KA ʻEUANELIO I KĀKAU ʻIA AI E LUKA 3
3
MOKUNA III.
1 ʻO ke aʻo ʻana o Ioane. 20 Paʻa ʻo Ioane iā Herode. 21 Bapetizo ʻia ʻo Iesū. 23 Kona kūʻauhau.
1¶ A i ka ʻumikumamālima o ka makahiki o ko Tiberio Kaisara aupuni; e aliʻi kiaʻāina ana ʻo Ponetio Pilato no Iudea, a e aliʻi ʻokana ana ʻo Herode no Galilaia, a e aliʻi ʻokana ana ʻo Pilipo kona kaikaina no ʻIturea a me nā ʻāina ʻo Terakoniti, a e aliʻi ʻokana ana ʻo Lusania no ʻAbilene,
2a e kahuna nui ana ʻo ʻAna a me Kaiapa, hiki maila ka ʻōlelo a ke Akua iā Ioane ke keiki a Zakaria, ma ka wao nahele.
3A kaʻahele aʻela ia i nā ʻāina a pau e kokoke mai ana ma Ioredane, e aʻo ana i ka bapetizo no ka mihi i mea e kala ʻia mai ai nā hewa;
4e like me ka mea i kākau ʻia ma ka buke ʻōlelo a ʻIsaia ke kāula e ʻī ana,
“«ʻO ka leo o ka mea e kala ana ma ka wao nahele,
‘E hoʻomākaukau ʻoukou i ke alanui no Iēhova,
E hana hoʻi i kona mau kuamoʻo i pololei.
5‘E hoʻopiha ʻia nā awāwa a pau,
A e hoʻohaʻahaʻa ʻia nā mauna a me nā puʻu a pau,
A e hoʻopololei ʻia nā ʻaoʻao kekeʻe,
A e hoʻomania ʻia hoʻi nā ala ʻāpuʻupuʻu;
6A e ʻike nā kānaka a pau i ka hoʻōla a ke Akua».’”
7¶ A laila ʻōlelo maila ʻo ia i nā ʻaha kanaka i hele aku i ona lā e bapetizo ʻia e ia, “E ka poʻe hanauna moʻo niho ʻawa, na wai ʻoukou i ao aku e holo i pakele ai i ka inaina e kau mai ana?
8“E hoʻohua hoʻi ʻoukou i nā hua e kū i ka mihi, mai hoʻomaka e ʻōhumu i loko o ʻoukou iho, ‘ʻO ʻAberahama ko kākou makua;’ no ka mea, ke ʻōlelo aku nei au iā ʻoukou, e hiki nō i ke Akua ke hoʻāla mai i mau keiki na ʻAberahama no kēia mau pōhaku mai.
9“ʻĀnō hoʻi, ke waiho ʻia nei ke koʻi ma ke kumu o nā lāʻau; no laila, ʻo kēlā lāʻau kēia lāʻau i hoʻohua ʻole mai i ka hua maikaʻi, ʻo ia ke kua ʻia i lalo a kiola ʻia aku i ke ahi.”
10Nīnau akula ia poʻe kānaka iā ia, ʻī akula lākou, “He aha lā kā mākou e hana ai?”
11Haʻi maila ʻo ia, ʻī maila iā lākou, “ʻO ka mea nona nā kapa komo ʻelua, e hāʻawi aku ʻo ia i kekahi no ka mea i nele; a pēlā nō e hana aku ai ka mea nāna ka ʻai.”
12A laila hele aʻela hoʻi nā luna ʻauhau e bapetizo ʻia, ʻī akula iā ia, “E ke kumu, he aha kā mākou e hana ai?”
13ʻĪ maila ʻo ia iā lākou, “Mai hōʻoi ʻoukou ma mua o ka mea i hoʻopono ʻia no ʻoukou.”
14A nīnau akula ka poʻe koa iā ia, ʻī akula, “He aha hoʻi kā mākou e hana ai?” ʻĪ maila ʻo ia iā lākou, “Mai kolohe iā haʻi, mai ʻālunu, a e ʻoluʻolu ʻoukou i ko ʻoukou uku.”
15¶ A i ke kānalua ʻana o nā kānaka, kūkākūkā ihola ka naʻau o lākou a pau, no Ioane, ʻo ka Mesia paha ia?
