Gyenesise 35

Nyameɛ yira Yakob wɔ Betel

1 # Gye 28.11-17 Nyameɛ sele Yakob kyɛ, “Dwɔso kɔ Betel kɔtena dɔ; na si afɔleɛ bokyea ma Nyameɛ bɔ ɔyele ye nwo ali hyirele wɔ wɔ mmerɛ bɔ ɔnate eliɛma Yisɔ ti ɛnwatili ne.” 2Yiti Yakob sele ye awuro ama ne bɛ bɔ bɛboka ye so amu kyɛ, “Ɛ́mɔgyi Amaenmaensofoɛ nyameɛ mɔ bɔ bɛwɔ ɛmɔ nwo ne begua, ɛ́mɔpete ɛmɔ nwo, na ɛ́mɔsesã ɛmɔ ndaadeɛ. 3Ɛ́mɔma yɛdwɔso yɛhɔ Betel, maa ngonzi afɔleɛ bokyea berɛ ma Nyameɛ bɔ otiele me wɔ mmerɛ bɔ me nwo hyerele me ne, na wagyina me si nekaa biala bɔ mahɔ ne.” 4Yiti bɛsesale Amaenmaensofoɛ nyameɛ mukoraa bɔ ɔwɔ bɛ nwo ne, ɔne b’asomade bɔ owura bɛ ne bɛmane Yakob; na Yakob fu wurale eluii bɔ né opingye Sɛkem ne abo.

5Na besili nu bɔ bɛ́kɔ ne, Nyameɛ mane esuronyi kandinga tɔle nguro bɔ né bapɛ bɛ nwo bayia ne aso, yiti bangora bamvoa Yakob mma mmienzua nemɔ. 6Yakob ne mmenia bɔ bɛboka ye so ne amukoraa beedwuli Luse (bɔ besa bɛfrɛ ye Betel) bɔ ɔwɔ Kanaan aseɛ so ne. 7Osili afɔleɛ bokyea wɔ berɛ, na ɔfrɛle berɛ Ɛl Betel#35.7: ƐL BETEL: Ye bo ole Betel Nyameɛ. ofikyɛ mmerɛ bɔ né ɔnwati oliɛma ne nen, berɛ yeɛ Nyameɛ yele ye nwo ali hyirele ye ɔ. 8Debora bɔ né ɔte Rebɛka afaneɛ ne wuli, na besiele ye wɔ eluii bie abo wɔ Betel ngwaen; yiti bɛfrɛle berɛ Alɔnbakute.#35.8: ALƆNBAKUTE: Ye bo ole: Adwepɛlɛ eluii.

9Yakob fili Padan Aram wale ne, Nyameɛ yele ye nwo ali hyirele ye bieku, na oyirale ye. 10#Gye 32.28 Na Nyameɛ sele ye kyɛ, “Bɛfrɛ wɔ Yakob; nakoso bɛngɔfrɛ wɔ Yakob ko. Bɛkɔfrɛ wɔ Yisrael.” Yiti bɛfrɛle ye Yisrael. 11#Gye 17.4-8 Na Nyameɛ sele ye kyɛ, “Me ole Ɛdangama Nyameɛ, wo mmaa na wɔ boso ɔ́trɛ. Maen ne maen pee kofi wɔ nu kɔwa, na ɛhene mɔ kofi wɔ nu kɔwa. 12Na aseɛ bɔ mva mane Abraham ne Yisake ne, ngɔfa ngɔma wɔ ne kyẽa bie wɔ boso ama.” 13Afei Nyameɛ fili nekaa bɔ ɔne ye bedwudwole ne berɛ ɔhɔle anwuro. 14#Gye 28.18-19 Na Yakob fale ngayeɛ nyɔboɛ penane nekaa bɔ ɔne Nyameɛ bedwudwole ne, ohwiele anonneɛ afɔleɛ guale so na ohwiele ngoo koso guale so. 15Na Yakob frɛle nekaa bɔ Nyameɛ ne ye bedwudwole ne Betel.

Rahɛl wue

16Afei befili Betel. Na ɔka kãa maa bedwu Efrate ne, aworɛ hane Rahɛl, na ye aworɛ ne anu yɛle se. 17Rahɛl aworɛ ne anu yɛle se ne, braa bɔ ode ye aworɛ ne sele ye kyɛ, “Nnɛsuro, na ɛhe koso ɛkɔwo bienzua.” 18Na mmerɛ bɔ ɔ́fa ne, (ofikyɛ owuli) ɔtole ye dumaa Benoni,#35.18: BENONI: Ye bo ole: M’aworabɔlɛ nu ba. nakoso ɔse Yakob de ɔfrɛle ye Benyamin.#35.18: BENYAMIN: Ye bo kyire Asaa famaa nu ba, anaakyɛ Ngwaen dɔ ba. 19Yiti Rahɛl wuli, na besiele ye wɔ Efrate (bɔ besa bɛfrɛ ye Betlehem) atee ne aso dɔ. 20Na Yakob fale ngayeɛ nyɔboɛ penane ye asieleɛ ne aso; ɛhe te Rahɛl asieleɛ so ngayeɛ nyɔboɛ bɔ ɔwɔ berɛ ɔbaadwu ɛnɛ ye. 21Yisrael toale ye ateetulɛ ne aso, na oosili ye ɛtena sua wɔ Edere abandenden ne asi dɔ.

Yakob mma mmienzua nemɔ

22 # Gye 49.4 Mmerɛ bɔ né Yisrael te sɔ aseɛ ne aso nen, Ruben ne ye baba sómaa Bilha bɛlale, na Yisrael tele sɔ dwirɛ ne.

Né Yakob mma mmienzua nemɔ bɛte buru ne nyɔ: 23Lea mma mmienzua mɔ ɛhe: Ruben (Yakob bamuɛbaa), Simeon, Lewi, Yuda, Yisaka ne Sebulɔn. 24Rahɛl mma mmienzua mɔ ɛhe: Yosef ne Benyamin. 25Bilha bɔ ɔte Rahɛl afaneɛ ne, ye mma mmienzua mɔ ɛhe: Dan ne Nafetali. 26Silpa bɔ ɔte Lea afaneɛ ne, ye mma mmienzua mɔ ɛhe: Gade ne Asɛ. Ɛhemɔ ole Yakob mma mmienzua bɔ bɛwole bɛ wɔ Padan Aram ne.

Yisake wue

27 # Gye 13.18 Yakob oodwuli ɔse Yisake berɛ wɔ Mamre, bɔ opingye Kiriate Aba (bɔ besa bɛfrɛ ye Hebron ne,) nekaa bɔ Abraham ne Yisake bɛɛtenane bɛyɛle ɛwɔfoɛ ne. 28Yisake lili afoɛ ɛyaa ko ne aburawɔtwɛ, 29ɔhale nu, owuli, na ɔpole ye mbanyi mɔ, mmerɛ bɔ né wanyi wayɛ aworowaa paa ɔ. Na ye mma mmienzua Yisɔ ne Yakob besiele ye.

Currently Selected:

Gyenesise 35: EBP

Highlight

Copy