Luka 12

Yesu dwudwo tia nyaatwomyɛlɛ

(Mateo 10.26-27)

1 # Mat 16.6; Mak 8.15 Sɔ mmerɛ ne, né mmenia apee apee bahyere so bɔ betiatia bɛ nwo so ɔ. Na Yesu hyɛle ye bo lili moa sele ye asuafoɛ nemɔ kyɛ, “Ɛ́mɔnea ɛmɔ nwo yé wɔ Farasiifoɛ mɔle harewaa bɔ ye ole nyaatwomyɛlɛ ne anwo. 2#Mak 4.22; Luk 8.17 Nikyee biala nne berɛ bɔ so akata bɔ ye nwo ngɔla berɛ ɔ, anaa bɔ ɔwɔ mvealeɛ nu bɔ bengonwu ye ɔ. 3Yiti edwirɛ biala bɔ ɛmɔahã ye awosii nu ne, bɛkɔte ye eyia ketee. Na bɔ ɛmɔatu ye nwo asure wɔ sua nu ne, bɛkɔbɔ ye dawure wɔ sua ti afia.

Bɔ ɔsɛ kyɛ yɛsuro ye ɔ

(Mateo 10.28-31)

4“Me damvo mɔ, mekã mekyire ɛmɔ kyɛ, nnɛma ɛmɔsuro bɛ bɔ beku anwoɔnaen ne, ná ye si ye bɛngora hwee yɔ ko ɔ. 5Na mebɔ ɛmɔ kɔkɔ, bɔ ɔsɛ kyɛ ɛmɔsuro ye ɔ: Odi kyɛ ɛmɔsuro bɔ oku yie a, ole tumi kyɛ ogyi to abɔnzam see nu ɔ. Amba, mekã mekyire ɛmɔ kyɛ, ye yeɛ odi kyɛ ɛmɔsuro ye ɔ. 6Aso bɛndɔne akatipire nnu mbɛsaa nyɔ? Nakoso Nyameɛ nyunu de, bɛ nu ko po nne berɛ bɔ ɔma ye wora fi ye ɔ. 7Ɛmɔ ti nwiaa po baha ye mukoraa. Yiti nnɛma ɛmɔsuro, na ɛmɔ nwo hia tra ngatipire pee!”

Kyɛ ekole Yesu kɔto nu, ɔne kyɛ ɛkɔpo ye ɔ

(Mateo 10.32-33; 12.32; 10.19-20)

8“Mekã mekyire ɛmɔ kyɛ, ebiala bɔ ɔkɔbɔ me dumaa mmenia nyunu nen, Sona Awa ne koso ɔkɔbɔ ye dumaa Nyameɛ abɔfo mɔ nyunu. 9Nakoso bɔ ɔkɔpo me mmenia nyunu ne de, me koso ngɔpo ye Nyameɛ abɔfo mɔ nyunu.

10 # Mat 12.32; Mak 3.29 “Ebiala bɔ okodwudwo kotia Sona Awa ne, bɛkɔfa bɛkɔhyɛ ye; nakoso bɔ ɔkɔhã musue dwirɛ kotia Sunzum Krongron ne de, bɛngɔfa ngɔhyɛ ye.

11 # Mat 10.19-20; Mak 13.11; Luk 21.14-15 “Sɛ bɛfa ɛmɔ bɛkɔ nyianu sua mɔ nu, ndɛenbualɛfoɛ ne mbanyi nyunu a, nnɛma ɛmɔdwenedwene kyɛbɔ ɛmɔkosi bɛkɔye ɛmɔ noa nwo, anaa bɔ ɛmɔkɔhã ɔ nwo; 12ɔnate kyɛ Sunzum Krongron ne kohyirehyire ɛmɔ sɔ mmerɛ ne ala nu bɔ odi kyɛ ɛmɔkã ɔ.”

Esikaniɛ kwaseaa ne nwo anyandera

13Na ebie fili ɛlɔen ne anu sele Yesu kyɛ, “Kyerɛkyerɛniɛ, dwudwo kyire nniɛma ná ɔma yɛhyɛ agyapadeɛ bɔ bafa bayakyi yɛ ne.” 14Na Yesu buale ye kyɛ, “Ngyabiaa, nwa yeɛ ɔfale me sili ndɛenbualɛniɛ anaa kyɛfoɛ wɔ ɛmɔ so ɔ?” 15Na osele bɛ kyɛ, “Ɛ́mɔnea ɛmɔ nwo yé wɔ anyeboroborolɛ nwo; ofikyɛ nna agyapadeɛ somaa bɔ sona wanya ye ɔ yeɛ otira ye ngoa nyamaa nu ɔ.”

