Matt. 13
13
Apitikiveu Pesü Kimghi Pìye
1Tipau tsalà lo Jisü ye aki lono ipeve püzü ayizükucho mükü lo iqa ae. 2Timi kutomo no Jisü sühope ngoluve kehu pa ye ashuka lo ilove püzü iqaluve no kütami kümtsü no ayizü mükü lo puthugho pe ngove. 3Tisheno pa no kimghi pìye keu tsa lono panongu vilo thime kutomo pi. Pa no ishi pi: “Alukichimi lakhi no apitì ve niye wue. 4Pa no apitì vesü akelo, hami no alaphe lo vesülu, ikelo aghauqo no ighino tipaqo mighive. 5Hami no aghüma chilomo keu atusaye yeghi lo vesülu. Aghüma ilalei keu ghenguno apitì hu ye paikhavi thuwu ipeghive. 6Ikemu kughou khetsünhe no müka ipeghive keno, abò tipaqo ye akuhu thonhei quilomo kehu phuqhive eno kimghoive. 7Apitì hami ye asahuli dolo ikiqi ilove, aghibo tipaqo ye thuwu ipeghi kemu asahu no ghüsüve. 8Tishimu apitì hami ye aghüma kivi lo ikiqi ilolu, eno athi kutomo pithílu; apitì vesü keu lo hami no aqhe, hami no lhotsügho eno shighi ishi küghüsü ghi pithílu. 9Khunoqo no chilu nishi ani keno panoqo pelo chilu pelo.”
10Akhopemiqo no pa lau ighino iniju, “No ye kushiye kimghi pìye keu lono timiqo pütsa acheni kea?”
11Pa no khochile, “Kughengu kungugha kükaphuw tuqhou kighithi ye nongu tsüvae, ikemu panongu ye tsü püamoe. 12Khuno no ani keno alau tsü nani, eno panongu ye kupukuno shi anani. Khuno no küha keno, pano no kiu aghíni keno, ti ghí pano lau no ikhipe wuve tsü nani. 13Hi ghenguno ni ye kimghi pìye keu lono panongu pütsa acheni:
“Panongu ye ju pülaghi ithumla nani;
panongu ye ini pülaghi chimla nani momu vethamla nani.
14Panongu lau no Isaiah no tungkupu tsa pipüa keu shikupuvae:
“ ‘Nongu no chilu anani ikemu khilemu vethamla nani;
nongu no ithulu anani ikemu khilemu vethamla nani.
15Kughengu timi hipaqo mlo ye mükamüghaivea ke;
panongu kìní ye ini kushughivae,
eno panongu ye pano nhethi miyiluvae.
Tishimo ke aye panongu nhethi no ithuluni cheke,
panongu kìní no chiluni cheke,
panongu mlo lono vethaluni cheke
eno xaideghi aye, I no panoqo shipivi tsüní cheke.’#13:15 Isa 6:9,10
16Ikemu nongu nhethi eno nongu kìní ye müghae, kughengu tino ithulu ani eno chilu ani ishi ke. 17Kuchou no I no nongu vilo pìní, tungkupumi eno amikuchomi timi kutomo no nongu no kiu ithulu ani keno ti ithulu nishi che kemu ithumlave, eno nongu no kiu chilu ani keno chilu nishi che kemu chimlave ke.
18“Tishiaye, apitikiveu pesü kimghi pìye keu tsa ye kiu kiqi keno iniju lo: 19Khukhumu akükaphu kükütsü sütsa ghili chilu no tipau vethalumove kelo, küsaküghau no ighino kiu amlo lo xusü püani keno süxa pesü wuve cheni. Hiye apitì alaphe lo xusüve keu kiqi ke. 20Apitì atusaye yeghi shou ikiqi iku keu ye khunoqo no Alhou tsa chilukhavi alokivishi ikhilu keno tipaqo ke. 21Ikemu panongu ye akuhu qüsümo kehu, ado ikhonhei likhi xü cheni. Kughou atsakiviu ghenguno aküpüna eno pishi-puju keu ighini keno, panongu ye paikhavi ikiqive cheni. 22Asahuli dolo apitì ikiqi ilove keu kiqi ye khunoqo no Alhou tsa hu chilu, ikemu hipau küxü lo mloküsaqo eno aküakini pishikiqhi no Alhou tsa hu küpühalu eno tino athi pithí mülave pe chekeu kiqi ke. 23Ikemu apitì aghüma kivi lo ikiqi ilo keu kiqi ye khunoqo no Alhou tsa chilu püzü ti vethalu keno tipau kiqi ke. Hipaqo no athi pithí tsü cheni, apitì vesü keu lo hami no aqhe no küghüsü, hami no lhotsügho no küghüsü eno hami no shighi no küghüsü ishi pithílu cheni.”
