MATHIUS, NOPUKU AFASAO SORE, 9.
NOPUKU AFASAO SORE, 9.
1AIA nisopocea ta vaka, nisua nofokagi, nimai ia tumrai sore tshana.
2Neicitia iai acre nimai iateia ta tane tasi nimace o ta palse, aia nokomoy ia ta potu; Iesu nokocitia tshare fakarogrogo aia, neitucage ia aia nimace o ta palse, Tucutariki kabisa akoi, nori tshou maganisa keiamke.
3Neicitia, faru o acre fakou nifakairo neitucage ia arotorea, Tatane nei nifasosa.
4Iesu nikeiro tshare fenagaro, neitucage, Tiaha acowa mentua ane isa ia arotowa?
5Ma komeru keitucua, Nori tshou maganisa keiamke; mo keitucua, Masike, ma fano?
6Kaia pe acowa keiro pe ta Nontariki o tagata tomatua ia takere wararoni keiamke nori o maganisa, iai aia neitucage ia tamace o ta palse, Masike, avake tshou apotu, ma fano tshou efare.
7Aia nimasike, nifano ia tshana fare.
8Kaia iai tagata nalupia su nifetacina neicitia anera, acre nimasaro, nibisa ia Atua, aia neitufwa fakasore tomatua tira ia tagata.
9¶ Hepe Iesu nifeke nifano iai, aia neicitia tasi tatane neigo Mathius, nokonofo none iai acre neitufwa mune tsha teriki iai; aia neitucage iateia, Komai wamuri avau. Aia nimasike, nifano wamuri aia.
10Ane nei nimai, hepe Iesu neinofo nokokai efare, neicitia nalupia tagata niamo mune tsha ma tagata isa niromai neinofo ia aia ma niana tagata aia nifakairo.
11¶ Iai fakou Farasi neicitia tira, acre neitucage ia niana tagata aia nifakairo, Tiaha tshowa teriki nokokai ia tagata niamo mune tsha teriki ma tagata isa?
12Kaia Iesu nifakarogona tira, aia neitucage iacre, Acre komouri secitiafakarafia keicitia tagata keiro amace, kaia acre komace.
13Kaia roro acowa ma keiro nokano o afasao tira, Avau kacitiafakarafia maganerefia o tagata; ma jimra takavari, ma avau semai keitapa tagata maganerefia, kai tagata isa, keinatshicina ma femacowa maganisa tshare.
14¶ Nopogera nimai iateia fakou Joanes nifakairo, nokoutucua, Tiaha acime ma tagata Farasi kopari, kaia tagata akoi fakairo sekopari mana?
15Iesu neitucage, iacre, Tiaha erecriki o tafare arafia ta fine kotagi, nopoge iotshi ta tane fakavegeina tshana fine konofo iacre, mo? kaia taha nopoge kamai, tatane karafia tshana fine, kanatshicina acre, taha nopoge tira acre kapari.
16Jimra ta tane tasi suciapofna nopito tumaga fou ia tumiga ituai, ma nopito suciapofna tafotu eifasia tumiga ituai, ma eifasia sore su iateai.
17Foci jimra tagata regea weina fou ia avai toga ituai, mo avaitoga eifasia, ma ta weina komarigi, avai toga isa ana; kaia acre keitifia weina fou ia avai toga fou, ma acrawa nofo erefia.
18¶ Hepe aia nifasao ane iotshi ra iacre, neicitia, tasi tereki nimai iateia nimori aia, nokoutucua, Tshaku nofine milou tamari nimate, kaia komai fecetshia tshou norima ilugia aia, ma aia kamouri.
19Iesu nimasike nifano wamuri aia, foci ma niana tagata aia nifakairo wamuri aia.
20¶ Neicitia iai, tasi tafine, nimace tshana toto nimaregi iateia toufi twelv, aia nimai wamuri aia, nitofia nuntafa o tshana tumiga;
21Ma aia neitucua ia tshana roto, Pe avau tofia ana tshana tumiga, Avau kamouri.
22Kaia Iesu nitafuri, iai aia neicitia aia, aia neitucage, Tucufine kabisa akoi; tshou fakarogrogo avau neipenpena tshou notshino. Ta fine neimna komouri ia our tira.
23¶ Nopogera Iesu nimai efare o ta teriki, ma neicitia acre nimakuru ma nikotagi.
24Aia neitucage iacre, Fakasara; ma tafine sisi tira sematiamana, kaia aia nokomero ana, Acre nikata nifakasega aia.
25Kaia iai wamuri nitaroce acre iotshi efuafo, aia nifano efare, nipurutshia tshan orima, ma ta fine sisi nimasike.
26Afasao ia nimasaro sore iateia nifano kofori iotshi ta fanua tira.
27¶ Nopogera Iesu nifeke none iai, erua tagata foimata pouri niroro wamuri aia, nokhtapa, ma nokoutucua, Akoi Nontariki o Tevit kowcitiafakarafia acimawa.
28Aia nimai efare iai, erua takou foimata pouri nimai iateia; Iesu nifakouia acrawa, Akorua fakarogrogo avau pe avau tomatua penpena iakouri, mo jimra? Acrawa neitucage iateia, Keini, Teriki sore.
29Iai aia nitofia tsharawa foimata nokoutucua, hepe fakarogrogo o akorua keimna erefia iakorua.
30Tsharawa foimata kuara nimerama, Iesu neitucuasana mukei acrawa nokoutucua, seitucua tagata tasi.
31Kaia acrawa niroro, neitucua fakasore ia tshana tomatua ia iotshi fanua tira.
32¶ Hepe acre niroro efuafo, neicitia, acre niarafia iateia tatane tano, agelo isa neinofo iateia.
33Iai ta agelo isa neisegeake, ta tane tano nifasao, ma tagatotshi nifetacina iai nimasaro, nokoutucua, secitia mana hepra ia fanua o Isreil.
34Kaia Afarasi neitucua, aia segiake agelo isa ia teriki o agelo isa.
35¶ Iesu nifano nifori umrai sore iotshi ma umrai sisi iotshi, nokofakairo acre i afare mori tshare, nikova afasao erefia o tavaka, ma neipenpena amaci iotshi, ma iotshi amy, o tagatotshi iai.
36¶ Kaia iai aia neicitia tagata nalupia su nifetacina, tshana roto karafeina acre, ia ane nei, acre nimatese, ma neinofo, kofori papai, hepe sip takou seiratshia acre.
37Iai aia neitucage ia niana tagata aia nifakairo, tagata fakatupu keifakarogona afasao, kaia tagata vere keifakairo acre toru ana.
38Mori acowa ia Teriki o tavare tira, pe aia kakowna faru foci tagata kavere ia tshana vere.
Currently Selected:
MATHIUS, NOPUKU AFASAO SORE, 9.: ANT
Highlight
Share
Copy
Want to have your highlights saved across all your devices? Sign up or sign in