Mbete Luk 12
12
1Ke seh-aw daɓa nzukri ɓa ŋgi̧-u mbu̧h hani nzuturu ké ta̧w Zezu. Tul woyri kal fe ki̧na sɔɗ sɔɗ boh gel boh (10.000) ka-kal, mí ku ndakla fal bɔk hani mbɔr mbɔr. Wara mí Zezu ɓah ɓay hi̧ nzuk-dih fal yeri pol dara. Ke ɓahri : « Í ru̧ ke mun woiri ɓay is fariziri. Isaw ɓa ɓay kú-u mu̧h ma law mí na ɓoɗ. 2Ɓayri gbam ké mu̧-mu̧h le, ɓay ti̧h kala. Ɓayri gbam ké mu̧h nun nzukri ra, nzukri ɓay tu-u. 3Ɓayri ké i ɓah ké gel a mu̧h-u ba, ɓay ti̧h ké gel a teh-u. Ɓayri ké i ɗakla ké ɓil vul, ɓay ka-kah-u ma síɓa síɓa.
4Mi ƴo ɓah hi̧ wuri ya̧h biri ɓahri, í laɓ hȩkme nzuk-i hulri ya. Doro hul haymun woiri le, ku ta laɓ fe a ɓoru ziŋ wuri ya. 5Mi ƴo sɔk wuri, a ge mí i laɓ hȩkme ye le ? Í laɓ hȩkme Ŋgerzah. A ye ra ke ɓa mbay tul tem woiri, ke mah ɓay vbu záh woiri ɓá ko seh ɓil hɔrɔ doro hul haymun woiri-aw. Mi ɓahri se, a ye gaŋ mí í laɓ hȩkme ye.
6Nzukri ƴo yeh ti̧ti̧hri ndiɓi ke lari seɗe, kaŋ ya le ? Ti̧ti̧h mbew ba, Ŋgerzah yȩkre tulu ya. 7Ani mí ke a woiri ɓáy le, i mba ti̧ti̧hri mba-mba. Ŋgerzah ké ki̧ pirmatul woiri mbew mbew gbam ki̧ dale, í laɓ wuri hȩkme ya.
8Mi ƴo ɓah hi̧ wuri ɓahri se, nzuk a suŋ suŋ gbam ké nzak ye ɓah ketina bi gun nzuk pirmatul ké pol nzukri le, ke nzak bi kara mi ɓay tu riŋ nzuku ké pol tem nzak pihna Ŋgerzahri pi. 9Mí nzuk a a̧y ké saŋ riŋ gun nzuk pirmatul ké pol nzukri le, a bi kara mi ɓay saŋ nzuku ké pol tem nzak pihna Ŋgerzahri pi. 10Nzuk a suŋ suŋ gbam ké mbi riŋ gun nzuk pirmatul ɓah keni suya le, mahful ɓay lu salɓayu ké tul nzuku ƴo ri ɓáy. Mí nzuk a a̧y ké fah Tempuki le, salɓay suya mgba tul nzuku. 11Gelku-u sek wuri si pol ŋgernzuk misoŋri, si pol ŋgernzuk puhri, si pol mbayri le, í hi̧ law woiri ɓá lu ya. Í nzah lakna ɓay ké i ɓah-u ké pol nzukri ra ya, 12ɓayu ké Tempuki ɓay firma law woiri ɓayri ké i ɓah-u ke sa̧wseh-u hi̧ nzukri. »
13Nzuk a hani ké sakra daɓa nzukri ra ɓah hi̧ Zezu ɓahri : « Metere, mú ɓah hi̧ yi̧n bi, ké kehr fe bah wah ra, ké fa̧h nzuku a bi hi̧ mi. »
14Mí Zezu ɓahri : « Uwa, a ge mí lu mi ɓa nzuk-nda pol woiri hi̧ mí kuŋ salɓay ké haŋsekle woiri le ? »
15Ke el ɓahri se : « Ko-ko. Í kɔr kerɓay woiri rɔkɔ law ɓá nzek ɓay tul fe ziŋnari ɓay fe le, káɓ ɓil fe ziŋna ta ɓa sa̧w ɔkna nzuk ya. »
16Mí ke el ɓah ɓay ra ke lawɓayay : « Nzuk fe ziŋna mbew, nduh fe pay ké waka ye nduɗ. 17Ke el ɓah hi̧ law ye ɓah se : “A ké gel-ku̧ fe pay biri ah mah ya-ay wa, mi láɓ ani ɓáy le ?”
