John 6
6
Jisü no Timi 5,000 Loji
1Ado hami thiu Jisü ye Galilee züghi (tiye Tiberias züghi ghí pi cheni) mükü küdau kathasü putou wue, 2ikelo timi kutomo no Jisü no küsükinimi shipivi keu vechewo amichipu kümlàqo shikeu ithulupüa kehu panongu ye Jisü pape ighie. 3Tipathiu Jisü no naghuto küdau iku püzü pa khopemiqo gholo iqa ae. 4Jewmi Hechekulu ghulhu Tiqhitini ye kupunukhoi ake.
5Kughou Jisü no timi kutomo pa küdau chekeu pishipuwo ithulu keno, pa no Philip vilo pi, “Ningu ye timi hipaqo ghenguno khile no achuqupu qhüni kea?” 6Jisü ye pa peju nike ghengu likhi no hi iniju ke, kughengu pa ye kiu shinishi akeno pa mlo lo kümsü pe ngove no ake.
7Philip no pa khochile, “Kümtsü pelo asho kimiki lakhi chulu penike qhü kepu shi namu ampe tüxa jume nguno akichiù#6:7 Momu denarii 200 avehupu shi nanie.”
8Pa khopemi kütau, tiye Simon Peter thiküzüu Andrew, no pi, 9“Apù lakhi barleythi shopa aghulo pungu eno akha aghulo kini pesü hi anie, ikemu hilikhi pesü kíshi timi hijejehi lojílu nani kea?”
10Jisü no pi, “Timiqo pelo iqave pelo.” Tipau-a lo atsüni kutomo akehu panongu ye tilehi iqave (tilehi kipitimi 5,000 qhalo ae). 11Tisheno Jisü no asho ikhilu, shikimthi tsü, eno iqa akemiqo no chunishi ke thaqhü kijé tsü. Hitoi akha ghí kijé tsü.
12Kughou panongu kümtsü no aghakiqi shi chuve keno, Jisü no pa khopemiqo vilo pi, “Chuve no alà ipeghi keu munomughoqo kümtsü kumqolo. Lakhimu kilheve pe kevilo.” 13Ike panongu no kiche kumqo kelo timiqo no barleythi shopa pungu chu keu lo alà ipeghi keu no ashoghi chighikini pichhilu.
14Jisü no amichipu kümlà shikeu ithuluve kethiu timiqo no ishi pi, “Kuchou no hiye ayeghi lo ighi niye piakeu Tungkupuu ke.” 15Jisü ye timiqo no tsükhomo pa pesü akükau shive niye shi akeu ithive no naghuto lakhi küdau itaghi pa likhi wuve.
Jisü no Azü Shou Alache
16Kughou avelau shive keno, pa khopemiqo ye ayizükucho lo iqi 17püzü tilau no ashuka lakhi lo ikuve no ayizükucho katha süsü Capernaum lo wuve. Hipau ghuloki lo zümoive, eno Jisü ye ti kutólo panoqo gholo kümtsa müla no ae. 18Amlhü kijè lakhi ighi ae eno azü fuchighi thuve. 19Kughou panongu no mile küthü ngò bidí qhalo ashuka tuha ighi keno, Jisü no azü shou no alà che süsü ashuka küdau ighi keu ithulu püzü panongu ye shishe msàve. 20Ikemu Jisü no panongu vilo pi, “Ni ke; Msà kevilo.” 21Tipathiu panongu no ashuka lo Jisü sasü nike pulove eno paikhavi lono ashuka ye panongu no wuche keu küdau ayizükucho mükü tove.
22Tishi thoghiu azükucho mükü hukukuu aqokitikhi akeqo ye ashuka lakhi likhi akeu kümsüchilelu püzü Jisü ye pa khopemiqo gholo ashuka lo ikumo no panongu ye panongu likhi wuve keu ithive. 23Ampeu no shikimthi keu tsü püzü timiqo no asho chuve keu-a phivilo Tiberias lono ashukaqo hami ighi. 24Kughou aqokitikhi no Jisü ngò pa khopemiqo ghí tile küha keu ithive keno, panongu no ashukaqo lo ikuve no Jisü phusü Capernaum lo wuve.
