Luke 17
17
Axiné, Aküpülü, eno Akümlapu
1Jisü no pa khopemiqo vilo pi, “Timi pelo axiné lo ilove pe nikeu thimeqo ye ighini pütsa, ikemu khuno vechewo tipaqo ighini keno panongu ghenguno ahaküsapue. 2Timi khukhumu hi kitilaqo gholo milakhi pelomu axiné lo ilove pe aye panongu kuwo homüxa athì kütsüghǜ tuqu tsüghave no ayizü lo vesüve keu pavie. 3Tighenguno O likhi O jukuto lo!
“Tsalá nongu thiküzümi momu nongu chelimiqo no nongu lau akipimí shive aye panongu lomipi lo; eno tsalá panongu no amlo pebide aye panongu kipimí qhitsülo. 4Panongu no atsala lo ghuthu tsünì nongu shou axiné shive no axiné shikeu kümtsü lo ideighi no ‘I kipimí qhitsülo,’ ipi nongu vilo pi aghimu nongu ye panongu kipimí qhitsü moayesae.”
5Apostolmiqo no Ampeu vilo pi, “Ni küpülü kighishe tsülo.”
6Jisü no khochile, “Nongu aghane thi pahi likhimu aküpülü aghí aye, nongu ye militasübo hipau vilo, ‘O kuhu lono O likhi O süjo pesü ayizü lo shosüve lo,’ ipi pilu nani eno tino nongu gholu nanie.
7“Kümsüju kelo nongu lakhi gholo aqeu lakhi no alu hokide momu ambe jukutoa no kughou pa no alu lono ideghini keno pa ye aqeu vilo, ‘Mtazü ningu gholo iqa no ana chulo,’ ipi nani keshea? 8Tishini ke züqhulo pa ye, ‘I ghenguno alibe kutólo, O ghili kutò püzü I no chuqu-kusho shiqhimo ke kutó I lojí lo, eno no ghí tithiu no chu-sho kepu shilo,’ ipi nani ke kumo keshea? 9Aqeu no aghokulu shi kiu shilo pi keno shikeu ghenguno pa ye shikimthi nani keshea? 10Titoi kughou nongu vilo azah tsü keu kümtsü shive kethiu nongu ghí ishi pi kepue, ‘Ningu ye aküzüpu kumo keu aqemiqo ke; ningu ye ningu kümlapù saje likhi shike.’ ”
Jisü no Apügha Kupumi Chighí Shipivi
11Jisü no Jerusalem lo wuche kelo Samaria ngò Galilee lughi dolo kicheghüzü shiche. 12Pa no aphu lakhi lo ilo che kelo apügha kupumi chighí no pa sasü kushoe. Panongu no putou puthugho 13no ighamuku pi, “O Ampeu Jisü, ningu kimiye tsülo!”
14Kughou Jisü no panongu ithulu keno pa no hitoi pi, “Wu no nongu likhi nongu pesü achinemiqo pìyelo.” Ikelo panongu ye wuchephi lono mitheluve.
15Panongu gholo milakhi no kughou, pa ye vive aghí keu ithulu keno ighamuku Alhou sheqhe ghi ideighi. 16Pa no Jisü pukhuphi lo iqi pishiqho pe ngo no pa shikimthi. Timi hipau ye Samariami lakhi ke.
17Jisü no iniju, “Timi chighí shipivi ke kumo keshea? Pano tokú ye khile ani kea? 18Kütami ye kíshive keno inami hipau likhi no Alhou shikimthi niye ideighi kea?” 19Tisheno Jisü no pa vilo pi, “Ithu no wolo, O küpülü no O shipivivae.”
Alhou Kükaphu Ighi niye akeu
20Ghuthu lakhi Phariseemiqo no Jisü vilo Alhou kükaphu ye kughou no ighi nani kea ipi iniju kelo Jisü no khochile: “Alhou kükaphu ye chhejulu chekeu thime kumoe, 21momu timi khunomu Alhou kükaphu ye, ‘Hilehi ani,’ momu ‘Tilehi ani,’ ipi pimo nani kughengu Alhou kükaphu ye nongu bocho lo anie.”
22Tisheno pa no pa khopemiqo vilo pi: “Nongu no tsalà lakhi likhimu Timi Nu ithulu nishiqhiyi keu tüqhüdo ighi nani, ikemu nongu ye ti ithumla nanie. 23Timi no nongu vilo, ‘Pa ye hule anie,’ momu ‘Hilau anie,’ ipi nani, ikemu panongu thikhau posü wu kevilo. 24Kughengu Timi Nu ighi keu tsalà lo tsütsüpha no atsütsǘ shekha lakhi lono ashekha lakhi küdau kulo keu toi nani. 25Ikemu pa ye atüghishi shishe ime moayesa nani eno hipau tiqhelimi pelo pa milive pe nani.
26“Noah ghuloki lo toi, Timi Nu ghuloki lo ghí tishi nani. 27Noah no ashuka lo ilo ke tsalà kutólo timiqo ye chu-shoa, külakupu shia eno külakupu tsüae. Tishi ake lono züqo ighino panongu kümtsü kütsave ke.
28“Tiye Lot ghuloki lo toi nani. Timiqo ye chuqu-kusho shi, küqhü-kili shi, axa yisü eno aki shiqhepuku ake. 29Ikemu Lot no Sodom qhive ke tsalà lono atsütsǘ lono ami eno amitì tuqu ghuqhi püzü panongu kümtsü kütsave ke.
30“Timi Nu pephe-piye ke tsalà lo ghí hitoi shi nani. 31Tipau tsalà lo timi khuu no pa ki kütsüqa lo ani keno pa ki alou anhemgha akeu lu niye iqighi kepu kumoe. Tihutoi, alu lo akemi khumu aki lo idewo kepu kumoe. 32Lot nipu ghili kümsülulo! 33Khuno no pano likhi pano küxü süsho niye pükapütsa cheni keno pühave nani; khuno no pano küxü tsüveni keno xaluve nani. 34I no nongu vilo pìní, tipa jì lo azüa lakhi lo timi kini züa nani; lakhi sawuve no lakhi ye qhive nani. 35Totimi kini kümtsa ao shesü anani; lakhi sawuve no lakhi ye qhive nani. 36Timi kini alu lo akelo lakhi sawuve no lakhi ye qhive nani.”#17:36 Kaku khami lo ajò hipau küha eno Mt 24:40 akeu peitha cheni
37Akhopemiqo no iniju, “Ampeu, khile no tishini cheni kea?”
Jisü no khochile, “Khile no akithí sükumo ani keno tilehi aluquqo no kumqo nani.”
Currently Selected:
Luke 17: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