18-19Kerɓay gi law ye, ke ɓahri se : “Mi tu da. Mi háw pul biri-ay riw ma fal el mbóh a baw bawuri soh ri le, mi mbú̧h fe pay biri ku̧ ri dara mí-i ɓáh hi̧ law bi ɓahri, suki biri na hɔtɔk hɔtɔk mah su̧ mbihmbam ŋgi̧-ŋgi̧. Mi ɔ́k mun bi, mi su̧-u, mi nzo-u, mi láɓ mun rihna.”
20Dale Ŋgerzah ɓah hi̧ ni ɓahri : “Kɔk nzuk, suŋay suŋay gaŋ mí mi sor mu fe wo ké mi ta mu. Fe ziŋnari-aw ké mu lek ɓa fe wo ra ba wa, a ge mí ɓay kaɓ keni le ?”
21Kaŋaw mí ɓa nzuk ké ƴo ka̧y fe ziŋna. In Ŋgerzah ba, nzuku sa-a. »
22-23Mí Zezu ɓah hi̧ nzuk-dih fal yeri ɓahri : « Sa̧wu mí-i ƴo ɓah hi̧ wuri ɓahri se, í hi̧ law woiri ɓá tehre ya, ɓa ra kerɓay fe su̧na, ɓa ra kerɓay gar ndohna. Nzuk mba fe su̧na mba-mba. Mun nzuk kara mba gar ndohna mba-mba pi. 24Í hekre ga̧hri, í ker ɓay ɗi-ɗih. Ga̧hri ruh fe ya, vbeh naŋ ya. Gel-ku̧ fe pay woyri ta-a, pul woyri ta-a pi. Ŋgerzah ƴo hɔl ga̧hri-aw. A woiri ba, i mba tul gundoyri mba-mba kaŋ ya le ? 25Ké sakra woiri-ay ra wa nzuk a suŋ mí law ye tehre ni le, mah laɓ sa̧wseh ndi̧ dɔm tul nam ye le wo ? 26A ké i mah dɔɓ gun sa̧wseh a mah gelu-aw ra ya wa, ani dara mí law woiri tehre ke kerɓay tɔ́r fe a ɓoruri ɓáy le ? 27Í hekre funa feri ké su ɓa gama, í ker ɓayu ɗi-ɗih. Funa feri ta̧h mun ya, kaŋ gar ya. Mí-i ƴo ɓah hi̧ wuri ɓahri se, Salomoŋ mbay a luki ké lewsa̧, ke va̧na ye gbam, ke ndoh gar ké ndɔh mah ke funa feri-aw ya dih. 28A ké gay feri ɓil kpah ké Ŋgerzah ndoh funa ɓa gar ndohna woyri, pele le, hɔrɔ se ra wa, ani ɓáy mí ke a woiri le, ke ndóh wuri gar, ya le wo ? A woiri nzukri ké law woiri kehr seɗe. 29Í poŋ mun woiri hi̧ fe su̧na ya, hi̧ fe nzona ya. Í hi̧ law woiri ɓá zɔklɔ wuri tul feri ya. 30Sa̧wnzuk tukalari mí ƴo ɗuk fal feri-aw. A woiri ba, Bah woiri Ŋgerzah tu feri ké mah mun woiri tu-tu. 31Í poŋ mun woiri hi̧ Ŋgerzah ɓá lak mbay ma. Fe a ɓoruri-aw le ke ndár hi̧ wuri ɓáy.
