Yohanes 19

1An iatuma ni Pilatus sé surarona i mahwalimé si Yesus wo sumambok ni Sia. 2Sé suraro mayamla um poporongen um panga rintek menulah am wangunen, an iporong nérala wia ni Sia. Ni Sia éng kinaraian nérala ung karai tonton monong. 3Tumondong niitu, ni séra mahsasawelana mahrétéma wia ni Sia a mahkua, “Sigi' wangko', é Kolano né tou Yahudi!” A Sia pahsepalen nérama.

4A mondol kasiima si Pilatus wo mahkua, “Ilekenola, ni Sia méiondolkumé wia ni kamu, wo toro kata'uan nioua i ni aku én zéi'kan nimilekla u sinala' zozo' in esa im wia ni Sia.” 5A mondolé si Yesus, nimaké poporongen ni kolano um panga rintek menulah am wangunen, wo ung karai tonton monong. A si Pilatus kumuama wia ni séra, “Ilekenoma si tou itii!”

6I si Yesus niilekla né tonaas né walian karia né menénéiz um Walé ni Opo Empung, ni séra é mahkérét, “Salipenola Sia, salipenola Sia!”

Ang kuan ni Pilatus wia ni séra, “Éndonoma Sia wo kiitola um paaz niou i sumalip ni Sia, pahpaan zozo' in esa én zéi'kan siapa u sinala' kinailekangku im wia ni Sia.”

7Am wingkotela né tou Yahudi itii wia ni sia, “Ni kai ém wéwéhan un ukum Torat wo mengiit an ukum itii ni Sia é léwo'zéi' ukumen i maté. Pahpaan ni Sia éng kimuamola i ni Sia én Oki' ni Opo Empung.”

8In timalingamé u méikua néramé itii, si Pilatus éng kalousnamo i maindé'. 9A sia muntepa sumaup witi istanana. I si Yesus méipahwalimomé i nimuntepé, a si Pilatus kumuama wia ni Sia, “Wisa Ko a méyé wé?” Taan si Yesus zéi'kan nimingkotla.

10Pahpaano niitu si Pilatus kimuala wia ni Sia, “Kaa Ko soo numuwu' wia ni aku? Zéi'kan kata'uan-Nu wé i ni aku ém wéwéhan kawasa i milot ni Ko wo kangkasii wéwéhan kawasa i sumalip ni Ko?”

11Si Yesus nimingkotla, “Ni ko én zéi'kan siapa kawasa zozo' in esa wia ni Aku, sa ung kawasa itii zéi'kan méiwéhémé ni Opo Empung. Pahpaano niitu, si tou nimayo ni Aku wia ni ko, u singkéla'na é lumouspé'mé u singkéla'mu.”

12Rengané in toro niitu, si Pilatus mahtututu' i milot ni Sia, taan sé tou Yahudi mahkérét, “Sa Sia ipilotmumé, ni ko én zéi'kan kakaria ni Kaisar. Séi uman si mapakua ing kolano é mahsaru si Kaisar.”

13I si Pilatus timalingamé an ipahkua néramé itii, ni sia nimatuma sé tou i mahwalimé si Yesus i mondolé, wo si Pilatus rimumezla witu u rurumezan i mahtotoz in ulit kaapa zéi'kan am pahwangunen né tou. Un tampa itii ém pahkuan Welah Watu.#19:13 Witu nunuwu'en Yunani é méipantik ‘Litostrotos’. Witu u nunuwu'en Ibrani ém pahkuan Gabata. 14Un endo itii én endo mahsiwo-siwo i lumé'os um Paskah né tou Yahudi. In toro niitu ém woo jam mapulu' wo zua i lolambot. A si Pilatus kumuama wia sé tou Yahudi itii, “Ileknola si Kolano niou!”

15A séra mahkérét, “Wunu'enola Sia! Wunu'enola Sia! Salipenola Sia!”

