KA ʻEUANELIO I KĀKAU ʻIA AI E IOANE 8
8
MOKUNA VIII.
3 No ka wahine moekolohe. 12 ʻO Iesū ka mālamalama o kēia ao. 30 Nui ka poʻe manaʻoʻiʻo. 33 Hoʻākāka mai ʻo Iesū, ʻo nā Iudaio he poʻe lākou na ka hewa, a he poʻe keiki lākou na ka diabolō.
1¶ Hele akula ʻo Iesū i ka mauna ʻo ʻOliveta.
2A i ka wanaʻao hoʻi hou ia i ka luakini, a hele akula nā kānaka a pau i ona lā; a noho ihola ia, a aʻo maila iā lākou.
3Alakaʻi akula nā kākau ʻōlelo a me nā Parisaio i ona lā i kekahi wahine i loaʻa e moekolohe ana; a hoʻokū akula iā ia i waena;
4ʻōlelo akula lākou iā ia, “E ke Kumu, ua loaʻa kēia wahine e moekolohe ana.
5“Kauoha maila ʻo Mose iā mākou i loko o ke Kānāwai, e hailuku ʻia i ka pōhaku ka mea i hana pēlā: he aha hoʻi kāu e ʻōlelo mai ai?”
6ʻŌlelo aku lākou i kēia i mea e hoʻāʻo ai iā ia, i loaʻa ai iā lākou ka mea e hoʻāhewa aku ai iā ia. Kūlou ihola ʻo Iesū i lalo, a kahakaha ihola kona lima ma ka lepo.
7A i ko lākou nīnau mau ʻana aku iā ia, ea aʻela ia i luna, ʻī maila iā lākou, “ʻO ka mea hala ʻole o ʻoukou, ʻo ia mua ke pehi aku iā ia i ka pōhaku.”
8Kūlou hou ihola ia i lalo, a kahakaha ihola ma ka lepo.
9A lohe aʻela lākou, a ua hoʻāhewa ʻia lākou e ko lākou lunaʻikehala, hele pākahi akula lākou i waho, mai nā lunakahiko ka hoʻomaka ʻana, a hiki i ka poʻe i lalo loa; a koe ihola ʻo Iesū wale nō, a me ka wahine e kū ana i waena.
10Ea aʻela ʻo Iesū i luna, ʻaʻohe mea ʻē aʻe āna i ʻike ai, ʻo ka wahine wale nō, nīnau maila iā ia, “E ka wahine, ʻauhea lā kēlā poʻe i hoʻopiʻi mai nei iā ʻoe? ʻAʻole anei kekahi i hoʻopaʻi mai iā ʻoe?”
11ʻĪ akula ia, “ʻAʻole kekahi, e ka Haku.” ʻĪ maila ʻo Iesū iā ia, “ʻAʻole nō hoʻi au e hoʻopaʻi aku iā ʻoe; e hele ʻoe, mai hana hewa hou aku.”
12¶ ʻŌlelo hou maila ʻo Iesū iā lākou, ʻī maila, “ʻO wau nō ka mālamalama o ke ao nei; ʻo ka mea e hahai mai iaʻu, ʻaʻole ia e hele i ka pouli; akā, e loaʻa iā ia ka mālamalama e ola ai.”
13No laila ʻōlelo akula nā Parisaio iā ia, “Ke hōʻike nei ʻoe nou iho, ʻaʻole pono kāu hōʻike ʻana.”
14ʻŌlelo maila ʻo Iesū ʻī maila iā lākou, “Inā e hōʻike aku au noʻu iho, he pono kaʻu hōʻike ʻana; no ka mea, ua ʻike au i koʻu wahi i hele mai ai, a me koʻu wahi e hele aku ai; akā, ʻaʻole ʻoukou i ʻike i koʻu wahi i hele mai ai, a me koʻu wahi e hele aku ai.
15“Ke hoʻāhewa nei ʻoukou ma muli o ke kino, ʻaʻole au e hoʻāhewa aku i kekahi.
16“Inā e hoʻāhewa aku au, he pono kaʻu hoʻohewa ʻana; no ka mea, ʻaʻole ʻo wau wale nō; akā, ʻo māua me ka Makua nāna au i hoʻouna mai.
17“Ua palapala ʻia i loko o ko ʻoukou kānāwai, he pono ka hōʻike ʻana a nā kānaka ʻelua.
18“ʻO wau nō kekahi e hōʻike noʻu iho, a ʻo ka Makua nāna au i hoʻouna mai, ʻo ia kekahi e hōʻike mai noʻu.”
19No ka mea nīnau akula lākou iā ia, “ʻAuhea kou Makua?” ʻĪ maila ʻo Iesū, “ʻAʻole ʻoukou i ʻike iaʻu, ʻaʻole hoʻi i koʻu Makua: inā ua ʻike ʻoukou iaʻu; inā ua ʻike nō hoʻi ʻoukou i koʻu Makua.”
