Gyenesise 26

Yisake tu kɔtena Gyeraa

1Ɛhɔen piri bie wale aseɛ ne aso; asora ɛhɔen piri bɔ olili moa wale Abraham aberɛ so ne. Na Yisake hɔle Filisti hene Abimɛlɛke berɛ wɔ Gyeraa. 2Yeɛ AWURADE yele ye nwo ali hyirele Yisake sele ye kyɛ, “Nnɛkɔ Misraim, na mmom tena aseɛ bɔ mebaahyire wɔ ye aso. 3Tena aseɛ ye aso kyɛ ɛwɔfoɛ, na ngogyina wɔ si na mayira wɔ; ofikyɛ ngɔfa sɔ aseɛ ye mɔ amukoraa ngɔma wɔ ne wɔ bosofoɛ na mamaa bɔhyɛ bɔ nhyɛle ɛse Abraham ne awa nu. 4Ngɔmaa wɔ bosofoɛ kɔsone kyɛ nyameɛso nzramaa, na ngɔfa aseɛ ye amukoraa ngɔma bɛ, na ɔnate bɛ so yeɛ amaen maen mukoraa bekonya saleɛ ɔ, 5ofikyɛ Abraham tiele me dwirɛ, olili me dwirɛ so, me mmeraa dwirɛ so, m’ahyɛdeɛ ne me mmeraa so.”

6Yiti Yisake tenane Gyeraa. 7#Gye 12.13; 20.2 Na sɛ né berɛ mmienzua bisa ye dwirɛ fa ɔye nwo a, ose bɛ kyɛ, “Nniɛma brasua ɔ”. Né osuro kyɛ ɔkɔha kyɛ, “Me ye ɔ,” ofikyɛ né ɔdwene kyɛ ɔnate Rebɛka anwonyemene somaa ne ati, annea a, berɛ ama kohũ ye. 8Na Yisake tenane berɛ hyɛle ne, ɛlɛho bie, Filisti hene Abimɛlɛke neane mboma nu, na onwuni kyɛ Yisake ne ɔye Rebɛka bedi aweweɛ ɔ. 9Yiti Abimɛlɛke frɛle Yisake, na osele ye kyɛ, “Nea, ɛye ɔ, nzu ati yeɛ ɛnwa ‘nniɛma brasua’ ahɔ ɔ?” Na Yisake buale ye kyɛ, “Ofikyɛ né medwene kyɛ annea a ɔnate ye ti bekohu me.” 10Abimɛlɛke sele ye kyɛ, “Nzikyɛ dwirɛ yeɛ afa ali yɛ ye? Ahaa mmienzua ye anu bie kɔhora ne ɛye bɛkɔla na wama musue awa yɛ so.” 11Yiti Abimɛlɛke kanzole mmenia ne amu kyɛ, “Ebiala bɔ ɔkɔha biaa he anaa ɔye ne, ehunɛ yeɛ ngɔmaa bekohu ye ɔ.

12Na Yisake yɔle eboo wɔ aseɛ ne aso, na sɔ afoɛ ne ala onyane aleɛ mmɔhoɛ ɛyaa. AWURADE yirale ye 13maa onyane ye nwo, na ɔhɔle so nyane ye nwo maa oodwuli kyɛ onyane ye nwo tam. 14Onyane mmoaen ne nandwie mɔ ɔne ngoaa pee. Yiti Filistifoɛ nemɔ nye borole ye. 15(Mmerɛ bɔ né ɔse Abraham te ase ne, Abraham ngoaa mɔ tutuli abura mɔ. Nakoso Filistifoɛ ne fale nnɛterɛ betuatuale sɔ abura nemɔ amu.) 16Yiti Abimɛlɛke sele Yisake kyɛ, “Fi yɛ wa kɔ, ofikyɛ wɔ nwo suronyi atɔ yɛ so.”