Jisü ye Aküxüpu Sho
25Kughou panongu no ayizükucho tüxa küdau Jisü ithulu keno panongu no Jisü vilo ishi iniju, “Rabbi! No ye kughou no hilau wo tova kea?”
26Jisü no khochile, “Kuchou no I no nongu vilo pìní, nongu ye I no amichipu kümlàqo shikeu ithulu keu ghenguno kumo püzü nongu no asho chu no nongu kive pichhilu keu ghenguno I phu chenie. 27Shipüsave chekeu chuqu ghenguno müla kevilo, ikemu lhokta küxü kutólo ngolu chekeu chuqu ghenguno müla lo, tiye Timi Nu no nongu tsü nani ke. Kughengu Apù Alhou no pa shou pulobe mekhavae.”
28Tipathiu panongu no Jisü vilo iniju, “Ningu ye Alhou no avehupu shi akeu kümlà shini ke ghenguno kiu shi moayesa kea?”
29Jisü no khochile, “Alhou kümlà hu ye hike: pa no puwu keu shou pülüni keu.”
30Ike panongu no pa vilo iniju, “Tishiaye ningu no ithulu no O pülü kepu shini ke ghenguno no ye amichipu kiu tsü nani ke? No ye kiu shi nani kea? 31Ni pù-asüqo ye küghünamokeu-a lo manna chue; kughengu ishi yèpüani: ‘Pa no panongu pelo chu penike kungugha lono asho tsüe.’#6:31 Ipe 16:4; Nehe 9:15; Leshe 78:24,25”
32Jisü no panongu vilo pi, “Kuchou no I no nongu vilo pìní, kungugha lono asho tsü keu ye Moses no kumo ke, ikemu I pù no kungugha lono kuchou sho pesü nongu tsü cheni. 33Kughengu Alhou’w asho ye kungugha lono iqighi cheni eno ayeghilomi lau aküxüpu tsü chenie.”
34Panongu no pi, “Akijeu, asho hipau alhokuthu ningu tsülo.”
35Tisheno Jisü no asheshu ghi pi, “Ni ye aküxüpu sho ke. I lau ighi kemi ye khilemu müzüthimo nani, eno I pülü kemi ye khilemu tüghüthimo nani. 36Ikemu I no nongu vilo pive ketoi, nongu ye ni ithuluve keghi I pülümo ke. 37I pù no I tsüke miqo kümtsü I lau ighi nani, eno ni ye I lau ighi kemiqo ye khilemu hapuwuvemo nani. 38Kughengu ni ye I pulou shini ke ghenguno kungugha lono iqighimoe ikemu I puwu keu pulou shini ke ighike. 39Eno hino I puwu keu pulou ke, tiye pa no I tsü kemi lakhimu pühavemo püzü ashekha tsalà lono panoqo xüputhuni keu ke. 40Kughengu I pù pulou ye Anu lau jupuku no pa pülülu kemi kümtsü lhokta küxü alu pe nikeu ke, eno I no ashekha tsalà lono panongu xüputhu nani.”
41Jisü no, “Ni ye kungugha lono iqighi keu sho ke,” ipikeu ghenguno tilehi Jewmi akeqo ye nhenheshi Jisü ghili kügha thuve. 42Panongu no ishi pi, “Hiye Joseph nopu Jisü ke kumo keshea, ningu ye papù eno pazá ithi anike kumo? Kíshi no pa ye itehi ye, ‘Ni ye kungugha lono iqighi ke,’ ipini kea?”
