Luka 15
15
Folafola o le fiafia maoki
1Na fakafeofi ake loa kia Sesu le kau popelikano fuli mo ni kakai mauli veli, ke logo kiate ia. 2Ti na mumusu loa le kau faliseo mo le kau sekelipa, o pati : E fakatalitali e le tagata leinei ni kakai mauli veli, ti e kai a ia mo latou.
Le ovi na puli
3Kae na fakasa loa e ia kia latou le folafola fakatata leinei : 4Pe ko ai ia koutou, mo kapau e maua e ia ni ovi e kau lelau, ti e puli se ovi e tasi, e leaise tuku e ia a ovi e kau iva tupu iva i le toafa, kae ano a ia o afa leia kua puli, o kaku ki lana maua a ia ? 5Ka maua e ia a ia, e teki e ia a ia ki ona tuauma i le fiafia, 6ti ka toe liliu a ia ki fale, e kalagai e ia ona kaukau nea mo ona vasaa fale, o pati kia latou : Kotou fiafia mo au, talie kua kau maua laku ovi leia na puli. 7Koia e kau pati atu ai kia koutou, e ia loa se fiafia lasi ake i le lagi i se tagata agasala e toka tasi leia e fakasemala, i ni tagata agatonu e tino iva tupu iva ala e leaise aoga ki ai le fakasemala.
Le fa talame na puli
8Pe ko ai le fafine leia, mo kapau e maua e ia ni fa talame e kau agafulu, ti puli se fa talame e tasi, e leaise tutu ia se malama, mo seu ia le fale, ti mo afa lasi o kaku ki lana maua a ia ? 9Ka maua e ia a ia, ti e kalagai e ia ona kaukau nea mo ona vasaa fale : Kotou fiafia mo au, talie kua kau maua laku fa talame leia na puli ! 10Koia e kau pati atu ai kia koutou : e i ai se fiafia i mua o le kau aselo o le Atua i se tagata agasala e toka tasi leia e fakasemala.
Le vosa na puli
11Na toe pati foki Sesu : Na maua e se tagata ni vosa e toka lua. 12Na pati loa le mulimuli ki lona tamana : Tamana, soli mai loku vaega i koloa ala e tonu ke kau maua. Ti na vae loa e le tamana ki ona vosa lona koloa. 13Na sili ni ga aso teiki, na tanaki loa e le mulimuli ona koloa fuli, ti na mavae loa a ia o ano ki se fenua mamao, o maumaui ona koloa i se mauli maveuveu. 14I le oki o lana maumaui ona koloa fuli, na to loa se oge i le fenua lena, ti na kamata fia kai loa a ia. 15Na ano loa a ia o fakasausau ki se tagata o le fenua, leia na kakau ia loa a ia ke ano o taupau a uviki puaka i ona kele. 16Na oli loa a ia ke fakamakona a ia ki fuai kalupe ala na kai e le kau puaka ; kae na leaise soli ake e se tasi se nea kiate ia. 17Na fakakaukau loa a ia i lona loto, o pati : E toka fia a tagata gaoi totogi i le fale o loku tamana ala e maua ia se pane o lasi, ti mo au leinei ka mate i le fia kai ! 18E kau tuu loa ki aluga, ti e kau ano loa ki loku tamana, ti e kau pati loa kiate ia : Tamana, kua kau agasala ki le lagi ti mo koe, 19e leaise koi kau gali ke fakaigoa a au ko lou vosa ; too au ofaipe se tasi o au tagata gaoi totogi. 20Ti na tuu loa a ia ki aluga, ti na ano loa a ia ki lona tamana. Koi natu a ia i mamao, kae kua tio mai lona tamana kiate ia, ti na manavaalofa loa a ia, ti na makape loa a ia, o fui lona vosa ki ona lima, ti mo sogi kiate ia. 21Na pati loa le vosa kiate ia : Tamana, kua kau agasala ki le lagi ti mo koe, e leaise koi kau gali ke fakaigoa au ko lou vosa. 22Kae na pati loa le tamana ki ana tagata fakasausau : Kotou aumai vave le kofu fulumalie oki, ti kotou tui a ia kiate ia ; kotou velo mo se mama ki lona maikao, ti kotou tui mo ni taka ki ona vae. 23Ti kotou aumai le uviki pipi peti, ti kotou tamate a ia. Tou kai ti tou fiafia ; 24talie ko loku vosa leinei na mate, ti kua toe mauli a ia ; na puli a ia, ti kua toe maua a ia. Ti na lotou kamata fakafiafia loa. 25Kae na nofo le vosa uluaki i faisaga. I lana toe liliu mai, o fakafeofi mai loa ki le fale, na logo loa a ia ki se musika mo ni mako. 26Na kalagai loa e ia se tasi o le kau tagata fakasausau, ti na vesili loa a ia kiate ia pe kolea kua soko. 27Ti na pati loa le tagata fakasausau lena kiate ia : Kua toe liliu mai lou taina, ti kua tamate e lou tamana le uviki pipi peti, talie kua toe maua e ia lona vosa e malolo. 28Na itaita loa le vosa uluaki, ti na leaise loto loa a ia ke ulu ki fale. Na ulu ake loa lona tamana ki fafo o kole kiate ia ke ulu ki fale. 29Kae na tali loa a ia ki lona tamana : Ko leinei, kua lasi ai a fetuu mo laku tausi kiate koe, o leaise kau maumaui fua i se aso au fakatotonu, kae na leaise ke soli mai fua kiate au se uviki koti e tasi ke kau fiafia ai mo oku kaukau nea. 30Kae i le kaku mai o lou vosa, leia na kai ia ou koloa mo fafine faiaga, kua ke fakatotonu ke tamate kiate ia le uviki pipi peti ! 31Na pati loa le tamana kiate ia : Ei loku fanau, e ke nofo tuumau mo au, ti ko nea fuli a aku a au foki ; 32kae na tonu mua ke tou kai mo fakafiafia, talie ko lou taina leinei na mate kae kua toe mauli a ia, ti na puli kae kua toe maua a ia.
Currently Selected:
Luka 15: FB2000
Highlight
Share
Copy
Want to have your highlights saved across all your devices? Sign up or sign in
© Société Biblique de Genève, 2000-2020
