Soane 6

Liuga o pane ki tagata e tino afe lima

1Sili aia, na ano loa Sesu ki leia ake fetuu o le tai o Kalilea, na igoa foki ko le tai o Tipeliate. 2Na muli loa se kakai toka api iate ia, talie na tio a ia ki milakulo ala na fai e ia ki le kau masaki. 3Na pale loa Sesu ki le mauga, ti na tonatona loa a ia ki lalo i ai mo ana tisipulo.

4Ti kua ofi foki le Pasikate, le aso lasi o le kau Sutea.

5I le siki ake loa e Sesu ona mata, o tio ki le kakai toka api leia kua au kiate ia, na pati loa a ia kia Filipo : Pe tou totogi loa meifea ni pane ke fagai ai le kakai leinei ? 6Na pati fenaaki a ia ke asiasii ai Filipo, talie kua iloa e ia le nea leia ka fai loa e ia. 7Na tali loa Filipo kiate ia : Ko fa pane ala e mafai ke too ki ni fa tenalio e kau lelau e lua, e leaise feauga ke lotou tasi mo ia se ga pane. 8Ko se tasi o ana tisipulo ko Atelea, taina o Simone Petelo, na pati loa kiate ia : 9E nofo i leinei se ga tama leia e maua ia ni fa pane olese e lima mo ni ga ika e lua ; kae kolea lona uiga ki le toka api ? 10Na pati loa Sesu : Kotou fakanonofo latou ki lalo. Talie na lasi ai le mutie i le ganea lena. Na lotou nonofo loa ki lalo, na lotou fakaano ki tino afe e lima a tagata. 11Na too loa e Sesu a fa pane, o fakafetai, ti mo tufa loa latou kia latou ala kua nonofo ki lalo ; na toe soli foki e ia ni ika kia latou, o fakalogo ki lolatou loto. 12I lolatou makokona, na pati loa a ia ki ana tisipulo : Tanaki a toei kaiga ke aua na maumau se nea. 13Na lotou tanaki loa, ti na lotou fakaapele loa ni polapola e kau agafulu tupu lua ki toei kaiga o fa pane e lima, i le oki o lalatou kai fulifuli.

14I le tio a le kakai lena ki le milakulo leia na fai e Sesu, na lotou pati loa : Ko ia leinei ko le polofeta maoki leia e tonu ke au ki le malama nei. 15I le iloa e Sesu, ka lotou au loa o too a ia ke fakasau, na toe ano loa a ia toka tasi ki le mauga.

Saele a Sesu i le tai

16I le au o le afiafi, na ifo loa ana tisipulo ki le tai. 17Na lotou sopo loa ki se vaka, o fakataumua ki Kafanaume. Kua pouli foki, kae e leikiaise kaku ake Sesu kia latou. 18Na to loa se matagi lasi, ti na malagalaga loa le tai. 19Na lotou foe o mamao mei le kele i ni kilometa e tolu pe ono, ti na lotou tio loa kia Sesu e saele i le tai, o au ki le vaka. Ti na lotou i lasi ai. 20Kae na pati loa Sesu kia latou : Ko au, aua na kotou i ! 21Ti na lotou loto loa ke fakaeke a ia ki le vaka, ti na tau aifai le vaka ki le ganea leia na lotou ano ki ai.

