Mbete Luk 13
13
1Bale nzuk a haniri ndazi fe ké laɓ nzuk Galile a haniri hi̧ Zezu lah. Nzuk Galileri ra ƴo puh fe ké gel fe puhna Ŋgerzah dale, guvener Pilaɗ i niri hi̧ sem woyri zukru ke sem fe puhnari ké gel fe puhna Ŋgerzah. 2Zezu ba, el ke ɓay hi̧ nzukri ɓahri : « A woiri i ker ɓahri, suya nzuk Galileri-aw mba suya tɔr nzuk Galile a ɓoruri riw mí ku ziŋ hul ɓayu wa ? 3Kaŋ ya. Mi ƴo ɓah hi̧ wuri ɓahri, í lu kerɓayu ma fal. I sa mbi law woiri ké tul suya woiri el kan law tul Ŋgerzah ya le, gbam woiri i zi-u pi. 4Nzukri ké boh falu toŋndɔk seɗe ké baw vul a gaŋu ké Silowa haw nde niri ra ba, i ker ɓahri, mbɔl suya ké tul woyri-aw mba tul mbɔl ké na tul tɔr nzuk a ɓoruri ké kaɓ Zurusalemaw wa ? 5Kaŋ ya. Mi ƴo ɓah hi̧ wuri ɓahri se, í lu kerɓayu ma fal. I sa mbi law woiri ké tul suya woiri ma fal el kan law tul Ŋgerzah ya le, gbam woiri i zi-u pi. »
6Zezu el ɓah ɓay ra ke lawɓay ɓahri se : « Nzuk a hani mbew ma̧ kpuh nzu̧y ké ɓil waka viyȩh ye laɓ mbihmbam ŋgi̧-ŋgi̧ da#13.6 Kandɔk karaŋri ké ruh naŋ ɓil waka nzɔkɔ woyri, ziɓri ma kpuh nzu̧y ɓil waka viyȩh woyri. Gelke nzuk ma kpuh, mbihmbam say dara kpuh-u ti lehna. Mbete Lévitique 19.23-24 sɔk ɓahri, kpuh ti leh lehna le, nzukri ɓá za lehna-u ya mah mbihmbam say. Mbihmbam a niŋu ba, ké hal, ké si ke lehna-u gbam hi̧ Ŋgerzah ɓa fe puhna. Kaŋ dale kpuh nzu̧y ɓil lawɓayay, ko ya le, laɓ mbihmbam toŋndɔk mbew da ɓay fe le, nzuk waka gi nzah lehna-u ke mbihmbam a toŋndɔk sayu ɓay hi̧ Ŋgerzah. Ke ziŋ ya. Ke nzah ke mbihmbam a toŋndɔk seɗe-u. Ke ziŋ ya. Ke el nzah ke mbihmbam a tondɔk mbewu, mí ke ziŋ ya pi. . Ke gi ɓay hal lehna-u, mí kpuh-u leh ya. 7Bale ke si ɓah hi̧ nzuk-kɔr waka-u ɓahri : “Mú ko. Laɓ mbihmbam say mí na-ay mí-i gi ɓay hal lehna nzu̧yay, mí kpuh-u leh ya. Mú lu ke sa̧wu kan kpah. Kpuh ra gboh gel ndikpo.”