Alupi Pesü Kimghi Pìye
24Jisü no panongu vilo kimghi pìye keu tsa kütau pesü pi: “Kungugha kükaphu ye timi lakhi no pa lu lo apitì kivi xusü keu toi ke. 25Ikemu timi kümtsü zü ake lono, pa ghümi no ighino alupiqo pesü aghibo gholo xusüvetsü no pove. 26Kughou aghibo no thu ipeghino ape peipeghive keno, alupiqo ghí thu ipeghive.
27“Alu mpeu qemiqo no pa lau ighi eno ishi pi, ‘Akijeu, no ye O lu lo apitì kivi likhi xusü ke kumo keshea? Tishiaye khilau no alupiqo ighive kea?’
28“ ‘Aghümi no ishive tsüke,’ ipi pa no khochile.
“Aqemiqo no pa vilo iniju, ‘No ye ningu pelo wu no alupiqo nhüve penishi anima?’ ”
29Pa no khochile, “ ‘Moe, kughengu nongu no alupiqo müxa ake lono, aghibo ghí panongu gholo no müxave nosake. 30Ghile kutólo tishi kümtsa thuwu aghí pelo. Tipau ghuloki lono I no ghile hu kemiqo vilo ishi pive nani: Atüghishi alupiqo pekütsü lo eno tipaqo ye pitive kepu shi amqo shi tsügha kumqolo; tithiu no athì pekütsü pesü iw ale lo süghi lo.’ ”
Aghane Thi eno Kholaqhi Pesü Kimghi Pìye
31Pa no panongu vilo kimghi pìye keu tsa kütau pesü pi: “Kungugha kükaphu ye timi lakhi no aghane thi lakhi pesü shosü keu toi ke. 32Tiye apitì kümtsü nguno aghulou shi aghí namu, kughou tino thuwuni keno, tiye aghutu lo atsüni kümtsü nguno akijeu shive no asübo ilhove cheni, tisheno aghauqo no ighino alokaqo lo apüsü pesü cheni.”
33Pa no itaghi panongu vilo kimghi pìye keu kütau pesü pi: “Kungugha kükaphu ye kholaqhi lakhi toi ke, tiye totimi lakhi no kholaqhi epesü ashokukubo ahukimighi muku tsünì toi keu lo kitekungove no, ti kümtsü kunuluve moke kutólo kunú akeu toi ke.”
34Jisü no hipaqo kümtsü pesü aqokitikhi vilo kimghi pìye keu tsaqo lono pi; pa ye aholetsa sümo kelo ye panongu vilo kiu tsamu pimoe. 35Tishi keu lono tungkupumi vechewo kiu pipüa keno shikupuve ke:
“I no kimghi keu tsaqo lono I kichí xukho nani,
I no ayeghi pulhosü ake lono küsüpe püakeqo piphe nani.”#13:35 Leshe 78:2
Alupiqo Kimghi Pìye Keu Hepho-piye
36Tisheno pa ye aqokitikhi qhive no aki lo ilove. Pa khopemiqo no pa lau ighino pi, “Alu lo alupiqo kimghi pìye keu hu ningu vilo hepho-piye tsülo.”