Sesu, pane o le mauli

22I leia ake aso, na fakatokagai loa e le kakai leia na nofo i le ganea lena ko se vaka fai e tasi leia na tau i ai, ti na leaise sopo Sesu ki le vaka lena mo ana tisipulo, kae na lotou ano tefua. 23I le pogipogi ake, na kaku ake loa ni iki a vaka mei Tipeliate ki le ganea leia na lotou kai ai le pane i le oki o le fakafetai a le Aliki, 24ti na tio loa ni iki o le kakai kua puli Sesu mo ana tisipulo, na lotou sopo loa ki vaka ana o ano ki Kafanaume, o afa Sesu. 25Ti na lotou maua loa a ia i leia atu fetuu o le tai, o pati kiate ia : Pule, na ke au nafea ki leinei ? 26Na tali loa Sesu kia latou : E maoki, e maoki, e kau pati atu kia koutou, e kotou afa au, o leaise tupu ko lakotou tio ki ni milakulo, kae o tupu ko lakotou kai ni pane o makokona. 27Aua na kotou gaoi ki le nea kai leia e maumau, kae kotou gaoi ki le nea kai leia e tologa ki le mauli lee gato, le nea kai leia e soli atu loa e le Vosa o le tagata kia koutou ; talie ko ia leia na fakamailoga e le Tamana, e le Atua totonu, ki lona fakamailoga. 28Na lotou pati loa kiate ia : Kolea e tonu ke motou fai, ke fakasoko ai a gaoi a le Atua ? 29Na tali loa Sesu kia latou : Ko leinei le gaoi a le Atua, ke kotou tui ki leia na kakau mai e ia. 30Na lotou pati loa kiate ia : Kolea le milakulo e ke fai loa ke motou tio ki ai, ti ke motou tui ai kiate koe ? Kolea e ke fai loa ? 31Na kai e omatou tamana le mane i le toafa, o mulimuli ki le nea leia e tuu i le Tosi : Na soli e ia kia latou le pane o le lagi ke lotou kai.

32Na pati loa Sesu kia latou : E maoki, e maoki, e kau pati atu kia koutou, na leaise soli atu e Moisese le pane mei le lagi kia koutou, kae e soli atu e loku Tamana le pane maoki mei le lagi kia koutou ; 33talie ko le pane o le Atua ko leia e ifo mei lagi o soli le mauli ki le malama nei.

34Na lotou pati loa kiate ia : Aliki, soli tuumau mai kia matou le pane lena.

35Na pati loa Sesu kia latou : Ko au ko le pane o le mauli. Ko leia e au kiate au e leaise toe fia kai loa a ia, ti ko leia e tui kiate au e leaise toe fia inu loa a ia. 36Kae na kau pati atu kia koutou, kua kotou tio kiate au, kae e leaise kotou tui fua. 37Ko latou fuli ala e soli mai kiate au e loku Tamana e au loa kiate au, ti e leaise kau tuku loa ki fafo leia e au kiate au ; 38talie na leaise kau ifo mei lagi o fai loku finegalo, kae le finegalo o leia na kakau ia mai au. 39Ti ko le finegalo o leia na kakau ia mai au, ke aua na kau tuku ke puli se tasi fua o latou fuli ala na soli mai e ia kiate au ; kae ke kau toe fakatuuake latou i le aso fakamuli. 40Ko le finegalo o loku Tamana, ko leia e tio ki le Alo ti e tui kiate ia ke maua e ia le mauli lee gato, ti ke kau toe fakatuuake a ia i le aso fakamuli.

41Na femumusuaki loa le kau Sutea kiate ia, talie na pati a ia : Ko au ko le pane leia na ifo mei le lagi. 42Ti na lotou pati : Pe leaise ko Sesu koia lena, le vosa o Sosefo, leia e tou iloa lona tamana mo lona tinana ? Ti kolea e pati ai loa a ia : Na kau ifo mei le lagi ?

43Na tali loa Sesu kia latou : Aua na kotou femumusuaki ia koutou. 44E leaise feala ke au se tasi kiate au, mo kapau e leaise fakalalata mai a ia e loku Tamana leia na kakau ia mai au ; ti e kau toe fakatuuake loa a ia i le aso fakamuli.

45E tuu i le tosi a le kau polofeta :

E ako loa latou fuli e le Atua.

