Mark 1
1
John Baptiz Kishiu no Alà Ghe tsü
1Alhou Nu, Jisü Messiah#1:1 Messiah ipi akeu ye Hebrew tsa ke eno Christ no Greek tsa ke eno kinikujo akiqi ye nukisheluve keu ipi ani. tsakiviu ghili hukuthu ye 2Isaiah tungkupu no hitoi yèpüani:
“I no O züu no I ghinikishiu puwu nani,
pa no O laghi ghepe qhitsü nani”#1:2 Mala 3:1—
3“Pa ye küghünamokeu-a lo asütsa lakhi ighamuku ishi ku akeu ke,
‘Ampeu ghenguno alaghi ghepe qhitsülo,
pa no wu kepu laghi müzüchoi shitsülo.’ ”#1:3 Isa 40:3
4Ikehu John Baptiz kishiu no küghünamokeu-a lo ipeghi eno amlo pebideve püzü axiné qhikütsü ghenguno baptiz shive moayesa keu kütsüe. 5Tishikehu Judea qha kümtsü lo eno Jerusalem lo timiqo kümtsü no pa lau ighie. Panongu no pütüta xinéqo piphe püzü John no Jordan Ghoki lono panongu baptiz shitsüe. 6John ye sayeshi mhi no mülà keu phimini pepu che, pa ashiyiko pokha no pa chita lo khapu che, eno pa ye aghasa lo tülhaqu ngò akhingozü chuche. 7Eno pa no hitoi kütsü che: “I thiu khuu cheni keno pa ye I nguno akumtou ke, ni ye iqi no pa pukhukuqho kütsügha kighimu kuqho nike aküzüpu kumoe. 8Ni ye azü lono nongu baptiz shitsü ani, ikemu pa ye Aghungu Kimthe lono nongu baptiz shitsü nani.”
Jisü Baptiz Shi eno Ghuju Keu
9Tipau ghuloki lo Jisü ye Galilee lo Nazareth phu lono Jordan ghoki lo ighi eno John no baptiz shitsüe. 10Kughou Jisü no azü lono khalau ipeghi keno, kungugha khaqhive no Aghungu no miqhedu lakhi toi pa shou iqi chekeu pa no ithulu. 11Eno kungugha lono asütsa lakhi ishi pi: “No ye I nu, I no qhuivü chekeu ke; O shou I mlokiqi achenie.”
12Paikhavi lono Alhou Ghungu no küghünamokeu-a lo pa puwuve 13eno pa ye küghünamokeu-a lo Satan no atsala lhobidi pa ghujue#1:13 Momu peju. Pa ye tüghashiqo gholo ngoa ikemu kungumiqo no pa tucho-hiju ae.
Jisü no Atsakiviu Piputo tsü.
14John pesü akughuki lo sǘve kethiu Jisü no Galilee lo ilo eno Alhou tsakiviu pesü asheshue. 15Pa no pi, “Ado hu ye ighivea, Alhou kükaphu ye kupunú ighivae. Amlo pebidelo eno atsakiviu pülülo!”
Jisü no Akhopemi Atüghimiqo Kulù
16Jisü no Galilee züghi mükü lo alà cheche kelo, pa no Simon ngò pa thiküzüu Andrew pama ithulue. Pama ye akhakükhami kehu azüghi lo akhame vesü ae. 17Jisü no pi, “I papelo, I no nokujo pelo akha khalu ketoi timi khalu penike puwunie.” 18Pama no akimighi shi akhameqo qhive no Jisü papesü wuve.
19Jisü no kitila chesü wu kelo, Zebedee Nu James eno pa thiküzüu John pama ashuka alou akhameqo pukho aghí keu ithulu. 20Pama ithulukhavi Jisü no pama ku, eno pama ye ashuka lo ajume qemiqo gholo pama papù Zebedee qhive no Jisü papesü wuve.