Ang kuan ni Pilatus wia ni séra, “Paaz kamu wé sa si Kolano niou salipengku?”

Ang kuan né tonaas né walian, “Si Kolano nai én esa uman, ni siamo si Kaisar!”

16Ing kamurian si Pilatus nimayola si Yesus wia ni séra i salipen. Angé néramé si Yesus an ipahwali nérama Sia i salipen.

Si Yesus i sinalip

(Mat. 27:32-38; Mrk. 15:21-27; Luk. 23:26, 33-43)

17Si Yesus é nimasaan u salip-Na nimondolé im witi wanua tua'na a mangé witi tampa makangaran Tampa an Tengkora'. Witu u nunuwu'en Ibrani ém pahkuan Golgota. 18Si Yesus é méisalip néra witu. Witu ung kawihi wo kakan-Na é méisalip kasii sé zua tou walina wo si Yesus é méiunez. 19Si Pilatus nimatuma i méhéma witu un atas u salip ni Yesus um papang pinantikan: “Yesus tou Nazaret, Kolano né tou Yahudi”.

20Lakez sé tou Yahudi nimaca u méipantik itii, pahpaan u sinalipan si Yesus é rété uman u Yerusalem. Wo u méipantik witu é nunuwu'en Ibrani, nunuwu'en Latin wo nunuwu'en Yunani. 21A sé tonaas né walian né Yahudi kumuama wia si Pilatus, “Tia' ipahpantikmu, ‘Kolano né tou Yahudi’, taan ipantikla ‘Si tou kenu é mahkua: ni Akumo si Kolano né tou Yahudi.’ ”

22Am wingkotela ni Pilatus, “Apa u mémoipantikkula, téntumo u méikapantik.”

23Kumawusa sé suraro itii i simalipa si Yesus, ni séra niméndomé ung karai-Na am pahepaten nérama, si esa wo si esa é makailek sana wéténg. Ni séra kasii niméndomé ung karai tonton ni Yesus. Ung karai tonton itii én zéi'kan siapa wiwilitan, nimasondol witu un atas makaz witu um wawa'. 24#Mzm. 22:19 Pahpaano niitu ni séra mahkuaala, “Tia'mo wéténgenta ung karai tonton kenu, taan tawimo isawutla lot#19:24 In toro niitu ni séra limombo'ma um watu zua i mahtata'u séi si niméndo. wo toro makailek niitu.” Karia in téntu malekepa u méipantik witu um Pinantik Lenas in téntii,

“Ung karai-Ku ém pinemété-météng néra

wo ni séra é simawut lot i makailek ung karai tonton-Ku.”

Niitumo um winangun né suraro itii.

25Si ina' ni Yesus wo si wéwéné katuari ni ina' ni Yesus, si Maria mahayo ni Klopas wo si Maria tou Magdala é rimendai witu rété u salip ni Yesus. 26I niilekla ni Yesus si Maria ina'-Na wo si pahtuzu'en si ikararaaté-Na witu ung kasaru ni Maria, a Sia kumuama wia si ina'-Na, “Ina', kenumo si oki'mu!”

27Tumondong niitu Sia kumuama wia si pahtuzu'en-Na, “Kenumo si ina'mu!” Rengané in toro niitu si ina' ni Yesus é méipahwalima witi walé ni pahtuzu'en-Na itii.

Si Yesus i nimaté

(Mat. 27:45-50; Mrk. 15:33-37; Luk. 23:44-46)

28 # Mzm. 22:16, 69:22 Tumondong niitu, pahpaan ing kata'uano ni Yesus im péléng am paayangen-Na é simampetola, wo u méipantik witu um Pinantik Lenas malekep, ni Sia kimua, “Ni Aku é maré'o!” 29Im witu ém wéwéhan ung kuré' winuta un anggor esem. An éndo néramé um wunga karang pahkuan spons#19:29 U spons kenu ém wunga a mahtou witi tasik. Um wunga kenu é mahsepsep zano. an ito'to' nérama witu un anggor esem. Iruki nérama um wunga itii witu u rendaina ung kai pahkuan hisop#19:29 U hisop én tinanem ung karakékna é mahakazé sana meter. Um wungana éng kulo' wo lakez um pangana. U rendaina wo am pangana ém wulwulen. Niitumo un zano kaapa a mahzano-zano én toro lumaput witu., an ilaput nérama witu um wiwih ni Yesus. 30Makapé'anla un anggor esem itii, a si Yesus kumuama, “Simampetola.” A Sia tumuktukla an iayo-Nala ung katou-touan-Na.

