EVASELIO A SOANE 18
18
Sakilifisio o te Alo o te Atua
1I te osi o tana fakaha te u mea aia, nee alu leva ia Sesu mo ana tisipulo ki te tahi fahai o te liua o Setolone, ki te faahi nee tuu ai he oloto, pea nee ulu leva ia ki ai mo ana tisipulo.
2Nee toe iloi foki e Sutasi, ae nee ina fakatau ia, te faahi aia, koteuhi nee ko te fakatahiaga mahani aia o Sesu mo ana tisipulo. 3Koia nee taki age leva ki ai e Sutasi he solia mo he u ofisa ae nee fekaui age e te kau pule faisakilifisio mo te kau faliseo, pea nee natou olo age mo he u malama taki, mo he u afi taume, pea mo he u mahafu tau.
4I te iloi e Sesu te u mea fuli ae e tonu ke hoko kia ia, nee haele mai leva ia kia natou, o ui: Ko ai ae e kotou kumi? 5Nee natou tali leva kia ia: Ko Sesu mai Nasaleti. Nee ui leva e Sesu kia natou: Ko au. Pea nee tuu mo natou ia Sutasi, ae nee ina fakatau ia. 6I te ui a Sesu kia natou: Ko au, nee natou homuli leva pea nee natou fetokai ki te kele.
7Nee toe fehui age leva e Sesu kia natou: Ko ai ae e kotou kumi? Pea nee natou ui age leva: Ko Sesu mai Nasaleti. 8Nee tali leva e Sesu: Kua au ui atu kia koutou ko au. Pea kapau ko au ae e kotou kumi, koutou tuku natou aeni ke natou olo. 9Nee ina ui te mea aia, ke fakahoko te folafola ae nee ina fakaha: Nee mole au tuku ke puli he tahi o natou ae nee ke foaki mai kia au.
10Ko Simone Petelo, ae nee nofo mo he heleta, nee ina tohoi ake leva te heleta, pea nee ina taai te faifekau a te pule faisakilifisio, pea nee ina motuhi ai tona taliga matau. Ko te higoa o te faifekau aia ko Malekusi. 11Pea nee ui age leva e Sesu kia Petelo: Toe tuku tau heleta ki tona tukuaga. Pe e mole au inu anai te ipu nee foaki mai e te Tamai ke au inu?
Sesu ia mua o Anasi mo Kaifa
12Ko te solia, mo te pule solia, pea mo te u ofisa a te kau Sutea, nee natou puke leva Sesu, pea nee natou haihai leva ia. 13Nee natou uluaki taki leva ia ki te api o Anasi; koteuhi ko te tamai aia o te ohoana o Kaifa, ae nee pule faisakilifisio i te tau aia. 14Pea ko Kaifa ae nee ina tuku te tonu aeni ki te kau Sutea: E lelei age ke mate he tagata e tahi ki te hahai.
Fakafisi tua tolu a Petelo
15Nee mulimuli ia Simone Petelo ia Sesu, mo he tahi age tisipulo. Nee iloi te tisipulo aia e te pule faisakilifisio, pea nee ulu leva ia mo Sesu ki te loto malae o te pule faisakilifisio; 16kae nee nofo leva Petelo i fafo o ovi ki te matapa. Ko te tisipulo ae nee iloi e te pule faisakilifisio, nee toe ulu ake leva ia ki fafo, o palalau ki te fafine leo matapa, pea nee ina fakaulu age leva Petelo ki loto. 17Pea nee ui age leva e te fafine leo matapa kia Petelo: Ko koe foki, pe e mole ke kau i te u tisipulo a te tagata aeni? Nee ina tali age leva: Kailoa, e mole au kau au i ai. 18Ko te kau faifekau mo te kau ofisa, ae nee tutuu i ai, nee natou tafu leva he afi, koteuhi nee momoko, pea nee natou fakamafana leva i ai. Nee nofo Petelo mo natou, o fakamafana.
