KA ʻEUANELIO I KĀKAU ʻIA AI E MAREKO 15
15
MOKUNA XV.
1 Ua hoʻopiʻi ʻia ʻo Iesū i mua o Pilato. 17 Ua hoʻolei ʻia i ka lei kākalaioa. 27 Ua kaulia ma ke keʻa ma waena o nā ʻaihue. 43 Ua kanu ʻia.
1¶ A kakahiaka aʻela, kūkākūkā koke ihola nā kāhuna nui, a me nā lunakahiko, a me nā kākau ʻōlelo, a me ka ʻaha luna kānāwai a pau, a nakinaki akula iā Iesū, a kaʻi aʻela, a hāʻawi akula iā Pilato.
2Nīnau maila ʻo Pilato iā ia, “ʻO ʻoe nō anei ke Aliʻi o ka poʻe Iudaio?” Haʻi akula ia, ʻī akula iā ia, “ʻO ia nō kāu e ʻōlelo maila.”
3Hoʻopiʻi akula nā kāhuna nui nona, ma nā mea he nui loa; ʻaʻole ia i ʻōlelo mai.
4Nīnau hou maila ʻo Pilato iā ia, ʻī maila, “ʻAʻole anei ʻoe e ʻōlelo iki mai? E noʻonoʻo ʻoe i ka nui loa o nā mea a lākou e hoʻopiʻi mai nei nou!”
5ʻAʻole i ʻōlelo iki mai ʻo Iesū; no laila kāhāhā akula ko Pilato naʻau.
6¶ Ia ʻahaʻaina, kuʻu maila ia i kekahi paʻahao no lākou, i ka mea a lākou i noi aku ai.
7Ma laila nō kekahi i kapa ʻia ʻo Baraba, ua nakinaki pū ʻia me ka poʻe i kipikipi, ua pepehi kanaka lākou me ia kipikipi ʻana.
8Hoʻōho nui aʻela nā kānaka, me ka nonoi aku iā ia e hana mai iā lākou e like me kāna ma mua.
9ʻŌlelo maila ʻo Pilato iā lākou, ʻī maila, “Ke makemake nei anei ʻoukou e kuʻu aku au i ke Aliʻi o ka poʻe Iudaio, no ʻoukou?”
10No ka mea, ua ʻike ʻo ia, no ka huāhuā i hoʻōpeʻa aku ai nā kāhuna nui iā ia.
11Hoʻokonokono aʻela nā kāhuna nui i nā kānaka, i kuʻu mai ʻo ia iā Baraba no lākou.
12Nīnau hou maila ʻo Pilato, ʻī maila iā lākou, “He aha ko ʻoukou makemake e hana aku ai au i ka mea a ʻoukou i kapa aku ai, ʻo ke Aliʻi o ka poʻe Iudaio?”
13Hea hou akula lākou, “E kau ʻia ʻo ia ma ke keʻa!”
14A laila, nīnau maila ʻo Pilato iā lākou, “He aha ka hewa āna i hana ai?” ʻUāʻuā nui akula lākou, “E kau ʻia ʻo ia ma ke keʻa!”
15Makemake nō ʻo Pilato, e hōʻoluʻolu i kānaka; no laila ia i kuʻu mai ai iā Baraba na lākou; a laila, hahau aʻela kēlā iā Iesū, a hāʻawi iho iā ia e kaulia ai ma ke keʻa.
16¶ Alakaʻi aʻela ka poʻe koa iā ia i ke keʻena hoʻokolokolo; a hōʻuluʻulu maila lākou i ka poʻe koa a pau.
17Hōʻaʻahu ihola lākou iā ia i ke kapa ʻula, a hili ihola i lei aliʻi kākalaioa, a hoʻolei akula iā ia.
18Aloha hoʻomāʻewaʻewa akula lākou iā ia, “Aloha ʻoe, e ke Aliʻi o ka poʻe Iudaio!”
19Hahau akula lākou i kona poʻo i ka lāʻau, kuhakuha akula iā ia, a kukuli ihola e hoʻomana iā ia.
20A pau ko lākou hoʻomāʻewaʻewa ʻana iā ia, a laila, wehe aʻela lākou i ke kapa ʻula, a hoʻokomo ihola i kona kapa, alakaʻi akula lākou iā ia e kau iā ia ma ke keʻa.
21¶ A koi akula lākou i kekahi Simona no Kurenaio, e lawe i kona keʻa, e hele ana ia, mai ke kuaʻāina mai, ʻo ka makua kāne hoʻi ia o ʻAlekanedero, a me Rupo.
22¶ A lawe aʻela lākou iā ia i Golegota, ʻo ke ʻano kēia i ka hoʻākāka ʻana, he Wahi Iwi Poʻo.
23Hāʻawi akula lākou iā ia i ka waina ua wili pū ʻia me ka mura, ʻaʻole naʻe ia i inu.
24A kau akula lākou iā ia ma ke keʻa, a laila, puʻunaue ihola lākou i kona kapa, me ka puʻu ʻana ma ka mea a kēlā kanaka, kēia kanaka e lawe ai.
25I ke kolu o ka hora, ko lākou kau ʻana iā ia ma ke keʻa.
