SENESI 45
45
Fakaha o Sosefo ki ona tehina
1Nee mole kei feala te tataofi e Sosefo ona loimata ia mua o natou ae nee nonofo mo ia i te fale, pea nee kalaga leva ia ia: Ke fakaulu ki tua te hahai katoa. Pea nee nofo toko tahi leva ia Sosefo i te temi ae nee ina fakaha ai ia ia ki ona tehina. 2Nee tagi leva ia Sosefo o leo lahi, pea nee logo foki ki ai te kau Esipito, pea nee toe logo ki ai te fale o Falaone. 3Nee ui leva e Sosefo ki ona tehina: Ko au ko Sosefo! Pe kei mauli taku tamai? Kae nee mole feala ke tali e ona tehina, koteuhi kua natou hevaia i ona mua. 4Pea nee ui fenei e Sosefo ki ona tehina: Koutou fehohofi mai kia au. Pea nee natou fehohofi age leva kia ia. Pea nee ina ui leva: Ko au Sosefo, ko tokotou tehina, ae nee kotou fakatau ke ave ki Esipito. 5I te aho nei, aua naa koutou mamahi, pea aua naa koutou ita i takotou fakatau au. Ko te Atua ae nee ina fekaui au i okotou mua ke au hau ki te fenua aeni, ke haofaki ai okotou mauli. 6Koeni kua tau lua te hoge i te fenua, pea kei toe foki ni ihi tau e nima ae e mole toe feala ai he gaue ki te kele, pea e mole toe mau ai he fulumeto. 7Nee fekaui mai au e te Atua ke au mua mai ia koutou ki te fenua aeni, o tupu ke mauli ai tokotou hakoga i te fenua, pea ke koutou mauli foki o sisio ki te ofa lahi o te Atua kia koutou o haofaki koutou. 8Koia, e mole ko koutou ae nee koutou aumai au ki heni, kae ko te Atua. Kua fakanofo au e te Atua ko te tamai a Falaone, ko te pule o tona fale katoa, pea ko te kovana o te fenua katoa o Esipito. 9Koutou hahake fakavilivili ki taku tamai, o ui kia ia: Koeni te palalau o tou foha ko Sosefo: Kua fakanofo au e te Atua ko te pule o Esipito katoa, hifo mai kia au, aua naa ke toe tuai! 10E ke nofo anai i te fenua o Koseni, ke ke ovi mai kia au, mo au fanau, mo ou mokopuna, mo au pipi, mo au faga ovi, mo au tao, pea mo au mea fuli. 11I heni, e au fafaga anai ia koe, mo tou fale, pea mo au mea fuli, ke aua naa puli anai he mea kia koutou, koteuhi kei toe foki ni tau hoge e nima. 12Kua koutou sio mata tonu, pea kua sio mata foki toku tehina ko Pesamino, ko au ia Sosefo, aeni e palalau tonu atu kia koutou. 13Koutou fakamatala ki taku tamai toku kololia katoa i Esipito, mo te u mea fuli ae kua koutou sisio ki ai. Pea koutou fakavilivili o aumai taku tamai ki heni.
14Nee faufua leva ia Sosefo ki te kia o tona tehina, ia Pesamino, o tagi. Pea ne tagi leva Pesamino i tona kia. 15Nee toe faufua foki ia Sosefo ki ona tehina fuli o tagi, pea nee natou kamata loto toa leva i te palalau kia ia.
16Nee mafola leva te logo i te fale o Falaone kua kaku ake te u tehina o Sosefo kia ia. Nee fiafia lahi osi ia Falaone mo ana minisi i te mea aia. 17Pea nee ui leva e Falaone kia Sosefo: Ui ki ou tehina ke natou fai te mea aeni: Koutou fakauta te u amoga o akotou manu, pea koutou toe liliu ki te fenua o Kanaane; 18koutou too takotou tamai, pea mo okotou famili, pea koutou omai kia au. E au foaki atu anai kia koutou te kogafenua lelei tukupau o Esipito, pea e koutou kai anai te u fua lelei o te fenua. 19E au tuku atu anai kia koe te fakatotonu aeni, ke ke ui kia natou: Koutou fai te mea aeni: koutou too i te fenua o Esipito ni saliote ke aumai ai okotou ohoana, mo akotou fanau, mo takotou tamai. 20Ke aua naa koutou fakahemala ki te u mea ae ka koutou tuku anai, koteuhi e tuku atu anai kia koutou te u mea lelei tukupau o Esipito.
