Soane 4

Sesu mo le fafine samalia

1I le iloa e le Aliki kua logo le kau faliseo, na fai e ia ti na papitema e ia ni tisipulo o toka api ake ia Soane, 2(kae na leaise ko ia totonu leia na faipapitema, kae ko ana tisipulo,) 3na mavae loa a ia i Sutea, o toe liliu ki Kalilea.

4Ti na tonu ke fakalaka a ia i Samalia. 5Na kaku loa a ia ki se kolo o Samalia, na igoa ko Sikale, e feofi ki le faisaga leia na soli e Sakopo ki lona vosa ko Sosefo. 6I ai, na tuu ai le sosoni o Sakopo. I lona gaegae i le fanoga, na tonatona loa Sesu i le laugutu o le sosoni. Ko le lalatea a ia.

7Na au loa se fafine o Samalia, o asu vai. Na pati loa Sesu kiate ia : Soli mai ke kau inu. 8Talie kua ano ana tisipulo ki le kolo o totogi nea kai. 9Na pati loa le fafine samalia kiate ia : Kolea e ke kole mai ai kiate au ke ke inu, a koe leia ko le Sutea, kiate au leia ko se fafine Samalia ? Talie na leaise malilie le kau Sutea mo le kau Samalia. 10Na tali loa Sesu kiate ia : Kanapau na ke iloa le nea alofa o le Atua ti mo leia e pati atu kiate koe, soli mai kau inu, na ke kole loa e koe totonu kiate ia ke ke inu, ti e soli atu loa e ia kiate koe le vai mauli. 11Kae na pati loa le fafine kiate ia : Aliki, e leaise ke maua se nea ke asu ai le vai, ti e loloto le sosoni ; pe ke maua loa meifea le vai mauli lena ? 12Pe ke lasi ake i lomatou tamana ko Sakopo, leia na soli ia mai kia matou le sosoni leinei, ti na inu ki ai a ia totonu, mo ona vosa, mo ana kau manu ? 13Na tali loa Sesu kiate ia : Ko leia e inu ki le vai nei e toe fia inu loa a ia ; 14kae ko leia e inu loa ki le vai leia e kau soli loa kiate ia e leaise toe fia inu loa a ia, ti ko le vai leia e kau soli loa kiate ia e liliu loa iate ia ko se matapuna vai leia e mapusi loa o kaku ki le mauli lee gato. 15Na pati loa le fafine kiate ia : Aliki, soli mai kiate au le vai lena, o tupu ke aua na kau toe fia inu, ti ke aua na kau toe au o asu vai i leinei. 16Na pati loa Sesu kiate ia : Ano, o kalagai mai lou avaga, ti ke au ki leinei, 17Na tali loa le fafine : E leai soku avaga. Na pati loa Sesu kiate ia : E ke pati maoki : E leai soku avaga. 18Talie na ke avaga lima, ti ko leia e nofo nei mo koe e leaise ko lou avaga a ia. I le nea lena na ke pati maoki ai. 19Na pati loa le fafine kiate ia : Aliki, e kau tio ko le polofeta a koe. 20Na atolasio omatou tamana i le mauga leinei ; kae e kotou pati koutou, ko le ganea leia e tonu ke atolasio ai e tuu i Selusalemi. 21Na pati loa Sesu kiate ia : Fafine, tui mai kiate au, kua soko mai le ola leia e leaise kotou toe atolasio ai loa ki le Tamana i le mauga leinei, pe ko Selusalemi. 22E kotou atolasio ki le nea leia e leaise kotou iloa ; ko matou, e motou atolasio ki le nea leia e motou iloa, talie e au le fakamauli mei le kau Sutea. 23Kae e au le ola, ti kua soko foki a ia, leia e atolasio ai loa le kau atolasio maoki ki le Tamana i le laumalie mo le maoki ; talie ko lena le kau atolasio leia e afa e le Tamana. 24E laumalie le Atua, ti e tonu kia latou ala e atolasio kiate ia, ke atolasio kiate ia i le laumalie mo le maoki. 25Na pati loa le fafine kiate ia : E kau iloa e tonu ke au le Mesia leia e igoa ko le Kilisito ; ka au loa a ia, e fakasa mai loa e ia kia matou a nea fuli.

26Na pati loa Sesu kiate ia : Ko au totonu, a au leinei e masau atu kiate koe.