43Jisü no khochile, “Nongu dolo nhenheshi akeu tavelo. 44I puwu keu Apù no sasü ighimo ke thaqhülo ye timi khumu I lau ighi mülae, eno ashekha tsalà lo I no panongu xüputhu nani. 45Tungkupu kakuqo lo ishi yèpüani: ‘Panongu kümtsü Alhou no shika nani.’#6:45 Isa 54:13 Apù tsa chilu kemi eno pa lau no shikalu kemi kümtsü I lau ighi cheni. 46Alhou lau no ighi keu likhi no kumo aye khumu Apù ithumla aphie; pa likhi no Apù ithulu püani. 47Kuchou no I no nongu vilo piani, timi khuu no pülüni keno pa ye lhokta küxü anie. 48Ni ye aküxüpu sho ke. 49Nongu pù-asüqo ye küghünamokeu-a lo manna chuke, tishimu panongu ye thive ke. 50Ikemu kungugha lono iqighi keu sho hi anie, eno hipau chukulumi khumu thimo nani. 51Ni ye kungugha lono iqighi keu aküxüpu sho ke. Khukhumu asho hipau chu keu ye lhokta kutólo xü anani. Asho hipau ye I shi#6:51 Jisü no pa shi piakeu kiqi ye pa phimpi ke. Hiye kuchou no pa phimpi shi chuni keu tsa piamoe, ikemu pa no ni ghenguno Kros lo ichhe-ime no thive keu piani ke, tiye I no ayeghilomi pelo xülu penike ghenguno tsü nani.”
52Ikelo Jewmiqo ye panongu dolo aloqhi kütsala ghi ishi pi, “Timi hipau ye kíshi püzü ningu pelo chu penike pa shi tsüní kea?”
53Jisü no panongu vilo pi, “Kuchou no I no nongu vilo pìní, Timi Nu shi chumo eno pa jì yemo ke thaqhülo nongu ye lhokta küxü ithumla nani. 54Khukhumu I shi chu eno I jì ye keu ye lhokta küxü anani eno I no ashekha tsalà lo panongu xüputhu nani. 55Kughengu I shi ye kuchou chuqu eno I jì ye yelu kepu kuchou ke. 56Khukhumu I shi chu eno I jì ye keu ye I gholo kimepe ani eno I no panongu lolo ani. 57Xü akeu Apù no I puwu eno Apù vechewo I no xü ake toi, khuu no I no lojí keu chuni keno pa ye I vechewo xülu nani. 58Hiye kungugha lono iqighi keu sho ke. Nongu pù-asüqo ye manna chu no thive ke, ikemu khukhumu asho hipau no lojí keu ye lhokta xüache nani.” 59Jisü ye Capernaum lo synagog lo kütsü ake lono hipau tsa pike.
Apapemi Kutomo no Jisü Pheve
60Hipau chilu kelo pa papemiqo kutomo no ishi pi, “Hiye ighono kushokütsü kükütsü shi ani. Khuu no hi ikhikulupu kea?”
61Pa papemiqo no hipau tsa lo nhenheshi akeu ithive püzü Jisü no panongu vilo pi, “Hiye nongu mlo shipüsava keshea? 62Tishiaye tsalá Timi Nu no püzüu pa no achekeu-a lo ikuve keu nongu no ithulu aye kíshive nani kea! 63Aghungu no aküxü tsü cheni; ashi ye kiumu kihi akepu kühae. I no nongu vilo pive keu tsaqo ye Aghungu eno aküxü no chhitoi ani. 64Tishimu nongu dolo pülümo kemi khami ani.” Kughengu Jisü ye abothu lono khipaqo no pa pülümo eno khuu no pa thechu shi nani keno ithi ake. 65Pa no ishi pikibe, “Hi ghenguno Apù no shilupemo ke thaqhülo ye timi khumu I lau ighi mülae ipi I no nongu vilo pivae.”
66Hipau do thiu ye pa papemiqo kutomo no idechile wove eno pa papemove.
67Jisü no pano chighikini vilo iniju, “Nongu ghí wove nishi ani keshea?”
68Simon Peter no pa khochile, “Ampeu, lhokta küxüpu tsaqo O gholo anike ningu ye khuu lau wuni kea? 69No ye Alhou’w Akimtheu Lakhi kepi ningu no ithivea eno pülüluvae.”
70Ike Jisü no khochile, “Ni ye nongu Chighikini kishelu ke kumo keshea? Ikemu nongu dolo lakhi ye tüghami ke!” 71(Jisü ye Simon Iscariot nopu Judas khuu Chighikini dolo lakhi shi anamu, kutou pa thechu shive niye akeu ghili pi ake.)
Currently Selected:
John 6: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
