Luke 11
11
Jisü no Akighini Ghili Shika
1Ghulo lakhi Jisü ye a-a lakhi lo inikhua. Kughou pa no inikhu tave keno pa khopemi lakhi no pa vilo pi, “Ampeu, John no pa khopemiqo shika keu toi akighini ningu shikalo.”
2Pa no panongu vilo pi, “Kughou nongu no inikhuni keno ishi pilo:
“ ‘Apù,
O je akimthe shi pelu pelo,
O yekipe ighilo.
3Tsalakipe chuqupu ishí tsalà lo ningu tsülo.
4Ningu xinéqo qhive tsülo,
kughengu ningu ghí kütami no ni lau akipimí
shikeqo pevetsü cheni ke.
Eno ningu pelo ghukuju lo ilove pe kevilo.
Ikemu küsakügha lau no ni xaphe tsülo.’ ”#11:4 Atüghi lo ye, “Ikemu alhoküsa lau no ni xaphelu tsülo,” ipikeu ye süküqhamo no acheke.
5Tisheno Jisü no panongu vilo pi, “Kümsüju kelo no ye aküsàu lakhi aghíni, eno zübumta lono nono wu no ishi pìní, ‘I küsàu, asho apa küthü I püná tsü aghílo; 6I küsàu lakhi kicheghüzü shi I lau ighi ani eno ni ye kiumu pa tsü kepu kühae.’ 7Eno kümsüju kelo O küsàu no sholokuu no, ‘I küpüna kevilo. Ni ye ahukikha ghí khavea eno I tianuli sasü azüa lo ngovae. Ni ye ithughi no kiumu O tsü luni chemoe,’ ipi khochile aye. 8I no nongu vilo pìní: pa ye shompami kehu ashopa tsü nike ithumo namu nono akukujo kumoshi khuauve keu ghenguno pa ye ithuve nani eno nono khijehi avehupu shi akeno O tsü nanie.
9“Tighenguno I no nongu vilo piani: Khulo eno ti nongu tsü nani; phulo eno nongu no phulu nani; kukhulo eno O ghenguno ahukikha khaqhi tsü nani. 10Kughengu khu kemi kümtsü tsü cheni, phu kemi no ithulu cheni, eno ahukikha kukhu kemi lau khaqhisü tsü nani.
11“Nongu apù khuu no, O nu no akha khu aye tipau züqhulo apighi tsü nani kea? 12Momu tsalá pa no awukhu khu kelo achuwa pazá pe pa tsüní kea? 13Tishiaye, nongu küsaküghami thotsü thime kivi pesü nongu tianuli tsüke ye ithi aghí aye, nongu Papù kungugha lo akeu ye kíshi tinguno alau Aghungu Kimthe pesü pa vilo khukemiqo tsü nani kea?”
Jisü eno Beelzebul
14Jisü ye amilitshü keu tüghaküsa haphea. Kughou tüghaküsa no timi lau no ipeve keno amili-kütshüu hu no atsa piluve, eno timi aqokitikhi ye akümzave. 15Ikemu panongu khami no pi, “Jisü ye Beelzebul tüghaküsaqow kükapuu küká vechewo tüghaküsaqo haphe anie.” 16Kütami no Jisü peju ghi pa vilo kungugha lono amichipu pìyelo pi khu.
17Jisü no panoqo kükümsü ithive no panongu vilo pi, “Akükaphu lakhi lono kijetha keu ipeghive aye akükaphu kümtsü kütsave cheni, eno akibo lakhi lono kijetha keu ipeghive aye akibo ipove nani. 18Satan no pa likhi pa kijethave aye pa kükaphu ye kíshi no puthugholu nani kea? I no hi piakeu ye nongu no ni ye Beelzebul je lono tüghaküsaqo haphe cheni ipikeu ghenguno ke. 19Itehi tsalá I no Beelzebul vechewo tüghaküsaqo haphelu cheghi aye, now papemiqo ye khuu vechewo tüghaküsaqo haphelu cheni kea? Tishiaye, nongu papemiqo no nongu kimchiluve nani. 20Ikemu I no Alhou küká vechewo tüghaküsaqo haphe aye, tiye Alhou kükaphu nongu shou ikughi anike.
21“Kughou akumtomi lakhi no aghünanu kümtsü pepu no pa ki khe aye, paw küakini süsholuve cheni. 22Ikemu kughou pa nguno akumtomi no pa le ighino pa shou toluveni keno, pa no aghünanu pükhü pe akeu kümtsü lepuwuve no kijéluve cheni.
23“Khunoqo no I gholo chemo keno I mujochile ani, eno khunoqo no I gholo hekütsümoni keno panapaghaive nani.
24“Kughou mithekumo ghungu no timi lau no ipeghiveni keno, qhai keu-a lo akulhokiqhi phuju eno phumlave kelo, ishi pi cheni, ‘Ni ye I no qhive keu ki lo idewoni.’ 25Kughou pa no ighi keno aki khukimtheve no kithikiyi aghí keu ithulu. 26Tile no, pa no wu no pa nguno alau küsakügha ghungu kütami tsünì sasü ighino panongu tile ilo ngove cheni. Tithiu timi tipau ye atüghi lo nguno alomo kitheve cheni.”
27Jisü no hipaqo pi akelo totimi lakhi aqokitikhi dolo no müghachhoi pi, “Totimi khuu no O punú eno O lojí puthu keno akümghapue.”
28Jisü no khochile, “Khunoqo no Alhou tsa chilu eno tipau ghokulu shini keno tipaqou no akümghapue.”