16ʻŌlelo maila ʻo Ioane iā lākou a pau, ʻī maila, “ʻO wau nō ke bapetizo nei iā ʻoukou me ka wai; akā, e hele mai ana Kekahi, he ʻoi aku kona mana i koʻu, ʻaʻole au e pono ke wehe aʻe i nā kaula o kona mau kāmaʻa; ʻo ia ke bapetizo iā ʻoukou me ka ʻUhane Hemolele a me ke ahi.
17“A ʻo kona peʻahi, aia nō i kona lima, a e hoʻomaʻemaʻe loa ʻo ia i kāna huapalaoa, a e hōʻiliʻili i kāna huapalaoa i loko o kona hale papaʻa, a e hoʻopau hoʻi ʻo ia i ka ʻōpala i ke ahi pio ʻole.”
18¶ He nui nō hoʻi nā mea ʻē aʻe āna i hōʻike mai ai i nā kānaka i kāna ʻōlelo hoʻoikaika.
19A ʻo Herode ke aliʻi kiaʻāina, ua aʻo ʻia e ia no Herodia ka wahine a Pilipo a kona hoahānau, a no nā mea hewa hoʻi a pau a Herode i hana ai,
20hoʻohui hou nō ʻo ia i kēia mea ia mau mea a pau, a hana paʻa ʻo ia iā Ioane i loko o ka hale paʻahao.
21¶ Eia hoʻi kekahi, i ka bapetizo ʻia ʻana o nā kānaka a pau, ʻo Iesū nō kekahi i bapetizo ʻia; a i kāna pule ʻana aʻe, wehe ʻia maila ka lani;
22a iho maila ma luna ona ka ʻUhane Hemolele me ko ke kino ʻano o ka manu nūnū, a paʻē mai ka leo mai ka lani mai, e ʻī mai ana, “ʻO ʻoe nō kaʻu Keiki punahele, he ʻoluʻolu loa koʻu iā ʻoe.”
23¶ A ʻo Iesū, noho nō ia he kanakolu paha makahiki, he keiki, (i ka manaʻo ʻia) na Iosepa, ʻo ia na Heli,
24ʻo ia na Matata, ʻo ia na Levi, ʻo ia na Meleki, ʻo ia na Iana, ʻo ia na Iosepa,
25ʻo ia na Matatia, ʻo ia na ʻAmosa, ʻo ia na Nauma, ʻo ia na ʻEseli, ʻo ia na Nagai,
26ʻo ia na Maʻata, ʻo ia na Matatia, ʻo ia na Semei, ʻo ia na Iosepa, ʻo ia na Iuda,
27ʻo ia na Ioana, ʻo ia na Resa, ʻo ia na Zorobabela, ʻo ia na Salatiʻela, ʻo ia na Neri,
28ʻo ia na Meleki, ʻo ia na ʻAdi, ʻo ia na Kosama, ʻo ia na ʻElemodama, ʻo ia na ʻEra,
29ʻo ia na Iose, ʻo ia na ʻEliezera, ʻo ia na Iorima, ʻo ia na Matata, ʻo ia na Levi,
30ʻo ia na Simeona, ʻo ia na Iuda, ʻo ia na Iosepa, ʻo ia na Ionana, ʻo ia na ʻEliakima,
31ʻo ia na Melea, ʻo ia na Menana, ʻo ia na Matata, ʻo ia na Natana, ʻo ia na Dāvida,
32ʻo ia na Iese, ʻo ia na ʻObeda, ʻo ia na Boaza, ʻo ia na Salemona, ʻo ia na Naʻasona,
33ʻo ia na ʻAminadaba, ʻo ia na ʻArama, ʻo ia na ʻEseroma, ʻo ia na Paresa, ʻo ia na Iuda,
34ʻo ia na Iakoba, ʻo ia na ʻIsaʻaka, ʻo ia na ʻAberahama, ʻo ia na Tara, ʻo ia na Nahora,
35ʻo ia na Saruka, ʻo ia na Ragau, ʻo ia na Paleka, ʻo ia na ʻEbera, ʻo ia na Sala,
36ʻo ia na Kainana, ʻo ia na ʻArepakada, ʻo ia na Sema, ʻo ia na Noa, ʻo ia na Lameka,
37ʻo ia na Metusala, ʻo ia na ʻEnoka, ʻo ia na Iareda, ʻo ia na Maleleʻela, ʻo ia na Kainana,
38ʻo ia na ʻEnosa, ʻo ia na Seta, ʻo ia na ʻAdamu, ʻo ia na ke Akua.
Currently Selected:
KA ʻEUANELIO I KĀKAU ʻIA AI E LUKA 3: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