16Na obuli bɛ anyandera he: “Esikaniɛ bie ye aseɛ hyene aleɛ pee. 17Na osusuli ye nwo wɔ ye ti anu kyɛ, ‘Ɛhe de, ngɔyɛ ye sɛ koraa, ofikyɛ nnne nekaa bɔ ngɔfa me nnɔbaeɛ ne ngosie ɔ?’ 18Na osele kyɛ: ‘Mese bɔ ngɔyɔ ɔ: Ngobubu me pata nemɔ ngogua, ná masisi bɔ bɛte mbiri ɔ, na berɛ yeɛ ngɔfa me nnɔbaeɛ ne me nningyein amukoraa ngosie ɔ; 19ná afei mahã mahyire me kra kyɛ: Ɛkra, ele nningyein paa pee bɔ bafa basie berɛ bama wɔ bɔ okoli afoɛ pee ɔ; yiti de wɔ nwome, didi ná no, ná gye wɔ nye.’ 20Nakoso Nyameɛ sele ye kyɛ, ‘Kwaseambane! Kɔngɔen ye ala ngole wɔ kra ngofi wɔ sa nu; na nningyein bɔ apena agua berɛ ne, nwa yeɛ bɛkɔyɛ ye deɛ ɔ?’ 21Na sɔ ala yeɛ sona bɔ ɔboaboa agyapadeɛ noa ma ye nwo, nakoso olle anwonyadeɛ huu wɔ Nyameɛ nu ne ɔte ɔ.”

Fa wɔ nwo to Nyameɛ so

(Mateo 6.25-34)

22Afei Yesu sele ye asuafoɛ nemɔ kyɛ, “Yiti mekã mekyire ɛmɔ kyɛ, nnɛmɔma ɛmɔ asetena nu adwenedwene tɔ ɛmɔ so, kyɛ nzu yeɛ ɛmɔkoli ɔ; anaa ɛmɔ nipadua nwo, kyɛ nzu yeɛ ɛmɔkɔhera ɔ. 23Ɔnate kyɛ ngoa nwo hia tra aleɛ, yeɛ nipadua koso nwo hia tra ɛtena. 24Ɛ́mɔnea adene mɔ, bɛnyɔ boo, bɛngɔmva eboo so aleɛ, yeɛ belle aleɛ bɔ bafa basie ɔ anaa pata; nakoso Nyameɛ ma bɛ aleɛ. Aso ɛmɔ nwo nhia ndra nnomaa hɔ ɔ! 25Na ɛmɔ nu beni yeɛ ɔkɔhora kɔdwenedwene kɔfa ɛlɛho kɔtoa ye ngoa so ɔ? 26Na sɛ ɛmɔngɔhora ngɔyɔ bɔ ɔte kaaba he po a, nzu ati yeɛ ɛmɔdwenedwene bɔ ɔboka so nemɔ nwo ɔ? 27#1 Ahe 10.4-7; 2 Abe 9.3-6 Ɛ́mɔnea kyɛbɔ sukooko mɔ besi benyi ɔ: bɛnyɔ adwuma, bɛnnwo tena, nakoso mekã mekyire ɛmɔ kyɛ, Solomon animnyam amukoraa nu ne po, ye anwosiesie ne ando ɛhemɔ anu ko po. 28Na sɛ Nyameɛ siesie eburo ndire bɔ ogyi berɛ ɛnɛ maa ɔyɛ nyemene, ná ɛhema bapɛ bayera ye foonoo nu po a, ɔkɔyɛ sɛɛ bɔ ongosiesie ɛmɔ ma ɛmɔ nwo ngɔyɛ nyemene ngɔtra so ɔ? Ɛmɔ bɔ ɛmɔ gyidie te kãa ɔ! 29Sɔ ala yeɛ nnɛma ɛmɔpena bɔ ɛmɔkoli ɔ, anaa bɔ ɛmɔkɔno ɔ; yeɛ nnɛmɔmaa ɔyɛ ɛmɔ so adwenedwene. 30Ofikyɛ ewiasefoɛ yeɛ bɛdwenedwene ɛhemɔ amukoraa nwo ɔ. Na ɛmɔ Baba se kyɛ ɛmɔhia sɔ nningyein nemɔ. 31Yiti ɛ́mɔpena Nyameɛ ahennie ne mmom, na ɔkɔfa ɛhemɔ amukoraa kɔboka ɛmɔ so.

