Soane 9

Fakamauli o se tagata na tupu kivi

1Na tio loa Sesu i lana fakalaka ki se tagata na tupu kivi. 2Na fai loa e ana tisipulo kiate ia le vesili leinei : Pule, ko ai na agasala, ko le tagata leinei pe ko ona matua, ke tupu kivi ai a ia ? 3Na tali loa Sesu : E leaise ko ia pe ko ona matua ala na agasala, kae tupu ke fakasa a gaoi a le Atua iate ia. 4E tonu ke kau fai koi ao a gaoi a leia na kakau ia mai au ; e au le pouli, leia e leaise mafai ke gaoi ai se tasi. 5I laku koi nofo i le malama nei, ko le malama au o le malama nei.

6I le oki o lana pati lena, na aanu loa a ia ki le kele, ti na fai loa e ia ki lona savale se ga pela. Ti na takai loa e ia ki le ga pela a mata o le kivi, 7o pati kiate ia : Ano, o maanu i le maanuaga o Siloe (ko lona uiga : ko le fakasausau). Na ano loa a ia ki ai o maanu, ti na liliu mai loa a ia kua tio malie. 8Ko ona vasaa fale ti mo latou ala na iloa ia a ia i mua ake ko se tagata kaiisi, na pati loa : Pe leaise ko ia lena na tonatona o kaiisi ? 9Ti na pati ni iki : Ko ia. Ti ko iki : leai, kae e mata a ia pe ia. Ti na pati a ia totonu : Ko au maoki. 10Ti na lotou pati loa kiate ia : Pe na ala feaki ou mata ? 11Na tali loa a ia : Ko le tagata leia e igoa ko Sesu na fai ia se ga pela, o takai ki ai oku mata, ti na pati mai loa a ia kiate au : Ano o maanu i le maanuaga o Siloe. Ti na kau ano ki ai, o maanu, ti na kau tio ai.

12Na lotou pati loa kiate ia : Kofea le tagata lena ? Na tali loa a ia : E leaise kau iloa.

13Na lotou taki loa ki le kau faliseo leia na kivi. 14Kae ko se aso sapato lena na fai ai e Sesu le ga pela, o fakaala ai a mata o le kivi. 15Na toe vesili loa le kau faliseo kiate ia pe na mafai feaki lana tio. Ti na pati loa a ia kia latou : Na takai e ia se ga pela ki oku mata, ti na kau maanu, ti na kau tio. 16I le nea lena, na pati loa ni iki o le kau faliseo : E leaise au le tagata lena mei le Atua, talie e leaise tausi e ia le sapato. Kae na pati loa ni iki : Pe mafai feaki e se tagata agasala ni milakulo fenaaki ? 17Ti na lotou mavaevae loa i ai. Na lotou toe pati loa ki le kivi : Ko koe, kolea lau pati kiate ia, i lana fakatio ou mata ? Na tali loa a ia : Ko se polofeta a ia.

18Na leaise tui loa le kau Sutea na kivi a ia, ti kua tio a ia, o kaku ki lalatou aumai ona matua. 19Ti na lotou vesili loa kia laua, o pati : Pe ko lokoulua vosa leinei, leia e kolua pati na tupu kivi ? Ti e feaki loa kua tio a ia i le lakaga nei ? 20Na tali loa ona matua : E ma iloa ko loma vosa a ia, ti na tupu kivi a ia ; 21Kae pe feaki kua tio a ia i le lakaga nei, pe ko ai leia na fakaala ia ona mata, e leaise ma iloa le nea lena. Kotou vesili kiate ia totonu, kua lasi a ia, e masau loa a ia ki le nea o uiga mo ia. 22Na pati fenaaki loa ona matua talie na la i ki le kau Sutea ; talie kua tuku e le kau Sutea ke fakamavae mei le sinakoka latou fuli ala e fakasa ia ko Sesu ko le Kilisito. 23Koia na pati ai loa ona matua : Kua lasi a ia, kotou vesili kiate ia totonu.

24Na toe kalagai loa e le kau faliseo le tagata leia na kivi, o pati kiate ia : Tuku ki le Atua le kololia ; e motou iloa ko se tagata agasala le tagata lena. 25Na tali loa a ia : Kapau ko se tagata agasala a ia, e leaise kau lave ; e kau iloa le nea e tasi, na kau kivi ti kua kau tio i le lakaga nei. 26Na lotou pati loa kiate ia : Kolea na fai e ia kiate koe ? Pe na feaki lana fakaala ou mata ? 27Na tali loa a ia kia latou : Kua oki i laku fakasa atu kia koutou, ti na leaise kotou fakalogo ; kolea e kotou toe fia logo ai ki ai ? Pe kotou loto ke kotou liliu foki ko ana tisipulo ? 28Na lotou tauvele loa kiate ia, o pati : Ko koe leia ko lana tisipulo ; ko matou, ko tisipulo matou a Moisese. 29E motou iloa na masau le Atua kia Moisese ; kae ko ia leinei, e leaise motou iloa pe au a ia meifea. 30Na tali loa le tagata lena kia latou : E fakapunamauli ai e leaise kotou iloa pe au a ia meifea ; kae kua fakaala e ia oku mata. 31E tou iloa e leaise tali e le Atua le kau agasala ; kae kapau e fakaapaapa se tasi ki le Atua mo fai ia lona finegalo, e tali e ia a ia. 32Talu mei le kamataaga o le malama nei e leikiaise logo fua kua fakaala ia e se tasi a mata o se tagata na tupu kivi. 33Kapau na leaise au le tagata lena mei le Atua, na leaise mafai fua e ia se nea. 34Na lotou tali loa kiate ia : Na ke tupu katoa i le agasala, ti e ke ako ia matou ! Ti na lotou kapu loa a ia.

Toe fakamaoki e Sesu o lona Atua

35Na logo loa Sesu na lotou kapu a ia ; ti e i lana felavei mo ia, na pati loa a ia kiate ia : Pe ke tui ki le Vosa o le Atua ? 36Na tali loa a ia : Ti ko ai a ia, Aliki, ke kau tui kiate ia ? 37Na pati loa Sesu kiate ia : Kua ke tio kiate ia, ti ko leia e masau atu kiate koe, ko ia. 38Ti na pati loa a ia : E kau tui, Aliki. Ti na su loa a ia kiate ia.

39Ti na pati loa Sesu : Na kau au ki le malama nei o tupu ko se fakamaau : talie ke tio latou ala na kivi, ti ke liliu o kivi latou ala na tio. 40Ko ni iki faliseo ala na nonofo mo ia, i lalatou logo ki folafola ana, na pati loa kiate ia : Pe motou kivi, mo matou foki ? 41Na tali loa Sesu kia latou : Kanapau na kotou kivi, e leaise kotou maua loa se agasala. Kae i le lakaga nei e kotou pati : E motou tio, koia e tuumau ai lakoutou agasala.

Currently Selected:

Soane 9: FB2000

Highlight

Copy