Yohane 12

Maria fa sakyeɛfona popa Yesu gya bo

(Mateo 26.6-13; Marko 14.3-9)

1Ɔhale elesia maa Abɔtra ne dwu nen, Yesu wale Betania, nekaa bɔ Lasarɔso bɔ otingyele ye fili awufoɛ nu ne ɔwɔ ne. 2#Luk 10.38-42 Na bɛtole poen bɛmane ye wɔ berɛ, bɔ né Maata ɔso bɛ ɔ. Na Lasarɔso de, né ɔte mmenia bɔ bɛ ne ye didi ne anu ko.

3 # Luk 7.37-38 Yeɛ Maria fale sakyeɛfona paa towaa ko, bɔ ye nyɔboɛ yɛ se paa ɔ, na ɔfa popale Yesu gya bo, na ɔfale ye ti nwiaa nununi ye gya bo; na sakyeɛ ne fona lele awuro berɛ amukoraa. 4#Yoh 6.71; 13.26 Yeɛ ye asuafoɛ nemɔ anu ko, Yudase Yiskariote, (bɔ né ɔbaaye ye ma ne), ɔhane kyɛ, 5“Nzu ati yeɛ bandɔne sakyeɛfona ye denare ɛyaa nza, ná bamva bamma ehiafoɛ ɔ?” 6Nna kyɛ ɔdwene ehiafoɛ nwo ti yeɛ ɔmaa ɔhane sɔ ɔ; na mmom ɔte awueniɛ ti ɔ. Ye yeɛ né otira sikaabɔtɔ ne ɔ, na né owua bɔ bɛfa begua nu ne ati ɔ. 7Yeɛ Yesu hane kyɛ, “Nnɛha ye ye adwene, na wafa he wasie wama me sielɛ kyẽa ne. 8#Deut 15.11 Na ehiafoɛ de, ɛmɔ ne bɛ wɔ berɛ daa; nakoso me de, nna ɛmɔ ne me yeɛ bɛwɔ berɛ daa ɔ.”

Bɛbɔ Lasarɔso ti so porɛ

9Na Yudafoɛ nemɔ nu pee bɛtele kyɛ Yesu wɔ berɛ nen, bɛwale berɛ. Nna kyɛ Yesu ngome ti ɔ, na mmom kyɛ bekonwu Lasarɔso bɔ otingyele ye fili awufoɛ nu ne koso ti ɔ. 10Yiti asɔfo mbanyi nemɔ bɔle porɛ kyɛ bekohu Lasarɔso koso; 11ofikyɛ ɔnate ye ti, né Yudafoɛ nemɔ anu pee bɛ́kɔ bekode Yesu bedi.

Yesu kɔ Yerusalem ngonim nu

(Mateo 21.1-11; Marko 11.1-11; Luka 19.28-40)

12Aleɛ hyene ne, mmenia worawora bɔ bɛwale aluolue ne abo ne, bɛtele kyɛ Yesu ɔ́ba Yerusalem. 13#Lew 23.40; Edw 118.25, 26 Yiti bɛfale ɛberɛ, na bɛhɔle kyɛ bɛkwaayia ye, na bɛbɔle ese kyɛ, “Hosana! Saleɛ ole bɔ ɔnate Awurade dumaa nu ɔ́ba ye, Yisrael Hene ne!” 14Yeɛ Yesu nwuni afunum akrɔngrɔma bie, na ɔtenane ye so, kyɛbɔ bahyerɛ ye kyɛ,

15 # Sak 9.9 “Nnɛsuro, Sion awa brasua;

nea, wɔ Hene ne ɔ́ba,

ɔte afunum akrɔngrɔma so.”

