EVASELIO A MALEKO 12
12
Folafola o te u tagata faivite
1Nee kamata leva e Sesu tana palalau kia natou i ni folafola fakatata. Nee to leva e he tagata he vite. Pea nee ina takatakai leva aki he a, pea nee ina keli leva he tatauaga vino, pea nee ina fakatuu leva he tule; pea nee ina tuku leva te vite ki ni tagata faivite, pea nee mavae leva ia ia i te fenua. 2I te temi toli o te vite, nee ina fekaui leva he tagata faifekau ki te kau tagata faivite, o tupu ke ina tali maia natou he vaega i te fua o te vite. 3Nee natou puke leva ia ia, o haha, pea nee natou fekau leva ia ia ke liliu atea. 4Nee ina toe fekaui leva he tahi tagata faifekau kia natou; nee natou haha leva ia ia i tona ulu, pea nee natou laukovii ia ia. 5Nee ina toe fekaui leva he tahi tagata faifekau, ko tona tolu aia, ae nee natou fakapogi leva; pea mo ni ihi age o kaugamalie, kae nee natou haha ihi pea natou fakapogi ihi. 6Pea nee kei ina mau he foha ofaina; nee ina fekaui leva ia ia fakamuli kia natou, o ui: E natou fakaapaapa anai ki toku foha. 7Kae nee ui leva e te u tagata faivite aena: Koeni te foha ae e mau tofiga; kotou omai, tou fakapogi ia ia, pea tou mau anai te tofiga. 8Pea nee natou puke leva ia ia, o fakapogi, pea nee natou li leva ia ia ki te tua vite. 9Kotea anai ka fai e te pule o te vite? E hau anai ia ia o tamatei te kau tagata faivite, kae e ina foaki anai te vite ki ni ihi age.
10Pe nee mole kotou lau te folafola aeni o te Tohi:
Ko te maka ae nee liaki e te kau tufuga
Nee liliu ko te maka tafito o te agele;
11 Ko te mea aena nee hau mai te Aliki,
Pea ko he mea fakapunamauli ki omatou mata?
12Nee natou kumi ke puke ia ia, kae nee natou tuania ia te hahai. Nee natou mahino leva nee fakaha e Sesu te folafola fakatata aena kia natou. Pea nee natou mavae leva ia ia, o olo.
Tukuhau kia Sesale
13Nee natou fekaui leva kia Sesu ni ihi o te kau faliseo mo te kau Helote, o tupu ke fakamautoka ia ia i ana folafola totonu. 14Pea nee natou omai leva, o ui kia Sesu: Pule, e matou iloi e ke mooni, pea e mole ke tuania pe he tahi; koteuhi e mole ke sio ki te mea e ha ki tua i te u tagata, pea e ke ako te ala o te Atua o mulimuli ki te mooni. Pe e gafua, pee kailoa, ke foaki te tukuhau kia Sesale? Pe e tonu ke matou foaki pe e mole tonu ke matou foaki ia ia? 15Nee iloi leva e Sesu tonatou malualoi, pea nee ina tali leva kia natou: Kotea e kotou ahiahii ai au? Kotou aumai age he foi tenalio, ke au sio ki ai. 16Nee natou avage leva he foi tenalio; pea nee fehui leva e Sesu kia natou: Ko te paaki mo te fakailoga o ai ae e tuu i ai? Nee natou tali leva: O Sesale. 17Pea nee ina ui leva kia natou: Kotou liufaki kia Sesale te mea a Sesale, pea kotou liufaki ki te Atua te mea a te Atua. Pea nee natou punamauuli osi kia ia.
Ko te kau Satuseo mo te toe tuuake
18Ko te kau Satuseo, ae nee ui e mole he toe tuuake, nee omai leva kia Sesu o fai kia ia te fehui aeni: 19Pule, koeni te mea ae nee fakatotonu mai e Moisese kia matou: Kapau e mate te tehina o he tagata, kae e ina tuku tona ohoana hala fanau, e toe ohoana anai tona tehina mo te fafine aena, ke tupu ai he hakoga ki tona tehina. 20Kae nee i ai ni tehina e toko fitu. Nee ohoana leva te uluaki, pea nee mate leva ia ia kae nee mole tupu hona hakoga. 21Nee ohoana leva te lua mo te fafine aena, pea nee mate leva ia ia kae nee mole hona hakoga. Pea nee toe fena ki te tolu, 22pea nee mole tuku e he tahi pe i te toko fitu aia he hakoga. I te osi o natou fuli, nee mate leva te fafine. 23I te toe tuuake, ko ai ia natou ka ohoana anai mo te fafine? Koteuhi nee ohoana fuli te toko fitu aia mo ia. 24Nee tali leva e Sesu kia natou: Koeni te tupuaga o takotou faihala: E mole kotou mahino ki te Tohi pea mo te mafimafi o te Atua. 25Koteuhi i te toe tuuake o te kau mate, e mole too anai e te u tagata ni fafine, pee ko te u fafine ni tagata, kae e natou liliu anai o hage ko te kau aselo i te atu lagi. 26Ki te toe tuuake o te kau mate, pe nee mole kotou lau, i te tohi a Moisese, te mea ae nee fakaha e te Atua kia ia i te pupuga vao: Ko au ko te Atua o Apalahamo, ko te Atua o Isaake, pea ko te Atua o Sakopo? 27Ko te Atua e mole ko te Atua o te kau mate, kae ko te Atua o te kau mauuli. E kotou faihala lahi aupito.