32Í laɓ hȩkme ya, gun sami biri ɓay fe le, law baah na sa tul woiri ɓay hi̧ wuri puh lakna ye#12.32 Í mbga Mbete Efezeri 1.14 tuh ke gel ki̧na-ay.. 33Í fa̧h fe woiri, í yeh, í poŋ lari-u hi̧ nzuk sehri. Í laɓ ɓɔl lari a a̧y ké ɓay ta̧h ya, í ka̧y fe ziŋnari ma nunmbam. Ké nunmbam, riɓari ka̧h ri ya, ndereri nde fe ké ri ya pi. 34Gel a a̧y ké fe ziŋna woiri ku̧ ri ra, sa gelaw mí law woiri te sa sari.
35-36Sa̧w mun woiri ɓá ŋga̧h ɓa kpuh-u, hɔrɔ ɓá na lampe woiri pi dale, í ƴo tul bɔk kandɔk gun-laɓ pihnari kú-u ƴo tul bɔk geŋ bahgaŋ woyri. Ku geŋ ni ɓay mgba ni ɓa suki ke wu̧y ye a foyu. Gelke-e ka̧h ke wu̧y ye, mí ke ɗi fe le, gun-laɓ pihnari ɓay mgbur ful ɓa gáh hi̧ niri. 37Pol tehna ɓa a gun-laɓ pihna a kandɔkawri ké bahgaŋ woyri ziŋ niri ké tul bɔk. Ketina, mi ƴo ɓah hi̧ wuri ɓahri se, bahgaŋ woyri ɓay ŋga̧h si̧h ye. Ke hí̧ niri, kú kaɓ nzak fe su̧na dara mí a ye ke mun ye gaŋ mí ke ɓay wal fe su̧na hi̧ niri, kú su̧. 38Ɓa ra haŋgel, ɓa ra gel tipele, bahgaŋ woyri ziŋ ra niri ƴo tul bɔk le, pol tehna-aw ɓa a woyri.
39I tu ɓahri, nzuk puh tu ra sa̧wseh riɓa ɓay gi rih fe ye le, ke ta poŋ ful ndi̧ hi̧ riɓa ɓá haw vul ye ya. 40A woiri kara í ƴo tul bɔk ɓay fe le, i ta tu sa̧wseh ké gun nzuk pirmatul ɓay gi keni ya. »
41Mí Piyer vbi ni ɓahri : « Ŋgernzuk, lawɓayaw mu ɓah ɓay tul wah kaŋto mini mu ɓah ɓay tul nzukri-ay riw pi le ? »
42Gaŋ tul feri riw yih nzak ye kandɔkay : « Gun ké ker law, ké law ye ƴo mbew ke nzuk puh, ke na ani le ? Nzuk puh poŋ puh ke gelu kan ndɔk ye, mí ke mgba sa̧wu. Ke wal fe su̧na hi̧ gun puhri ke sa̧wseh-uri gbam. 43Pol tehna ɓay na tul gun-laɓ pihna a a̧y ké bahgaŋ ye el gi ziŋ ni ké tul pihna. 44Ketina, mi ƴo sɔk wuri ɓahri se, bahgaŋ ye ɓay el ndoh fe ziŋna yeri gbam ku̧ ndɔk gun-laɓ pihna-u. 45Mí gelke gun-laɓ pihna ra ker ra ɓahri, elna bahgaŋ ye, doro-u ɓay ɗih sal sal, mí ke ti vba̧ mbaŋ yeri gun-laɓ pihna a wu̧yuri, a wo̧ro-uri, ke el su̧ fe, ke nzo fe, ke ta yim teka teka pi le, 46bahgaŋ ye ɓay ti̧h tul ye kpur ke nam ké-e tu ya. Bahgaŋ ye ɓay vba̧ ni nun hul, ke mbú̧h ni ziŋ nzuk-saŋ Ŋgerzahri ma kala. 47Gun-laɓ pihna a a̧y ké tu fe ké bahgaŋ ye yih, mí ke sa hi̧ tul ye ƴo tulu ya le, ku ɗúr ni ŋgi̧ mbamba. 48Gun-laɓ pihna a a̧y ké tu fe ké bahgaŋ ye yih ya, mí ke laɓ fe ké mah vba̧na le, ɗurna ye ɓay ŋgi̧ ya. Nzuk a suŋ suŋ gbam ké ziŋ ŋgerna ɓa ŋgi̧-u le, salɓay ŋgerna-u ƴo tul ye ŋgi̧-ŋgi̧. Ku ɓay ki̧ falu gbam hi̧ nzuk-hi̧ ŋgerna-u. Feri gbam kú-u ɓaŋ ndoh ndɔk nzuk le, salɓay fe-uri gbam ƴo tul ye. Nzuku ɓay ki̧ falu hi̧ nzuk-ndoh fe-uri ké ndɔk ye.
