Luke 19
19
Zame Küqhau Zacchaeus
1Jisü ye Jericho lo ilo no ti hechesü wuche. 2Tile timi lakhi pa je Zacchaeus ipikeu ache; pa ye zame küqhami shou atou eno ighono kiními lakhi ke. 3Pa ye Jisü ye khuu keno ju nishiqhiyi ake, ikemu pa ye shitimi kehu aqokitikhi ghenguno Jisü jumla no ae. 4Tighenguno pa no aqokitikhi züu powu püzü Jisü ju niye tüküthi bò lo mili ikuve, kughengu Jisü ye tipau là lo wu niye cheke.
5Kughou Jisü no tipau-a tove keno pa no kunguu jupuku no Zacchaeus vilo pi, “Zacchaeus, mtazü iqighive lo. Ni ye ishí O ki lo ngo moayesani cheni.” 6Ikehu Zacchaeus no mighemghai iqighive püzü alokivi kijè lono pa ki lo Jisü sasüe.
7Timi kümtsü no hi ithulu no nhenheshi ishi pithuve, “Timi hipau ye axinemi lakhi ki lo ngo niye wuvae.”
8Ikemu Zacchaeus no puthugho no Ampeu vilo pi, “Julo, Ampeu! Ni ye I küakini tüxa pesü athokhami tsüveni, eno I no kiu-kiu lomu khuala pishiqhi püaghi aye tipau theli lo ghuthu bidí no küghüsü püzü tsüchile veni.”
9Jisü no pa vilo pi, “Ishí no xakulu akibo hipau lo ighivae, kughengu timi hipau ghí Abraham nu lakhi ke. 10Kughengu Timi Nu ye pühave kemi phu niye eno xalu nike ighie.”
Aqhi küthü Jume Holetsa
11Panongu no hipau tsa ini akelo Jisü no aholetsa lakhi pi, kughengu pa ye Jerusalem kupunúve eno timiqo ye paikhavi Alhou kükaphu ipeghi niye kutò ani küghashi kümsü ake. 12Pa no pi, “Aküka lagha lono ighi kemi lakhi no aghakhu kushuwa lo wu püzü pa ye akükau ipi süküsü shive no ideighi nikeu shie. 13Pa no wu mphi lono pa qemi chighí kukütsü eno panongu lakhi-khi lau aqhi küthü jume#19:13 Mina lakhi lo aqhi küthü qelu keu jume qhemi ke. pesü tsü. Pa no ishi pi, ‘I no ideghimo ke kutólo pisa hipaqo pe kighishe aghílo.’
14“Ikemu pa ghakhumi no pa mithi eno pa thiu no kishekiphemi hapesü ishi piwu pe, ‘Ningu ye timi hipau pelo ni kükau shipe nishi amoe.’
15“Tishiaghimu, pa ye akükau shive no aki lo ideighi. Tisheno pa qemi khunoqo lau pisa tsüpüa keno panongu ye khijehi alá kighishe luvea keno ithi niye panongu ku puwu.
16“Atüghiu no ighi püzü pi, ‘Akijeu nono pisa I tsü keu pesü ni ye chighí kighishe luvea.’
17“Pa mpeu no khochile, ‘Aghile shivea, I qeu kiviu, nono thime aghulo lo pichebekulu shike, O pelo mishighüna chighí shou aye pelu peni.’
18“Akiniù no ighino pi, ‘Akijeu, nono pisa I tsü keu pesü ni ye pungu kighishe luvea.’
19“Pa mpeu no khochile, ‘No ghí mishighüna pungu shou aye pelu peni.’
20“Tithiu kütami lakhi no ighino pi, ‘Akijeu, ow pisa hilo; I no aphì tachu pe küzüve no küsüpe qhive ke. 21No ye mükamihi kemi lakhi kehu, ni ye O msàve ke. No ye ow kumomu luve cheni, eno nono shosümo keu ghí xoluve cheni ke.’
22“Pa mpeu no khochile: ‘No küsakügha qeu! I no O likhi O tsa pesü O shou xakütha be nani! Ni ye mükamihi kemi, ni ye iw kumomu luve cheni, eno I no shosümo keu ghí xoluve chekemi ipi nono ithi ani keshea? 23Tishiaye I no ideighi kelo akighishe sǘ no ithuluveni cheke, no ye kushiye iw ghüka pesü kighishe kepu-a lo sümove kea?’