8Nzuk-kɔr waka ra yih nzak ye ɓahri : “Mbay, law woiri ɓá voh. Í poŋ kpuh ra seway ɓáy. Mi ɗéh siɓa ɗoŋ bɔku. Mi kú̧ ri vbi̧ri feri. 9Ko ya le, kpuh-u ɓay leh sew a ɓoru ɓáy. Kpuh-u leh ya gaŋ le, mi té kan kpah ɓáy.” »
10Zezu ƴo firma nzukri ɓay lák mbay Ŋgerzah ɓil vul misoŋ a hani. Namu ɓa nam ɔkna. 11Wu̧y a hani mbew ƴo ri. Wu̧y ra, záh mgba ni laɓ mun ye ɓa sena mah mbihmbam boh falu toŋndɔk seɗe. Záh ra ra̧h tak ye ŋgole. Mahful ɓay ndar mun ye ta-a. 12Zezu ɓá ko wu̧yaw kaŋ bale, ke ɗi ni, ke ɓahri : « Wu̧y, sena wo-aw lu ké tul wo lu-lu. »
13Mí ke ndar ndɔk kan tul wu̧y ra ba, tak wu̧yu ndar kparak hi̧ ni ke pir Ŋgerzah ba. 14Mí mbay vul misoŋ ziŋ law fa̧hna ɓay fe le, Zezu gah sena ra ke nam ɔkna. Ke ɓah ɓay le, el ɓah ra ɓáy hi̧ daɓa nzukri ɓahri se : « Nam-laɓ pihna ɓa namri ké tɔtɔklɔ, í gi ɓil namri-aw gah sena woiri ma. Í gah sena ke nam ɔkna ya. »
15Gaŋ tul feri riw ba, fer nzak mbay ra kandɔkay : « A woiri nzuk-mu̧h ketinari, ké sakra woiri-ay ra wa, a ge mí sel nday ye mini bamnde ye ke nam ɔkna si nzo mbih ya lo ? 16Wu̧yay, ke ɓa gun zih Abaraham. Mbay záh tukala ŋga̧h ni, í ko, laɓ mbihmbam boh falu toŋndɔk seɗe da. Su-su ɓay hi̧ selna ye ɓá laɓ ke nam ɔkna kaŋ ya le wo ? »
17Ɓay ɓahna Zezu hi̧ su̧hru se nzukbaa yeri. Nzuk a ɓoruri gbam ba, ziŋ law rihna ɓay fe laɓna a ŋgeruri ké-e laɓ.
18Zezu el ɓah ra ɓáy ɓahri se : « A fe mí-i mgba tuh ke lák mbay Ŋgerzah le ? Lák mbay ye na ani le ? 19Lák mbay Ŋgerzah na kandɔk mi̧hri fe pay a mah gelu kalak kalak ké nzuk mi̧h ké waka. Fe payu ti̧h mí hu̧h dale laɓ kpuh hi̧ ndɔkuri vba gbah gbah, mí gundoyri gi laɓ ri vul. »
20Zezu el ɓahri : « A fe mí-i mgba tuh ke lák mbay Ŋgerzah ɓáy le ? 21Lák mbay Ŋgerzah na kandɔk is ké wu̧ynzuk wa̧h ɓil som kilo bon seɗe#13.21 Sa̧w nzak gerek ɓahri, sata ɓa say. Sata ɓa fe-leh fe mah litere boh falu say. Yi̧hna som ké ɓil sata mbew mah ke kilo tondɔk say.. Is ra, rih ɓil som ya̧h ya̧h mí ur som mbah fe ɓaɗ ɓaɗ. »
22Sina Zezu ma Zurusalem, ke kal puh a lukiri ke gun puhri ƴo firma nzukri ɓay lák mbay Ŋgerzah. 23Bale nzuk mbew vbi ni ɓahri : « Ŋgernzuk, tul nzukri ké ɓay ti̧h ke ndɔk hul mí ŋgi̧ ya le ? »
Mí Zezu ɓahri : 24« Í ruh mun woiri ɓay rih puh ke nzakful a ah ya-u ɓay fe le, mi ƴo sɔk wuri, nzukri ɓa ŋgi̧-u ƴo ƴah ɓay rih keni, mí ku ziŋ mahful rih-u ya. 25Ur ke nam ké nzuk puh-u ɓay ur dar nzakful gbik dale, i ti vba̧ tuhru nzak vul ɓahri : “Nzuk puh, í mgbur ful hi̧ na” bale, ke ɓáh hi̧ wuri ɓahri : “Mi tu sa̧w woiri ya. Puh-ay ta ɓa sa̧w puh woiri ya.”
26Wara mí i él ɓah ɓay ra ɓáy ɓahri : “Nah lak huru ziŋ wuri, nah nzo fe ziŋ wuri, nah ƴo sɔk fe firma woiri ké fál kɔr wah-ay ra ba wa, ani le ?”
27Kandɔkaw mí nzuk puh-u ɓay el ɓah ɓay ra hi̧ wuri ɓahri se : “Mi tu sa̧w woiri ya. Í tɔr wuri gbam ké ta̧w bi ma sa̧, pihna woiri ɓa sél ɓay Ŋgerzah.”
