EVASELIO A LUKA 24
24
Toe tuuake a Sesu
1I te uluaki aho o te vahaa, nee olo leva te u fafine ki te tanuma, i te mafoata, o ave te u mea fakamagoni ae nee natou teuteui. 2Nee natou mau atu leva te maka kua tekai mai te tanuma; 3pea i tanatou hu ki loto nee mole natou mau leva te sino o te Aliki Sesu. 4I te hevaia o tanatou fakakaukau, koeni, nee ha leva kia natou ni tagata e toko lua, nee teu gigila. 5I tonatou matataku, nee natou punou ifo leva onatou mata ki te kele; kae nee na ui age leva kia natou: Kotea e kotou kumi ai i te kau mate ia ae e mauli? 6E mole i heni ia, kae kua toe tuuake ia. Koutou manatui tana palalau atu kia koutou, kae kei nofo ia i Kalilea, 7o ui: E tonu ke tuku te Foha o te tagata kia nima o te kau agahala, ke tutuki ia ki te koluse, pea ke toe tuuake ia i te tolu aho. 8Pea nee natou manatui leva te u folafola a Sesu.
9I tanatou liliu mai te tanuma, nee natou fakaha leva te u mea fuli aena ki te toko hogofulu ma tahi pea mo natou fuli ake ae. 10Ko natou ae nee natou fakaha te u mea aena ki te kau tisipulo, ko Malia mai Maketala, mo Soana, mo Malia fae a Sakopo, mo te u fafine ake ae nee olo mo natou. 11Nee hage te u mea aena ki te kau apositolo ko ni moemisi pea nee mole natou tui ki te u fakamatala a te u fafine.
12Pea nee tuu ake leva ia Petelo ki oluga, o lele ki te tanuma. I tana punou ifo ke fakasiosio ki loto o te tanuma, nee sio leva ia ki te u kie atea e tuku i te kele; pea nee alu leva ia i te punamauli i te mea kua hoko.
Tisipulo e toko lua i te ala o Emausi
13Pea koeni, i te aho pe aia, nee olo ni tisipulo e toko lua ki he kolo nee higoa ko Emausi, ae nee mamao mai Selusalemi i ni kilometa e hogofulu ma tahi; 14pea nee na palalau ki te u mea fuli nee hoko. 15I te lolotoga o tana palalau mo tana talanoa, nee fakaoviovi age leva ia Sesu kia naua o kau fagona mo naua i te ala. 16Kae nee taofi ona mata ke aua naa na iloi ia ia. 17Nee ui leva e Sesu kia naua: Kotea te u mea e kolua palalau ki ai? Pea nee na tutuu leva, pea ne ha tona lotomamahi i ona mata. 18Pea nee tali leva kia ia he tahi o naua, nee higoa ko Keleopasi: Pe ko koe toko tahi nee nofo matapule i Selusalemi nei e mole ke iloi te mea nee hoko ia aho aeni? Pea nee ui leva e Sesu kia naua: Kotea te u mea aia? 19Pea nee na tali leva kia ia: Te u mea ae nee hoko kia Sesu mai Nasaleti, nee ko he polofeta malohi ia i tana u gaue mo tana u folafola ia mua o te Atua pea mo mua o te hahai katoa. 20Nee tuku age ia e te kau pule faisakilifisio, pea mo omatou kau taki, ke tautea ia ki te mate, pea ke tutuki ia ki he koluse. 21Nee matou falala ko ia ae ka ina haofaki anai ia Iselaele; kae ko tona tolu aho aeni talu mai te hoko o te u mea fuli aena. 22E mooni nee fakaoho matou e he u fafine o matou, nee natou olo i te mafoata ki te tanuma, 23pea i tanatou mole mau tona sino, nee natou omai o ui mai nee ha age kia natou he u aselo o na tala age kua mauli ia. 24Ko ihi foki o natou ae nee nonofo mo matou, nee natou olo foki ki te tanuma, pea nee natou mau te u mea fuli o hage ko tona fakaha mai e te u fafine; kae ko ia, nee mole natou sisio kia ia. 25Pea nee ui age leva e Sesu kia naua: Ei tagata hala atamai, pea mo tui gataa ki te u mea fuli nee fakaha e te kau polofeta! 26Pe nee mole tonu ke mamahi te Kilisito i te u mea aena, pea ke ulu ia ki tona kololia? 27Pea, nee ina kamata leva maia Moisese pea mo te kau polofeta fuli, tana fakamahino kia naua i te Tohi tapu katoa te u mea o uhiga mo ia. 28I tanatou kaku leva ki te kolo nee tonu ke na nonofo ai, pea nee hage leva ia e fia hoko atu tona fagona. 29Kae nee na faiga age leva kia ia, o ui: Nofo mo maua, koteuhi kua ovi te afiafi pea ka fakaosi te aho. Nee ulu leva ia ki fale, ke nofo mo naua. 30I tana kai mo naua i te laupapa, nee ina too leva te pane; pea, i te osi o tana fakafetai, nee ina tofitofi leva ia, o foaki age kia naua. 31Pea nee ava leva ona mata, pea nee na iloi leva ia ia; kae nee puli leva ia mai ona mua. 32Pea nee na ui leva: Pe nee mole vevela ota loto, i tana palalau mai kia taua i te ala, pea mo tana fakamahino mai kia taua te Tohi tapu?