49Mi gi tusiɓa ɓay kan ri hɔrɔ. Mi taw ɓay hɔrɔ-u ɓá oh lewsa̧#12.49 Í mgba Mbete Fe laɓna Tempuki 2.3-4,17-18; 8.16-17 tuh ke gel ki̧na-ay.. 50Mí batem a hani#12.50 Batemay ta ɓa batem a mbih ya. Gelay le, Zezu ƴo ɓah ɓay hul ké-e ɓay hu-u ké tul kpuh ɓay tul suya nzukri. ƴo geŋ mi ɓáy. Kerɓay ɓay oh hɔrɔ-u ƴo zaŋ law bi loɗ, mi ƴo geŋ batemu ɓá kal ɔh dara ɓáy. 51-52A woiri i ker ɓahri, mi gi ɓay hi̧ ɗeŋ ɓá ƴo tusiɓa wa ? Mi ƴo ɓah hi̧ wuri, mi gi ɓay kehr nzukri gel seɗe wara. Nzuk inri ndiɓi ɓay kehr hani. Nzuk a sayuri ɓay kehr hani ke nzuk a seɗe-uri. Nzuk a seɗe-uri ɓay kehr hani ke nzuk a sayuri. 53Bah gun ɓay kehr hani ke mi̧hri ye. Gun ɓay kehr hani ke bah ye. Mah gun ɓay kehr hani ke gun ye a wu̧yu. Gun a wu̧yu ɓay kehr hani ke mah ye. Mahfay ɓay kehr hani ke wu̧y gun ye. Wu̧y gun ɓay kehr hani ke mahfay ye. »
54Zezu ƴo ɓah ɓay hi̧ daɓa nzukri-aw kara pi ɓahri : « Gelke i ko ɗikmambam ƴo mbu̧h hani le, i ɓahri : “Mbam ɓay to-u.” Mí mbam to gaŋ ba. 55Gelke kuna gel zaŋna ku le, i ɓahri : “Gel ɓay zaŋu.” Mí gel zaŋ gaŋ ba. 56A woiri, nzuk-mu̧h ketinari, fe ké ti̧h nun woiri ké nunmbam ke tusiɓa ra, i ko-ko, ani mí sa̧w fe a guri-ay ma, mí i ko ya le ? 57Ɓay fe mí i gboh tul woiri tú ketina Ŋgerzah ke mun woiri le wo ? 58Ɓayu ké nzuk sek mu si ziŋ mu ma gel kuŋ salɓay le, mú ruh mun ɓay hi̧ nzuku ɓá sel mu ké mahful sina-aw. Mu si ziŋ ni ya le, ke ɓay kɔklɔ mu si pol nzuk-kuŋ salɓay. Nzuk-kuŋ salɓay ba, ɓay ndoh mu ndɔk soze-kɔr mgbalri. Sɔze-kɔr mgbalri ba, ɓay vbu mu vul mgbal. 59Mi ƴo ɓah hi̧ mu, mu ta ti̧h ke vul mgbal ra ya. Tere gursu mbew ta toŋ ya. Mu púh ɔh ke gelu dara kú poŋ mu ɓáy. »
Currently Selected:
Mbete Luk 12: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
Mbete Luk 12
12
1Ke seh-aw daɓa nzukri ɓa ŋgi̧-u mbu̧h hani nzuturu ké ta̧w Zezu. Tul woyri kal fe ki̧na sɔɗ sɔɗ boh gel boh (10.000) ka-kal, mí ku ndakla fal bɔk hani mbɔr mbɔr. Wara mí Zezu ɓah ɓay hi̧ nzuk-dih fal yeri pol dara. Ke ɓahri : « Í ru̧ ke mun woiri ɓay is fariziri. Isaw ɓa ɓay kú-u mu̧h ma law mí na ɓoɗ. 2Ɓayri gbam ké mu̧-mu̧h le, ɓay ti̧h kala. Ɓayri gbam ké mu̧h nun nzukri ra, nzukri ɓay tu-u. 3Ɓayri ké i ɓah ké gel a mu̧h-u ba, ɓay ti̧h ké gel a teh-u. Ɓayri ké i ɗakla ké ɓil vul, ɓay ka-kah-u ma síɓa síɓa.
