Gyenesise 50

1Yosef yakyili ye nwo tole ye baba so, ɔfele ye noa na osuni ye. 2Na Yosef hyɛle ye ngoaa safoɛ nemɔ kyɛ bewura ɔse fuin ne ayire amaa wamborɔ. Yiti bewurale Yisrael fuin ne ayire. 3Bɛfale eleburanna yeɛ bɛyɔle ɔ, ofikyɛ né eleburanna yeɛ bɛfa bewura efuin ayire ɔ. Na Misraimfoɛ suni ye eleburasoo.

4Na ngyẽa bɔ bɛfa besuni ye ne pɛle nu ne, Yosef sele Faro mbanyi kyɛ, “Sɛ ɛmɔanya baboka me sɔa de a, ye de mesrɛ ɛmɔ, ɛ́mɔfa bɛto Faro nyunu bɛma me kyɛ, 5#Gye 47.29-31 me baba maa ndale ndaen na ɔhane kyɛ, ‘Mebaawu, na kosie me wɔ Kanaan aseɛ so, wɔ asieleɛ bɔ mbɛ ndole berɛ kyɛ besie me wɔ nu ne anu.’ Yiti mesrɛ wɔ, maa ngonzie me baba na nza mmra.” 6Na Faro buale kyɛ, “Kɔ na kosie ɛse, kyɛbɔ ɔmaa ɛtale ndaen ne.” 7Yiti Yosef hɔle kyɛ ɔkwaasie ɔse; na Faro mbanyi amukoraa: mbanyi bɔ bɛwɔ Faro awuro, yeɛ Misraim maen ne anu mbanyi amukoraa, 8Yosef awuro ama mukoraa, oliɛma mmienzua mɔ, yeɛ afei ɔse awuro ama mɔ bɛbokale ye so bɛ ne ye hɔle. Bɛ mma mɔ ne bɛ mmoaen mɔ ne bɛ nandwie mɔ ngome yeɛ bɛhale Gosen aseɛ so ɔ. 9Teaseɛnam mɔ ne pɔngɔhanɛfoɛ bokale ye so bɛ ne ye hɔle; né ɛlɔen ne te piri paa. 10Beedwuli nekaa bɔ bɛboro aburoo wɔ Atade bɔ ɔwɔ asue Yɔɔdan asi dɔ ne, bɛbɔle awuye serɛserɛ bɔ ɔyɛ aworabɔ paa ɔ; na Yosef yɔle ɔse sɛen ɛlɛsoo. 11Na Kanaanfoɛ bɔ bɛte aseɛ ne asofoɛ nwuni ɛsɛen bɔ né bɛyɔ wɔ nekaa bɔ bɛboro aburoo wɔ Atade nen, bɛhane kyɛ, “Misraimfoɛ ɛsɛen piri paa ɛhe!” Yiti bɛfrɛle berɛ Abel Misraim.#50.11: ABEL MISRAIM: Ye bo kyire: Misraimfoɛ ɛsɛenyɛlɛ. Ɔwɔ Yɔɔdan asi dɔ. 12Yiti Yakob mma mɔ yɔle kyɛbɔ ɔhyɛle bɛ ne ala mane ye; 13#Aso 7.16 ofikyɛ ye mma nemɔ soale ye hɔle Kanaan aseɛ so, na besiele ye wɔ Makepɛla aseɛ so nyɔboɛ bɔ wasi sua nu wɔ Mamre eyia afiteleɛ. Abraham tɔle sɔ nyɔboɛ ne ɔne aseɛ ne fili Hitiniɛ Efron berɛ kyɛ ɔfa yɛ ye asieleɛ. 14Na Yosef siele ye baba yiele nen, ɔne oliɛma mmienzua nemɔ, yeɛ bɛ bɔ beesomane ye maa osiele ye baba ne amukoraa, besa bɛwale Misraim.

Yosef sá hyɛ oliɛma mɔ bɔ

15Na Yosef aliɛma nemɔ nwuni kyɛ bɛ baba awu ne, besusuli ye nwo kyɛ, “Anyɔ a, né Yosef atu ye nye wasie yɛ so na watua yɛ bɔne bɔ yayɔ ye ne amu so kerɛ.” 16Yiti bɛmaa bɛɛhã behyirele Yosef kyɛ, “Wɔ baba hane sɔ dwirɛ ye kitii koraka yeɛ owu ɔ kyɛ, 17‘Ɛ́mɔhã behyire Yosef kyɛ, mesrɛ wɔ, fa eliɛma mɔ amumuyɛɛ ne bɛ bɔne kyɛ bɛ, ofikyɛ bɛyɔle wɔ tɛɛ paa.’ Yiti afei, yɛsrɛ wɔ, fa wɔ baba ye Nyameɛ ngoaa mɔ b’amumuyɛɛ kyɛ bɛ.” Na bɛhane ɛhe behyirele Yosef ne, osuni. 18Oliɛma nemɔ koso wale beebutubutuli ye nyunu na besele kyɛ, “Yɛte wɔ ngoaa.” 19Nakoso Yosef sele bɛ kyɛ, “Nnɛma ɛmɔsuro. Aso ngɔhora ngole Nyameɛ adwuma ngɔyɔ anaa? 20Ɛmɔ de, ɛmɔambena me ne paa, nakoso Nyameɛ nhyehyɛleɛ maa ɔkakyili paa; kyɛ ɔnate so okole mmeni pee ngoa, kyɛbɔ afei wala ali ye. 21Yiti nnɛma ɛmɔsuro, na ngɔnea ɛmɔ ne ɛmɔ mma mɔ.” Yiti ɔkyekyele bɛ wora mane bɛ kunu tɔle bɛ fɔnwoo.

Yosef wue

22Yosef ne ɔse awuro ama bɛtenane Misraim, na Yosef lili afoɛ ɛyaa ko ne buru. 23Yosef nwuni Efraim ye nana nganzowa mɔ po, na bɛwole Manase awa Makyiri mma bɛtole Yosef gya so. 24Yeɛ Yosef sele oliɛma nemɔ kyɛ, “Mebaawu, nakoso Nyameɛ kɔɔnea ɛmɔ. Na aseɛ bɔ ɔtale ye nwo ndaen hyirele Abraham ne Yisake ne Yakob ne, ɔkɔye ɛmɔ kofi aseɛ he aso ɔkɔfa ɛmɔ kɔhɔ so.” 25#Ɛks 13.19; Yos 24.32; Heb 11.22 Yosef mane Yisrael mma nemɔ tale ndaen hyirele ye, na ɔhane kyɛ, “Nyameɛ kɔɔye ɛmɔ kofi wa. Na sɛ ɔba ye sɔ a, ɛ́mɔsoa me mmowue béfi wa bɛhɔ.” 26Yiti Yosef wuli, mmerɛ bɔ né wali afoɛ ɛyaa ko ne buru ɔ. Bewurale ye ayire bɔ wamma wamborɔ ɔ, na bɛfale ye bɛtole alaka nu wɔ Misraim.

Currently Selected:

Gyenesise 50: EBP

Highlight

Copy