Jonah Michipu Kiqi
29Timi kutomo shikitheve kelo Jisü no pi, “Hiye küsakügha tiqheli ke. Amichipu likhi khu nani, ikemu Alhou no tungkupu Jonah lau amichipu tsü keu nguno alau kütau ye tsümo nani. 30Jonah no Nineveh nó ghami ghenguno amichipu shi ketoi, tipaphi shi Timi Nu ghí hipau tiqheli ghenguno amichi shi nani. 31Küghakütha tsalà lo apéu Kükaliu no hipau tiqheli timiqo gholo no ithughi no tiqheli hipau kiléqhive nani; kughengu li no ayeghi shekha küdau no Solomon lokütsü ini nike ighie, ikelo itehi ye kiu kela Solomon nguno akijeu hilehi anie. 32Küghakütha tsalà lo Nineveh lo timiqo no puthugho no tiqheli hipau kiléqhive nani; kughengu panongu ye Jonah no kütsü keu lono amlo pebideve ke, eno itehi ye kiu kela Jonah nguno akijeu hilehi anie.
Aphimpi Küvü
33“Khunomu akulu küqü pesü küsüve kepu-a lo qhive chemoe momu alì qholo qhive chemoe. Ikemu panongu no akibepu lo be cheni, tishianguno iloghi kemi pelo aküvü ithulu peniye ke. 34O nhethi no O phimpi küvü ke. O nhethi no vi akelo O phimpi kuchopu aküvü no chhitoi acheni. Ikemu kughou tino tsüghükhüimoveni keno O phimpi lo ghí àküzǘ no chhitoive cheni. 35Tishiaye O lolo aküvü akeu hu àküzǘ kumo kemo keno jukuto lo! 36Tighenguno tsalá O phimpi kuchopu aküvü no chhitoi püzü kiu lomu àküzǘ küha aye tiye akulu lakhi no phuphui iqü kelo aqha kümtsü yepüvülu keu toi nani.”
Phariseemi eno Ayeza lo Shitsamiqo shou Ahaküsapu Tsa
37Jisü no atsa pitave kethiu Phariseemi lakhi no pa gholo alibe chu penike pa kusüe; ikehu pa no wu no aghulhu lipa lo ngoe. 38Ikemu Phariseemi hu ye Jisü no aghulhu chumphi züu au mütsümo keu ithulu püzü akichiqhive.
39Tisheno Ampeu no pa vilo pi, “Pini keu lo nongu Phariseemiqo ye akhu ajikhu ashou ye shikimtheve cheni ikemu nongu lolo alakimine ngò küsakügha no chhitoi anie. 40Nongu mbomzü timiqo! Ashou lhotsü keu hu no alou ghí lhotsü ke kumo keshea? 41Ikemu nongu khu-ajikhu lo kiu ani keno kumlhomi lau tsükinimi shilo, eno O ghenguno thowkha mitheluve nanie.
42“Nongu Phariseemiqo ye ahaküsapue, kughengu nongu no ayilo, kikimiye tsüní eno aghutu lo tsüní jeli kümtsüw saje chighí pesü Alhou tsü cheni, ikemu nongu no achipiu xakütha ngò Alhou kikimiye kughucho cheni. Nongu ye saje chighí pe Alhou tsü akeu gholo achipiu xakütha ngò Alhou kikimiye pepimhe kepue.
43“Nongu Phariseemiqo ye ahaküsapue, kughengu nongu no Synagogqo lo alakhü akhotouqo eno alhikishi-a lo agigihupu petha kimiye cheni.
44“Nongu ye ahaküsapue, kughengu nongu ye amichi shimo keu kumokiqo, khikhi timi no mtha no tipau shou püla cheni keno, tipaqo toi ke.”
45Ayeza lo shitsamiqo gholo lakhi no pa khochile ghi pi, “Akükütsüu, kughou nono hipaqo vehu pi keno no ye ningu ghí thaighave anie.”
46Jisü no khochile, “Eno nongu ayeza lo shitsamiqo, nongu ye ahaküsapue, kughengu nongu no xapuqhemla kepu ape kimshi pesü timiqo pipe cheni, eno nongu ye nongu u loti lakhimu chhopuwo panongu kuphu chemoe.
47“Nongu ye ahaküsapue, kughengu nongu no tungkupumiqo ghenguno akumoqo mülà tsüke, ikemu nongu pù-asüqo no panongu ghiqhi pìthíve ke. 48Ikehu nongu pù-asüqo no kiu shive keno nongu ghí puloküqha tsü cheni; panongu no tungkupumiqo ghiqhi pìthíve eno nongu no panongu thigho mülà tsüke. 49Hi ghenguno Alhou no pa lokütsü lono pivae. ‘I no panongu lau tungkupumi ngò apostolmiqo puwu nani eno khami pìthíve eno khami pishi-puju nani.’ 50Tighenguno ayeghi lho ke lono ishi kutólo tungkupumi khijehi jì pele püani keno, 51tiye Abel ghiqhi keu jì lono wo Zechariah khuu akümlá-khache ngò akimthe-a küma dolo no ghiqhive keu jìw bemakho ye hipau tiqheli no pù nani. Iyei, I no nongu vilo piani, hipau tiqheli no tipaqo kümtsü bemakho pù nani.
52“Nongu ayeza lo shitsamiqo ye ahaküsapue, kughengu nongu no akighithi hukikha khaqhiyi ikhisüwuve ke. Nongu no ilomo keu likhi kumo no kütami no ilo chekeu ghí nongu no aküpüna shike.”
53Jisü no khalau ipeve kelo Phariseemi eno ayeza kükütsümiqo no ayiküsa shi pa ghochile thuve eno pa süholuve no avehu kutomo pa vilo iniju thuve, 54tisheno pa no pikeu lono pa meluve niye miqe ake.
Currently Selected:
Luke 11: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
