Markus 3
3
Si Yesus sumama' in tou asi endo Sabat
(Mat. 12:9-14; Luk. 6:6-11)
1Wo si Yesus muntep angé sumawel am balé paapo'an é agama Yahudi. Am bitu awéan si esa tou, eng kamana esa imapalaio. 2Am bitu ka'i awéan piraan tou sé mawere-weren a si Yesus sa Sia sumama' si tou itu an endo Sabat, wosama' séra ro'na méé kaséaan ai Sia. 3Icua i Yesus a si tou eng kamana esa mapalaio, “Mayo, tumulungo mai an uner!”
4Wo wuéien-Na ai séra, “Si wisa e ro'na émaan asi endo Sabat? Méma' si loor kuma'pa si léwo'? Sumama' in tou kuma'pa maté tou?” Taan séra makapeneske'.
5Téintengen-Na séra im baya sé an li'cir-Na ang karapi in e'bow. Sia matapé ampa'paan séra keté até. Wo icua-Na a si tou itu, “Yuluro mai eng kamamu.” Wo yulurna eng kamana wo asi témpo ituke' imasama'o eng kamana. 6An tutuw ituke', sé tou Farisi kumesot am balé paapo'an. Séra makala'us mangé e mepaar wo sé tou makii-kiit si Herodes en tumambisa maté si Yesus.
Keli en tou kumiit si Yesus
7Si Yesus wo sé murit-Na tumela'u in tampa itu wo mangé an lour Galilea. Sé tou keli makii-kiit Sia, séra ra'ica asaloke' ang Galilea owo, taan ka'i an Yudea owo, 8an Yerusalem owo, an Idumea owo, an lewet in doyongan Yordan, wo an li'cir ing kota Tirus wo in Sidon. Séra mai a si Yesus, ampa'paan liningao éra pakasa sé niéma'-Na.
9 #
Mrk. 4:1; Luk. 5:1-3 An tutuw sérén i Yesus taniitu eng kakeli é tou sé mai ai Sia, wo iru'du'-Na sé murit-Na tumu'tul in londéi en sakéan-Na, wosama' sé tou ra'ica ruméngké' Sia. 10Ampa'paan kelio en tou sé sinama'-Na, akar pakasa sé tou sumakit merénké-réngké'an e mai misu' Sia. 11Susur ka'i sé tou rinasuk i roh léwo' itu suméré si Yesus, séra kumundu an dior-Na wo mangko', “Icoo si Toyaang i Amang Kasuruan!” 12Taan séra pinéro repet i Yesus eng kumua sa si séi Sia.
Si Yesus sumisir sé sangapulu' rua tou e mamuali ruru'du'an-Na
(Mat. 10:1-4; Luk. 6:12-16)
13Kekawus in itu si Yesus sumosor an esa tolaina. Towan-Na sé tou sé sinisir-Na wo séra mai ai Sia. 14Wo sisiren-Na sangapulu' rua tou sé mewali-wali ang karapi-Na wo yutus-Na eng kumua in Abar Kaaruien. 15Wo wéan-Na ka'i séra kawasa e musér sé sétang.
16Sé sangapulu' rua tou sé sinisir-Na itu, e ngaran éra: Simon si ningaranan-Na ka'i Petrus, 17si Yakobus wo si tuarina Yohanes toyaang i Zebedeus, séra in dua ningaranan-Na ka'i Boanerges eng kaangéanna toyaang in erut, 18si Andreas, si Filipus, si Bartolomeus, si Matius, si Tomas, si Yakobus toyaang i Alfeus, si Tadeus, si Simon tou Zelot,#3:18 Zelot: Esa paesaan é tou Yahudi sé rumaméji wosama' sé bangsa Israel icawekar am pakakawasaan é pemerénta Romawi. 19wo si Yudas si kumianat oka si Yesus.
Si Yesus wo si Beelzebul
(Mat. 12:22-32; Luk. 11:14-23, 12:10)
20Kekawus in itu, si Yesus muntep an esa walé. Am bitu ka'i keli en tou mai mali'us, akar Sia wo sé murit-Na ra'io wana ka'i témpo eng kuman. 21An tutuw é pamalé-Na luminga Sia am bitu, séra mai e mindo woo Sia, ampa'paan ipakua é tou Sia imanganga'o.
22 #
Mat. 9:34, 10:25, 12:24; Luk. 11:15 Sé makailek wutul in Torat sé imai an Yerusalem owo kumua ka'i, “Sia rinasuko i Beelzebul! Sia musér sé sétang mengapaké ing kawasa i kikiiten é sétang anio'.”
23Wo towan i Yesus séra wo numuwu' maké in andéan, “Tumambisa si sétang ro'na musér si sétang? 24Sa awéan esa kakolanoan meréndé-réndéran, eng kakolanoan itu ra'ica kawisa tumang. 25Wo sa esa pamalé meréndé-réndéran, em pamalé itu ra'ica kawisa tumang. 26Taniitu ka'i sa si kikiiten é sétang sumundur sé kakéléna in esa wo meréndé-réndéran, sia itu ra'ica kawisa tumang wo tantu maka'pu.
27Taan ra'ica wana mandé esake' tou e ro'na muntep am balé i tou enté' e mandét ing kasiyaanna, sa ra'ica wa'kesenna owo si tou enté' itu. Kekawus in itu ro'nao andétenna waya eng kasiyaan sé an untep im balé itu.
28En ulitna icua-Ku mangé ai camu, pakasa eng kamesé-meséaan wo en ojat sapake' mangé sé ipakua é toya-toyaang i tou ro'napé' kaampungan. 29#Mat. 12:32; Luk. 12:10 Taan si séike' mangé e mengaojat si Roh Le'nas, sia ra'io kaampungan akar ing kauré-uré, ampa'paan sia iméma'o ing kamesé-meséaan akar ing kauré-uré.” 30Si Yesus kumua in taniitu, ampa'paan ipakua éra sapaoka Sia rinasuk i roh léwo'.
Si inang wo sé mepoow wo si Yesus
(Mat. 12:46-50; Luk. 8:19-21)
31Si inang wo sé mepoow wo si Yesus mai am balé pengasusuian-Na. Ang karoro'an éra i makatulung ang kesot, iru'du' éra tou e mangé tumowa Sia. 32An tampa itu, kelian tou makalukut lumi'cir si Yesus wo awéan eng kumua ai Sia, “Tuang, si inang wo sé mepoow wo si Tuang ang kesot. Séra rumaméji meta'up wo si Tuang.”
33Isowat i Yesus ai séra, “Si séi réén si inang-Ku wo sé mepoow wo Yaku?”
34Téintengen-Na séra sé makalukut lumi'cir Sia wo kumua ai séra, “Si anioo si inang-Ku wo sé mepoow wo Yaku. 35Si séike' si mengaéma' ing kasalé'an i Amang Kasuruan, siao si poow tuama wo poow wéwéné wo inang-Ku.”
Currently Selected:
Markus 3: TNT
Highlight
Share
Copy
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018
