Gyi 7
7
Sitivin sa ɔ ne
1Sɛlɛvolɛ Kpanyinli ne bizale Sitivin kɛ, “Asoo ɛhye mɔ le zɔhane?”
2 #
Mɔl 12.1
Sitivin buale kɛ, “Mediema mrenya nee egya mɔ, bɛdie me! Anyunlunyia Nyamenle ne yele ɔ nwo hilele yɛ nlenya Ebileham wɔ mekɛ mɔɔ ɛnee ɔwɔ Mɛsɔpɔteemea la, kolaa na yeadu yeahɔdɛnla Hɛlan. 3Ɔzele ye kɛ, ‘Ɛvi wɔ abusua nee wɔ maanle ye anu tu na kɔ azɛlɛ ne mɔɔ mebahile wɔ la azo.’ 4#Mɔl 11.31; 12.4 Ɛhye ati yɛɛ ɔvi Kaledea mɔɔ le ɔdaye ye maanle nu la ɔdule ɔhɔdɛnlanle Hɛlan a. Nzinlii mɔɔ Ebileham ɔ ze wule la, Nyamenle manle ɔradɛnlanle azɛlɛ ɛhye mɔɔ ɛnɛ bɛmɛ bɛde zolɛ la azo. 5#Mɔl 12.7; 13.15; 17.8 Ɛnee Nyamenle ɛtɛfale azɛlɛ ne ɛleka biala ɛtɛmanle Ebileham kɛ ɔle ɔdaye ye ɛdeɛ. Azɛlɛ waa ko bɔbɔ bɔle ye, noko ɛnee Nyamenle ɛva ɛbɔ ye ɛwɔkɛ kɛ ɔbava yeamaa ye nee ɔ bo zo amra, wɔ mekɛ mɔɔ ɛnee Ebileham mumua ne ɛnlɛ ralɛ la. 6#Mɔl 15.13-14 Kɛ Nyamenle zele ye la ɛne, ‘Ɛ bo zo amra bahɔ maanɔne ahɔyɛ ahanra, bɛahile bɛ nyane toonwo ɛvolɛ ɛya nna. 7Nzinlii mebadea menli zɔhane mɔɔ bɛbahɔzonle bɛ la, na bɛvi maanle zɔhane anu bɛbaye bɛ nwo na bɛarazonle me wɔ ɛke ala.’ 8#Mɔl 17.10-14; 21.2-4 Na Nyamenle manle Ebileham ngyekyeleɛ ɛhye anwo sɛkɛlɛneɛ, yemɔ a le mrenyanu nzonlɛyɛlɛ. Yemɔti Ebileham wole Ayezeke la ye kenle mɔtwɛ ne azo ɔyɛle ye mrenyanu nzonlɛ. Ayezeke wole Gyekɔbo na ɔyɛle ye mrenyanu nzonlɛ, yɛɛ Gyekɔbo wole mralɛ mrenya bulu nee nwiɔ ne, mɔɔ le yɛ nlenya mɔ titile ne, na ɔyɛle bɛ mrenyanu nzonlɛ.
9 #
Mɔl 37.11,28; 29.2,21 “Dwosefi anwo yɛle ɔ mediema ne mɔ ɛya na ɔlua zolɛ bɛdɔnenle ye kɛ kanra bɛmanle bɛ nee ye hɔle Yigyibiti, na Nyamenle lile ɔ nzi, 10#Mɔl 41.39-41 na ɔyele ye ɔvile ye amaneɛnwunlɛ muala anu. Mɔɔ Dwosefi dwule Yigyibiti belemgbunli ne (Falo) anyunlu la, Nyamenle manle ye nrɛlɛbɛ na ɔlua zo ɔnyianle ɔ nyunlu. Na Yigyibiti belemgbunli yɛle ye amɛnlado wɔ ye maanle ne anu nee ye suakunlu ɛkɛ ne neavolɛ. 11#Mɔl 42.1-2 Mekɛ ne anu, sane nee ɛhɔne rale Yigyibiti nee Keena maanle ne mɔ anu, manle ɔyɛle abodelɛ kpalɛ, mɔɔ ɛnee yɛ nlenya mɔ ɛnnyia aleɛ wɔ ɛleka biala a. 12Yemɔti mɔɔ Gyekɔbo dele kɛ aleɛ wɔ Yigyibiti la, ɔzoanle ɔ mra mrenya ne mɔ, mɔɔ le yɛ nlenya mɔ wɔ ɛkɛ. 13#Mɔl 45.1,16 Bɛhɔle mɔɔ tɔ zolɛ nwiɔ ne la, Dwosefi yele ɔ nwo hilele ɔ mediema ne mɔ, na ɔlua zolɛ Yigyibiti belemgbunli ne nwunle Dwosefi abusua ne. 14#Mɔl 45.9-10,17-18 Dwosefi vale nrɛlaleɛ hɔmanle ɔ ze Gyekɔbo kɛ ɔ nee ye sua nu amra amuala ɛrɛla Yigyibiti. Bɛle menli abulasuu nee nnu. 15#Mɔl 46.1-7; 49.33 Yemɔti Gyekɔbo hɔle Yigyibiti, na ɛkɛ ne yɛɛ ɔwule na yɛ nlenya mɔ noko wule a. 16#Mɔl 23.3-16; 33.19; 50.7-13; Dwɔ 24.32 Bɛdule bɛ avunli ne mɔ bɛrale Hyikɛm na bɛziele bɛ wɔ sɛka ne mɔɔ Ebileham dɔle vile Heemɔ abusua ne lɔ la anu.