26Eia ka palapala hoʻākāka i kona hewa i kau ʻia ma luna, “ʻO KE ALIʻI O KA POʻE IUDAIO.”
27Kau pū akula lākou me ia ma ke keʻa, i nā pōā ʻelua; ʻo kekahi ma ka ʻaoʻao ʻākau, a ʻo kekahi, ma ka ʻaoʻao hema.
28A kō ihola kā ka Palapala Hemolele i ʻōlelo mai ai. “Ua helu pū ʻia ʻo ia me ka poʻe lawehala.”
29A ʻo ka poʻe e māʻalo ana ma laila aʻe, hōʻino wale akula lākou iā ia, me ka hoʻokunokunou i ko lākou poʻo, ʻī akula, “Ē, ʻo ʻoe ka mea wāwahi i ka luakini, a i nā lā ʻekolu, hana hou nō,
30e hoʻōla ʻoe iā ʻoe iho, a e iho mai ʻoe mai luna mai o ke keʻa!”
31Pēlā pū akula nō hoʻi ka poʻe kāhuna nui a me ka poʻe kākau ʻōlelo, i hoʻomāʻewaʻewa aku ai, ʻī aʻe kekahi, “Hoʻōla nō ʻo ia iā haʻi, ʻaʻole naʻe e hiki iā ia ke hoʻōla iā ia iho.
32“E iho mai ka Mesia, ke Aliʻi o kā ʻIseraʻela, mai luna mai o ke keʻa, i ʻike kākou a e manaʻoʻiʻo aku!” A ʻo nā mea i kaulia pū me ia ma ke keʻa, hoʻomāʻewaʻewa pū aʻela lāua iā ia.
33¶ Mai ka hora ʻaono, a hiki i ka hora ʻaiwa, pouli nō ka honua a pau.
34A i ka iwa o ka hora, kāhea aʻela Iesū me ka leo nui, ʻī aʻela, “«ʻEli, ʻEli, lama sabaketani»?” ʻO ke ʻano kēia, “«E kuʻu Akua, e kuʻu Akua, no ke aha lā ʻoe i haʻalele mai ai iaʻu»?”
35A lohe aʻela kekahi poʻe o lākou e kū ana ma laila, ʻī ihola, “Aiʻa, ke kāhea aku nei ʻo ia iā ʻElia.”
36Holo akula kekahi, a hoʻomaʻū i ka huʻahuʻakai i ka vīnega, kau ihola ma ka ʻohe, a hāʻawi aku iā ia e inu, ʻī aʻela, “Alia; i ʻike kākou inā paha e hele mai ʻo ʻElia e wehe iā ia.”
37Kāhea aʻela Iesū me ka leo nui, a kāʻili akula ke aho.
38Nahae aʻela ka pākū o ka luakini i ʻelua, mai luna a i lalo.
39A ʻo ka luna haneri e kū ana i mua o kona alo, i kona ʻike ʻana iā ia e kāhea ana pēlā, a me ke kāʻili ʻana o kona aho, ʻī aʻela ia, “ʻOiaʻiʻo nō, ʻo kēia kanaka ke Keiki a ke Akua!”
40He poʻe wāhine nō hoʻi kekahi e nānā mai ana, ma kahi mamao aku, ʻO Maria no Magedala, a me Maria ka makuahine o Iakobo ka liʻiliʻi, a me Iose, a me Salome.
41Ua hahai nō lākou ma muli ona, i kona wā ma Galilaia, a lawelawe akula nāna; a me nā wāhine ʻē he nui loa, a hele pū nō lākou me ia i Ierusalema.
42¶ A hiki aʻela i ke ahiahi; no ka mea, ʻo ka lā hoʻomalolo ia, ʻo ka lā ma mua aku o ka lā Sābati,
43hele maila ʻo Iosepa no ʻArimataia, he luna kānāwai koʻikoʻi ia, e kakali ana i ke aupuni o ke Akua, hele akula ia i o Pilato lā, me ka hopohopo ʻole, a noi akula i ke kino o Iesū.
44Kāhāhā ihola ka naʻau o Pilato, no kona make koke ʻana; a kāhea aʻela ia i ka luna haneri, nīnau aʻela iā ia i kona make ʻē ʻana.
45A ʻike pono ia, na ka luna haneri mai, a laila, hāʻawi maila ia i ke kino na Iosepa.
46A kūʻai ihola ia i kapa olonā, a lawe aʻela i ke kino, a wahī iho i loko o ua kapa lā, a waiho aʻela ia ma loko o ka hale kupapaʻu i kālai ʻia i loko o ka pōhaku, a ʻolokaʻa ihola i pōhaku nui ma ka puka o ua hale kupapaʻu lā.
47A nānā aʻela ʻo Maria no Magedala a me Maria ka makuahine o Iose, i kahi i waiho ʻia ai.
Currently Selected:
KA ʻEUANELIO I KĀKAU ʻIA AI E MAREKO 15: KBH
Highlight
Share
Copy
Want to have your highlights saved across all your devices? Sign up or sign in
Ka Baibala Hemolele © Partners Development Foundation, 2018.
