Luka 24

Toe tuuake o Sesu

1I le uluaki aso o le vasaa, na ano loa a fafine ki le tanuma, i le mafoata, o ave a nea fakamanogi ala na lotou teuteui. 2Na lotou maua atu loa le fatu kua tekai mei le tanuma ; 3ti na lotou ulu loa ki loto kae na leaise lotou maua loa le tino o le Aliki Sesu. 4I le sevaia o alatou fakakaukau, ko leinei, na sa loa kia latou ni tagata e toka lua, ala na teu gigila. 5I lolatou i, o punou olotou mata ki le kele, na pati loa le sa tagata kia latou : Kolea e kotou afa ai i le kau mate leia e mauli ? 6E leaise nofo a ia i leinei, kae kua toe tuuake a ia. Kotou manatui lana masau atu kia koutou, kae koi nofo a ia i Kalilea, 7o pati : E tonu ke tuku le Vosa o le tagata ki lima o le kau agasala, ke tutuki a ia ki le koluse, ti ke toe tuuake a ia i le tolu o aso.

8Ti na lotou manatui loa a folafola a Sesu.

9Na lotou toe liliu loa mei le tanuma, o fakasa a nea fuli ana ki le tino agafulu tupu tasi ti mo la ake fuli. 10Ko latou ala na fakasa ia a nea ana ki le kau apositolo, ko Malia mei Maketala, mo Soana, mo Malia tinana o Sakopo, ti mo la ake fafine ala na ano mo latou. 11Na fai a nea ana ki le kau apositolo pe ni moe miti, ti na leaise lotou tui ki fakamatala a fafine.

12Kae na tuu ake loa Petelo ki aluga, o makape ki le tanuma. Na faino loa a ia ki loto o le tanuma, ti na tio loa a ia ki kie ata e tuku i le kele ; ti na punamauli ai a ia ki le nea kua soko, ti na ano loa a ia ki lona kaiga.

Tisipulo e toka lua i le ala o Emausi

13Ti ko leinei, i le aso foki lena, na ano ni tisipulo e toka lua ki se kolo na igoa ko Emausi, leia na mamao mei Selusalemi i ni kilometa e kau agafulu tupu tasi ; 14ti na la masau ki nea fuli ala na soko. 15I lala masau, na fakafeofi loa Sesu kia laua, o kau fanoga mo laua i le ala. 16Kae na taofi ola mata ke aua na la iloa a ia. 17Na pati loa Sesu kia laua : Koa nea ala e kolua masau ki ai ? Ti na la tutuu loa, o mata mamae ai. 18Ti na tali loa kiate ia se tasi o laua, na igoa ko Keleopasi : Pe ko koe toka tasi i Selusalemi nei e leaise iloa ia le nea leia na soko i aso anei ? Ti na pati loa Sesu kia laua : Kolea le nea ? 19Ti na la tali loa kiate ia : Le nea leia na soko kia Sesu mei Nasaleti, leia ko se polofeta makeke i gaoi mo masau i mua o le Atua ti mo mua o le kakai katoa, 20leia na tuku e le kau pule faisakilifisio ti mo omatou kau pule ke tautea ki le mate, o tutuki a ia ki se koluse. 21Na motou fanaki ko ia leia ka fakamauli ia loa Iselaele ; kae mo nea fuli ana, ko le tolu leinei o aso mei le oki o nea ana. 22E maoki foki na motou punamauli lasi ai, o tupu ko ni fafine o matou ala na ano i le mafoata ki le tanuma, 23ti na leaise lotou maua ia lona tino, ti na lotou au, o pati na sa ake kia latou ni aselo, o fakasa kua mauli a ia. 24Ti ko ni iki foki o latou ala na nonofo mo matou, na ano foki ki le tanuma, ti na lotou maua a nea fuli ofaipe le fakasa mai e fafine ; kae ko ia, na leaise lotou tio fua kiate ia. 25Ti na pati loa Sesu kia laua : Tagata sala atamai, ti mo tui gataa ki nea fuli ala kua fakasa e le kau polofeta ! 26Pe na leaise tonu ai ke mamae le Kilisito i nea ana, ti ulu loa ki lona kololia ? 27Ti na kamata loa a ia meia Moisese ti mo le kau polofeta fuli, o fakamatala kia laua i le Tositapu katoa a nea o uiga mo ia. 28Na lotou kaku loa ki le kolo leia na la ano ki ai, ti na sakinake loa a ia e fia soko atu. 29Kae na la taofi loa a ia, o pati : Nofo mo maua, talie kua ofi le pouli, ti kua vave oki le aso. Na ulu loa a ia ki fale, ke nofo mo laua. 30I lana nofo mo laua i le laupapa kai, na too loa e ia le pane, o fakafetai, ti na tofitofi loa e ia a ia, o soli kia laua. 31Ti na mavaa loa ola mata, ti na la iloa loa a ia ; kae na puli loa a ia mei ola mua. 32Ti na la pati loa : Pe na leaise vevela ota loto, i lana masau mai kia taua i le ala, o fakamatala mai kia taua le Tositapu ?