17 #
Ade 1.7-8
“Mɔɔ mekɛ ne bikyele mɔɔ ɔwɔ kɛ Nyamenle akee ye ye ɛwɔkɛ ne mɔɔ ɔbɔle yɛ nlenya Ebileham la, ɛnee yɛ nlenya mɔ mɔɔ wɔ Yigyibiti la anwo ɛzo kpalɛ. 18Nzinlii belemgbunli fofolɛ bie mɔɔ ɛnze Dwosefi anwo edwɛkɛ biala la rale ebia ne azo. 19#Ade 1.22 Ɔvale nrɛlɛbɛ adenle zo ɔbɔle yɛ mgbanyima ne mɔ abolɛ ɔmanle bɛvuandinle bɛ nlɔma bɛguale bɛmanle bɛwule. 20#Ade 2.2 Mekɛ ɛhye anu ala yɛɛ bɛwole Mosisi a, ɔle kakula kɛnlɛma kpalɛ! Na bɛvale ye bɛveale sua nu bɛnleanle ye toonwo ɔlile siane nsa. 21#Ade 2.3-10 Nzinlii mɔɔ bɛyele ye bɛdole ye lɔ la, Yigyibiti belemgbunli ne ara raalɛ hɔvale ye yɛle ɔ ra na ɔhɔtetele ye wɔ ye sua nu ɛkɛ. 22Bɛhilehilele ye Yigyibiti nrɛlɛbɛ nee ye amaamuo ne amuala. Na ɔnyinle ɔyɛle sonlakpole wɔ edwɛkɛhanlɛ nee nyɛleɛ nu.
23“Mɔɔ Mosisi lile ɛvolɛ abulanla la, ɔyɛle ye adwenle kɛ ɔkakpɔla ɔ mediema Yizilayɛma, yeanlea bɛ tɛnlabelɛ nu nee kɛ bɛsi bɛyɛ bɛ la. 24Ɔnwunle bɛ nuhua ko kɛ Yigyibitinli bie ɛlɛyɛ ye asa, na ɔhɔliele ɔ ti na ɔbɔle Yigyibitinli ne ɔmanle ɔwule. 25(Ɛnee ye adwenle a le kɛ ye menli ne kɛnwu kɛ Nyamenle balua ɔ nwo zo araye bɛ, na bɛannyia zɔhane ndelebɛbo ne.) 26Ye alehyenlɛ nu ɔnwunle kɛ Yizilayɛma nwiɔ ɛlɛko, ɔhɔle kɛ ɔkakpɔda, na ɔzele bɛ kɛ, ‘O, ebiamɔ! Bɛle mediema; duzu ati a bɛlɛko bɛayɛ bɛ nwo asa ɛ?’ 27Na ko ne mɔɔ ɛnee ɛlɛyɛ ɔ gɔnwo asa la zuhunle Mosisi ziele ahane na ɔzele ye kɛ, ‘Nwane a dule wɔ kɛ ɛrali yɛ nwo zo belemgbunli na ɛyɛ yɛ ndɛnebuavolɛ a? 28Anzɛɛ ɛkpondɛ kɛ ɛku medame noko, kɛmɔ anoma ɛhunle Yigyibitinli ne la ɔ?’ 29#Ade 18.3-4 Mɔɔ Mosisi dele ɛhye la, ɔvi Yigyibiti ɔnriandile ɔhɔle Medea azɛlɛ zo. Ɔwole mralɛ mrenya nwiɔ wɔ ɛkɛ.