28Namu-aw a woiri kú-u vbuk wuri ku̧ kala-aw, i ɓay ko Abaraham, Isak, Zakoɓ, gun nzak pihna Ŋgerzahri riw kaɓ ɓil puh lakna Ŋgerzah le, i ɓay vuh rew ke mbihnun darara darara, i sú̧ sel ŋger ŋger. 29Sa̧wnzuk a ɓoruri ɓáy ɓay mbu̧h haniri ke Abarahamri mí kaɓ nzak fe su̧na ké puh lakna Ŋgerzah. Ku úr ke fál tí̧h seh ke fál ríŋ seh, fál ndɔk lakna ke fál ndɔk kperu pi. 30Í ko, nzukri ké ƴo sar fal ɓay kal ma pol. Nzukri ké ƴo pol ba, ɓay el si sar fal mgbaɗ. »
31Ké sa̧wseh-u, farizi a haniri gi ta̧w Zezu ɓahri : « Mú ɗuk ma gel a ɓoru ɓay fe le, mbay Eroɗ yih ɓay i mu. »
32Mí Zezu ɓahri : « Í si ɓah ɓayay hi̧ suhze ra, ké lah, mi ƴo ni̧h záhri ké tul nzukri, nzuk senari kara mi ƴo gah niri guri ke pele. Nam a sayu ba, mi ɔh gbam ke gelu. 33Ɓa ra fe fe gaŋ kara guri, pele, pelah, mi ɓa sina ma Zurusalem ɓay fe le, gun nzak pihna Ŋgerzah ta hu kala Zurusalem ya.
34Zurusalem, Zurusalem wo, a wo puh ké Ŋgerzah hi̧ vul ye kan ri, gun wori ƴo i gun nzak pihnari ké Ŋgerzah pih niri. Ku vbuk nzuk a ɓoruri ké Ŋgerzah pih niri ke kasaw i pi. Bɔk ka̧h ani mí-i yih ɓay mbu̧h gun wori kandɔk mah ndoy ké ƴo mbu̧h gun yeri el pɔr tulu, mí ku sa-a. 35Í ko. Ŋgerzah poŋ gel kani ye hi̧ wuri wara. Mi ɓahri se, i ta ko mi mba kpu̧ru ka̧h seh ké i tú mi ɓahri se : “Mgbɔkɔ Gaŋ tul feri riw ku̧ tul wo ké mu gi-aw ke riŋ ɗina ye#13.35 Gel ki̧na-u na ɓil Mbete Siŋ (Psaumes) 118.26..” »
Currently Selected:
Mbete Luk 13: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
Mbete Luk 13
13
1Bale nzuk a haniri ndazi fe ké laɓ nzuk Galile a haniri hi̧ Zezu lah. Nzuk Galileri ra ƴo puh fe ké gel fe puhna Ŋgerzah dale, guvener Pilaɗ i niri hi̧ sem woyri zukru ke sem fe puhnari ké gel fe puhna Ŋgerzah. 2Zezu ba, el ke ɓay hi̧ nzukri ɓahri : « A woiri i ker ɓahri, suya nzuk Galileri-aw mba suya tɔr nzuk Galile a ɓoruri riw mí ku ziŋ hul ɓayu wa ? 3Kaŋ ya. Mi ƴo ɓah hi̧ wuri ɓahri, í lu kerɓayu ma fal. I sa mbi law woiri ké tul suya woiri el kan law tul Ŋgerzah ya le, gbam woiri i zi-u pi. 4Nzukri ké boh falu toŋndɔk seɗe ké baw vul a gaŋu ké Silowa haw nde niri ra ba, i ker ɓahri, mbɔl suya ké tul woyri-aw mba tul mbɔl ké na tul tɔr nzuk a ɓoruri ké kaɓ Zurusalemaw wa ? 5Kaŋ ya. Mi ƴo ɓah hi̧ wuri ɓahri se, í lu kerɓayu ma fal. I sa mbi law woiri ké tul suya woiri ma fal el kan law tul Ŋgerzah ya le, gbam woiri i zi-u pi. »
6Zezu el ɓah ɓay ra ke lawɓay ɓahri se : « Nzuk a hani mbew ma̧ kpuh nzu̧y ké ɓil waka viyȩh ye laɓ mbihmbam ŋgi̧-ŋgi̧ da#13.6 Kandɔk karaŋri ké ruh naŋ ɓil waka nzɔkɔ woyri, ziɓri ma kpuh nzu̧y ɓil waka viyȩh woyri. Gelke nzuk ma kpuh, mbihmbam say dara kpuh-u ti lehna. Mbete Lévitique 19.23-24 sɔk ɓahri, kpuh ti leh lehna le, nzukri ɓá za lehna-u ya mah mbihmbam say. Mbihmbam a niŋu ba, ké hal, ké si ke lehna-u gbam hi̧ Ŋgerzah ɓa fe puhna. Kaŋ dale kpuh nzu̧y ɓil lawɓayay, ko ya le, laɓ mbihmbam toŋndɔk mbew da ɓay fe le, nzuk waka gi nzah lehna-u ke mbihmbam a toŋndɔk sayu ɓay hi̧ Ŋgerzah. Ke ziŋ ya. Ke nzah ke mbihmbam a toŋndɔk seɗe-u. Ke ziŋ ya. Ke el nzah ke mbihmbam a tondɔk mbewu, mí ke ziŋ ya pi. . Ke gi ɓay hal lehna-u, mí kpuh-u leh ya. 7Bale ke si ɓah hi̧ nzuk-kɔr waka-u ɓahri : “Mú ko. Laɓ mbihmbam say mí na-ay mí-i gi ɓay hal lehna nzu̧yay, mí kpuh-u leh ya. Mú lu ke sa̧wu kan kpah. Kpuh ra gboh gel ndikpo.”