Te fakatotonu lahi toko tahi
28Ko he tahi o te kau sekelipa, ae nee fakalogo ki tanatou palalau, pea nee sio ki te lelei o te tali e Sesu ki te kau Satuseo, nee fakaoviovi age leva, o fehui kia ia: Ko te fekau fea e lahi osi i te u fekau fuli? 29Nee tali leva e Sesu: Koeni te uluaki:
Fakalogo, Iselaele: Ko te Aliki, totatou Atua, ko te Aliki ia e tahi; 30pea:
E ke ofa anai ki te Aliki, tou Atua, i tou loto katoa, mo tou laumalie katoa, mo tou atamai katoa, pea mo tou malohi katoa.
31Koeni tona lua:
E ke ofa anai ki tou oloi o hage ko koe totonu.
E mole he tahi age fakatotonu e lahi age i te u fakatotonu aena. 32Nee ui leva e te sekelipa kia ia: E lelei, Pule; kua ke fakaha te mooni ko te Atua e tahi, pea e mole he tahi age Atua ia ia, 33pea ko te ofa kia ia i te loto katoa, mo te atamai katoa, mo te laumalie katoa, mo te malohi katoa, pea mo te ofa ki te oloi o hage kia kita totonu, e lahi age i te u failaulau fuli mo te u sakilifisio fuli. 34I te iloi e Sesu tana tali poto, nee ina ui leva kia ia: E mole ke mamao i te puleaga o te Atua. Pea nee mole pe he tahi nee feala ke ina toe fai ni fehui kia ia.
Kilisito ko te foha o Tavite
35Nee hoko atu te akonaki a Sesu i te fale tapu, o ui: Kotea e ui ai e te kau sekelipa ko te Kilisito ko te foha o Tavite? 36Koteuhi nee ui foki e Tavite i te Laumalie Maonioni:
Nee ui e te Aliki ki toku Aliki:
Heka ia koe i toku fahai matau,
O kaku ki taku fakaliliu ou fili ko tou hiliaga vae. 37Nee fakahigoa ia ia e Tavite totonu ko te Aliki; pe e feafeai anai ke liliu ia ia ko tona foha? Pea nee fakalogo he hahai tokolahi kia ia i te fiafia.
Valoki o te kau sekelipa
38Nee ui leva e Sesu kia natou i tana akonaki: Kotou tokaga aupito ki te kau sekelipa, ae e manako ki te taka mo te u kofu loloa, pea ke fakamalo age kia natou i te u kogamea hahai; 39ae e natou kumi te u hekaaga lelei i te u sinakoka, mo te u nofoaga lelei i te u kaitahi; 40ae e natou kaipo te u fale o te u finetaka, pea e natou fai ni kole loloa ke fakamatalelei. E fakamaaui anai natou o mamafa osi.
Molaga a te finetaka
41Nee heka leva ia Sesu o tuha tonu mo te foi puha tanaki koloa o te fale tapu, o sio ki te tuku e te hahai anatou paaga ki ai. Ko he kau mau koloa kaugamalie nee natou laku ki ai he paaga lahi osi. 42Nee hau foki mo he finetaka masiva, pea nee ina tuku leva ki ai ni foi piesi liliki e lua, ko tona tatau ko he satimi e tahi. 43Pea nee paui leva e Sesu ana tisipulo, o ui kia natou: E au ui mooni atu kia koutou, nee foaki e te finetaka masiva aeni, o lahi age ia natou fuli ae nee tuku paaga ki te foi puha tanaki koloa; 44koteuhi nee natou foaki fuli te fakalaka o onatou koloa, kae ko te finetaka, i tona masiva, nee ina foaki te mea katoa ae e ina mau, te mea katoa ae nee tonu ke mauli ai.
Currently Selected:
EVASELIO A MALEKO 12: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