19Nee fakafehui leva Sesu e te pule faisakilifisio o uhiga mo ana tisipulo pea mo tana akonaki. 20Nee tali leva e Sesu kia ia: Nee au palalau fakahaha ki te malamanei; nee au akonaki tuumau i te sinakoka pea mo te fale tapu, ae nee fakatahi ai te kau Sutea katoa, pea nee mole au palalau fakafufu ki he mea. 21Kotea e ke fakafehui ai au? Fehui kia natou ae nee logo kia au, o uhiga mo te u mea nee au fakaha kia natou; koeni, e iloi e natou aia te mea nee au palalau ki ai. 22I te u palalau aia, ko he tahi o te kau ofisa, ae nee tuu i ai, nee ina paaki leva Sesu, o ui: Pe e ke tali fena ki te pule faisakilifisio? 23Nee tali leva e Sesu kia ia: Kapau nee au palalau kovi, fakaha mai tona kovi; pea kapau nee au palalau lelei, kotea e ke paaki ai au?
24Nee fekau leva e Anasi ke ave haihai ia kia Kaifa, te pule faisakilifisio.
25Nee nofo leva Simone Petelo i ai, pea nee fakamafana ia. Nee ui age leva e he tahi kia ia: Pe e mole kau mo koe ki ana tisipulo? Nee fakafisi leva ia, o ui: Kailoa, e mole au kau ai. 26Ko he tahi o te kau faifekau a te pule faisakilifisio, ko he kaiga o ae nee tuusi e Petelo tona taliga, nee ina ui leva: Pe nee mole au sio kia koe mo ia i te oloto? 27Nee toe fakafisi age leva Petelo ki ai. Pea i te lakaga tonu aia nee uua leva te moa tagata.
Sesu ia mua o Pilato
28Nee natou taki leva Sesu mai te fale o Kaifa o ave ki te peletolio; ko te pogipogi uhu aia. Nee mole natou ulu leva ki te peletolio, ke aua naa natou uli, pea ke feala tanatou kai te Pasikate. 29Nee ulu age leva Pilato ki fafo o alu kia natou, pea nee ina ui: Kotea te hala e kotou tuku ki te tagata aeni? 30Nee natou tali leva kia ia: Kapau nee mole ko he tagata agakovi aia, nee mole matou aumai ia kia koe. 31I te mea aia nee ui leva e Pilato kia natou: Kotou puke ia, pea kotou fakamaaui ia o mulimuli ki takotou lao. Nee ui leva e te kau Sutea kia ia: E mole fakagafua mai kia matou ke matou tamatei he tagata. 32Nee tupu ke fakahoko ai te folafola nee fakaha e Sesu o uhiga mo te fahiga mate e tonu ke mate ai ia ia.
33Nee toe ulu age leva Pilato ki te peletolio pea nee ina paui age leva Sesu, o ui kia ia: Pe ko te hau ia koe o te kau Sutea? 34Nee tali leva e Sesu: Pe e hau maia koe totonu te mea aia, pe nee palalau atu ni ihi kia koe o uhiga mo au? 35Nee tali leva e Pilato: Pe ko au ko he Sutea? Kua aumai ia koe kia au e tou hahai mo te kau pule faisakilifisio: Kotea nee ke fai? 36Nee tali leva e Sesu: E mole kau toku puleaga hau i te malama aeni. Kapau nee kau toku puleaga hau i te malama aeni, nee tau anai aku tagata faifekau kia au ke aua naa tuku au ki te kau Sutea; kae i te lakaga nei e mole kau toku puleaga hau i lalo nei. 37Nee ui leva e Pilato kia ia: Kapau koia, pe e ke hau ia koe? Nee tali age leva e Sesu: E ke ui ia, e au hau. Nee au tupu pea nee au hau ki te malamanei o fakamooni ki te mooni. Ko natou fuape e kau ki te mooni, e natou fakalogo ki toku leo. 38Nee ui age leva e Pilato kia ia: Kotea ia te mooni?
Palapasi; Sesu
I te osi o tana palalau aia, nee toe ulu leva ia ia ki fafo ki te kau Sutea, o ui age kia natou: E mole au mau he hala ia ia. 39Kae e i ai he aga fakafenua a koutou, ke au fakaateaina atu kia koutou he toko tahi i te aho o te Pasikate, pe e kotou loto ke au fakaateaina atu kia koutou te hau o te kau Sutea? 40Pea nee natou toe kalaga fuli leva: Kailoa, e mole ko ia, kae ko Palapasi. Kae ko Palapasi nee ko he tagata kaihaa ia.
Currently Selected:
EVASELIO A SOANE 18: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