Ha foou a Sesu i te aho aena
33Nee na tutuu ake leva ki oluga i te hola pe aia, o toe liliu ki Selusalemi, pea nee na mau leva te toko hogofulu ma tahi mo natou ae nee nonofo mo natou, kua fakatahi, 34pea nee natou ui age leva kia naua: E mooni! kua toe tuuake te Aliki, pea nee ha ia kia Simone. 35Nee na fakamatala leva te mea nee hoko kia naua i te ala, pea mo tana iloi ia i te tofitofi o te pane.
36I tanatou lolotoga talanoa, nee tuu leva ia Sesu totonu i te lotomalie o natou, o ui: Ke ia koutou te tokalelei! 37Nee natou matataku lahi, mo tete lahi, koteuhi nee natou ui kua natou sisio ki he laumalie. 38Kae nee ina ui leva kia natou: Kotea e kotou matataku ai, pea kotea e tupu ai ni manatu fena i okotou loto? 39Koutou sisio mai ki oku nima mo oku vae, ko au totonu; kotou fafa mai kia au pea kotou sisio: E mole mau e te laumalie he kakano pea mo ni hui, o hage ko au aeni, e kotou sisio mai ki ai.
40I tana fai te palalau aena, nee ina fakaha leva kia natou ona nima mo ona vae. 41Kae nee mole natou tui aipe ko ia logo ai te lahi o tonatou fiafia mo tanatou punamauli, pea nee ui leva e Sesu kia natou: Pe e koutou mau i heni he meakai? 42Nee natou foaki age leva kia ia he potu ika tunu mo he laui meli. 43Pea nee ina too leva ia, o kai i onatou mua.
Gaue foou a te toko hogofulu ma tahi
44Pea nee ina ui leva kia natou: Koeni te u mea ae nee au fakaha atu kia koutou kei au nofo mo koutou: E tonu ke fakahoko te u mea fuli nee tohi kia au i te lao a Moisese, mo te kau polofeta, pea mo te u pesalemo. 45Pea nee ina avahi leva onatou atamai, ke natou mahino ki te Tohi tapu. 46Pea nee ina ui leva kia natou: E tuu foki i te Tohi: E mamahi anai te Kilisito, pea e toe tuuake anai ia mai te kau mate i te tolu aho, 47pea e fakaha anai te fakahemala mo te fakamolemole o te u agahala i tona huafa ki te u puleaga fuli, o kamata mai Selusalemi. 48Ko koutou e ko te kau tagata fakamooni koutou o te u mea aia. 49Pea koeni, e au fekaui mai anai kia koutou te fakapapau a taku Tamai; kae ko koutou, koutou nonofo i te kolo o kaku ki tokotou kofu e te malohi mai oluga.
Asesione
50Nee ina taki leva natou o kaku ki Petania, pea nee ina hiki ake leva ona nima o tapuaki kia natou. 51I te lolotoga o tana tapuaki kia natou nee mavae leva ia maia natou, pea nee too ake leva ia ki te lagi. 52Pea nee natou atolasio leva kia ia, pea nee natou toe liliu leva ki Selusalemi mo he fiafia lahi; 53pea nee natou nonofo hohoko i te fale tapu, o fakavikiviki mo fakafetai ki te Atua.
Currently Selected:
EVASELIO A LUKA 24: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
