Mbete Luk 14
14
1Zezu rih ɓil kerpuh ŋgernzuk fariziri a hani ɓay su̧ fe dale, namu ɓa nam ɔkna. Ku ko kona ma tul Zezu yi̧m. 2Nzuk a hani mbew ƴo ri. Mun ye he-hew. Ke ƴo pol Zezu. 3Bale Zezu vbi nzuk goso fe tuna mbete bolkusol Ŋgerzahri ke fariziri ɓahri : « Mbete bolkusol Ŋgerzah hi̧ nzukri ful ɓay gah sena ke nam ɔkna mini ani le ? »
4Mí ku kaɓ silili, ku fer nzak ye ya. Zezu ba, mgba nzuk sena ra el gah ni mí poŋ ni tɔr. 5Zezu el ɓah hi̧ niri ɓahri : « Ké sakra woiri-ay, a ge mí gun ye mini nday ye lih ɓu lɔkɔ mbih ke nam ɔkna le, ke ten ɓa gah-u ya le wo ? »
6Nzuk ké ziŋ nzak él ke ɓay ɓoɗ ta-a.
7Mí Zezu el ɓah hi̧ gahru a ɓoruri ké ŋgernzuk fariziri ɗi niri kaɓ nzak fe su̧na-aw pi. Ke ko gahruri ƴo mbi gel kaɓna a suki suki, mí ke ɓah lawɓayay ɓahri : 8« Gelke nzuk ɗi mu si su̧ fe ké gel ti̧hmbih-ya̧ hani le, mú mgba gel kaɓna riŋ ɗina ya. Ko ya le, nzuk ti̧hmbih ɗi nzuk a ɓoru ké riŋ ɗina ye mgbe mba riŋ ɗina a wo. 9Dale nzuk ti̧hmbih ɓay gi ta̧w wo ɓahri : “Mú poŋ gel kaɓna-ay hi̧ ŋgernzuk.” Bale su̧hru ɓay se mu. Mu úr si kaɓ gel kaɓna ke sar fal mgbaɗ. 10Mí gelke nzuk ɗi mu si su̧ fe le, mú mgba gel kaɓna a gunri. Nzuk-ɗi mu gi ka̧h dale, ke ɗí mu ɓahri : “Ya̧h, mú si kaɓ gel kaɓna ŋgernzuk ké na polaw.” Kaŋ dale nzukri ké kaɓ nzak fe su̧na ziŋ mu, ku tú mu ɓa nzuk riŋ ɗina. 11Nzuk a suŋ suŋ gbam ké ɔr tul ye le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa. »
12Mí Zezu el ɓah hi̧ ŋgernzuk fariziri ké ɗi niri gi su̧ fe ra ɓahri : « Gelke mu ɗi nzukri gi su̧ fe, ɓa ra fe su̧na a garu mini fe su̧na ti̧hmbih le, mú ɗi ya̧h wori ya, yi̧n wori ya, in wori ya, mbaŋ wori nzuk fe ziŋna kara ya pi rɔkɔ kú soh ɗi mu si su̧ fe puh keni mbɔl fe su̧na wo. 13Gelke mu ɗi nzukri gi su̧ fe le, mú ɗi ko̧hkori, nzukri ké mun woyri hu yɔh, kpereri, ra̧wri ma. 14Ku ta puh mbɔl fe su̧na wo ra ya. Mí pol tehna Ŋgerzah ɓay teh tul wo ɓayu ké a ye mí ke ɓay puh mbɔlu ke nam ké nzukri ké tu ni ɓa záh woyri ziŋ pa̧ymun a foyu. »
15Bale nzuk a hani mbew ké kaɓ nzak fe su̧na ziŋ Zezu ra el ke ɓay ɓahri : « Pol tehna Ŋgerzah ƴo tul nzuk ké ɓay kaɓ nzak fe su̧na ké puh lakna ye. »
16Mí Zezu el ɓahri : « Nzuk a hani-u mbew wahɓay laɓ baw ti̧hmbih. Ke ɗi daɓa nzukri ɓá gi su̧ fe. 17Fe ti̧hmbih lek ɔh dale, ke pih gun nzak pihna ye si ɗi nzukuri-aw ɓahri : “Ti̧hmbih lek ɔh da. Í gi wuri su̧ fe wara.”
18Mí a ge ge le, ɓah lakna ɓay ye ɓay ye. Nzuk a titilu ɓahri se, ke yeh waka. Ɓay si ko waka-u zaŋ law ye. A ye ra ke goŋ law vohna.
