Yohanes 6

Si Yesus niméhé ung kakanen wia sé limana riwu tou

(Mat. 14:13-21; Mrk. 6:32-44; Luk. 9:10-17)

1Tumondong niitu si Yesus mangé witi leweta u Louz Galilea um pahkuan kangkasii Louz Tiberias. 2Lakez sé tou mahkiit ni Sia, pahpaan ni séra nimilek a makakompo'en pahwangunen-Na wia sé tou saki. 3A si Yesus karia né pahtuzu'en-Na sumosoza witi wawona ung kentur a rumumez witu. 4In toro niitu, un endo mahpésta né tou Yahudi um pahkuan Paskah én zéi'mo uré. 5I ni Sia nimileka u makaliklik-Na wo mileka lakez sé tou mahéyé wia ni Sia, a Sia kumuala wia si Filipus, “Wisa un toro telesantamé roti, wo séra toro kuman?” 6Niitu é méikua-Na i milek um wangunen ni Filipus, pahpaan kata'uan-Namo un totoz im wangunen-Na.

7A si Filipus mingkotla wia ni Sia, “Un zoit zuana atus dinar én zéi'kan awes iteles roti iwéhé wia ni séra zozo' tahkokori'an uman ung kailekan néra.”

8Si Andreas, si totoz katuari ni Simon Petrus, si esaané im wia sé pahtuzu'en ni Yesus kimuala wia ni Sia, 9“Im wia'i ém wéwéhan si tolé oki' mahali-ali u roti jelai#6:9 Jelai én tatanemen tanu ung gandum. Un topongna ém pahwangunen kakanen né binatang. Un topong kenu ém pahwangunen roti né tou zéi'kan siapa apa. lima wo sé seza' zua, taan apa niitu awes iwéhé wia sé tou téntu ung kalakez?”

10Kuan ni Yesus, “Pekirumezpé'la séra.” Un tampa itii éng kazukutan, a séra rumumezla witu. Ni séra péléng, taré sé tuama ém woo limana riwu.

11Tumondong niitu si Yesus méndomé u roti itii ang kumuama u makasé wia si Opo Empung, am peméténg-Nama u roti itii wia sé tou rimumez witu. Téntu kangkasii um winangun-Na wia sé seza' itii wo ni séra kiman makaz nimawesuh.

12I ni séra péléng kimanola makaz im wesuh, si Yesus kimuala wia sé pahtuzu'en-Na, “Pakaréwokené a nimateza wo tia' wéwéhan a méikatia'.” 13A réwoken néramé an teza im witu u roti jelai lima ang kinan né tou itii, ung kalakezna é mapulu' wo zuana lo'lo'.

14I niilekla né tou itii u makakompo'en winangunla ni Yesus, ni séra mahkua, “Ni Sia én uli-ulit Nabi si méitaaz ni Opo Empung i méyé wia ung kaayahan kenu.” 15Kata'uan ni Yesus ni séra é mamenutu' ni Sia i maéndo kolano néra. Niitumo Sia nimangé witi kimentur mengesamé.

Si Yesus limampang witu um wawo un zano

(Mat. 14:22-33; Mrk. 6:45-52)

16I mahwengimoma, sé pahtuzu'en ni Yesus nimangé witi louz. 17A séra sumakéma londéi i lumewet mangé witi Kapernaum. Un endo é rimbengbengo taan si Yesus én zéi'kampé' mahwali-wali karia néra. 18Karegas niitu un zano witi louz é mahsempa'mo pahpaan u reges repet. 19Im woo lima kaapa enemna kilométer ung kazou'na um pinanggayuan néra, an ileken nérama si Yesus mahlampangé witu um wawo un zano mahrétémé u londéi sinakéan néra. Ni séra én totoz maindé'. 20Taan si Yesus kimuama wia ni séra, “Kenu é ni Aku, tia'mo maindé'!” 21Niitumo ni séra é mahpaa-paaz i ni Sia simakémé witu u londéi wo in toro niitu u londéi sinakéan néra é méikaayomola witi tampa angéan néra.

Si Yesus pahpenéron né tou lakez

22Masandomé sé tou lakez é nimento' witi leweta u louz menéro-néro si Yesus. Pahpaan kata'uan néra ing kahwii u londéi witu én esa uman wo si Yesus én zéi'kan simakéma mahwali-wali karia né pahtuzu'en-Na witu u londéi itii i lumewet u louz itii. 23Karegas niitu a mawitula um woopira londéi walina am witi Tiberias a méyé. Ni séra méikaayola witi rété un tampa né tou lakez ing kiman u roti tumondongla si Yesus ing kimuama u makasé.

24Ing kinata'uanola né tou lakez i si Yesus wo sé pahtuzu'en-Na zéi'mo witu, sé tou itii é simakéma wana a londéi a séra mangé witi Kapernaum i menéro si Yesus.

Si Yesus é roti si mahwéhémé ung katou-touan

25I si Yesus kinailekanola né tou lakez im witi leweta u louz itii, ni séra meligau wia ni Sia, “Méster, kawisa a ni Ko ikaayomé wia'i?”