4Mi ƴo ɓah hi̧ wuri ya̧h biri ɓahri, í laɓ hȩkme nzuk-i hulri ya. Doro hul haymun woiri le, ku ta laɓ fe a ɓoru ziŋ wuri ya. 5Mi ƴo sɔk wuri, a ge mí i laɓ hȩkme ye le ? Í laɓ hȩkme Ŋgerzah. A ye ra ke ɓa mbay tul tem woiri, ke mah ɓay vbu záh woiri ɓá ko seh ɓil hɔrɔ doro hul haymun woiri-aw. Mi ɓahri se, a ye gaŋ mí í laɓ hȩkme ye.
6Nzukri ƴo yeh ti̧ti̧hri ndiɓi ke lari seɗe, kaŋ ya le ? Ti̧ti̧h mbew ba, Ŋgerzah yȩkre tulu ya. 7Ani mí ke a woiri ɓáy le, i mba ti̧ti̧hri mba-mba. Ŋgerzah ké ki̧ pirmatul woiri mbew mbew gbam ki̧ dale, í laɓ wuri hȩkme ya.
8Mi ƴo ɓah hi̧ wuri ɓahri se, nzuk a suŋ suŋ gbam ké nzak ye ɓah ketina bi gun nzuk pirmatul ké pol nzukri le, ke nzak bi kara mi ɓay tu riŋ nzuku ké pol tem nzak pihna Ŋgerzahri pi. 9Mí nzuk a a̧y ké saŋ riŋ gun nzuk pirmatul ké pol nzukri le, a bi kara mi ɓay saŋ nzuku ké pol tem nzak pihna Ŋgerzahri pi. 10Nzuk a suŋ suŋ gbam ké mbi riŋ gun nzuk pirmatul ɓah keni suya le, mahful ɓay lu salɓayu ké tul nzuku ƴo ri ɓáy. Mí nzuk a a̧y ké fah Tempuki le, salɓay suya mgba tul nzuku. 11Gelku-u sek wuri si pol ŋgernzuk misoŋri, si pol ŋgernzuk puhri, si pol mbayri le, í hi̧ law woiri ɓá lu ya. Í nzah lakna ɓay ké i ɓah-u ké pol nzukri ra ya, 12ɓayu ké Tempuki ɓay firma law woiri ɓayri ké i ɓah-u ke sa̧wseh-u hi̧ nzukri. »
13Nzuk a hani ké sakra daɓa nzukri ra ɓah hi̧ Zezu ɓahri : « Metere, mú ɓah hi̧ yi̧n bi, ké kehr fe bah wah ra, ké fa̧h nzuku a bi hi̧ mi. »
14Mí Zezu ɓahri : « Uwa, a ge mí lu mi ɓa nzuk-nda pol woiri hi̧ mí kuŋ salɓay ké haŋsekle woiri le ? »
15Ke el ɓahri se : « Ko-ko. Í kɔr kerɓay woiri rɔkɔ law ɓá nzek ɓay tul fe ziŋnari ɓay fe le, káɓ ɓil fe ziŋna ta ɓa sa̧w ɔkna nzuk ya. »
16Mí ke el ɓah ɓay ra ke lawɓayay : « Nzuk fe ziŋna mbew, nduh fe pay ké waka ye nduɗ. 17Ke el ɓah hi̧ law ye ɓah se : “A ké gel-ku̧ fe pay biri ah mah ya-ay wa, mi láɓ ani ɓáy le ?”
