EVASELIO A SOANE 16
16
Gaohi kovii o natou e oofa kia Sesu
1Nee au fakaha kia koutou te u mea aia, o tupu ke aua naa natou liliu anai kia koutou ko he higaaga. 2E natou kapu anai koutou mai te u sinakoka; pea e hoko mai anai te hola, ko ae e ina tamatei koutou, e tui anai ia ko tana gaue lelei aia ki te Atua. 3Pea e natou fai anai te u mea aia kia koutou, koteuhi nee mole natou iloi te Tamai pee ko au. 4Kae nee au fakaha te u mea aia kia koutou, o tupu, ka hoko mai anai te hola, ke kotou manatui nee au fakaha atu natou kia koutou. Nee mole au fakaha atu natou kia koutou talu mai te kamataaga, koteuhi nee au nofo fakatahi mo koutou.
Gaue a te Laumalie Maonioni
5Kae i te lakaga nei e au alu ki ae nee ina fekaui mai au, pea e mole he tahi o koutou e ina fehui mai kia au: Pe e ke alu ki fea? 6Kae kua mamahi aupito okoutou loto koteuhi nee au fakaha atu kia koutou te u mea aia. 7Kae e au fakaha te mooni kia koutou: E lelei age kia koutou ke au alu, he kapau e mole au alu, e mole hau anai te Palakeleto* kia koutou; kae kapau e au alu, e au fekaui mai anai ia kia koutou. 8Pea ka hau anai ia, e ina fakamalamai anai te malamanei o uhiga mo te agahala, mo te faitotonu, pea mo te fakamaau: 9O uhiga mo te agahala, koteuhi e mole natou tui kia au; 10o uhiga mo te faitotonu, koteuhi e au alu ki te Tamai, pea e mole kotou toe sisio anai kia au; 11o uhiga mo te fakamaau, koteuhi kua fakamaaui te pule o te malamanei.
12E kei lahi te u mea e au mau ke fakaha atu kia koutou, kae e heeki feala ke kotou fua natou i te temi nei. 13Ka hau anai te Palakeleto*, te Laumalie o te mooni, e ina taki anai koutou i te mooni katoa; koteuhi e mole palalau anai ia maia ia totonu, kae e ina fakaha anai te u mea fuli e logo anai ia ki ai, pea e ina fakaha fakatomua atu anai kia koutou te u mea ka hoko mai. 14E ina fakakololiai anai au, koteuhi e ina too anai mai te mea ae a aku, pea e ina fagonogono atu anai ia kia koutou. 15Ko mea fuli e mau e te Tamai a aku natou; koia nee au ui ai, e ina too te mea ae a aku, pea e ina fagonogono atu anai ia kia koutou.
Palalau a Sesu ki tona mate, tana toe tuuake, tana toe liliu mai
16Ko he temi sii kei toe, pea e mole kotou toe sisio anai kia au; pea ko he temi sii age, pea e kotou toe sisio anai kia au, koteuhi e au alu ki te Tamai.
17Koia nee ui leva e ihi o ana tisipulo: Kotea te uhiga o te mea aeni e ina ui mai kia tatou: Ko he temi sii kei toe, pea e mole kotou sisio anai kia au, pea ko he temi sii age pea e koutou toe sisio anai kia au, pea: Koteuhi e au alu ki te Tamai? 18Pea nee natou ui: Kotea te uhiga o tana ui: Ko he temi sii kei toe? E mole matou iloi te mea e palalau ia ki ai.
19Nee iloi age e Sesu, nee natou fia fakafehui ia, pea nee ina ui age leva kia natou: E kotou fehuiaki ia koutou o uhiga mo te mea ae nee au palalau ki ai: Ko he temi sii kei toe, pea e mole kotou sisio anai kia au; pea e ko he temi sii age kei toe, pea e kotou toe sisio anai kia au. 20E mooni, e mooni, e au ui atu kia koutou, e kotou fetagihi anai, pea e kotou lalauga anai, kae e fakafiafia anai te malamanei: E kotou nonofo anai i te mamahi, kae e fetogi anai tokotou mamahi o fiafia. 21Ko te fafine, moka fanau, e ina logoi te mamahi, koteuhi kua hoko mai tona hola; kae, ka ina fanaui mai tana tamasii, e mole ina toe manatui anai tona mamahi, koteuhi ko tona fiafia i te kua tupu he tagata ki te malamanei. 22Mo koutou foki, e kotou nonofo i te aho nei i te mamahi; kae e au toe sio anai kia koutou, pea e fiafia anai okotou loto, pea e mole he tahi e ina too anai tokotou fiafia maia koutou. 23I te aho aia, e mole kotou toe fakafehui anai au ki he mea. E mooni, e mooni, e au ui atu kia koutou, ko te mea ae e kotou kole anai ki te Tamai, e ina foaki atu anai ia kia koutou i toku huafa. 24O au mai ki te lakaga nei, nee heeki kotou kole he mea i toku huafa. Kotou kole, pea e kotou mau anai, o tupu ke katoa tokotou fiafia.
25Nee au fakaha te u mea aia kia koutou i ni folafola fakatata. Kua hoko mai te hola e mole au toe palalau atu anai kia koutou i ni folafola fakatata, kae e au palalau fakahaha atu anai kia koutou ki te Tamai. 26I te aho aena e kotou kole anai i toku huafa, pea e mole au ui atu kia koutou e au faikole anai ki te Tamai kia koutou; 27koteuhi e ofa te Tamai totonu ia koutou, o tupu nee kotou ofa ia au, pea nee kotou tui nee au hau mai te Atua. 28Nee au hau mai te Tamai, pea nee au hau ki te malamanei; koeni e au mavae i te malamanei, o alu ki te Tamai.
29Pea nee ui age leva e ana tisipulo kia ia: Sio, koeni kua ke palalau fakahaha, pea e mole kei ke fakaaoga he folafola fakatata. 30I te lakaga nei, e matou iloi papau e ke iloi te mea fuli, pea e mole kei aoga ki he tahi ke ina fakafehui koe; koia ae kua matou tui ai nee ke hau mai te Atua. 31Nee tali age leva e Sesu kia natou: E kotou tui i te lakaga nei. 32Koeni, e hau te hola, pea kua hau foki ia, e veuki anai kotou ke kotou mavetevete, pea e kotou tuku toka tahi anai au; kae e mole au toko tahi, koteuhi e nofo te Tamai mo au. 33Kua au fakaha te u mea aia kia koutou, o tupu ke kotou mau te tokalelei ia au. E koutou mau anai ni mamahi i te malamanei; kae koutou kataki, kua au malo i te malamanei.
Currently Selected:
EVASELIO A SOANE 16: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
