Soane 13

Fakasa o le alofa lasi o le Alo

1I mua o le Pasikate, i le iloa e Sesu kua soko lona ola ke mavae i le malama nei ki le Tamana, na alofa loa a ia kia latou ala na nonofo i le malama nei, ti na fakakatoa loa e ia lona alofa kia latou o kaku ki le gatoaga.

Fufulu e Sesu o vae o ana tisipulo

2I le lolotoga o le kai afiafi, kua tuku e le temonio ki le loto o Sutasi Isekaliote, vosa o Simone, le manatu ke fakatau a ia, 3ti kua iloa e Sesu kua tuku e le Tamana a nea fuli ki ona lima, ti na au a ia mei le Atua, ti ka toe liliu a ia ki le Atua, 4na tuu ake loa a ia mei le laupapa, o ui ona kofu, ti na too loa e ia se kie solosolo o sulu. 5Ti na liligi loa e ia se vai ki se pesini, ti na kamata loa e ia le fufulu o vae o le kau tisipulo, o solosolo ki le kie solosolo leia na sulu e ia. 6Na au loa a ia kia Simone Petelo, ti na pati loa Simone Petelo kiate ia : Ko koe, Aliki, e ke fufulu oku vae ! 7Na tali loa Sesu kiate ia : Ko le nea leia e kau fai, e leaise ke iloa i le temi nei, kae e ke matala loa ki ai ki muli. 8Na pati loa Petelo kiate ia : Leai, e leaise ke fufulu loa oku vae. Na tali loa Sesu kiate ia : Kapau e leaise kau fufulu a koe, ti e leaise ke kau loa mo au. 9Na pati loa Simone Petelo kiate ia : Aliki, e leaise gato fua i vae, kae mo lima foki ti mo le ulu. 10Na pati loa Sesu kiate ia : Ko leia kua maanu, e aoga fua kiate ia ke fufulu ona vae ke mea katoa a ia ; ti e kotou mea, kae leaise ko koutou fuli. 11Talie na iloa e ia leia e fakatau ia loa a ia ; koia na pati ai loa a ia : E leaise ko kotou fuli.

12I le oki o lana fufulu olatou vae, na toe tui loa e ia ona kofu, ti na toe eke loa a ia ki le laupapa, o pati kia latou : Pe kotou matala ki le nea leia kua kau fai kia koutou ? 13E kotou fakaigoa au ko le Pule mo Aliki, ti e kotou pati tonu, talie ko au a ia. 14Ti kapau ko au, ko le Aliki mo le Pule, kua kau fufulu okoutou vae, e tonu foki ke kotou fefufuluaki okoutou vae ; 15talie kua kau tuku atu kia koutou se faifaitakiaga, o tupu ke kotou fai ofaipe laku fai kia koutou. 16E maoki, e maoki, e kau pati atu, e leaise lasi ake le tagata fakasausau i lona aliki, ti e leaise lasi ake le tagata fakasausau i leia na kakau ia a ia. 17Kapau e kotou iloa a nea ana, e kotou manuia, kese fua ke kotou fai latou.

Fakasa e Sesu o leia ka fakataga ia a ia

18E leaise kau masau kia koutou fuli ; e kau iloa latou ala kua kau filifili. Kae e tonu ke fakasoko le Tosi :

Ko leia e kai ia mo au le pane

Kua siki lona mulivae kiate au.

19Ko leinei e kau fakasa le nea lena kia koutou kae e leikiaise soko mai a ia, o tupu ka soko mai loa a ia, ke kotou tui ko au a ia.

20E maoki, e maoki, e kau pati atu kia koutou, ko leia e tali ia leia e kau kakau ia loa, e tali e ia au ; ti ko leia e tali ia au, e tali e ia leia na kakau ia mai au.

21I le oki o lana masau, na mamae loa Sesu i lona laumalie, ti na fakasa loa e ia : E maoki, e maoki, e kau pati atu kia koutou, e fakatagai loa au e se tasi o koutou. 22Na fetioaki le kau tisipulo ia latou, o fifili pe ko ai leia e masau a ia ki ai. 23Na fafanaki ki le fatafata o Sesu se tasi o ana tisipulo, leia na alofa ki ai a Sesu. 24Na kakamo loa Simone Petelo kiate ia ke fakaala pe ko ai leia na masau a ia ki ai. 25Ti na punopunou loa le tisipulo lena ki le fatafata o Sesu, o pati kiate ia : Aliki, ko ai ? 26Na tali loa Sesu : Ko leia e kau soli loa ki ai le potu pane pekei. Ti na pekei loa e ia le potu pane, o soli kia Sutasi, vosa o Simone, le Isekaliote. 27I le temi fai leia na soli ai le potu pane, na ulu loa Satana kia Sutasi. Ti na pati loa Sesu kiate ia : Ko le nea leia e ke fai, fai a ia ke vave. 28Kae na leaise matala loa se tasi o latou ala na nonofo i le laupapa pe kolea le nea na pati a ia kiate ia. 29Kae, o tupu na nofo Sutasi mo le kisi paaga, na manatu ni iki na fia pati Sesu kiate ia : Totogi le nea leia e aoga mai kia tatou ki le aso lasi, pe na fakatotonu e ia kiate ia ke soli se nea ki le kau mativa.

30I le too e Sutasi le potu pane, na ulu fakatavili loa a ia ki fafo. Kua pouli.

31I le kua ulu a Sutasi ki fafo, na pati loa Sesu : I le lakaga nei, kua fakakololia le Vosa o le tagata, ti kua fakakololia le Atua iate ia. 32Kapau kua fakakololia le Atua iate ia, e toe fakakololia loa a ia e le Atua iate ia totonu, ti e fakakololia loa e ia a ia.

33Ei aku fanau liliki, ko se ga temi ikiiki fai koi kau nofo ai mo koutou. E kotou afa loa au ; ti e faipe laku pati ki le kau Sutea : E leaise mafai ke kotou au ki le ganea leia e kau ano ki ai, e kau toe fakasa atu foki a ia kia koutou i le lakaga nei. 34E kau tuku kia koutou se fakatotonu foou : Kotou fealofani ia koutou ; ofaipe loku alofa kia koutou, ko koutou foki, kotou fealofani ia koutou. 35I le nea lena e iloa ai loa e tagata fuli ko aku tisipulo koutou, mo kapau e kotou fealofani ia koutou.

Fakasa e Sesu o le fakafiti a Petelo

36Na pati loa Simone Petelo kiate ia : Aliki, e ke ano kifea ? Na tali loa Sesu : E leaise mafai i le lakaga nei ke ke muli mai iate au i le ganea leia e kau ano ki ai, kae koi ke muli mai loa i se lakaga ki muli. 37Na pati loa Petelo kiate ia : Aliki, kolea e leaise mafai ai ke kau muli atu iate koe i le lakaga nei ? E kau soli loa loku mauli o tupu ko koe. 38Na tali loa Sesu : E ke soli loa lou mauli o tupu ko au ? E maoki, e maoki, e kau pati atu kiate koe, e leikiaise koukoua le moatoa kae kua ke fakafiti tua tolu kiate au.

Currently Selected:

Soane 13: FB2000

Highlight

Copy