Dw 21
21
Gyisɛse ye ɔ nwo ahile ɛdoavolɛma nsuu
1Ɛhye anzi, Gyisɛse eza yele ɔ nwo hilele ɛdoavolɛma ne wɔ Taebilease Tandane ne anloa. Kɛ ɔyɛle la ɛne: 2Saemɔn Pita, Tɔmase, mɔɔ bɛfɛlɛ ye Nda, Natanayɛle, mɔɔ vi Kana mɔɔ wɔ Galeli maanzinli nu la, Zɛbɛdi amra ne mɔ, yɛɛ Gyisɛse ɛdoavolɛma gyɛne nwiɔ, bɛ muala bɛwɔ ɛkɛ. 3#Luk 5.5 Saemɔn Pita zele bɛ kɛ, “Mekɔ azule zo.”
Bɛzele ye kɛ, “Yɛ nee wɔ kɔ.” Zɔhane ati bɛ muala bɛhɔvale ɛlɛne na bɛhɔle, na nɔe ne amuala bɛyɛle biala na bɛangye fɛlɛ. 4Mɔɔ sɛnzɛne ne ɛlɛba aradudu la, Gyisɛse ragyinlanle tandane ne anloa, noko ɛdoavolɛma ne annwu kɛ ɔdaye ɔ. 5Na ɔbizale bɛ kɛ, “Mgbavolɛ ye mɔ, bɛhyele fɛlɛ ɔ?”
Bɛbuale ye kɛ, “Yɛannyia debie!”
6 #
Luk 5.6
Gyisɛse zele bɛ kɛ, “Bɛdo bɛ avonle ne wɔ bɛ sa fema zo ɛkɛ ne, na bɛkɛhye bie.” Amgba bɛdole avonle ne bɛ fema zo, na fɛlɛ ngome mɔɔ bɛhyele la ammaa bɛangola avonle ne twehwe gua ɛlɛne ne anu.
7Ɛdoavolɛ ne mɔɔ Gyisɛse kulo ye edwɛkɛ la hanle hilele Pita kɛ, “Awulae ɔ.” Saemɔn Pita dele kɛ Awulae la, ɔvale ye anwuma tɛladeɛ ne ɔwulale (ɔluakɛ ɛnee yekpa yegua) na ɔwulule ɔdɔle azule ne anu ɔweɛle ɔrale file zo. 8Ɛdoavolɛma ne mɔ mɔɔ hale la vale ɛlɛne ne radwule aze, bɛhwenle avonle ne mɔɔ fɛlɛ ɛyi ye tɔ la bɛrale. Ɛnee bɛ nee aze anwa biala, ɔkɛyɛ abɛsamu abulanlu. 9Mɔɔ bɛdwule aze la, bɛnwunle kɛ bɛva emunlike bɛwuda senle na fɛlɛ gua zo yɛɛ kpanwo noko wɔ ɛkɛ. 10Gyisɛse zele bɛ kɛ, “Bɛva fɛlɛ ne mɔɔ bɛhye bɛ kɛkala la bie bɛrɛla.”
11Saemɔn Pita hɔle ɛlɛne ne anu na ɔhɔhwehwenle avonle ne ɔrale file zo, fɛlɛ mgbole ɛya ko abulanlu nee nsa ɛyi ye tɛkɛɛ! Bɛhyele fɛlɛ dɔɔnwo, noko avonle ne anye ko bɔbɔ ande.
12Gyisɛse zele bɛ kɛ, “Bɛrɛla bɛrali debie.” Ɛdoavolɛma ne anu biala angola ambiza ye kɛ, “Na ɛdawɔ a le nwane?” Ɔluakɛ bɛze kɛ Awulae ɔ. 13Na Gyisɛse hɔvale kpanwo ne, na ɔbubule ɔmanle bɛ; eza ɔhɔvale fɛlɛ ne, na ɔyɛle ye zɔhane ala.
14Ɛhye a tɔ zolɛ nsa mɔɔ Gyisɛse yele ɔ nwo hilele ye ɛdoavolɛma ne mɔ wɔ mekɛ mɔɔ bɛdwazole ye bɛvile ewule nu la a.
