EVASELIO A LUKA 5
5
Kalagai o te u uluaki tisipulo
1I te temi aia, nee tuu ia Sesu i te matatai o Senesaleti, pea nee fakapupu age leva te hahai kia ia ke fakalogo ki te folafola a te Atua, 2nee sio leva ia ia ki ni vaka e lua i te matatai, ae kua hihifo mai ai te u tagata tautai o fufulu onatou kupega. 3Nee hopo leva ia ia ki he tahi o te u vaka aena, ko te vaka o Simone, pea nee ina kole leva kia ia ke fakamamao fakasiisii mai te kele. Pea nee hekaheka leva ia ia ki lalo o akonaki ki te hahai mai te loto vaka.
4I te osi o tana palalau, nee ina ui leva kia Simone: Hoho atu ki te loloto, pea kotou aau okotou kupega o fagota. 5Nee ui age leva e Simone kia ia: Pule, nee matou gaue i te po katoa, o noa; kae, i tau folafola, e au aau anai te kupega. 6Nee natou aau leva te kupega, pea nee natou mau leva ni ika lahi osi, pea nee kamata motumotu tonatou kupega. 7Nee natou taukalo leva ki onatou kau tautai i te u vaka ake ae ke omai o tokoni mai kia natou. Nee natou omai leva, pea nee natou fafao leva te u vaka lualua o fofonu, pea kua na vave mou foki. 8I tana sio ki te mea aena, nee to ifo leva ia Simone Petelo ki tuli o Sesu, o ui: Aliki, fakamamao atu ia au, he ko au ko he tagata agahala, 9koteuhi nee manavahe ia ia mo natou fuli ae nee nonofo mo ia, o tupu ko te lahi o te u ika nee natou mau. 10Nee tatau foki mo Sakopo, mo Soane, foha o Sepeteo, ko te kau gelu a Simone. Koia nee ui ai leva e Sesu kia Simone: Aua naa ke mataku; koeni e ke liliu anai ko he tagata tautai o tagata. 11Pea nee natou toho ake leva te u vaka ki uta, pea nee natou tuku leva te u mea fuli, pea nee natou muli leva ia ia.
Fakamauli o he tagata kilia
12Nee nofo ia Sesu i he tahi o te u kolo; pea koeni, ko he tagata nee kilia katoa, i tana sio kia Sesu, nee fakamapee ifo leva ia ia ki te kele, o fai kia ia te kole aeni: Aliki, kapau e ke loto ki ai, e ke fealagia toku fakamaa. 13Nee faoi leva e Sesu tona nima o fafa kia ia, o ui: E au loto ki ai, ke ke maa. I te temi pe aena, nee mavae leva te kilia ia ia. 14Pea nee ina fakatotonu age leva ki te tagata ke aua naa ina fakaha ki he tahi. Kae nee ina ui age kia ia, alu o fakaha ia koe ki te tagata faisakilifisio, pea ke momoli ki tou fakamaa te mea ae nee fakatotonu e Moisese, o tupu ke liliu te mea aia kia natou ko he fakamooni.
15Nee toe asilisili mafola ai tona logologona, pea nee omai te hahai o kaugamalie osi o fakalogo kia ia pea ke ina fakamauli natou i onatou mahaki. 16Pea ko ia, nee fakamamao ia ia ki te u potu lavaki, o faikole i ai.