18-19Kerɓay gi law ye, ke ɓahri se : “Mi tu da. Mi háw pul biri-ay riw ma fal el mbóh a baw bawuri soh ri le, mi mbú̧h fe pay biri ku̧ ri dara mí-i ɓáh hi̧ law bi ɓahri, suki biri na hɔtɔk hɔtɔk mah su̧ mbihmbam ŋgi̧-ŋgi̧. Mi ɔ́k mun bi, mi su̧-u, mi nzo-u, mi láɓ mun rihna.”
20Dale Ŋgerzah ɓah hi̧ ni ɓahri : “Kɔk nzuk, suŋay suŋay gaŋ mí mi sor mu fe wo ké mi ta mu. Fe ziŋnari-aw ké mu lek ɓa fe wo ra ba wa, a ge mí ɓay kaɓ keni le ?”
21Kaŋaw mí ɓa nzuk ké ƴo ka̧y fe ziŋna. In Ŋgerzah ba, nzuku sa-a. »
22-23Mí Zezu ɓah hi̧ nzuk-dih fal yeri ɓahri : « Sa̧wu mí-i ƴo ɓah hi̧ wuri ɓahri se, í hi̧ law woiri ɓá tehre ya, ɓa ra kerɓay fe su̧na, ɓa ra kerɓay gar ndohna. Nzuk mba fe su̧na mba-mba. Mun nzuk kara mba gar ndohna mba-mba pi. 24Í hekre ga̧hri, í ker ɓay ɗi-ɗih. Ga̧hri ruh fe ya, vbeh naŋ ya. Gel-ku̧ fe pay woyri ta-a, pul woyri ta-a pi. Ŋgerzah ƴo hɔl ga̧hri-aw. A woiri ba, i mba tul gundoyri mba-mba kaŋ ya le ? 25Ké sakra woiri-ay ra wa nzuk a suŋ mí law ye tehre ni le, mah laɓ sa̧wseh ndi̧ dɔm tul nam ye le wo ? 26A ké i mah dɔɓ gun sa̧wseh a mah gelu-aw ra ya wa, ani dara mí law woiri tehre ke kerɓay tɔ́r fe a ɓoruri ɓáy le ? 27Í hekre funa feri ké su ɓa gama, í ker ɓayu ɗi-ɗih. Funa feri ta̧h mun ya, kaŋ gar ya. Mí-i ƴo ɓah hi̧ wuri ɓahri se, Salomoŋ mbay a luki ké lewsa̧, ke va̧na ye gbam, ke ndoh gar ké ndɔh mah ke funa feri-aw ya dih. 28A ké gay feri ɓil kpah ké Ŋgerzah ndoh funa ɓa gar ndohna woyri, pele le, hɔrɔ se ra wa, ani ɓáy mí ke a woiri le, ke ndóh wuri gar, ya le wo ? A woiri nzukri ké law woiri kehr seɗe. 29Í poŋ mun woiri hi̧ fe su̧na ya, hi̧ fe nzona ya. Í hi̧ law woiri ɓá zɔklɔ wuri tul feri ya. 30Sa̧wnzuk tukalari mí ƴo ɗuk fal feri-aw. A woiri ba, Bah woiri Ŋgerzah tu feri ké mah mun woiri tu-tu. 31Í poŋ mun woiri hi̧ Ŋgerzah ɓá lak mbay ma. Fe a ɓoruri-aw le ke ndár hi̧ wuri ɓáy.
