Matt. 28
28
Jisü Ye Xülethuvae
1Sabbath tsalà thiu, apine tsalà atüghiu lo tsütho ipeghi kelo, Mary Magdalene eno Mary lakhiu pama ye Jisü sükumo ju niye wue.
2Tilehi ayeghi küghütha kijè lakhi ighie, kughengu Ampeu’w kungumi no kungugha lono iqighi, eno akumoki lo wu no atuqu tukulove tsü püzü tipau shou iqa ae. 3Pa jukoghe ye tsütsüpha toi, eno paw tiphimini ye murasü nguno miyetsüghoi pepu ake. 4Ikelo ghükhemiqo ye kungumi hu ju pesü shishe msàve eno panongu ye thüghüive eno akithí kumlho shive.
5Ikelo kungumi hu no totimi pama vilo pi, “Msà kevilo! Nokujo ye Jisü yeda pìthíve keu phu cheni ipi I no ithi anie. 6Pa no pipüa keu toi, pa ye hilehi kühae; pa ye xülethuvae. Ighino khilehi pa sükumo qhipüa keno julo. 7Mtazü wu püzü pa khopemiqo vilo ishi pilo: ‘Pa ye akithí lono xülethuvae eno nongu züu no pa ye Galilee lo wuve niye cheae. Tilau no nongu no pa sasü kusholu nani.’ I no hi nongu vilo piakeu kümsüchilelu lo.”
8Ikehu totimi pama no akimighi shi akumoki qhive no, akümsa eno alokivi küqha ghi, Jisü khopemiqo vilo pi niye posü wuve. 9Zülile no Jisü no pama sasü kusho no ishi pi, “Alo ani kema?” Ike pama no pa lau ighino pa pukhu mutuluve püzü pa müláe. 10Tisheno Jisü no pama vilo pi, “Msà kevilo. Wulo eno I thiküzümiqo vilo Galilee lo wulo pilo; tilau no panongu no I sasü kusholu nani.”
Ghükhemiqo no Asütsa Pìthi Keu
11Totimi pama no alà lo che kelo, ghükhemiqo khami no mishighüna lo ilo no achinetomiqo vilo kiu shive keno kümtsü lhepe pivetsü. 12Ikelo achinetomi ngò kichimiqo kusholu no avehu kümqüve eno panongu no pisa kutomo pesü ghüshimiqo tsüve no 13panongu vilo pi, “Nongu ye ishi pilo, ‘Ningu no putho lo zü ake lono pa khopemiqo no ighi püzü pa kumo pükape wuvae.’ 14Kughou atsa hipau angh vilo pithive keno, ningu no pa pütsakümtshaluve nani eno nongu ye aküpüna shipemo nanie.” 15Ikelo ghüshimiqo no pisa luve no panongu vilo kíshi pilo pi mijetsü keno titoi pivetsü. Eno hipau ghili ye Jewmiqo dolo aqha kuchopu veküpha wove no ishi kutólo hipau tsa pekishe achephi.
Azakütsü Akijeu
16Ikehu akhopemi pano chighiqhaqhi ye Galilee lo Jisü no panongu vilo naghuto khilehi wulo pi keno tilehi wue. 17Kughou Jisü ithulu keno, panongu no pa müláe; ikemu khami ye ta pülümo ghi ae. 18Ikelo Jisü no panongu lau ighino pi, “Kungugha lo eno ayeghi lo kükagha kümtsü pesü I tsüvae. 19Tighenguno shiye kümtsü lau wulo eno I khopemiqo shilu pelo; Apù jeku, Anu jeku eno Aghungu Kimthe jeku no baptiz shitsülo, 20eno I no azah nongu tsüve keu kümtsü papelu penike panongu kütsü tsülo. Eno ni ye kuchou no, ashekha ghuloki kutólo pülhapuju nongu sasü ache nani.”
Currently Selected:
Matt. 28: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