37Pa no khochile, “Timi khuu no apitì kivi xusü keno tiye Timi Nu ke. 38Alu ye ayeghiqha ke, eno apitì kivi ye kükaphu lo timiqo ke. Alupiqo ye küsaküghamiqo ke, 39eno aghümi khuu no alupiqo xusü keno tiye tüghami ke. Ghile ye ashekha ghuloki ke, eno ghile hu kemiqo ye kungumiqo ke.
40“Alupiqo nhü pesü ami lono piti akelo, tihu no ashekha ghuloki shive nani ke. 41Timi Nu no paw kungumiqo puwu nani, eno panongu no paw kükaphu lono alupi nhüve nani eno titoi axiné lo ilove pe chekeu jeli eno khunoqo no küsakügha shi cheni keno kümtsü nhüve nani. 42Panongu ye ami boboshi iqü akeu lo vesüve nani, tilehi panongu ye ahu tsüghü-bubushi qa nani. 43Tithiu amikuchomiqo ye panongu Papù kükaphu lo khetsünhe toi vü nani. Khunoqo no chilu nishi ani keno panoqo pelo chilu pelo.
Küsüpüa keu Akinikhuki eno Mülaputu Pesü Kimghi Pìye
44“Kungugha kükaphu ye alu lo akinikhuki küsüpüa keu toi ke. Kughou timi lakhi no ti ithuluni keno, pa no tipau itaghi küsüve cheni, eno alokivishi wo no pa no pighi akeu kümtsü jeve püzü alu tipau qhüluve cheni.
45“Itaghi, kungugha kükaphu ye alhikishimi lakhi no mülaputuqo phu chekeu toi ke. 46Kughou pa no shishe amekusho mülaputu lakhi ithuluni keno, pa ye wo no pa no pighi akeu kümtsü jeve püzü tipau qhüluve cheni.
Akhame Pesü Kimghi Pìye
47“Itaghi akiniù, kungugha kükaphu ye akhame toi ke, tiye ayizükucho lo vesü kelo akha jeli kümtsü veluve chekeu toi ke. 48Kughou akhame chhiveni keno, akhakükhami no amükü lo sünhepheve cheni. Tisheno panongu no iqa püzü akha akivi kishe pesü aqhupuqo lo sǘve cheni, ikemu alomo keqo ye peve cheni. 49Tihutoi ashekha ghuloki lo ghí tishive nani. Kungumi no ighino amikuchomiqo lau no küsaküghami küta shive nani 50eno panongu ye ami boboshi iqü akeu lo vesüve nani, tilehi panongu ye ahu tsüghü-bubushi qa nani.”
51Jisü no iniju, “Nongu ye hipaqo kümtsü vethaluve akema?”
“Iyei,” ipi panoqo no khochile.
52Pa no panongu vilo pi, “Tighenguno ayeza kükütsümi khunoqo no kungugha kükaphu lo akhopemi shiluvea keno, tiye aki mpeu no paw pekütsü chebo lono akughupu thime aqa ghí eno akithé ghí pesü ipeghi keu toi ke.”
Tungkupu Agigihu Küha Keu
53Kughou Jisü no kimghi pìye keu tsa hipaqo pitave keno, pa ye tile no cheve. 54Pa no pa punugha lo ighino panonguw synagog lono timiqo kütsü thuve, ikelo panongu ye akümzave. Eno panongu no ishi iniju ae, “Timi hipau ye khile no alokütsü hipau eno akümzapu küká hipaqo ithulu kea? 55Hipau ye asǜ kümlàu nopu ke kumo kea? Pazá je ye Mary, eno James, Joseph, Simon ngò Judas noqo ye pa thiküzümiqo ke kumo kea? 56Pa chepu noqo ye ningu gholo anike kumo kea? Tishiaye timi hipau ye khile no hipaqo kümtsü ithulu kea?” 57Ike panongu ye pa ikhilumoe.
Ikemu Jisü no panoqo vilo pi, “Tungkupumi lakhi ye pa likhi pa punugha eno pa likhi pa kibo lo thono aqha kütau lo ye agigihu tsü chenie.”
58Eno panongu küpülü küküha ghenguno pa ye tilehi akümzapu kümlà kutomo shimove.
Currently Selected:
Matt. 13: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