16 # Mak 9.32; Yoh 2.22 Na ye asuafoɛ nemɔ bande ɛhemɔ bo sɔ mmerɛ ne; nakoso nziɛ ye bɔ Nyameɛ hyɛle Yesu animnyam ne, yeɛ afei bɛkayele kyɛ bahyerɛ ɛhemɔ bafa ye nwo, na bayɔ sɔ bama ye koso. 17Yeɛ mmenia wora bɔ né bɛ ne ye wɔ berɛ, mmerɛ bɔ ɔfrɛle Lasarɔso fili ye asieleɛ nu, ná otingyele ye fili awufoɛ nu ne, belili ɛhe nwo adanzeɛ. 18#Luk 19.37 Na ɛhe ati koso yeɛ mmenia worawora ne beeyiale ye ɔ; ofikyɛ né bate kyɛ wayɔ sɔ nzɛngyerɛnneɛ ne. 19Yeɛ Farasiifoɛ nemɔ sisele bɛ nwo kyɛ, “Yeɛ ɛmɔanwu kyɛ ɛmɔngɔhora bɛngɔyɔ ye nwo huu! Ɛ́mɔnea, kyɛ ewiase atu bi waali ye si ɔ.”

Helafoɛ biemɔ pena kyɛ benwu Yesu

20Na bɛ bɔ bɛwale aluolue ne abo kyɛ bɛbaasɔne ne, né Helafoɛ biemɔ bɛboka so. 21Yeɛ sɔ mmenia nemɔ bɛwale Filipo bɔ ofi Betesaeda bɔ ɔwɔ Galilea ne berɛ, na besele ye kyɛ, “Yɛ mene, yɛpena kyɛ yɛnwu Yesu.” 22Filipo hɔle ɔɔhã hyirele Andrea, na Andrea ne Filipo bɛɛbɔle Yesu amaneɛ. 23#Yoh 13.1; 17.1; Mak 14.35 Na Yesu buale bɛ kyɛ, “Mmerɛ ne aso kyɛ bɛhyɛ sona Awa ne animnyam ɔ. 24#1 Kor 15.36 Nahorɛ nu paa, mekã mekyire ɛmɔ kyɛ, sɛ aburoo baa ko wandɔ aseɛnwo wanwu a, ɔte komapɛ ne ala; nakoso sɛ owu a, osu mmaa pee. 25#Mat 10.39; Mak 8.35 Ebiala bɔ okuro ye ngoa dwirɛ ne, okofi ye sa; yeɛ ebiala bɔ ɔpɔ yɛ ngoa wɔ wiase wa ne, ɔkɔfa kosie kɔhɔ daa ngoa nu. 26Sɛ ebie so me a, ɔsɛ kyɛ odi me si; na nekaa bɔ nwɔ ne, berɛ yeɛ me somvoɛ koso kɔwa ɔ; na ebiala bɔ ɔso me ne, me Baba kɔhyɛ ye animnyam.”

Yesu kã ye wue nwo dwirɛ

27 # Mat 26.38; Mak 14.34; Yoh 11.33 “Afei de, me kra nwo ato; na nzikyɛ dwirɛ koraa yeɛ nga ɔ? Baba, de me fi dɔnhwere he anu! Nakoso, ɛhe ati yeɛ mawa dɔnhwere he anu ɔ. 28#Mat 3.17 Baba, hyɛ wɔ dumaa animnyam!” Yeɛ komviɛ bie fili nyameɛso wale kyɛ, “Mahyɛ ye animnyam dada, na ngɔhyɛ ye animnyam bieku.”

29Na ɛlɔen bɔ né begyigyi berɛ ne, bɛtele sɔ dwirɛ nen, bɛhane kyɛ, “Agralaa ne abɔ nu kurudududu.” Yeɛ ebiemɔ koso hane kyɛ, “Abɔfo adwudwo ahyire ye.”

30Na Yesu buale kyɛ, “Nna me ti yeɛ komviɛ he wale ɔ, na mmom ɛmɔ ti ɔ. 31#2 Kor 4.4; Ɛfe 2.2 Afei ewiase ndɛenbualɛ ne wadwu; bɔ odi wiase he aso ne, bekye yeɛ bɛbaaye ye befi berɛ ɔ. 32#Yoh 3.14; 8.28 Na me de, sɛ bɛma me so befi aseɛ ye aso a, ngɔhwe mmenia mukoraa ngɔwa me nwo.” 33Ɛhe de, ɔhã fa hyirele ewue horɛ bɔ né ɔbaawu ɔ.

34 # Edw 110.4; Yes 9.7; Hes 37.25; Dan 7.14 Na ɛlɔen ne buale ye kyɛ, “Yɛ de, yate yafi mmeraa ne anu kyɛ Kristo ne kɔtena ase daa; na ɔyɛle sɛɛ bɔ ɛnwa: Ɔsɛ kyɛ bɛma Sona Awa ne so ɔ? Nwa ole Sona Awa he?”