8Nzuk-kɔr waka ra yih nzak ye ɓahri : “Mbay, law woiri ɓá voh. Í poŋ kpuh ra seway ɓáy. Mi ɗéh siɓa ɗoŋ bɔku. Mi kú̧ ri vbi̧ri feri. 9Ko ya le, kpuh-u ɓay leh sew a ɓoru ɓáy. Kpuh-u leh ya gaŋ le, mi té kan kpah ɓáy.” »
10Zezu ƴo firma nzukri ɓay lák mbay Ŋgerzah ɓil vul misoŋ a hani. Namu ɓa nam ɔkna. 11Wu̧y a hani mbew ƴo ri. Wu̧y ra, záh mgba ni laɓ mun ye ɓa sena mah mbihmbam boh falu toŋndɔk seɗe. Záh ra ra̧h tak ye ŋgole. Mahful ɓay ndar mun ye ta-a. 12Zezu ɓá ko wu̧yaw kaŋ bale, ke ɗi ni, ke ɓahri : « Wu̧y, sena wo-aw lu ké tul wo lu-lu. »
13Mí ke ndar ndɔk kan tul wu̧y ra ba, tak wu̧yu ndar kparak hi̧ ni ke pir Ŋgerzah ba. 14Mí mbay vul misoŋ ziŋ law fa̧hna ɓay fe le, Zezu gah sena ra ke nam ɔkna. Ke ɓah ɓay le, el ɓah ra ɓáy hi̧ daɓa nzukri ɓahri se : « Nam-laɓ pihna ɓa namri ké tɔtɔklɔ, í gi ɓil namri-aw gah sena woiri ma. Í gah sena ke nam ɔkna ya. »
15Gaŋ tul feri riw ba, fer nzak mbay ra kandɔkay : « A woiri nzuk-mu̧h ketinari, ké sakra woiri-ay ra wa, a ge mí sel nday ye mini bamnde ye ke nam ɔkna si nzo mbih ya lo ? 16Wu̧yay, ke ɓa gun zih Abaraham. Mbay záh tukala ŋga̧h ni, í ko, laɓ mbihmbam boh falu toŋndɔk seɗe da. Su-su ɓay hi̧ selna ye ɓá laɓ ke nam ɔkna kaŋ ya le wo ? »
17Ɓay ɓahna Zezu hi̧ su̧hru se nzukbaa yeri. Nzuk a ɓoruri gbam ba, ziŋ law rihna ɓay fe laɓna a ŋgeruri ké-e laɓ.