Gyisɛse nee Pita
15Bɛwiele debie di la, Gyisɛse zele Saemɔn Pita kɛ, “Dwɔn ara Saemɔn, asoo ɛkulo me kpalɛ ɛtɛla ɛhye mɔ?”
Pita buale ye kɛ, “Ɛhɛe, Awulae, ɛze kɛ mekulo wɔ.”
Gyisɛse zele ye kɛ, “Nea me mboane mralɛ ne mɔ boɛ.” 16Gyisɛse eza bizale Pita kɛ, “Dwɔn ara Saemɔn, asoo ɛkulo me?”
Pita buale kɛ, “Ɛhɛe, Awulae, ɛze kɛ mekulo wɔ.”
Gyisɛse zele ye kɛ, “Nea me mboane ne mɔ boɛ.” 17Fane nsa ne azo eza Gyisɛse bizale Pita kɛ, “Dwɔn ara Saemɔn, asoo ɛkulo me?”
Nyane hanle Pita kɛ Gyisɛse ɛbiza ye fane nsa kɛ, “Asoo ɛkulo me?” a, na ɔbuale ye kɛ, “Awulae ɛze debie biala; ɛze kɛ mekulo wɔ.”
Gyisɛse zele ye kɛ, “Nea me mboane ne mɔ boɛ. 18Meka nɔhalɛ ne meahile wɔ: Mekɛ mɔɔ ɛle kpavolɛ la, ɛnee ɛdawɔ ɛkola ɛmaa ɛ nwo zo ɛkɔ ɛleka biala mɔɔ ɛkulo la, na saa ɛyɛ kpanyinli a, ɛbadenrɛ ɛ sa na awie akyekye bɛ na yeava wɔ yeahɔ ɛleka mɔɔ ɛngulo kɛ ɛkɔ la.” 19(Gyisɛse hanle ɛhye hilele adenle holɛ ko mɔɔ Pita balua zo awu awula Nyamenle anyunlunyia la.) Akee Gyisɛse zele Pita kɛ, “Bɛla maa yɛhɔ!”
Gyisɛse nee ɛdoavolɛ ko ne
20Pita hakyile ɔ nwo na ɔnwunle kɛ ɛdoavolɛ ko ne mɔɔ Gyisɛse kulo ye edwɛkɛ la doa bɛ. Ɛdoavolɛ ɛhye ala a mekɛ mɔɔ bɛdi aleɛ ne la, ɔhwenle ɔbikyele Gyisɛse na ɔbizale ye kɛ, “Awulae, nwane a baye wɔ amaa?” la. 21Pita nwunle ye la ɔbizale Gyisɛse kɛ, “Awulae, na nrenya ɛhye ɛ?”
22Gyisɛse buale ye kɛ, “Saa mekulo kɛ ɔtɛnla aze kɔkpula kɛ menwɔra la a, ɔle wɔ edwɛkɛ ɔ? Wɔmɔ baze maa yɛhɔ!”
23Yemɔti edwɛkɛ ne dendenle dwule Gyisɛse ɛdoavolɛma ne mɔ amuala anzo nu kɛ ɛdoavolɛ ɛhye ɛnrɛwu ɛlɛ. Noko Gyisɛse anga ye zɔhane. Ɔse, “Saa mekulo kɛ ɔtɛnla aze kɔkpula kɛ menwɔra la a, ɔle wɔ edwɛkɛ ɔ?”
24Ɛdoavolɛ zɔhane a le ɛdoavolɛ ne mɔɔ ɛlɛka edwɛkɛ ɛhye mɔ la, yemɔ noko ala a eza hɛlɛle a, na yɛze kɛ mɔɔ yeha la le nɔhalɛ.
Adwulaleɛ
25Akee ninyɛne dɔɔnwo wɔ ɛkɛ ne mɔɔ Gyisɛse yɛle a. Saa bɛhɛlɛle bɛ muala ngoko ngoko a anrɛɛ menea a nwolɛ mbuluku ɛnrɛzo ewiade ye amuala anu.
Currently Selected:
Dw 21: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.