35 # Ɛfe 5.8 Yeɛ Yesu buale bɛ kyɛ, “Kanea ne ɔne ɛmɔ bɛwɔ berɛ mmerɛ kãa bie. Na mmerɛ bɔ ɛmɔle kanea ne de, ɔsɛ kyɛ ɛmɔnate, ná awosii wammando ɛmɔ; ofikyɛ ebiala bɔ ɔnate awosii nu ne, ɔnze nekaa bɔ ɔkɔ ɔ. 36#Luk 16.8 Mmerɛ bɔ ɛmɔle kanea ne de, ɔsɛ kyɛ ɛmɔde kanea ne bedi, amaa ɔnate so ɛmɔayɛ kanea ne mma.” Na Yesu hane ɛhemɔ yiele nen, ofili berɛ, na ɔfale ye nwo feale bɛ.

Mmenia ne anne Yesu banni

37Ɔwɔ nu kyɛ né wayɔ nzɛngyerɛnneɛ pee wɔ bɛ nyunu de, nakoso banne ye banni. 38#Yes 53.1; Rom 10.16 Na ɛhe mane ngɔmhyɛlɛniɛ Yesaya dwirɛ bɔ ɔhane ne wale nu kyɛ,

“Awurade, nwa yeɛ wale yɛ noa dwirɛ wali ɔ?

Nwa yeɛ Awurade tumi ne wala ali wahyire ye ɔ?”

39Yiti bangora banne banni, kyɛbɔ Yesaya hane ye bieku kyɛ,

40 # Yes 6.10; Mat 13.13, 15 “Wasi bɛ nye, na wama b’adwene ala,

ná bamva bɛ nye bannwu nikye, ná bamva b’adwene bande ye bo,

na banza bamma ma manza bɛ anwonyerɛ.”

41 # Yes 6.1; Luk 24.27 Yesaya hane sɔ, ofikyɛ onwuni ye animnyam, na ɔhane ye nwo dwirɛ.

42Na maen mbanyi nemɔ pee belele ye belili, nakoso ɔnate esurolɛ bɔ besuro Farasiifoɛ nemɔ ati, bangora banye bɛ nyunu, bɔ ahaa ɔkɔmaa bekotu bɛ bekofi nyianu sua ne anu ɔ; 43#Rom 2.29; 1 Sam 15.30 ofikyɛ né bekuro mmenia nyunu animnyam bɛtra Nyameɛ nyunu animnyam.

Yesu ole wiase kanea ne

44 # Mat 10.40 Yeɛ Yesu teane nu sele kyɛ, “Ebiala bɔ ode me di ne, nna me yeɛ ode me di ɔ, na mmom bɔ ɔsomane me ne yeɛ ode ye di ɔ. 45Na ebiala bɔ onwu me ne, onwu bɔ ɔsomane me ne. 46Mawa wiase kyɛ kanea, na ebiala bɔ ode me di ne, ɔngɔtena awosii nu. 47Na sɛ ebie te me noa dwirɛ ná wanne wanni a, me de, memmua ye ndɛen; ofikyɛ mamma kyɛ mebaabua wiase ndɛen, na mmom mmale kyɛ mebaale wiase ngoa. 48Sona bɔ ɔpo me ná onne me dwirɛ ndo nu ne, ole bɔ obua ye ndɛen ɔ; na me noa dwirɛ ne ala yeɛ okobua ye ndɛen wɔ ayieleɛ kyẽa ne ɔ. 49Ofikyɛ nna me bɔbɔ me tumi so yeɛ mefa medwudwo ɔ; na mmom Baba ne bɔ ɔsomane me ne, ye yeɛ wafa bɔ nga ɔne kyɛbɔ nzi nga ye ɔ nwo ahyɛdeɛ wama me ɔ. 50Na mese kyɛ ye ahyɛdeɛ te daa ngoa. Yiti edwirɛ bɔ mekã ne, kyɛbɔ Baba ne ahã ahyire me ne, sɔ ala yeɛ mekã ɔ.”

Currently Selected:

Yohane 12: EBP

Highlight

Copy