Si Yesus im winetuan

31Si Yesus i sinalip én endo mahsiwo-siwo i lumé'os un endo Sabat. Un endo Sabat in toro niitu én totoz wangko' pahpaan nimasepu'an karia un endo i lumé'os um Paskah né tou Yahudi. Sé tonaas né tou Yahudi é masimaru wia si Pilatus wo mahaléi wia ni sia i rumepu' an a'é né méisalip wo séra rewek i maté wo mekitumpa ni séra sé nimaté witu salip itii. Pahpaan sé tonaas né tou Yahudi é soo sa wéwéhan tou nimaté méisalip i ni séra lumé'os u Sabat. 32A méyé sé suraro a rumepu'ma un a'é ni kataré wo ni kazua sé méisalip karia ni Yesus. 33Taan i ni séra méikaayola wia si Yesus a milekla i ni Sia é nimatémo, ni séra én zéi'kan rimepu'ma un a'é-Na. 34Taan si esaané im wia sé suraro itii nimetuma um wentuhan ni Yesus karia un wengkou a rengan sumaroié un zaha' wo un zano.

35Si tou nimilek in esa u nimamuali itii, ni sia in esa si mahkua tumoro an niilekna itii wo un ipahkuana én ulit. Wo kata'uana un ipahkuana én ulit, wo ni kamu kangkasii é ma'éman. 36#Kel. 12:46; Bil. 9:12; Mzm. 34:21 Niitu nimamuali wo malekep u méipantik witu um Pinantik Lenas in téntii, “Zéi'kan siapa zozo' in esa un zuhi-Na u rinepu'.” 37Wéwéhan kasii u méipantik witu um Pinantik Lenas in téntii, “Ni séra é milek ni Sia si winetuan néramola.”

Si Yesus méileweng

(Mat. 27:57-61; Mrk. 15:42-47; Luk. 23:50-56)

38Tumondong niitu si Yusuf tou Arimatea mahaléi wia si Pilatus wo sia toro matumumpa un awak ni Yesus. (Si Yusuf é mahkii-kiit si Yesus, taan ni sia mahwuni-wuni uman pahpaan ni sia é maindé' wia sé tonaas né tou Yahudi). Um pahaléien ni Yusuf itii é niénéané ni Pilatus. A sia mangé in timumpamé un awak ni Yesus. 39Si Nikodemus kangkasii é nimangé witu. Ni siamo si i makasa niméyé wia si Yesus im wengi. Ni sia nimahalima u lana mur wo ung gaharu um pinasemboro, ung kawutezna ém woo teluna pulu' kilo. 40Ni séra nimangémé un awak ni Yesus, a saputen nérala karia u roko' lenan karia im pahisu'na u lana mahwou tariis un tou-Na mengiit ung kinanaram né tou Yahudi i lumeweng si tou.

41Im witu u rété un tampa ni Yesus sinalip ém wéwéhan un uma wo im witu un uma itii ém wéwéhan u lelewengan#19:41 U lelewengan kenu én tuleng winangun witu ung kentur watu simiri'. weru un zéi'kampé' pinahlewe-lewengala. 42Pahpaan in toro niitu én endo mahsiwo-siwo u Sabat wo u lelewengan é rété uman, niitumo un awak ni Yesus é méileweng néra witu.

Currently Selected:

Yohanes 19: LAITOM

Highlight

Copy