Fakamauli o he tagata palalisia
17I he aho nee akonaki ai Sesu, nee nofo i ai he kau faliseo, mo he kau toketa o te lao, ae nee omai mai te u kolo fuli o Kalilea, mo Sutea, mo Selusalemi; pea nee ha te mafimafi o te Aliki i te fakamauli o te hahai mahaki. 18Pea koeni, nee amo mai e he kau tagata he tagata palalisia i he palepale, pea nee natou kumi ke fakaulu ia ia ki loto pea ke tuku ia ia kia mua o Sesu. 19Kae nee mole natou mau he kogamea ke fakaulu ai ia ia, o tupu ko te kaugamalie o te hahai. Pea nee natou fekakei leva ki te fakafisi o te fale, pea nee natou hifoaki leva ia i he ava, mo tona palepale, ki lotomalie o te fakatahi, ia mua o Sesu. 20I tana sio ki tanatou tui, nee ui leva e Sesu: Tagata, kua fakamolemole kia koe au agahala. 21Nee kamata palalau leva te kau sekelipa mo te kau faliseo, o ui: Ko ai te tagata aeni e lea patapata? Ko ai e feala ke ina fakamolemole te u agahala? Pe e mole ko te Atua toko tahi? 22Kae i te iloi e Sesu anatou manatu, nee palalau leva ia ia, o ui kia natou: Kotea e kotou mau ai ni manatu fena i okotou loto? 23Kofea e faigafua age i te ui: Kua fakamolemole au agahala, mo te ui: Tuu ki oluga, o haele? 24Kae o tupu ke kotou iloi e mau e te Foha o te tagata i te kele te pule ke fakamolemole ai te u agahala, pea nee ina ui leva ki te tagata palalisia: E au fakatotonu atu kia koe: Tuu ki oluga, too tou palepale, pea ke alu ki tou api. 25Pea nee tuu ake leva ia ia ki oluga i te temi pe aena, ia mua o natou, o too te palepale ae nee moe ai, pea nee alu leva ia ia ki tona api, mo fakafetai ki te Atua. 26Nee natou punamauuli fuli, pea nee natou fakakololia ki te Atua; pea nee natou fonu i te mataku, o ui: Kua tou sio i te aho nei ki ni mea fakaofolele.
Kalagai o Levi
27I te osi o te mea aena, nee mavae leva ia Sesu i hena, pea nee sio leva ia ia ki he tagata popelikano, nee higoa ko Levi, ae nee heka i te pilo tukuhau. Nee ui leva e Sesu kia ia: Mulimuli mai ia au. 28Pea nee tuku leva e Levi te u mea fuli, kae tuu ake leva ia ia ki oluga, o mulimuli ia Sesu.
Kalagai e Sesu ni kau agahala kae mole ko ni kau agatonu
29Nee fai leva e Levi he kaitahi lahi kia Sesu i tona api, pea nee nofo fakatahi mo natou he kau popelikano kaugamalie mo ihi age hahai i te laupapa kai. 30Nee femumuhuaki leva te kau faliseo mo te kau sekelipa, o ui ki ana tisipulo: Kotea e kotou kai ai mo inu fakatahi ai mo te kau popelikano pea mo te kau agahala? 31Nee ui leva e Sesu kia natou: E mole ko natou ae haohaoa e aoga ki ai he toketa, kae ko te kau mahaki. 32Nee mole au hau o kalagai ki te fakahemala ni tagata agatonu, kae ni tagata agahala.
Sesunio; kie foou mo utele* foou
33Nee natou ui leva kia ia: E sesunio mo faikole putuputu te u tisipulo a Soane, o hage ko te u tisipulo a te kau faliseo, kae e kakai pe mo iinu au tisipulo. 34Nee tali leva e Sesu kia natou: Pe e feala ke kotou fakasesunio te u kaumea o te tagata ohoana kae kei nofo te tagata ohoana mo natou? 35E hoko mai anai te u aho ae e too ai anai te tagata ohoana maia natou, pea e natou sesunio anai i te u aho aena. 36Nee ina tuku foki kia natou he folafola fakatata: E mole haei e he tahi i he kofu foou he mahaei kie ke tapunui ai he kofu afea; koteuhi e ina haei anai te kofu foou, pea e mole alu tahi te kofu foou mo te kofu afea. 37Pea e mole tuku e he tahi he vino foou ki ni utele afea; koteuhi e motumotuhi anai e te vino foou te u utele afea, pea e puli noa anai te vino, pea e maumau anai te u utele; 38kae e tonu ke tuku te vino foou ki ni utele foou. 39Pea e mole pe he tahi, nee inu ki he vino matua, e toe loto anai ki he vino foou, koteuhi e ina ui: E lelei age te vino matua.
Currently Selected:
EVASELIO A LUKA 5: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