Nyameɛso agyapadeɛ

(Mateo 6.19-21)

32“Fekue kaaba, nnɛma ɛmɔsuro! Ofikyɛ ɔyɛ ɛmɔ Baba ne fɛ kyɛ ɔkɔfa ahennie ne kɔma ɛmɔ ɔ. 33Ɛ́mɔtɔne bɔ ɛmɔle ye ɔ ná ɛ́mɔfa bɛ́yɛ adɔeɛ; ɛ́mɔyɔ sikaa bɔtɔ mɔ bɔ bɛnyɛ daa ɔ bɛfa, ɔne agyapadeɛ bɔ benyie le ɔ wɔ nyameɛso, nekaa bɔ awuefoɛ bɛmma berɛ, ná mvrɔlɔ koso benni ɔ. 34Ɔnate kyɛ, nekaa bɔ ɛmɔ agyapadeɛ wɔ ne, berɛ yeɛ ɛmɔ ahone koso wɔ ɔ.

Ɛ́mɔwɛne

35“Ɛ́mɔmia ɛmɔ abɔsoɛ nu ná ɛ́mɔma ɛmɔ kanea ogye, 36ná ɛ́mɔyɛ kyɛ mmenia bɔ bɛnwondɛ kyɛ bɛ mene kofi atɔmvorɛ bo kɔwa ɔ; amaa sɛ ɔba babɔ anoa nu a, babukye ye berɛ ne ala! 37Na ngoaa bɔ bɛ mene ba a, ɔbato bɛ kyɛ bɛwɛne ne, benya saleɛ! Nahorɛ nu, mekã mekyire ɛmɔ kyɛ, ɔkɔbɔ ye abɔsoɛ, ɔkɔmaa bɛkɔtena poen nwo, ná wawa waaso bɛ. 38Sɛ ɔba abunnamu anaa alebahyene, ná ɔbato bɛ sɔ a, sɔ ngoaa nemɔ benya saleɛ. 39#Mat 24.43-44 Na ohia kyɛ ɛmɔnwu kyɛ, sɛ awuro mene ne ɔse mmerɛ bɔ awueniɛ ne kɔwa a, [ahaa ɔkɔwɛne], ahaa ɔngɔma ongonya ate ngootu ye anoa bo. 40Yiti ɛmɔ koso, ɛ́mɔsiesie ɛmɔ nwo bésie; ɔnate kyɛ Sona Awa ne kɔwa mmerɛ bɔ ɛmɔ nye ɔlla so ɔ nu.”

Akoaa nahorɛniɛ ne akoaa bɔnefoɛ ne

(Mateo 24.45-51)

41Yeɛ Petro bisale Yesu kyɛ, “Awurade, anyandera he, ebu ma yɛ, anaakyɛ ebu ma mmenia mukoraa?” 42Na Awurade buale kyɛ, “Nwa ole awuro so neafoɛ nahorɛniɛ ne nworɛniɛ ne, bɔ ye mene kɔfa ye awuro berɛ ngoaa mɔ kowura ye sa, kyɛ ɔma bɛ b’aleɛ wɔ mmerɛ bɔ ɔsɛ ɔ nu ɔ? 43Akoaa bɔ ye mene ba banwu ye kyɛ sɔ ala yeɛ ogu so ɔyɔ ne, onya saleɛ. 44Nahorɛ nu, mekã mekyire ɛmɔ kyɛ, ɔkɔfa ye nningyein amukoraa kowura ye sa. 45Nakoso sɛ sɔ akoaa ne kã ye wɔ ye ti anu kyɛ, ‘Me mene onnya ɔwwale,’ ná ɔhyɛ ye bo ɔbo ngoaa mmienzua ne ngoaa mmrasua nemɔ, ná odidi ná ɔno nzaa bo a, 46ye de, sɔ akoaa ne mene kɔwa kyẽa bɔ okoofu ye nu ɔ, ɔne dɔnhwere bɔ ɔnze ɔ nu; na ɔkɔpepɛ akoaa ne nu ahuronzi ahuronzi, ná wamaa wanya asobrakyeɛfoɛ bɛ kyɛfa ne bie.