19Nzuk a ɓoru ɓahri se, ke yeh ndayri seɗe seɗe gel ndiɓi. Ke ƴo tɔrna ɓay leh ndayuri ɓay ko-u. A ye ra ke goŋ law vohna. 20Nzuk a ɓoru ɓáy ɓahri se, ke ya̧ wu̧y ɓa foyu. Sa̧wu mí a ye ra ke sí ya.
21Gun nzak pihna el ndazi ɓayri hi̧ bahgaŋ ye lah bale, haŋ nzuk puh-aw fa̧h ni fa̧-fa̧h, mí ke ɓah hi̧ gun nzak pihna ra ɓahri : “Mú si ɓa gah-u ke mahful mgboŋri ke zelfulri. Mú ɗi ko̧hkori, nzukri ké mun woyri hu yɔh, ra̧wri, kpereri. Mú ɓaŋ niri, kú gi, kú su̧ fe ti̧hmbih bi.”
22Gun nzak pihna ra ur si. Ke el gi, mí ke ɓahri : “Mbay, bolkusol woiri ra, mi laɓ ɔh da. Wara mí gel kaɓnari toŋ ɓáy.”
23Bahgaŋ ye el ɓah hi̧ ni ɓahri : “Mú mbi mahful si puh a ɓoruri : puh a lukiri ke puh a ɓil suyri. Mú ɗi nzuk puh-awri, kú gi ti̧hmbih bi-ay. Kú mbah puh bi nzuturu. 24Mi ƴo ɓah hi̧ wuri ɓahri se, ké sakra nzukri ké mi ɗi niri polaw, nzak rim nzuk mbew woyri ta leh fe su̧na ti̧hmbih bi-ay ya.” »
25-26Daɓa nzukri ɓa ŋgi̧-u ƴo mbu̧h hani ké ta̧w Zezu, mí ke ɓah ɓay hi̧ niri ɓahri : « Nzuk gi ta̧w bi, mí law ye lu ké tul bah ye ya, tul mah ye ya, tul wu̧y ye ya, tul gun yeri ya, tul yi̧n yeri ya, tul manah yeri ya, dara mí mun ye ya le, nzuku mah dih fal bi ya. 27Nzuk a a̧y ké sa mbi kpuh vbatay hul ye suk toŋ fal bi keni ya le, nzuku mah dih fal bi ya pi. 28Ɓayu ké a ge mí ké sakra woiri-ay ɓay mboh vul a bawu dan kí̧ lari mboh-u le ? Ke ɓay ko ŋgerna ye mah ɔh pihna-u dara ɓáy ya le ? 29Ŋgerna ye mah ɔh mboh-u ya le, ke ta titil pihna-aw ya rɔkɔ nzukri ɓá mbi riŋ ye ɗi keni siŋ sakna kandɔkay : 30“Fenaze ti mboh vul ye, mí ŋgerna ɔh-u ta-a wo.”
31Dara mbay ɓá ur ɓay ruh ŋgermu ziŋ mbay a ɓoru le, ke ɓay ko ŋgerna ye dara ɓáy ya le ? Ke vbi law ye, tul soze yeri ké laɓ sɔɗ sɔɗ boh gel boh-aw (10.000) mah haw ŋgermu tul mbaŋ ye mbay ké ƴo gi ke soze yeri sɔɗ sɔɗ boh gel bon seɗe (20.000) ma-mah mini ani le ? 32Ŋgerna mbayu mah ya le, ke píh nzuk ye si pol ka̧h ta̧w mbaŋ ye mbay ɓay goŋ ni lekɓay ɓá na sakra woyri. 33Kaŋ pi mí nzuk a suŋ suŋ ké sakra woiri-ay, ke lu kerɓay ye tul fe yeri riw ma fal ya le, ke mah dih fal bi ya.
34Tom ɓa fe a suki, mí tom nuŋ mba le, a fe mí ɓay laɓ hi̧ tomu ɓá el nuŋ ɓáy le ? 35Tom ra ti̧h suk ya. Tomu mah hi̧ tusiɓa ŋgerna ya, mah ná ɓa aŋgere ya pi. Tom ra ku fer ku̧ kpah. Nzuk ké ƴo ke suk ɓay lah ɓay le, ké lah. »
Currently Selected:
Mbete Luk 14: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