Sa foou o Sesu i le aso lena

33Na la tutuu ake loa ki aluga i le ola fai lena, o toe liliu ki Selusalemi, ti na la maua loa le tino agafulu tupu tasi mo latou ala na nonofo mo latou, kua fakatasi, 34ti na lotou pati ake loa kia laua : Kua toe tuuake maoki le Aliki, ti kua sa a ia kia Simone. 35Na la fakamatala loa le nea leia na soko kia laua i le ala, ti mo lala iloa a ia i le tofitofi o le pane. 36I lala masau, na tuu loa Sesu totonu i loto malie o latou, o pati : Ke nofo le tokamalie mo koutou ! 37Na lotou i lasi, mo lulu lasi, talie na lotou pati kua lotou tio ki se tuuola. 38Kae na pati loa a ia kia latou : Kolea e kotou i ai, ti kolea e tupu ai ni manatu fenaaki i okoutou loto ? 39Kotou tio mai ki oku lima mo oku vae, ko au totonu ; kotou fafa mai kiate au ti kotou tio : E leaise maua e le tuuola se kanofi mo ni ivi, ofaipe au leinei, e kotou tio mai ki ai.

40I lana masau lena, na fakaali loa e ia kia latou ona lima mo ona vae. 41I le lasi o lolatou fiafia ti mo lolatou punamauli, na leaise lotou tui ko ia, ti na pati loa Sesu kia latou : Pe kotou maua i leinei se nea ke kai ? 42Na lotou soli loa kiate ia se potu ika tunu. 43Ti na too loa e ia le nea lena, o kai i mua o latou.

Gaoi foou a le tino agafulu tupu tasi

44Ti na pati loa a ia kia latou : Ko nei a nea ala na kau fakasa atu kia koutou koi kau nofo mo koutou : E tonu ke fakasoko a nea fuli ala kua tosi kiate au i le lao a Moisese, mo le kau polofeta, ti mo pesalemo. 45Ti na fakamavaa loa e ia olatou atamai, ke lotou matala ki le Tositapu. 46Ti na pati loa a ia kia latou : E tuu foki i le tosi : E mamae loa le Kilisito, ti e toe tuuake loa a ia mei le kau mate i le tolu o aso, 47ti e fakasa loa le fakasemala mo le fakamolemole o agasala i lona suafa ki puleaga fuli, o kamata mei Selusalemi. 48Ko kau tagata fakamaoki koutou o nea ana. 49Ko leinei, e kau kakau mai loa kia koutou le nea leia na fakapapau e loku Tamana ; kae ko koutou, kotou nonofo i le kolo o kaku ki lakotou kofu le makeke mei aluga.

Asesione

50Na taki loa e ia latou o kaku ki Petania, ti na siki loa ona lima o tapuaki kia latou. 51I le lolotoga o lana tapuaki kia latou, na mavae loa a ia meia latou, o ano ki le lagi. 52Ti na lotou atolasio loa kiate ia, ti na lotou toe liliu loa ki Selusalemi i se fiafia lasi ai ;

53ti na lotou nonofo tuumau i le fale tapu, o fakavikiviki mo fakafetai ki le Atua.

Currently Selected:

Luka 24: FB2000

Highlight

Copy