Jisü no Mithekumo Ghungu Haphe
21Panongu no mishighüna Capernaum lo wue eno Sabbath tsalani Jisü no Synagog lo ilo no kütsü thuve. 22Timiqo ye pa kükütsü ini pe akümzave, kughengu pa ye ayeza kükütsümiqo toimo püzü kükagha akemi toi kütsü ke. 23Tipa mtsa synagog lo timi lakhi mithekumo ghungu no tsüghape akeu no ishi igha, 24“Nazareth nó ghami Jisü, no ye ningu lau no kiu avehupu shi ani kea? No ye ningu kütsave niye ighi ani keshea? No ye khuu keno I no ithi ani, no ye Alhou’w Akimtheu hu ke!”
25“Inaqhoivelo eno pa lau no ipeghivelo!” ipi Jisü no müghachhoi alòmi pi. 26Mithekumo ghungu no ayiküsa shi timi hu sükuchoqhi püzü pa lolo no igha ghi ipeghive.
27Timi kümtsü no shishe akümzaqhiyive no panongu dolo ishi iniju kilé auve, “Hiye kiu kea? Anguagha akeu kükütsü kithé lakhie! Pa no mithekumo ghunguqo kutólo azah tsüe eno tipaqo no pa gholu ke.” 28Paikhavi lono Galilee qha kümtsü lo Jisü ghili pikülha wove.
Jisü no Timi Kutomo Shipivi
29Panongu no Synagog qhive no wuve kemtsa, Simon ngò Andrew no James eno John sasü pama ki lo wue. 30Simon pani ye aghamiki püzü alipa lo ihozü akehu Jisü no ighi kemtsa li vehu pesü pa vilo pive. 31Ike Jisü no li phivilo wu püzü li u lono mutu pesü li sünhe puthuve kelo ye li phi lono aghakimiki kühave, eno li no achuqupu kutò pe panongu tsüe.
32Tipani avelau shive kelo timiqo no küsükinimi eno tüghaküsa no tsüghape akemiqo kümtsü sasü Jisü lau ighi. 33Tile mishiphu lo xüküami kümtsü ighino ahukikha lo kumqo pe ae, 34eno aküsǜ jeli kütüta lono sǜ akemiqo kutomo Jisü no shipivi tsüe. Pa ye tüghaküsaqo ghí kutomo haphe ke, ikemu pa ye tüghaküsaqo pelo kiumu pipemoe kughengu panongu ye pa khuu keno ithi ake.
Jisü no Yenguikeu-a lo Akighini shi
35Inaqhe züghüghüi aphi lono Jisü ye ithuve püzü yenguikeu-a lo wu no inikhue. 36Ikelo Simon ngò pa küsàmiqo ye pa phu niye wue, 37eno kughou panongu no pa phuluve keno, panongu no ighamuku no ishi pi: “Kümtsü no O phu chenie!”
38Jisü no khochile, “Ningu ache-axü lo aphu akeqo lo wunie, tishianguno ni ye tilau ghí atsakiviu pikülha kepu shini ke. Ni ye hi ghenguno ighike.” 39Ikehu pa no Galilee qha kümtsü lo Synagogqo lo kütsü eno tüghaküsaqo haphe ghi kicheghüzü shi.
Jisü no Apügha Kupumi Lakhi Shipivi
40Apügha#1:40 Ayiko küsǜ jeli kümtsü pesü apügha küsǜ ipi ani. kupumi lakhi no Jisü lau ighi püzü qhoqhünhe no ishi qhüiniju, “Nono pulo aghí aye, no ye I shipivive tsülu nanie.”
41Jisü ye pa ju kimiyeqhiyive püzü pa u chhopuwo timi tipau bu no ishi pi, “Ni ye pulo anie, viluvelo.” 42Paikhavi lono apügha kupumi phi lono apügha kühave eno pa ye mitheluve.
43Jisü no hitoi akumto shi pa pikichive no puwuve: 44“No ye timi khuu vilomu pi kevilo, ikemu achinemiqo lau kimichikütsü shi ghi wu no panongu pìyelo eno Moses no azah tsüpüa keu toi O shikimtheve keu kümlagho pesü mülá lo.” 45Ikemu tishini ke züqhu, timi hu no khalau ipe no tipau ghili sütsa pesü inapügha zale ghi veküpha wove. Tishikehu, Jisü ye mishiphu lo pekiphe shi ilomlave no khalau küghünamokeu-a lo ngoe. Tishimu, aqha kümtsü lono timiqo no pa lau ighi.
Currently Selected:
Mark 1: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