20ʻŌlelo maila ʻo Iesū i kēia mau ʻōlelo ma kahi waihona kālā, i kāna aʻo ʻana i loko o ka luakini; ʻaʻole hoʻi kekahi i lālau aku iā ia; no ka mea, ʻaʻole i hiki mai kona manawa.
21¶ ʻŌlelo hou maila ʻo Iesū iā lākou, “E hele aku ana au, a e ʻimi ʻoukou iaʻu, a e make ʻoukou i loko o ko ʻoukou hewa; a i koʻu wahi e hele ai, ʻaʻole e hiki iā ʻoukou ke hele i laila.”
22A laila ʻōlelo ihola nā Iudaio, “E pepehi anei kēlā iā ia iho? No ka mea, ʻī maila ia, ‘I koʻu wahi e hele ai, ʻaʻole e hiki iā ʻoukou ke hele i laila.’”
23ʻĪ maila ʻo ia iā lākou, “No lalo nei ʻoukou; no luna mai nō wau; no ke ao nei ʻoukou; ʻaʻole wau no ke ao nei.
24“No ia mea i ʻōlelo aku ai au iā ʻoukou, e make auaneʻi ʻoukou i loko o ko ʻoukou hewa; no ka mea, a i ʻole ʻoukou e manaʻo mai, ʻo wau nō ia, e make nō ʻoukou i loko o ko ʻoukou hewa.”
25No laila nīnau akula lākou iā ia, “ʻO wai ʻoe?” ʻĪ maila ʻo Iesū iā lākou, “ʻO wau nō ka mea aʻu i haʻi aku ai iā ʻoukou i kinohi.
26“He nui kaʻu mau mea e ʻōlelo aku ai, a e hoʻohewa aku ai iā ʻoukou; akā, ʻo ka Mea nāna au i hoʻouna mai he ʻoiaʻiʻo ia; a ʻo nā mea aʻu i lohe ai iā ia, ʻo ia kaʻu e ʻōlelo aku nei i ko ke ao nei.”
27ʻAʻole lākou i ʻike, ʻo ka Makua, kāna i ʻōlelo mai ai iā lākou.
28No ia hoʻi, ʻōlelo maila ʻo Iesū iā lākou, “Aia kau aku ʻoukou i ke Keiki a ke Kanaka i luna, a laila e ʻike ʻoukou, ʻo wau nō ia, ʻaʻole hoʻi naʻu wale iho e hana aku i kekahi mea; akā, ʻo nā mea a koʻu Makua i aʻo mai ai iaʻu, ʻo ia nā mea aʻu e ʻōlelo aku nei.
29“A ʻo ka Mea nāna au i hoʻouna mai ʻo ia pū kekahi me aʻu; ʻaʻole i waiho wale mai ka Makua iaʻu ʻo wau wale nō; no ka mea, ke hana mau nei au i nā mea āna i ʻoluʻolu ai.”
30I kāna ʻōlelo ʻana ia mau mea, nui ka poʻe i manaʻoʻiʻo iā ia.
31¶ A laila ʻōlelo maila ʻo Iesū i ka poʻe Iudaio i manaʻoʻiʻo iā ia, “Inā e hoʻomau ʻoukou ma kaʻu ʻōlelo, a laila he poʻe haumāna ʻiʻo ʻoukou naʻu.
32“A e ʻike auaneʻi ʻoukou i ka ʻoiaʻiʻo, a ʻo ka ʻoiaʻiʻo e kuʻu aku iā ʻoukou.”
33ʻŌlelo akula lākou iā ia, “He mamo mākou na ʻAberahama, ʻaʻole loa mākou i noho pio na kekahi; pehea lā kāu i ʻōlelo mai ai, ‘E kuʻu ʻia ʻoukou’?”
34ʻŌlelo maila Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ʻo ka mea e hana ana i ka hewa, he kauā ia na ka hewa.
35“ʻAʻole e noho mau loa ke kauā ma ka hale; akā, ʻo ke keiki ʻo ia ke noho mau loa.
36“Inā na ke Keiki ʻoukou e hoʻonoho kaʻawale, a laila e kaʻawale ʻiʻo ʻoukou.
37“Ua ʻike nō au, he mamo ʻoukou na ʻAberahama; akā, ke ʻimi nei ʻoukou iaʻu e pepehi; no ka mea, ʻaʻole i komo ʻiʻo kaʻu ʻōlelo i loko o ʻoukou.
38“Ke ʻōlelo aku nei au i ka mea aʻu i ʻike ai i koʻu Makua; a ke hana nei hoʻi ʻoukou i ka mea a ʻoukou i ʻike ai i ko ʻoukou makua.”
39ʻŌlelo akula lākou, ʻī akula iā ia, “ʻO ʻAberahama ko mākou makua.” ʻĪ maila ʻo Iesū iā lākou, “Inā he poʻe keiki ʻoukou na ʻAberahama, inā ua hana ʻoukou i nā hana a ʻAberahama.
40“Akā, ʻānō ke ʻimi nei ʻoukou e pepehi iaʻu, i ke kanaka nāna i haʻi aku iā ʻoukou ka ʻoiaʻiʻo aʻu i lohe ai i ke Akua; ʻaʻole pēlā kā ʻAberahama i hana ai.