26A si Yesus mingkotla, “Uli-ulit ikua-Kuma wia ni kamu, ni kamu é menéro-néro ni Aku zéi'kan pahpaan ni kamu nimilekola a makakompo'en am winangun-Kumola, taan pahpaan ni kamu éng kimano u roti itii makaz nimawesuh. 27Ni kamu én tia'mo mahpaayang i menéro an tikohon rewek maapu wo toro uman mawuul, taan maayangla i menéro an tikohon zéi'kan mawuul, a mahwéhémé ung katou-touan makaz ing kauré-uré un iwéhé ni Oki' ni Tou wia ni kamu. Pahpaan ni Siamo si winéhan kawasa ni Opo Empung, si Ama'.”

28Ang kuan néra wia ni Sia, “Apa u léwo'zéi' im wangunen nai, wo kai toro maayang am paayangen kapaaz ni Opo Empung?”

29Kuan ni Yesus wia ni séra, “Ung kenumo um paayangen kapaaz ni Opo Empung: Pa'émanela Sia si méiatumé ni Opo Empung.”

30Niitumo ni séra mahkua wia ni Sia, “Apa u makakompo'en um wangunen-Nu un toro ileken nai, wo kai ma'éman wia ni Ko? Apa um paayangen-Nu? 31#Kel. 16:4, 15; Mzm. 78:24 Sé nimaopo nai éng kimano un tikohon pahkuan ‘manna’ im witi kapelasan, tanu u méipantik witu um Pinantik Lenas, ‘Ni séra ém winéhan-Na u roti witi kasendukan a méyé.’ ”

32Ang kuan ni Yesus wia ni séra, “Uli-ulit ikua-Kuma wia ni kamu, zéi'kan si Musa si niméhé wia ni kamu u roti witi kasendukan a méyé, taan si Ama'-Ku si niméhé wia ni kamu un uli-ulit roti witi kasendukan. 33Pahpaan u roti méiwéhémé ni Opo Empung é roti un timumpamé im witi kasendukan wo mahwéhé ung katou-touan wia sé tou wia ung kaayahan kenu.”

34A séra kumuala wia ni Sia, “Tuang, peméhé-méhémé u roti itii wia ni kai.”

35Kuan ni Yesus wia ni séra, “Ni Aku kenumo u roti mahwéhé ung katou-touan. Séi uman si méyé wia ni Aku én zéi'mo mahpenda-pendanla u maharem. Wo séi uman si ma'éman ni Aku én zéi'mo mahpenda-pendanla u maré'o. 36Taan tanumo u mémoikua-Ku wia ni kamu: Zozo' ni kamu nimileko ni Aku, ni kamu én zéi'kan ma'éman ni Aku. 37Péléng sé tou méiwéhé ni Ama' wia ni Aku é méyé wia ni Aku wo péléng sé méyé wia ni Aku, sé tou itii é sungkuleng-Ku. 38Pahpaan ni Aku én timumpamomé im witi kasendukan zéi'kan i mangun um paaz-Ku, taan i mangun um paaz ni Opo Empung si nimatumé ni Aku. 39Ung kenumo um paaz ni Opo Empung si nimatumé ni Aku: Wo im wia sé tou méiwéhé wia ni Aku, zéi'kan siapa zozo' in esa si ikaliong, taan ni Aku tumou sumaup ni séra im witu un endo kaakazan ung kaayahan. 40Pahpaan niiamo um paaz ni Ama'ku: Wo péléng sé tou nimilek wo sé ma'éman si Oki' é makailek ung katou-touan makaz ing kauré-uré wo ni séra én itou-Ku sumaup im witu un endo kaakazan ung kaayahan.”

41A sé tou Yahudi rengan i mengengu-ngengut tumoro si Yesus pahpaan ni Sia kimuama, “Ni Aku kenumo u roti timumpamé im witi kasendukan.” 42Kuan néra, “Zéi'kankuaa ni Sia é si Yesus, oki' ni Yusuf, si ina' wo ama'-Na éng kata'uanta? Kura kahuman Sia mahkua, ni Sia én timumpamé im witi kasendukan?”

43Ang kuan ni Yesus wia ni séra, “Ni kamu én tia'mo mengengu-ngengut. 44Zéi'kan siapa zozo' in esa si toro méyé wia ni Aku, sa sia zéi'kan ipahwalimé ni Ama' si nimatumé ni Aku. Wo si tou niméyé wia ni Aku én itou-Ku sumaup im wia sé nimaté im witu un endo kaakazan ung kaayahan. 45#Yes. 54:13 Wana am pinantik né nabi é méipantik, ‘Ni séra péléng én tuzu'en ni Opo Empung.’ Péléng sé tou sé timalingamo wo nimakaileko an tutuzu' ni Ama' é méyé wia ni Aku. 46Ni Aku én zéi'kan mahkuama im wéwéhano si tou nimilek si Ama'. Si wia si Opo Empung a méyé uman si nimileko si Ama'.