30 #
Ade 3.1-10
“Ɛvolɛ abulanla pɛle nu la, Nyamenle soanvolɛ yele ɔ nwo hilele Mosisi wɔ sendɔlɔra nu wɔ fienemgbole ne mɔɔ zua Boka Saenae la anu. 31Mosisi nwunle ɛhye la ɔyɛle ye azibɛnwo na ɔbikyele nwolɛ kɛ ɔkanlea ye boɛ. Na ɔdele Awulae ane, ɔse, 32‘Mame a mele ɛ nlenya mɔ Nyamenle ne, Ebileham, Ayezeke, yɛɛ Gyekɔbo Nyamenle ne a.’ Mosisi ahonle dule kpole na yeangulo kɛ ɔkɛmaa ɔ nye zo ɔkɛnlea deɛ ne bieko. 33Na Awulae zele ye kɛ, ‘Yeye ɛ gyakɛ mgbɔlaboa ne, ɔluakɛ ɛleka mɔɔ ɛgyi la azɛlɛ ne le nwuanzanwuanza. 34Menwu kɛ bɛlɛsi bɛayɛ me menli mɔɔ wɔ Yigyibiti la amumuyɛ la, yɛɛ mede bɛ ɛzunlɛ noko, na mera kɛ mebalie bɛ. Yemɔti bɛla na mesoa wɔ wɔ Yigyibiti.’
35 #
Ade 2.14
“Mosisi ɛhye mɔɔ bɛkpole ye, na bɛzele ye kɛ, ‘Nwane a yɛle wɔ belemgbunli nee ndɛnebuavolɛ wɔ yɛ nwo zo’ la, yemɔ ala a Nyamenle luale soanvolɛ ne mɔɔ vindele sendɔlɔra ne anu wɔ ɛsɛlɛ ne azo la anwo zo zoanle ye kɛ ɔli bɛ nwo zo belemgbunli na ɔlie bɛ a. 36#Ade 7.5; Ɛdi 14.33 Ɔvale ɛvolɛ abulanla ɔyɛle nwanwane ninyɛne nee sɛkɛlɛneɛ wɔ Yigyibiti nee Nyevile Kɔkɔlɛ#7.36 Nyevile Kɔkɔlɛ: anzɛɛ Ndɔ Nyevile. ne anloa, yɛɛ fienemgbole ne anu na ɔyele menli ne ɔvile Yigyibiti. 37#Mɛla 18.15,18 Mosisi ɛhye ala a zele Yizilayɛma kɛ, ‘Nyamenle baye ye kpɔmanvolɛ avi bɛ avinli yeazoa ye bɛ nwo, kɛmɔ ɔzoanle me la.’ 38#Ade 19.1—20.17; Mɛla 5.1-33 Yemɔ yɛɛ mekɛ mɔɔ bɛyiale ɛsɛlɛ ne azo la ɔ nee Nyamenle soanvolɛ ne dendɛle wɔ Boka Saenae azo, na ɔliele Nyamenle nrɛlaleɛ ne mɔɔ ɛnɛ ɛradwu yɛ nwo zo la ɔrɛlɛle yɛ nlenya mɔ a.
39“Na yɛ nlenya mɔ kpole kɛ bɛnrɛdie ye; bɛvale ye bɛziele ahane na bɛhulole kɛ anrɛɛ bɛkɛzia bɛkɛhɔ Yigyibiti. 40#Ade 32.1 Yemɔti bɛzele Sɛlɛvolɛ Aalɔn kɛ, ‘Yɛ awozonle maa bɛli yɛ nyunlu, na Mosisi ɛhye mɔɔ yele yɛ vile Yigyibiti la yɛnze mɔɔ ɛzi ɔ nwo zo a.’ 41#Ade 32.2-6 Mekɛ ne anu bɛyɛle ɛnlankɛ ralɛ ananze na bɛvale bɛyɛle amonle bɛzɔle, bɛlile nwolɛ nwɔhoa na bɛyeyɛle deɛ ne mɔɔ bɛdabɛ bɛva bɛ sa bɛyɛ la. 42#Emɔ 5.25-27 Yemɔti Nyamenle hwenle ɔ nwo vile bɛ nwo na ɔyele bɛ ɔmanle kɛ bɛzonle anwomanyunlu ninyɛne, kɛmɔ bɛhɛlɛ ye wɔ Nyamenle kpɔmanvolɛma mbuluku ne mɔ anu la. Ɔse,
‘Yizilayɛma, ɛvolɛ abulanla ne mɔɔ bɛlile wɔ ɛsɛlɛ
ne azo la,
bɛhunle nane bɛbɔle azu bɛmanle me ɔ?
43Bɛzoale bɛ bozonle Molɛke ɛdanlɛ sua ne,
yɛɛ bɛzoale bɛ ɛwɔlɔra bozonle Relɛfaa ɛdanlɛ
sua ne noko; bɛdabɛ a bɛnwonle bɛ yɛɛ bɛzonlenle bɛ a.
Yemɔti mebava bɛ meahɔ nlɔnu wɔ Babelɔn anzi lɔ.’