41“Ke hana nei ʻoukou i nā hana a ko ʻoukou makua.” A laila ʻōlelo akula lākou iā ia, “ʻAʻole mākou i hānau ʻia no ka moekolohe; hoʻokahi o mākou Makua, ʻo ke Akua.”
42ʻŌlelo maila ʻo Iesū iā lākou, “Inā ʻo ke Akua ko ʻoukou Makua, inā ua aloha mai ʻoukou iaʻu; no ka mea, no ke Akua mai au a hele mai nei; ʻaʻole naʻu wale iho i hele mai nei; akā, nāna nō au i hoʻouna mai.
43“No ke aha lā i ʻike ʻole ai ʻoukou i kaʻu ʻōlelo? No ka mea, no ka hiki ʻole iā ʻoukou ke hoʻolohe i kaʻu ʻōlelo.
44“Na ko ʻoukou makua ʻoukou na ka diabolō, a makemake nō ʻoukou e hana i nā kuko o ko ʻoukou makua. He pepehi kanaka ia mai ke kumu mai, ʻaʻole ia i kū ma ka ʻoiaʻiʻo; no ka mea, ʻaʻohe ʻoiaʻiʻo i loko ona. Inā ʻōlelo ʻo ia i ka wahaheʻe, ʻōlelo nō ʻo ia i kāna iho; no ka mea, he wahaheʻe ʻo ia, a ʻo ka makua hoʻi ia no ka wahaheʻe.
45“A no kaʻu ʻōlelo ʻana aku i ka ʻoiaʻiʻo, ʻo ia ka mea i manaʻoʻiʻo ʻole mai ai ʻoukou iaʻu.
46“ʻO wai lā ka mea o ʻoukou e hōʻike mai i koʻu hewa? Inā ʻōlelo aku au i ka ʻoiaʻiʻo, no ke aha lā ʻoukou i manaʻoʻiʻo ʻole mai ai iaʻu?
47“ʻO ka mea no ke Akua, ʻo ia ke hoʻolohe i kā ke Akua ʻōlelo; ʻaʻole nō ʻoukou e hoʻolohe mai; no ka mea, ʻaʻole no ke Akua ʻoukou.”
48¶ ʻŌlelo akula nā Iudaio, ʻī akula iā ia, “ʻAʻole anei he pono ke ʻōlelo mākou, ʻo kā Samaria ʻoe, he daimonio hoʻi kou?”
49ʻŌlelo maila ʻo Iesū, “ʻAʻole oʻu daimonio; akā, ke hoʻomaikaʻi nei au i koʻu Makua, a ke hōʻino mai nei ʻoukou iaʻu.
50“ʻAʻole au e ʻimi i koʻu hanohano iho; hoʻokahi nō Mea nāna e ʻimi a e hoʻopono mai.
51“ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, inā e mālama kekahi i kaʻu ʻōlelo, ʻaʻole loa ia e ʻike i ka make.”
52A laila ʻōlelo akula nā Iudaio iā ia, “ʻĀnō lā, ua ʻike mākou, he daimonio kou. Ua make ʻo ʻAberahama a me nā kāula; a ke ʻōlelo mai nei ʻoe, ‘Inā e mālama kekahi i kaʻu ʻōlelo, ʻaʻole loa ia e make.’
53“Ua ʻoi aku anei ʻoe ma mua o ʻAberahama, ʻo ko mākou kupuna, ka mea i make? A ua make hoʻi nā kāula; ʻo wai lā ʻoe i kou manaʻo iho?”
54ʻŌlelo maila ʻo Iesū, “Inā e hoʻomaikaʻi au iaʻu iho, he mea ʻole koʻu hoʻomaikaʻi ʻana; ʻo koʻu Makua ke hoʻomaikaʻi mai iaʻu, ʻo ka mea a ʻoukou e ʻōlelo nei, ‘ʻO ko ʻoukou Akua ia.’
55“ʻAʻole naʻe ʻoukou i ʻike iā ia, ʻo wau kai ʻike iā ia; inā e ʻōlelo aku au, ʻaʻole au i ʻike iā ia, inā ua like au me ʻoukou, he wahaheʻe; akā, ua ʻike au iā ia, ke mālama nō hoʻi au i kāna ʻōlelo.
56“ʻOliʻoli ihola ʻo ʻAberahama, e ʻike i koʻu manawa; a ʻike ihola nō ia, a hauʻoli ihola.”
57ʻŌlelo akula nā Iudaio iā ia, “ʻAʻole ou kanalima makahiki, a ua ʻike anei ʻoe iā ʻAberahama?”
58ʻĪ akula ʻo Iesū iā lākou, “ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, ma mua o ko ʻAberahama noho ʻana, ʻO WAU NŌ.”
59A laila lālau ihola lākou i nā pōhaku e pehi iā ia; hele malū akula ʻo Iesū i waho o ka luakini ma waena o lākou, pēlā ʻo ia i pakele ai.
Currently Selected:
KA ʻEUANELIO I KĀKAU ʻIA AI E IOANE 8: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