27I lena, na kaku ake loa ana tisipulo, o punamauli i lana masau mo se fafine. Kae na leaise pati loa se tasi : Kolea e ke kole ? Pe : E ke masau mo ia kilea ? 28Na tuku loa e le fafine lana fa vai, kae ano loa a ia ki le kolo, o pati ki le kakai : 29Kotou au o tio ki se tagata na fakasa ia mai kiate au a nea fuli ala na kau fai ; pe leaise ko le Kilisito a ia ? 30Na lotou mavae loa mei le kolo, o au kiate ia.

31I le temi lena, na fakakolekole e le kau tisipulo kiate ia ke kai, o pati : Pule, kai. 32Kae na pati loa a ia kia latou : E i ai saku nea kai leia e leaise kotou iloa. 33Ti na pati loa le kau tisipulo ia latou : Pe na aumai e se tasi se nea kai kiate ia ? 34Na pati loa Sesu kia latou : Ko laku nea kai ko le fai o le finegalo o leia na kakau ia mai au, ti mo le fakasoko o lana gaoi. 35Pe leaise kotou pati, koi toe foki ni masina e fa ki le temi tuuti o le fulumeto ? Ko leinei, e kau pati atu kia koutou, kotou siki ake okoutou mata ti kotou tio malie ki faigasaga fulumeto kua matutua ti kua tonu ke tuuti. 36Ko leia e tuuti e maua e ia se totogi, ti e tanaki e ia ni fua ki le mauli lee gato, o tupu ko leia e to mo leia e tuuti ke la fiafia fakatasi. 37Ti e maoki ai le taagapati leinei : E to e le tasi kae tuuti e le tasi. 38Na kau kakau koutou ke kotou tuuti i se ganea leia na leaise kotou gaoi ai ; na gaoi ni iki kese, ti na kotou maua le fua o lalatou gaoi.

39Na tui loa kia Sesu se kau Samalia toka api o le kolo lena, o tupu ko le masau a le fafine leia na fai ia le fakamaoki leinei : Na fakasa mai e ia kiate au a nea fuli ala na kau fai. 40Koia, i le au loa a le kau Samalia kiate ia, na lotou kole ai loa kiate ia ke nofo mo latou. Ti na nofo loa a ia i ai i aso e lua. 41Ti na tui loa se kakai leia na toe lasi ake o tupu ko lana folafola ; 42ti na lotou pati loa ki le fafine : E leaise motou tui o tupu ko nea ala na ke pati ki ai ; talie kua motou logo tonu kiate ia, ti kua motou iloa ko le fakamauli maoki a ia o le malama nei.

I Kalilea, fakamauli o le vosa o se ofisa

43Sili aso ana e lua, na mavae loa Sesu i ai, o ano ki Kalilea ; 44talie na fakasa e ia totonu e leaise maua e se polofeta se fakaapaapa i lona fenua totonu. 45I lana kaku ki Kalilea, na tali loa a ia e le kau Kalilea, talie na lotou tio ki nea fuli ala na fai e ia i Selusalemi i le aso lasi ; talie ko latou foki, na lotou ano ki le aso lasi. 46Ti na toe liliu loa a ia ki Kana i Kalilea, ganea leia na fakaliliu ai e ia le vai o vino.

Na i ai i Kafanaume se ofisa o le sau, leia na masaki lona vosa. 47I le logo a le tagata ofisa, kua au Sesu mei Sutea ki Kalilea, na ano loa a ia kiate ia, o kole ke ifo ake o fakamauli lona vosa, leia kua teitei mate. 48Na pati loa Sesu kiate ia : Kapau e leaise kotou tio ki ni milakulo mo ni gaoi fakatalatupua e leaise kotou tui fua. 49Na pati loa le ofisa a le sau kiate ia : Aliki, ifo mai i mua o le mate o loku fanau. 50Na pati loa Sesu kiate ia : Ano, kua mauli lou vosa. Ti na tui loa le tagata lena ki le folafola leia na fakasa e Sesu kiate ia, ti na ano loa a ia. 51Koi lolotoga ifo a ia, kae kaku ake ana tagata fakasausau, o fakasa kiate ia le logo leinei : Kua mauli lau fanau. 52Na vesili loa a ia kia latou pe ko le ola fia leia na kamata mauli ai a ia ; ti na lotou pati loa kiate ia : I nanafi, i le ola tasi sili lalatea, na mavae ai le fiva iate ia. 53Na iloa loa e le tamana ko le ola fai lena na pati ai Sesu kiate ia : Kua mauli lou vosa. Ti na tui loa a ia, a ia mo lona fale katoa.

54Na fai foki e Sesu le lua milakulo leinei i lana au mei Sutea ki Kalilea.

Currently Selected:

Soane 4: FB2000

Highlight

Copy