21Nee fai leva e te u foha o Iselaele te mea aia. Nee tuku leva e Sosefo ni saliote kia natou o mulimuli ki te fakatotonu a Falaone, pea mo te u meakai ki te fagona. 22Nee ina foaki foki kia natou ni kofu foou, o tahi mo ia te kofu, kae nee ina foaki leva kia Pesamino ni kofu e nima mo te u foi sikele* paaga e tolugeau. 23Pea nee ina fakamomoli leva ki tana tamai ni asino tagata e hogofulu o ave ai te u fua lelei tukupau o Esipito, pea mo te u asino fafine e hogofulu o ave ai te fulumeto, mo te u pane, mo te u meakai ki te fagona. 24Pea nee ina fekaui leva ona tehina ke olo, pea nee natou olo ai leva. Pea nee ina toe ui leva kia natou: Ke aua naa koutou fekeaki i te ala.
25Nee natou mavae leva i Esipito o olo ki te fenua o Kanaane, pea nee natou kaku leva ki tanatou tamai ko Sakopo. 26Nee natou ui fenei leva kia ia: Kei mauli ia Sosefo, pea koeni foki ko ia ae kua pule i te fenua katoa o Esipito. Kae nee momoko leva te mafu o Sakopo, koteuhi nee mole tui ia ia kia natou. 27Pea nee natou fakamatala leva kia ia te u palalau fuli ae nee fai e Sosefo kia natou. Nee toe sio foki ia Sakopo ki te u saliote ae nee fakamomoli ake e Sosefo ki tona fagona. I te mea aia, nee ofo leva te laumalie o tanatou tamai ko Sakopo. 28Pea nee ui leva e Iselaele: Kua feauga! Kei mauli toku foha ko Sosefo! E au alu, pea e au sio anai kia ia i mua o toku mate.
Currently Selected:
SENESI 45: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
SENESI 45
45
Fakaha o Sosefo ki ona tehina
1Nee mole kei feala te tataofi e Sosefo ona loimata ia mua o natou ae nee nonofo mo ia i te fale, pea nee kalaga leva ia ia: Ke fakaulu ki tua te hahai katoa. Pea nee nofo toko tahi leva ia Sosefo i te temi ae nee ina fakaha ai ia ia ki ona tehina. 2Nee tagi leva ia Sosefo o leo lahi, pea nee logo foki ki ai te kau Esipito, pea nee toe logo ki ai te fale o Falaone. 3Nee ui leva e Sosefo ki ona tehina: Ko au ko Sosefo! Pe kei mauli taku tamai? Kae nee mole feala ke tali e ona tehina, koteuhi kua natou hevaia i ona mua. 4Pea nee ui fenei e Sosefo ki ona tehina: Koutou fehohofi mai kia au. Pea nee natou fehohofi age leva kia ia. Pea nee ina ui leva: Ko au Sosefo, ko tokotou tehina, ae nee kotou fakatau ke ave ki Esipito. 5I te aho nei, aua naa koutou mamahi, pea aua naa koutou ita i takotou fakatau au. Ko te Atua ae nee ina fekaui au i okotou mua ke au hau ki te fenua aeni, ke haofaki ai okotou mauli. 6Koeni kua tau lua te hoge i te fenua, pea kei toe foki ni ihi tau e nima ae e mole toe feala ai he gaue ki te kele, pea e mole toe mau ai he fulumeto. 7Nee fekaui mai au e te Atua ke au mua mai ia koutou ki te fenua aeni, o tupu ke mauli ai tokotou hakoga i te fenua, pea ke koutou mauli foki o sisio ki te ofa lahi o te Atua kia koutou o haofaki koutou. 8Koia, e mole ko koutou ae nee koutou aumai au ki heni, kae ko te Atua. Kua fakanofo au e te Atua ko te tamai a Falaone, ko te pule o tona fale katoa, pea ko te kovana o te fenua katoa o Esipito. 9Koutou hahake fakavilivili ki taku tamai, o ui kia ia: Koeni te palalau o tou foha ko Sosefo: Kua fakanofo au e te Atua ko te pule o Esipito katoa, hifo mai kia au, aua naa ke toe tuai! 10E ke nofo anai i te fenua o Koseni, ke ke ovi mai kia au, mo au fanau, mo ou mokopuna, mo au pipi, mo au faga ovi, mo au tao, pea mo au mea fuli. 11I heni, e au fafaga anai ia koe, mo tou fale, pea mo au mea fuli, ke aua naa puli anai he mea kia koutou, koteuhi kei toe foki ni tau hoge e nima. 12Kua koutou sio mata tonu, pea kua sio mata foki toku tehina ko Pesamino, ko au ia Sosefo, aeni e palalau tonu atu kia koutou. 13Koutou fakamatala ki taku tamai toku kololia katoa i Esipito, mo te u mea fuli ae kua koutou sisio ki ai. Pea koutou fakavilivili o aumai taku tamai ki heni.