24“Tishive no pa no tilehi puthugho akemiqo vilo pi, ‘Pa lau no pisa ikhiluve lo eno tipau pesü aqeu khuu no chighí kighishelu keno pa tsüvelo.’
25“Panongu no pa vilo pi, ‘Akijeu, ikemu pa ye chighí anie.’
26“Pa no khochile, ‘I no nongu vilo pìní, khuno no ani keno alau süküpha tsü nani; ikemu khuno no küha keno pano no kitila akeu ghí ikhipe wuve tsü nani. 27Ikemu itehi ye I ghümi khipaqo no I pelo panongu shou akükau shi penishiamo keno hilau panongu saighi lo eno I gizü lono ghiqhivelo.’ ”
Jisü no Akükau shi Jerusalem lo ighi
28Jisü no hipau pive kethiu panongu züu no Jerusalem lo iqhove. 29Pa no Bethphage eno Bethany lo ato lakhi Olive Naghuto ipi chekeu kupunú ighi kelo, pa no pa khopemi kini vilo ishi pi no puwu, 30“Nokujo züu aphu akeu lo wulo eno nokujo no ilo kelo timi khunomu iku mphi keu khurhati lakhi tile tshüpe püaghi keu ithulu nani. Ti kuqho püzü hilau saighi lo. 31Khuala no nokujo vilo, ‘Kushiye ti kuqho ani kea?’ ipi iniju aye, ‘Ampeu no hi avehupu shi anie’ ipi lo.”
32Pama no wu keu lo ye Jisü no panongu vilo pikeu toi aghí keu ithulu. 33Pama no khurhati kuqho akelo tipau mpeu no, “Nokujo ye kushiye ti kuqho ani kea?” ipi iniju.
34Pama no khochile, “Ampeu no hi avehupu shi anie.”
35Pama no khurhati Jisü lau saighi no panonguw ubephiqo khurhati shou vebe püzü Jisü pelo tipau shou iqa pe. 36Pa no wuche kelo timiqo no panonguw ubephiqo alà lo qhatsü.
37Kughou pa no Olive Naghuto là aqhou iqive keu-a kupunúve keno, pa pape chekemi aqokitikhi no akümzapu kümlà mülà keqo ithulu keu ghenguno alokivishi asütsa kuloghi lono hitoi Alhou sheqhe thuve:
38“Akükau khuu Ampeu je lono cheni keno pa ye akümghau ke!”#19:38 Leshe 118:26
“Kungugha lo aloino keu alo eno akiqheu Lhou sheqhelo!”
39Aqokitikhi gholo Phariseemi khami no Jisü vilo pi, “Akükütsüu, O pape chekemiqo lomipive lo!”
40Jisü no khochile, “I no nongu vilo pìní, panongu no inaqhoive aye, atu noqou no igha ipeghive nanie.”
41Kughou pa no Jerusalem kupunú ighive no mishighüna tipau ithulu keno, pa ye tipau ghenguno mloqa 42püzü ishi pi, “Tsalá nongu no hipau tsalà lono kiu no aloino keu nongu lau süghilu nani keno ithi aghí ke aye. Ikemu itehi ye hipau nongu nhethi lono küsüve tsüae. 43Anguküsa tsalà nongu shou ighi nanie, tiye kughou no ghümi no nongu khasüluve püzü nongu sümxa ghi ayeghi pesü atozü toi shipuku nani eno aqha kümtsü lono nongu süholuve nani. 44Panongu no nongu eno nongu ki kuputuqo alou anuliqo kümtsü ayeghi lo vedaqhi nani. Panongu no atu lakhimu lakhi shou bepe qhimove nani, kughengu Alhou no nongu lau chekeu ado mthave ke.”
Jisü no Achineki lo wu
45Kughou Jisü no achineki kikhala lo iloghi keno, pa no küqhü-kili shi akemiqo haphe thuve. 46Pa no panongu vilo pi: “Kuchoyesü lo ishi yèpüani, ‘I ki ye akighini ki#19:46 Isa 56:7 ipi ku nani’; ikemu nongu no hipau pesü süxakuchumiqo küghütshü-a lakhi kughulhove tsüae.”#19:46 Jere 7:11
47Tsalà kipetsü Jisü ye achineki lo kütsüa. Ikemu achinetomi eno ayeza kükütsümi ngò timiqo dolo sakiphemiqo ye pa pìthíve niye pükapütsa ae. 48Ikemu panongu ye tishini ke kiu laghimu phu müla no ae, kughengu timi kümtsü no pa tsa ini auve ke.
Currently Selected:
Luke 19: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