47“Akoaa bɔ ɔse bɔ ye mene kuro, nakoso wammoaboa ye nwo wanzie, anaa wanyɔ ye mene apɛdeɛ nen, ɔkɔbo ye botorɔ. 48Nakoso akoaa bɔ ɔnze, ná ɔyɔ bɔ ɔfata ɛborɛ nen, bɛkɔbo ye kãa bie. Na ebiala bɔ bama ye somaa ne, bekobisa somaa bekofi ye berɛ; yeɛ ebiala bɔ mmenia afa somaa bawura ye sa ne, bekobisa somaa bɔ ɔbo so ɔ bekofi ye berɛ.

Yesu ti ndetemuɛ kɔwa

(Mateo 10.34-36)

49“Mmale kyɛ mebaafa see meto aseɛ nu, na me kunu a, ahaa see la nu! 50#Mak 10.38 Asubɔlɛ bie wɔ berɛ bɔ bɛbaafa bɛbɔ me ɔ, na sɛ bɛffa bɛbbɔle me beyyiele a, nnyane anwotɔ. 51Ɛmɔdwene kyɛ asomdwee yeɛ mafa mawa aseɛ so ɔ? Daabi oo, na mekã mekyire ɛmɔ kyɛ, ndetemuɛ ɔ. 52Ofi ɛnɛ bɔ ɔkɔ ɔ, mmenia nnu bɔ bɛwɔ awuro ko anu ɔ, bɛ nu kɔtete. Nza kɔyɛ ko kotia nyɔ, né nyɔ ayɛ ko atia nza. 53#Mika 7.6 Bɛ nu kɔtete, seɛ kɔho kotia baa bienzua, yeɛ baa bienzua kɔho kotia seɛ; niɛ kɔho kotia baa brasua, yeɛ baa brasua kɔho kotia niɛ; hyireni kɔho kotia sia brasua, né sia brasua aho atia ohyireni.”

Mmerɛ nwo nzɛngyerɛnneɛ bo hyirelɛ

(Mateo 16.2-3)

54Na Yesu sele ɛlɔen ne koso kyɛ, “Sɛ ɛmɔnwu kyɛ esue amuna eyia atɔleɛ a, ndɛndɛ so ɛmɔkã kyɛ, ‘Esue baatɔ’; na ɔtɔ koso amba. 55Yeɛ sɛ ɛmɔnwu kyɛ mvrama ɔbɔ fi ngwaen dɔ a, ɛmɔnwa, ‘Ahuhuro baawa’; na ɔba koso amba. 56Nyaatwomfoɛ! Ɛmɔkora bekyire aseɛ ne ewienu nzesãleɛ bo, nakoso nzu ati yeɛ ɛmɔngora bengyire mmerɛ ye anu bo ɔ?

Ɛ́mɔli ɛmɔ afia dwirɛ

(Mateo 5.25-26)

57“Na nzu ati yeɛ ɛmɔ bɔbɔ ɛmɔmmu bɔ ɔtengyɛ nwo ndɛen ɔ? 58Sɛ ɛne ebie bɔ wabɔ wɔ kwaadu begu so bɛ́kɔ tuminiɛ nyunu a, ɛmɔwɔ atunu bɔ ɛ́mɔkɔ ne, bɔ mmɔden ɛne ye besiesie ɛmɔ afia, ná wandwe wɔ wangɔ ndɛenbualɛniɛ ne nyunu, ná ndɛenbualɛniɛ ne wamva wɔ wanwura kuku nu wɛmvoɛ ne sa, ná wɛmvoɛ ne amva wɔ wando kuku nu. 59Na mekã mekyire wɔ kyɛ, sɛ andua kerɛ ne amukoraa pɛsɛɛ a, bɛngɔye wɔ ma ɛngɔhɔ.”

Currently Selected:

Luka 12: EBP

Highlight

Copy