18Zezu el ɓah ra ɓáy ɓahri se : « A fe mí-i mgba tuh ke lák mbay Ŋgerzah le ? Lák mbay ye na ani le ? 19Lák mbay Ŋgerzah na kandɔk mi̧hri fe pay a mah gelu kalak kalak ké nzuk mi̧h ké waka. Fe payu ti̧h mí hu̧h dale laɓ kpuh hi̧ ndɔkuri vba gbah gbah, mí gundoyri gi laɓ ri vul. »
20Zezu el ɓahri : « A fe mí-i mgba tuh ke lák mbay Ŋgerzah ɓáy le ? 21Lák mbay Ŋgerzah na kandɔk is ké wu̧ynzuk wa̧h ɓil som kilo bon seɗe#13.21 Sa̧w nzak gerek ɓahri, sata ɓa say. Sata ɓa fe-leh fe mah litere boh falu say. Yi̧hna som ké ɓil sata mbew mah ke kilo tondɔk say.. Is ra, rih ɓil som ya̧h ya̧h mí ur som mbah fe ɓaɗ ɓaɗ. »
22Sina Zezu ma Zurusalem, ke kal puh a lukiri ke gun puhri ƴo firma nzukri ɓay lák mbay Ŋgerzah. 23Bale nzuk mbew vbi ni ɓahri : « Ŋgernzuk, tul nzukri ké ɓay ti̧h ke ndɔk hul mí ŋgi̧ ya le ? »
Mí Zezu ɓahri : 24« Í ruh mun woiri ɓay rih puh ke nzakful a ah ya-u ɓay fe le, mi ƴo sɔk wuri, nzukri ɓa ŋgi̧-u ƴo ƴah ɓay rih keni, mí ku ziŋ mahful rih-u ya. 25Ur ke nam ké nzuk puh-u ɓay ur dar nzakful gbik dale, i ti vba̧ tuhru nzak vul ɓahri : “Nzuk puh, í mgbur ful hi̧ na” bale, ke ɓáh hi̧ wuri ɓahri : “Mi tu sa̧w woiri ya. Puh-ay ta ɓa sa̧w puh woiri ya.”
26Wara mí i él ɓah ɓay ra ɓáy ɓahri : “Nah lak huru ziŋ wuri, nah nzo fe ziŋ wuri, nah ƴo sɔk fe firma woiri ké fál kɔr wah-ay ra ba wa, ani le ?”
27Kandɔkaw mí nzuk puh-u ɓay el ɓah ɓay ra hi̧ wuri ɓahri se : “Mi tu sa̧w woiri ya. Í tɔr wuri gbam ké ta̧w bi ma sa̧, pihna woiri ɓa sél ɓay Ŋgerzah.”
28Namu-aw a woiri kú-u vbuk wuri ku̧ kala-aw, i ɓay ko Abaraham, Isak, Zakoɓ, gun nzak pihna Ŋgerzahri riw kaɓ ɓil puh lakna Ŋgerzah le, i ɓay vuh rew ke mbihnun darara darara, i sú̧ sel ŋger ŋger. 29Sa̧wnzuk a ɓoruri ɓáy ɓay mbu̧h haniri ke Abarahamri mí kaɓ nzak fe su̧na ké puh lakna Ŋgerzah. Ku úr ke fál tí̧h seh ke fál ríŋ seh, fál ndɔk lakna ke fál ndɔk kperu pi. 30Í ko, nzukri ké ƴo sar fal ɓay kal ma pol. Nzukri ké ƴo pol ba, ɓay el si sar fal mgbaɗ. »
31Ké sa̧wseh-u, farizi a haniri gi ta̧w Zezu ɓahri : « Mú ɗuk ma gel a ɓoru ɓay fe le, mbay Eroɗ yih ɓay i mu. »
32Mí Zezu ɓahri : « Í si ɓah ɓayay hi̧ suhze ra, ké lah, mi ƴo ni̧h záhri ké tul nzukri, nzuk senari kara mi ƴo gah niri guri ke pele. Nam a sayu ba, mi ɔh gbam ke gelu. 33Ɓa ra fe fe gaŋ kara guri, pele, pelah, mi ɓa sina ma Zurusalem ɓay fe le, gun nzak pihna Ŋgerzah ta hu kala Zurusalem ya.
34Zurusalem, Zurusalem wo, a wo puh ké Ŋgerzah hi̧ vul ye kan ri, gun wori ƴo i gun nzak pihnari ké Ŋgerzah pih niri. Ku vbuk nzuk a ɓoruri ké Ŋgerzah pih niri ke kasaw i pi. Bɔk ka̧h ani mí-i yih ɓay mbu̧h gun wori kandɔk mah ndoy ké ƴo mbu̧h gun yeri el pɔr tulu, mí ku sa-a. 35Í ko. Ŋgerzah poŋ gel kani ye hi̧ wuri wara. Mi ɓahri se, i ta ko mi mba kpu̧ru ka̧h seh ké i tú mi ɓahri se : “Mgbɔkɔ Gaŋ tul feri riw ku̧ tul wo ké mu gi-aw ke riŋ ɗina ye#13.35 Gel ki̧na-u na ɓil Mbete Siŋ (Psaumes) 118.26..” »
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.