17Yiti Yisake tu fili berɛ oosili ye ɛtena sua wɔ Gyeraa bɔnza ne anu, na ɔtenane berɛ. 18Na Yisake sá tuli abura bɔ betutuli ye Abraham aberɛ so ne bieku, ofikyɛ Abraham ye wue asi ne Filistifoɛ tuatuale bɛ. Osa fale dumaa bɔ ɔse fa totole bɛ ne tole bɛ. 19Nakoso Yisake ngoaa nemɔ tuli bɔnza ne anu abura na benwuni asue ti bɔ opu ba wɔ berɛ nen, 20Gyeraa mmoaenneafoɛ ne Yisake mmoaenneafoɛ nyane dwudwolɛ. Gyeraa mmoaenneafoɛ ne hane kyɛ, “Nzue ye te yɛ deɛ”. Yiti Yisake frɛle sɔ abura ne Eseke,#26.20: ESEKE: Ye bo kyire apereapereɛ. ofikyɛ bɛ ne ye perele. 21Yisake ngoaa nemɔ tuli abura foforɛ, na besa bɛ ne bɛ bedwudwole ye nwo, yiti ɔfrɛle ye Sitina.#26.21: SITINA: Ye bo kyire Ɛpɔen. 22Na ofili berɛ hɔle ootuli abura foforɛ, na ɛhene de edwudwolɛ amma ye nwo. Yiti ɔfrɛle ye Rehobote,#26.22: REHOBOTE: Ye bo kyire nekaa bɔ ɔtrɛ ɔ. na ɔhane kyɛ, “Afei de AWURADE ama yɛ atenaleɛ, yiti yɛ boso kɔtrɛ aseɛ ye aso.”

23Na Yisake fili berɛ ne, ɔhɔle Beɛ Hyeba. 24Na AWURADE yele ye nwo ali hyirele Yisake sɔ kɔngɔen ne ala, na osele ye kyɛ, “Me ole wɔ baba Abraham ye Nyameɛ. Nnɛsuro, ofikyɛ ngyi wɔ si. Ɔnate m’akoaa Abraham ti ngoyira wɔ na mamaa wɔ bosofoɛ asone.” 25Yiti Yisake sili afɔleɛ bokyea wɔ berɛ na ɔsɔnene AWURADE. Osili ɛtena sua wɔ berɛ, na ye ngoaa tuli abura wɔ berɛ.

Yisake ne Abimɛlɛke yɛ apam

26 # Gye 21.22 Na Abimɛlɛke ne ye foɛtulɛniɛ Ahusate ne ye safohene Fikole, befili Gyeraa bɛhɔle Yisake berɛ. 27Na Yisake bisale bɛ kyɛ, “Nzu ati yeɛ ɛmɔawa me wa ye. Ɛmɔpɔ me yeɛ ɛmɔafoa me bafi ɛmɔ maen nu ɔ?” 28Na bebuale ye kyɛ, “Yanwu ye pefee kyɛ AWURADE gyi wɔ si. Yiti yadwene ye nwo kyɛ yɛne wɔ baata ndaen na yɛne wɔ ayɛ apam, 29kyɛ ɛngɔyɔ yɛ tɛɛ biala, kyɛbɔ yanyɔ wɔ tɛɛ biala na mmom yɛyɔle wɔ paa ngome na yɛguale wɔ ate asomdwee nu ne. Kekesaala ye, wɔ ole bɔ Nyameɛ ayira ye ne.” 30Yiti Yisake tole poen mane bɛ na bedidili bɛnone. 31Aleɛ hyene ngyerɛmɔ ne, bedwɔsole ndɛ bɛtetale ndaen bɛfa bɛkyekyele bɛ nwo. Yisake guale bɛ ate, na bele asomdwee befili berɛ bɛhɔle. 32Sɔ kyẽa ne ala, Yisake ngoaa mɔ wale bɛɛbɔle ye amaneɛ fa abura bɔ betuli ne nwo kyɛ, “Yaato nzue.” 33#Gye 21.31 Na ɔfrɛle ye Hyiba. Yiti kuro ne dumaa li Beɛ Hyeba bapem ɛnɛ.

Yisɔ aye amanvrafoɛ mɔ

34Yisɔ lili afoɛ aburanna ne, ogyale Hitiniɛ Beeri ɔwa brasua Yudite ɔne Hitiniɛ Elon ɔwa brasua Basemate, 35na sɔ mmrasua nyɔ ne mane Yisake ne Rebɛka wora bɔle paa.

Currently Selected:

Gyenesise 26: EBP

Highlight

Copy