Жаратылыстың баст. 48

Жақыптың немерелері Ефрем мен Манасаға батасын беруі

1Біраз уақыт өткенде Жүсіпке «Әкең ауырып жатыр» деген хабар жетті. Жүсіп ұлдары Манаса мен Ефремді ертіп алып, әкесінің қасына барды. 2Жақыпқа «Сізге ұлыңыз Жүсіп келе жатыр» дегенде, ол күшін жинап, төсегінде басын көтеріп отырды. 3Содан Жақып ұлына тіл қатып былай деді:

— Құдіреті шексіз Құдай маған Қанахан жеріндегі Лұзда аян беріп батасын берген болатын. 4Сонда ол маған мынадай сөздер айтты: «Мен сені ұрпақты етіп көбейтемін, топ-топ руларға айналдырамын. Осы елді сенің ұрпақтарыңның тұрақты меншігіне беремін».#48:4 28:13-14. 5Ал енді, мен саған келмей тұрғанда Мысыр елінде туған сенің екі ұлың менікі. Ефрем мен Манаса екеуі де Рубен, Шимон сияқты өзімнің ұлдарым болады.#48:5 Тұңғыштық жол Рубеннен Жүсіпке ауысқандықтан, Жақып Жүсіпке Қанаханда екі үлесті уәде етіп, оларды Жүсіптің екі үлкен ұлына арнап белгіледі (49:3; Шеж1 5:1-2). 6Кейінірек туатын балаларың сенікі болмақ. Алайда олардың ұрпақтары өз үлестеріне тиген жерлерінде ағалары Ефрем мен Манасаның аттарымен аталатын болады.#48:6 Яғни олардың келер ұрпақтары ағалары Ефрем мен Манасадан шыққан рулардың аттарымен аталатын болды. 7Мен солтүстік Месопотамиядан қайтып келе жатып, Қанахан еліндегі Ефратаға таяу қалғанда Рахила қайтыс болды. Мен оны жоқтап, сол жерде, Ефратаға бара жатқан жолдың бойында, қабірге қойдым.#48:7 (35:16-20) Жүсіп пен Буняминнің шешесі Рахила ерте қайтыс болғандықтан көбірек бала сүйе алмады. — Сол Ефратаның бүгінгі аты Бетлехем.

8Исраил Жүсіптің ұлдарына қарап:

— Мыналар кімдер? — деп сұрады.

9— Бұлар Құдай маған сыйлаған екі ұлым.

— Маған жақындатшы, оларға батамды берейін.

10Қартайғандықтан Исраилдің көздері нашар көретін еді. Жүсіп ұлдарын әкесіне жақындатып, ол немерелерін беттерінен сүйіп, құшақтады. 11Жүсіпке:

— Өзіңнің жүзіңді қайта көруден үмітім үзілген еді. Ал Құдай маған тіпті ұлдарыңды да көруге бұйыртты, — деді.

12Жүсіп әкесінің алдында отырған ұлдарын оның құшағынан босатып алып, оған жерге дейін бас иіп тағзым етті. 13Ол оң қолымен Ефремді ұстап Исраилдің сол жағына, ал Манасаны сол қолымен ұстап оның оң жағына апарып тұрғызды. 14Алайда Исраил оң қолын кенжесі болса да Ефремнің басына, ал сол қолын тұңғыштығына қарамастан Манасаның басына қойып тұрып, екі қолын айқастырып ұстады. 15Исраил Жүсіпке батасын беріп тұрып былай деді:

— Аталарым Ыбырайым мен Ысқақ Құдайдың көз алдында ғұмыр кешті. Құдай менің де өмір бойы бүгінге дейін Қорғанышым#48:15 Немесе: Бақташым. болып келеді. 16Ол — барлық апаттан мені құтқарып келген Хабаршы,#48:16 (32:24-30) Немесе: Періште. енді мына балаларды да жарылқай көрсін! Менің атым және аталарым Ыбырайым мен Ысқақтың аттары осылар арқылы жалғаса беріп, олар жер бетінде кереметтей көбейсін!

17Әкесі оң қолын Ефремнің төбесіне қойғаны Жүсіпке ұнамады. Сондықтан ол оң қолын Ефремнің басынан алып, Манасаның төбесіне қоймақшы болып:

18— Әке, олай емес! Тұңғышы мынау, оң қолыңызды соның басына қойыңыз, — деді. 19Бірақ әкесі бұған қарсы шығып:

— Ұлым, мен оны өзім де білемін. Бұдан да халық шығып, ол да атақты болады. Бірақ оның інісі ағасынан да ұлы болып, оның ұрпақтарынан топ-топ рулар тарайды, — деді. 20Жақып оларға батасын беріп тұрып: — Исраилдің ұрпағы бата бергенде сенің атыңды атап, «Құдай сені Ефрем мен Манасадай қылсын!» деп айтатын болады, — деді. Осылайша ол Ефремді Манасадан жоғары қойды.

21Содан кейін Исраил Жүсіпке:

— Біліп ал: жақында мен бұ дүниеден кетемін. Бірақ Құдай жар болып, сендерді аталарыңның жеріне қайтарады. 22Мен семсер-садағыммен аморлықтардың қолынан тартып алған қыратты жерімді#48:22 34:25-29; Жох 4:5. ағаларыңның озаты ретінде саған арнап қалдырамын, — деді.

Currently Selected:

Жаратылыстың баст. 48: КК 2010

Highlight

Copy