32Í laɓ hȩkme ya, gun sami biri ɓay fe le, law baah na sa tul woiri ɓay hi̧ wuri puh lakna ye#12.32 Í mbga Mbete Efezeri 1.14 tuh ke gel ki̧na-ay.. 33Í fa̧h fe woiri, í yeh, í poŋ lari-u hi̧ nzuk sehri. Í laɓ ɓɔl lari a a̧y ké ɓay ta̧h ya, í ka̧y fe ziŋnari ma nunmbam. Ké nunmbam, riɓari ka̧h ri ya, ndereri nde fe ké ri ya pi. 34Gel a a̧y ké fe ziŋna woiri ku̧ ri ra, sa gelaw mí law woiri te sa sari.
35-36Sa̧w mun woiri ɓá ŋga̧h ɓa kpuh-u, hɔrɔ ɓá na lampe woiri pi dale, í ƴo tul bɔk kandɔk gun-laɓ pihnari kú-u ƴo tul bɔk geŋ bahgaŋ woyri. Ku geŋ ni ɓay mgba ni ɓa suki ke wu̧y ye a foyu. Gelke-e ka̧h ke wu̧y ye, mí ke ɗi fe le, gun-laɓ pihnari ɓay mgbur ful ɓa gáh hi̧ niri. 37Pol tehna ɓa a gun-laɓ pihna a kandɔkawri ké bahgaŋ woyri ziŋ niri ké tul bɔk. Ketina, mi ƴo ɓah hi̧ wuri ɓahri se, bahgaŋ woyri ɓay ŋga̧h si̧h ye. Ke hí̧ niri, kú kaɓ nzak fe su̧na dara mí a ye ke mun ye gaŋ mí ke ɓay wal fe su̧na hi̧ niri, kú su̧. 38Ɓa ra haŋgel, ɓa ra gel tipele, bahgaŋ woyri ziŋ ra niri ƴo tul bɔk le, pol tehna-aw ɓa a woyri.
39I tu ɓahri, nzuk puh tu ra sa̧wseh riɓa ɓay gi rih fe ye le, ke ta poŋ ful ndi̧ hi̧ riɓa ɓá haw vul ye ya. 40A woiri kara í ƴo tul bɔk ɓay fe le, i ta tu sa̧wseh ké gun nzuk pirmatul ɓay gi keni ya. »
41Mí Piyer vbi ni ɓahri : « Ŋgernzuk, lawɓayaw mu ɓah ɓay tul wah kaŋto mini mu ɓah ɓay tul nzukri-ay riw pi le ? »
42Gaŋ tul feri riw yih nzak ye kandɔkay : « Gun ké ker law, ké law ye ƴo mbew ke nzuk puh, ke na ani le ? Nzuk puh poŋ puh ke gelu kan ndɔk ye, mí ke mgba sa̧wu. Ke wal fe su̧na hi̧ gun puhri ke sa̧wseh-uri gbam. 43Pol tehna ɓay na tul gun-laɓ pihna a a̧y ké bahgaŋ ye el gi ziŋ ni ké tul pihna. 44Ketina, mi ƴo sɔk wuri ɓahri se, bahgaŋ ye ɓay el ndoh fe ziŋna yeri gbam ku̧ ndɔk gun-laɓ pihna-u. 45Mí gelke gun-laɓ pihna ra ker ra ɓahri, elna bahgaŋ ye, doro-u ɓay ɗih sal sal, mí ke ti vba̧ mbaŋ yeri gun-laɓ pihna a wu̧yuri, a wo̧ro-uri, ke el su̧ fe, ke nzo fe, ke ta yim teka teka pi le, 46bahgaŋ ye ɓay ti̧h tul ye kpur ke nam ké-e tu ya. Bahgaŋ ye ɓay vba̧ ni nun hul, ke mbú̧h ni ziŋ nzuk-saŋ Ŋgerzahri ma kala. 47Gun-laɓ pihna a a̧y ké tu fe ké bahgaŋ ye yih, mí ke sa hi̧ tul ye ƴo tulu ya le, ku ɗúr ni ŋgi̧ mbamba. 48Gun-laɓ pihna a a̧y ké tu fe ké bahgaŋ ye yih ya, mí ke laɓ fe ké mah vba̧na le, ɗurna ye ɓay ŋgi̧ ya. Nzuk a suŋ suŋ gbam ké ziŋ ŋgerna ɓa ŋgi̧-u le, salɓay ŋgerna-u ƴo tul ye ŋgi̧-ŋgi̧. Ku ɓay ki̧ falu gbam hi̧ nzuk-hi̧ ŋgerna-u. Feri gbam kú-u ɓaŋ ndoh ndɔk nzuk le, salɓay fe-uri gbam ƴo tul ye. Nzuku ɓay ki̧ falu hi̧ nzuk-ndoh fe-uri ké ndɔk ye.