14Nee faufua leva ia Sosefo ki te kia o tona tehina, ia Pesamino, o tagi. Pea ne tagi leva Pesamino i tona kia. 15Nee toe faufua foki ia Sosefo ki ona tehina fuli o tagi, pea nee natou kamata loto toa leva i te palalau kia ia.
16Nee mafola leva te logo i te fale o Falaone kua kaku ake te u tehina o Sosefo kia ia. Nee fiafia lahi osi ia Falaone mo ana minisi i te mea aia. 17Pea nee ui leva e Falaone kia Sosefo: Ui ki ou tehina ke natou fai te mea aeni: Koutou fakauta te u amoga o akotou manu, pea koutou toe liliu ki te fenua o Kanaane; 18koutou too takotou tamai, pea mo okotou famili, pea koutou omai kia au. E au foaki atu anai kia koutou te kogafenua lelei tukupau o Esipito, pea e koutou kai anai te u fua lelei o te fenua. 19E au tuku atu anai kia koe te fakatotonu aeni, ke ke ui kia natou: Koutou fai te mea aeni: koutou too i te fenua o Esipito ni saliote ke aumai ai okotou ohoana, mo akotou fanau, mo takotou tamai. 20Ke aua naa koutou fakahemala ki te u mea ae ka koutou tuku anai, koteuhi e tuku atu anai kia koutou te u mea lelei tukupau o Esipito.
21Nee fai leva e te u foha o Iselaele te mea aia. Nee tuku leva e Sosefo ni saliote kia natou o mulimuli ki te fakatotonu a Falaone, pea mo te u meakai ki te fagona. 22Nee ina foaki foki kia natou ni kofu foou, o tahi mo ia te kofu, kae nee ina foaki leva kia Pesamino ni kofu e nima mo te u foi sikele* paaga e tolugeau. 23Pea nee ina fakamomoli leva ki tana tamai ni asino tagata e hogofulu o ave ai te u fua lelei tukupau o Esipito, pea mo te u asino fafine e hogofulu o ave ai te fulumeto, mo te u pane, mo te u meakai ki te fagona. 24Pea nee ina fekaui leva ona tehina ke olo, pea nee natou olo ai leva. Pea nee ina toe ui leva kia natou: Ke aua naa koutou fekeaki i te ala.
25Nee natou mavae leva i Esipito o olo ki te fenua o Kanaane, pea nee natou kaku leva ki tanatou tamai ko Sakopo. 26Nee natou ui fenei leva kia ia: Kei mauli ia Sosefo, pea koeni foki ko ia ae kua pule i te fenua katoa o Esipito. Kae nee momoko leva te mafu o Sakopo, koteuhi nee mole tui ia ia kia natou. 27Pea nee natou fakamatala leva kia ia te u palalau fuli ae nee fai e Sosefo kia natou. Nee toe sio foki ia Sakopo ki te u saliote ae nee fakamomoli ake e Sosefo ki tona fagona. I te mea aia, nee ofo leva te laumalie o tanatou tamai ko Sakopo. 28Pea nee ui leva e Iselaele: Kua feauga! Kei mauli toku foha ko Sosefo! E au alu, pea e au sio anai kia ia i mua o toku mate.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland