Yohanes 9

Si letok renganpé' i nimatoumé liné'os ni Yesus

1I si Yesus mahlampang, ni Sia mileka si letok renganpé' i nimatoumé. 2Sé pahtuzu'en-Na meligau wia ni Sia, “Méster, séi wé si mahwangun a singkéla' taka-takazan si tou kenu rengan in taré nimatoumé é letoko, ni sia in esa kaapa sé tu'ana?”

3Si Yesus mingkotla, “Ni sia nimaletok én zéi'kan pahpaan a siningkéla'na wo zéi'kan kangkasii pahpaan a siningkéla' né tu'ana, taan wo sé tou toro milek um pahpaayangen ung kawasa ni Opo Empung wia ni sia. 4Ni kita é léwo'zéi' i mangun am paayangen ni Opo Empung si nimatumé ni Aku, in endopé' taré. Zéi'mo mauréma ém wengimo wo in toro niitu én zéi'kan siapa si toro maayang. 5#Mat. 5:14; Yoh. 8:12 I ni Aku memia-mia ung kaayahan kenu, ni Akumo si sena' ung kaayahan.”

6Tumondongla si Yesus kimuama péléng niitu, Sia rumura'ma witu un tana', semboren-Nala u rura' karia un tana' a maéndoma pentak, an ipurisi-Nala um pentak itii witu um weren ni tou letok itii 7wo mahkua wia ni sia, “Mangémo, maruma'musla witi kolam Siloam.” (Ung kalakoan Siloam é “Si méiatu”.) A si tou itii mangé i maruma'mus. I ni sia mawurimé, ni sia én toromo mahilek.

8Taan sé karéténa karia né mata'u ni sia i mengangaléi mahkua, “Zéi'kankuaa si tou kenu si sekezé é merume-rumez i mengangaléi?”

9Wéwéhan sé mahkua, “Ulit, ni sia.”

Wéwéhan kasii sé mahkua, “Zéi'kan, taan ni sia é makahgio wo si tou itii.”

Taan si tou itii éng kimuala, “Ni akumo si tou itii.”

10Ang kuan néra wia ni sia, “Kura wo um werenmu toromo mahilek?”

11Wingkotenala, “Si tou makangaran Yesus nimangunla um pentak, am purisi-Namé um werenku karia um pentak itii ang kumuamé wia ni aku, ‘Mangémo witi kolam Siloam wo ruma'musla.’ A ni aku mangé wo i makara'musola, ni aku én toromo mahilek.”

12A séra kumuala wia ni sia, “Wisa Sia?”

Wingkotenala, “Zéi'kan kata'uangku.”

13Ipahwali nérama si tou letok woan itii wia sé sana réwok tou Farisi, 14pahpaan si Yesus i simembor un tana' karia u rura'-Na a lumé'os si letok itii ém witu un endo Sabat. 15Niitumo sé sana réwok tou Farisi meligau wia ni sia, kura sia makaz toromo mahilek.

Wingkotenala, “Méipurisi-Namé um pentak witu um werenku, a ni aku maruma'musé wo in tarékan ni aku toromo mahilek.”

16Ang kuan né woopira im wia sé sana réwok tou Farisi itii, “Si tou nimangun niitu én zéi'kan wia si Opo Empung a méyé, pahpaan ni Sia én zéi'kan mahtali-talinga an tinotoz tumoro un endo Sabat.”

Taan sé walina mahkua, “Sa Sia tou mahsingkéla', kura kahuman Sia toro mangun u makakompo'en tanu niitu?” A séra rengan i mahéndo-éndoan.

17Ni séra meligau kasii wia si tou itii, “Kura un ikuamu tumoro ni Sia, pahpaan ni Sia limé'oso um werenmu?”

Wingkotenala, “Ni Sia é nabi.”

18Taan sé tonaas né tou Yahudi én zéi'kan ma'éman sa si tou itii é letok woan wo in tarékan én toromo mahilek. Niitumo ni séra timawahmé sé tu'ana, 19a meligau, “Ulit wé si tou kenu én oki' niou si letok renganpé' i nimatoumé? Kura kahuman wo sia toromo mahilek in tarékan?”

20Ang kuan né tu'ana, “Ni sia én ulit in oki' nai wo ni sia é letoko renganpé' i nimatoumé. 21Taan kura wo sia toromo mahilek in tarékan, zéi'kan kata'uan nai. Wo séi si nimanguné ni sia toromo mahilek, niitu kangkasii én zéi'kan kata'uan nai. Ligauenola wia ni sia, ni sia én tarétumoumo, ni sia toro kumua niitu in esa.” 22Sé tu'ana kimuala téntu, pahpaan ni séra é maindé' wia sé tonaas né tou Yahudi. Pahpaan sé tonaas né tou Yahudi é nimaesaanola i sé tou mahkua si Yesus é Mesias, ni séra én zéi'mo mata'u muntep witi walé peraragésan né tou Yahudi. 23Niitumo sé tu'ana éng kimua, “Ni sia én tarétumoumo, ligauenola wia ni sia.”

24An tawahen néramé sumaup si letok woan itii a mahkua wia ni sia, “Ikuamé an ulit witu u sinaru ni Opo Empung, kata'uan nai si tou itii én tou mahsingkéla'.”

25Wingkotenala, “Si tou itii mahsingkéla' kaapa zéi'kan én zéi'kan kata'uangku. Taan, ung kata'uangku i ni aku é letok woan wo in tarékan ni aku én toromo mahilek.”

26Ang kuan néra wia ni sia, “Apa um winangun-Nama wia ni ko? Kura um werenmu i liné'os-Nama?”

27Am wingkotenala, “Mémoikuakula wia ni kamu, taan ni kamu é soo tumalinga. Kaa kamu paazpé' in tumalinga niitu? Toro kuaa ni kamu kangkasii ém paaz i maéndo pahtuzu'en-Na?”

28A séra mahsalou ni sia wo mahkua, “Ni ko ém pahtuzu'en-Na, ni kai én zéi'kan! Ni kai ém pahtuzu'en ni Musa. 29Kata'uan nai si Opo Empung éng kimuamo wia si Musa. Taan tumoro si tou itii, zéi'kan kata'uan nai wisa Sia a méyé.”

30Si tou itii nimingkotla, “Ni kamu én totoz makalingangan! Ni kamu é mahkua i ni Sia én zéi'kan kata'uan niou wisa a méyé, taan ni Sia é limé'osoma um werenku. 31Kata'uantamo i si Opo Empung én zéi'kan mahtalinga sé tou mahsingkéla' taan sé tou mahsigi' ni Sia wo mahwangun am paaz-Na. 32Rengané im puuna makaz in tarékan zéi'kampé' pinahtali-talingala im wéwéhan si tou letok renganpé' nimatoumé i liné'osa. 33Sa si tou itii zéi'kan wia si Opo Empung a méyé, zéi'kan siapa un toro wangunen-Na.”

34Ang kuan néra wia ni sia, “Ni ko renganpé' i nimatoumé é lakezo a singkéla' wo ni ko mahtutuzu' ni kai?” A sia iwoho nérama i mondola.

Un atéta tia' maletok

35Si Yesus én timalinga i si letok woan itii é méiwoho néramé mondolé im witu. A si Yesus mahilekala karia ni letok woan itii ang kumua, “Apa ko ma'éman wia si Oki' ni Tou?”

36Am wingkotenala, “Tuang, séi Sia, wo ni aku ma'éman wia ni Sia?”

37Ang kuan ni Yesus wia ni sia, “Ni ko én zéi'kan uman nimilek ni Sia, taan ni Sia kangkasii é mahsirita kariamu in tarékan.”

38Kuana, “Ni aku é ma'éman, Tuang!” A sia sumigi' karia ing kimuruzla ung gio makaz witu un tana' witu u sinaru ni Yesus.

39Ang kuan ni Yesus, “Ni Aku niméyé wia ung kaayahan kenu in tumotoz in ulit kaapa zéi'kan am pahwangunen né tou, wo séi uman si zéi'kan mahilek én toro mahilek, wo séi uman si toro mahilek é maletok.”

40A méikua-Nama itii én tinalingama né woopira im wia sé sana réwok tou Farisi sé witu, a séra meligau wia ni Sia, “Apa ni kai kangkasii é letok?”

41Ang kuan ni Yesus wia ni séra, “Sa woo ni kamu letok, ni kamu zéi'kan mahsingkéla', taan pahpaan ni kamu kimuamé i ni kamu én toro mahilek, niitumo ni kamu é mahsingkéla'pé'.”

Currently Selected:

Yohanes 9: LAITOM

Highlight

Copy