47Uli-ulit ikua-Kuma wia ni kamu: Séi uman si ma'éman, ni sia é makaanu ung katou-touan makaz ing kauré-uré. 48Ni Aku kenumo u roti mahwéhé ung katou-touan. 49Sé nimaopo niou éng kimano un tikohon pahkuan ‘manna’ im witi kapelasan wo ni séra é nimatémoma. 50Taan u roti un timumpamé im witi kasendukan én zéi'kan téntu, séi uman si kuman u roti itii ni sia én zéi'kan maté. 51Ni Akumo u roti mahwéhé ung katou-touan um witi kasendukan an tumumpamé. Sa wéwéhan si tou kumana u roti kenu é mamenou-nou makaz ing kauré-uré. U roti iwéhé-Ku én awak-Ku, u maiwéhé-Ku wo sé tou wia ung kaayahan kenu mamenou-nou.”

52Kaitalingamé niitu, sé tou Yahudi mahzéi-zéi'an karia i mahkua, “Kura ni Sia toro méhé un awak-Na ing kanenta?”

53A si Yesus kumuala wia ni séra, “Uli-ulit ikua-Kuma wia ni kamu, sa ni kamu zéi'kan kuman un awak ni Oki' ni Tou wo melep un zaha'-Na, ni kamu én zéi'kan uli-ulit menou-nou. 54Séi uman si kuman un awak-Ku wo melep un zaha'-Ku, ni sia é makailek ung katou-touan makaz ing kauré-uré wo ni Aku én tumou sumaup ni séra im wia sé nimaté witu un endo kaakazan ung kaayahan. 55Pahpaan, un awak-Ku un uli-ulit tikohon wo un zaha'-Ku un uli-ulit eelepen. 56Séi uman si kuman un awak-Ku wo melep un zaha'-Ku, si tou itii é nimaesamo karia-Ku wo ni Aku é nimaesamo kariana. 57Si Ama', si nimangun sé tou i menou-nou, nimatumé ni Aku wo ni Aku menou-nou pahpaan si Ama'. Téntu kangkasii, séi uman si kuman un awak-Ku, si tou itii é mamenou-nou pahpaan ni Aku. 58Ni Akumo u roti timumpamé im witi kasendukan, zéi'kan tanu u roti kinan né nimaopo niou wo ni séra é nimatémoma. Séi uman si kumana u roti un iwéhé-Kuma kenu, si tou itii é mamenou-nou makaz ing kauré-uré.”

59Péléng niia é méikua ni Yesus im witi Kapernaum i ni Sia mahtuzu' witi walé peraragésan né tou Yahudi.

Sé mahkii-kiit si Yesus é soomo kumiit ni Sia

60In timalingamoma a méikuama ni Yesus, lakez sé mahkii-kiit ni Sia mahkua, “A méikuamé itii én totoz wutez, séi si toro kumiit a méikuamé itii?”

61Kata'uan ni Yesus i sé mahkii-kiit ni Sia é mengengu-ngengut pahpaan a méikua-Namé itii, a si Yesus kumuala wia ni séra, “Soomo ma'éman kamu wé ing kinuaang-Kuma niitu? 62Kura u mamuali sa kamu milek si Oki' ni Tou mawénéta i mawuri witi pinahwéha-wéhan-Na ing kataré? 63Si Roh ni Opo Empung si mahwéhémé ung katou-touan, ung kaenté'an ni tou én zéi'kan siapa torona. A nuwu' méikua-Kuma wia ni kamu é nuwu' ni Roh ni Opo Empung u mahwéhémé ung katou-touan. 64Taan im wia ni kamu ém wéwéhan sé zéi'kan ma'éman.” Pahpaan rengané ing kataré-taré éng kata'uano ni Yesus, séi sé zéi'kan ma'éman wo séi si mamangkér ni Sia. 65A Sia kumua, “Niitumo mémoikua-Kula wia ni kamu: Zéi'kan siapa zozo' in esa si toro méyé wia ni Aku, sa sia zéi'kan niénéan ni Ama'.”

66Rengané in toro niitu lakez sé mahkii-kiit si Yesus timula'u ni Sia wo soomo kumiit ni Sia. 67A si Yesus kumuama wia sé mapulu' wo zua pahtuzu'en-Na, “Apa ni kamu kasii én tumula'u ni Aku?”

68 # Mat. 16:16; Mrk. 8:29; Luk. 9:20 Wingkotela ni Simon Petrus wia ni Sia, “Tuang, séipé' si angéan nai? U nuwu'-Mu é mahwéhémé ung katou-touan makaz ing kauré-uré; 69wo ni kai é ma'émano wo mata'u i ni Komo Si Lenas wia si Opo Empung a méyé.”

70Kuan ni Yesus wia ni séra, “Zéi'kankuaa ni Aku si niméléng ni kamu sé mapulu' wo zua? Taan, si esaané im wia ni kamu é sétang.” 71Si pahkuan-Nala é si Yudas, oki' ni Simon Iskariot, pahpaan ni siamo si nimangkér si Yesus, zozo' ni sia én esaané wia sé mapulu' wo zua pahtuzu'en itii.

Currently Selected:

Yohanes 6: LAITOM

Highlight

Copy