49Mi gi tusiɓa ɓay kan ri hɔrɔ. Mi taw ɓay hɔrɔ-u ɓá oh lewsa̧#12.49 Í mgba Mbete Fe laɓna Tempuki 2.3-4,17-18; 8.16-17 tuh ke gel ki̧na-ay.. 50Mí batem a hani#12.50 Batemay ta ɓa batem a mbih ya. Gelay le, Zezu ƴo ɓah ɓay hul ké-e ɓay hu-u ké tul kpuh ɓay tul suya nzukri. ƴo geŋ mi ɓáy. Kerɓay ɓay oh hɔrɔ-u ƴo zaŋ law bi loɗ, mi ƴo geŋ batemu ɓá kal ɔh dara ɓáy. 51-52A woiri i ker ɓahri, mi gi ɓay hi̧ ɗeŋ ɓá ƴo tusiɓa wa ? Mi ƴo ɓah hi̧ wuri, mi gi ɓay kehr nzukri gel seɗe wara. Nzuk inri ndiɓi ɓay kehr hani. Nzuk a sayuri ɓay kehr hani ke nzuk a seɗe-uri. Nzuk a seɗe-uri ɓay kehr hani ke nzuk a sayuri. 53Bah gun ɓay kehr hani ke mi̧hri ye. Gun ɓay kehr hani ke bah ye. Mah gun ɓay kehr hani ke gun ye a wu̧yu. Gun a wu̧yu ɓay kehr hani ke mah ye. Mahfay ɓay kehr hani ke wu̧y gun ye. Wu̧y gun ɓay kehr hani ke mahfay ye. »
54Zezu ƴo ɓah ɓay hi̧ daɓa nzukri-aw kara pi ɓahri : « Gelke i ko ɗikmambam ƴo mbu̧h hani le, i ɓahri : “Mbam ɓay to-u.” Mí mbam to gaŋ ba. 55Gelke kuna gel zaŋna ku le, i ɓahri : “Gel ɓay zaŋu.” Mí gel zaŋ gaŋ ba. 56A woiri, nzuk-mu̧h ketinari, fe ké ti̧h nun woiri ké nunmbam ke tusiɓa ra, i ko-ko, ani mí sa̧w fe a guri-ay ma, mí i ko ya le ? 57Ɓay fe mí i gboh tul woiri tú ketina Ŋgerzah ke mun woiri le wo ? 58Ɓayu ké nzuk sek mu si ziŋ mu ma gel kuŋ salɓay le, mú ruh mun ɓay hi̧ nzuku ɓá sel mu ké mahful sina-aw. Mu si ziŋ ni ya le, ke ɓay kɔklɔ mu si pol nzuk-kuŋ salɓay. Nzuk-kuŋ salɓay ba, ɓay ndoh mu ndɔk soze-kɔr mgbalri. Sɔze-kɔr mgbalri ba, ɓay vbu mu vul mgbal. 59Mi ƴo ɓah hi̧ mu, mu ta ti̧h ke vul mgbal ra ya. Tere gursu mbew ta toŋ ya. Mu púh ɔh ke gelu dara kú poŋ mu ɓáy. »
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.