44 #
Ade 25.9,40 “Ɛsɛlɛ ne azo yɛɛ yɛ nlenya mɔ nyianle Ɛdanlɛ Sua ne mɔɔ kile kɛ Nyamenle de bɛ avinli la a. Bɛyɛle ye kɛmɔ Nyamenle zele Mosisi ala la, nzonlɛ mɔɔ Nyamenle vale hilele Mosisi la azo a ɔnleanle ɔzile a. 45#Dwɔ 3.14-17 Nzinlii yɛ nlenya mɔ vale Ɛdanlɛ Sua ne mɔɔ bɛliele ye bɛ ze mɔ ɛkɛ ne la lile bɛ nyunlu na bɛ nee Dwɔhyua hɔle bɛhɔhonle bɛvale maanle maanle mɔɔ Nyamenle manle bɛlile bɛ nwo zo konim la. Na ɔwoale bɛ nwo ɛkɛ ne toonwo ɔradwule Devidi mekɛ zo. 46#2 Sam 7.1-16; 1 Edk 17.1-14 Nyamenle anye zɔle Devidi na Devidi zɛlɛle Nyamenle kɛ ɔmaa ye adenle ɔmaa ɔzi sua ɔmaa Gyekɔbo Nyamenle ne. 47#1 Arl 6.1-38; 2 Edk 3.1-17 Noko Sɔlɔmɔn a zile sua ne a.
48“Noko akee Anwuma Anwuma Nyamenle ne ɛndɛnla sua mɔɔ menli ɛzi la anu. Nyamenle kpɔmanvolɛma ɛha kɛ,
49 #
Aye 66.1-2
‘Awulae se,
Anwuma le me belemgbunli ebia,
yɛɛ azɛlɛ ye le me gyakɛ abo ebia.
Duzu sua a bɛsi bɛamaa me a?
Nienwu ɛleka a metɛnla mealie me ɛnwomenle a?
50Anzɛɛ tɛ mame medame a
menyɛle ɛhye mɔ amuala ɔ?’ ”
51 #
Aye 63.10
Sitivin hɔle zolɛ zele bɛ kɛ, “Bɛdabɛ, bɛ nzo yɛ se kpalɛ! Bɛnlie Nyamenle bɛnli fee; bɛkpɔla bɛ nzo anzi wɔ Nyamenle edwɛkɛ ne anwo! Bɛva bɛ nlenya mɔ agyakɛ, dahuu bɛko bɛtia Sunsum Nwuanzanwuanza ne! 52Nyamenle kpɔmanvolɛ ko bɔbɔ ɛnle ɛkɛ mɔɔ bɛ mgbanyima andwazo ɔ nwo zo a. Bɛhunle menli mɔɔ Nyamenle zoanle bɛ kɛ bɛrabɔ ye Sonvolɛ Nwuanzanwuanza ne anwo nolo la amuala, na eza bɛye ɔdaye mumua ne bɛmaa bɛhu ye. 53Bɛmɛ a bɛliele Nyamenle mɛla ne mɔɔ ye soanvolɛma nee ye rale la a; noko bɛanli zolɛ!”
Sitivin awolɛ ɛzilɛ
54Mekɛ mɔɔ ayiama ne ɛlɛtie Sitivin la ɛnee ɛya ɛwie bɛ wolowolo na bɛ nwo ndinli ɛlɛtwehwe bɛ kikilikikili zɛhae. 55Na ɛnee Sunsum Nwuanzanwuanza ne ɛyi Sitivin tɛkɛɛ la ati, ɔdole ɔ nye anwuma na ɔnwunle Nyamenle anyunlunyia ne na Gyisɛse gyi Nyamenle asa fema zo. 56Na ɔzele bɛ kɛ, “Bɛnlea, menwu kɛ anwuma ɛbuke, na menwu kɛ Sonla Ra ne gyi Nyamenle asa fema zo.”
57Ɛkɛ ne ala bɛduoduale bɛ nzo, na bɛdeanle nu kokye la ɛnee bɛwɔ Sitivin anwo zo, nwee! 58Bɛhwenle ye bɛ nee ye hɔle suakpole ne kandiba, na bɛzile ye awolɛ. Dasevolɛma ne mɔ yeyele bɛ adɛladeɛ manle kpavolɛ bie mɔɔ bɛfɛlɛ ye Sɔɔlo la lɛle. 59Mɔɔ bɛlɛsi Sitivin awolɛ la ɛnee ɔ ne la nu ɔlɛtea ɔfɛlɛ Awulae kɛ, “Awulae Gyisɛse, die me ɛkɛla!” 60Akee ɔhotole na ɔdeanle nu kpole kɛ, “Awulae, fa ɛtane ɛhye kyɛ bɛ!” Ɔhanle ɛhye la, ɔwule.
Currently Selected:
Gyi 7: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