Koia ko leia e logo ki le Tamana, ti e tali ia lana akonaki, e au kiate au. 46Ti e leai se tasi leia kua tio ki le Tamana, gato tasi ki leia e au mei le Atua ; ko ia lena na tio ki le Tamana. 47E maoki, e maoki, e kau pati atu kia koutou, ko leia e tui kiate au e maua e ia le mauli lee gato. 48Ko au ko le pane o le mauli. 49Na kai e okoutou tamana le mane i le toafa, ti na lotou mamate. 50Ko leinei le pane leia e ifo mei le lagi, o tupu ko leia e kai ki ai ke aua na mate a ia. 51Ko au ko le pane mauli leia na ifo mei le lagi. Kapau e kai se tasi ki le pane lena, e mauli loa a ia o lee gato ; ti ko le pane leia e kau soli loa, ko loku tino, leia e kau soli loa ki le mauli o le malama nei.

52I le nea lena, na femasauaki loa le kau Sutea, o pati : Pe mafai feaki ke soli mai e ia kia tatou lona tino ke tou kai ?

53Na pati loa Sesu kia latou : E maoki, e maoki, e kau pati atu kia koutou, kapau e leaise kotou kai le tino o le Vosa o le tagata, ti kapau e leaise kotou inu lona toto, e leaise kotou maua le mauli ia koutou totonu. 54Ko leia e kai ki loku tino ti e inu ki loku toto e maua e ia le mauli lee gato ; ti e kau toe fakatuuake loa a ia i le aso fakamuli. 55Talie ko loku tino ko se nea kai maoki ai, ti ko loku toto ko se nea inu maoki ai. 56Ko leia e kai ia loku tino ti e inu ia loku toto e nofo a ia iate au, ti mo au iate ia. 57Ofaipe le Tamana leia e mauli na kakau ia mai au, ti e kau mauli i le Tamana, ko leia e kai kiate au e mauli loa iate au. 58Ko leinei le pane leia na ifo mei le lagi. E leaise tatau a ia mo le mane leia na kai e okoutou tamana ti na lotou mamate : Ko leia e kai ia le pane leinei e mauli loa o lee gato.

59Na fakasa e Sesu a nea ana i le sinakoka, i lana akonaki i Kafanaume.

Folafola o le mauli lee gato

60I le logo ki ai a le toka api o lana kau tisipulo, na lotou pati loa : E faigataa ai le folafola leinei : Ko ai e feala ke logo ki ai ? 61I le iloa e Sesu iate ia na mumusu ana tisipulo o tupu ko le nea lena, na pati loa a ia kia latou : Pe fakatupu siga le nea lena kia koutou ? 62Ti e feaki ake loa mo ka kotou tio ki le Vosa o le tagata e pale ake ki le ganea leia na nofo ai i mua ? 63Ko le Laumalie leia e fakamauli ia. E leai sona aoga o le tino. Ko folafola ala na kau fakasa atu kia koutou e Laumalie ti e mauli. 64Kae e i ai ni iki ia koutou e leaise tui. Talie na iloa e Sesu mei le kamataaga latou ala e leaise tui, ti mo leia ka fakatau ia loa a ia. 65Ti na toe pati loa a ia : Ko le tupuaga lena o laku pati atu kia koutou e leaise feala ke au se tasi kiate au mo kapau e leaise soli le nea lena kiate ia e le Tamana.

Fakasa e Petelo ko Sesu ko le Kilisito

66Talu mei ai na mavae loa se toka api o lana kau tisipulo, ti na leaise lotou toe ano loa mo ia.

67Na pati loa Sesu ki le tino agafulu tupu lua : Ti ko koutou, pe leaise kotou fia ano foki mo koutou ? 68Na tali loa Simone Petelo kiate ia : Aliki, ke motou ano loa kiate ai ? E nofo iate koe a folafola o le mauli lee gato. 69Ti kua motou tui, ti kua motou iloa ko le Kilisito a koe, ko le Sagato o le Atua. 70Na tali loa Sesu kia latou : Pe leaise ko au leia na filifili ia koutou, koutou ko le tino agafulu tupu lua ? Ti ko se tasi ia koutou ko se temonio ! 71Na masau a ia o uiga mo Sutasi Isekaliote, vosa o Simone ; talie ko ia leia na tonu ke fakatau ia Sesu, a ia ko se tasi o le tino agafulu tupu lua.

Currently Selected:

Soane 6: FB2000

Highlight

Copy