Lukas 11

Kura i mengaléi wia si Opo Empung

(Mat. 6:9-13, 7:7-11)

1I sana endo, si Yesus mengaléi. Kumawusa ni Sia i mengaléi, a méyé si esaané wia sé pahtuzu'en-Na, ang kumuala, “Tuang, tuzu'ené kai kura i mengaléi, tanu a méipahtuzu' ni Yohanes wia sé pahtuzu'enna.”

2A séra wingkotela ni Yesus, kuan-Na, “Sa kamu mengaléi, téntii un ikua nioula,

Ama', u ngaran-Mu é lenasen.

Ung Kakolanoan-Nu é méyé.

3Wéhané kai tikohon sekez in endo mengiit am pemandungen nai.

4Ampungané ni kai im wana a singkéla' nai,

pahpaan ni kai kangkasii é niméhémola un ampungan wia sé tou simala'la wia ni kai.

Wo tia'mo ni kai ipahwali witu um pema'waan.”

5Ang kuan ni Yesus wia ni séra, “Sa esaané im wia ni kamu ém wéwéhan si kalo, im wengi uré nimangémé wia ni sia, ang kumuala, ‘Kalo, pinjangampé' ndootuumé roti telu ni aku, 6pahpaan wéwéhan si kaloku mahlampang én timulimé witi waléku. Taan ni aku ndootuu én zéi'mo siapa kakanen un iwéhé wia ni sia.’ 7Taan si kalona itii, si witi untep um walé é nimingkoté in téntii, ‘Tia'mo mahraung ni aku! Um pepenet éng kinusi'kumomé, ni aku wo sé koki'ku én timekelo. Ni aku é zéi'kan mata'u tumooz i méhé um pahaléiennu.’

8Ikua-Kuma wia ni kamu, maanpé' ni séra zua é mahkaloan, si kalo witu um walé itii é soo tumooz i méhé um pahaléien ni kalona. Taan pahpaan si kalona én zéi'kan maizang i mengalé-ngaléi, si tou witu un untep um walé én timoozkané a méhéma um pahaléien ni kalona.

9Niitumo, ikua-Kuma wia ni kamu: Mahaléila, ni kamu ém wéhan. Menérola, ni kamu é makailek. Tuméngkorla, ni kamu ém wukaan um pepenet. 10Pahpaan séi uman si mahaléi ém wéhan, séi uman si mahpenéro é makailek wo séi uman si mahténgkor ém wukaan pepenet. 11Im wia ni kamu, apa wéwéhan si ama' si méhé ulé' wia si oki'na sa si oki'na mahaléi seza'? 12Kaapa sa si oki'na mahaléi ateluh ém wéhana kalajengking? 13Niitumo, sa ni kamu sé léwo' é mata'u mahwéhé am wangun wia sé oki' niou, apapé' kasii si Ama' niou witi kasendukan! Ni Sia é méhé si Roh Lenas wia sé tou mahaléi wia ni Sia.”

Ung kawasa ni Yesus i mahwoho sé sétang

(Mat. 12:22-30; Mrk. 3:20-27)

14Makasamé si Yesus nimoho si sétang wia si tou si nimawowo' pahpaan sinelazan ni sétang. Kaiondolé ni sétang itii, si tou sinelazan itii én toromo mahnuwu'. Sé tou lakez i nimileka u nimamuali itii é mengusi-ngusingsing. 15#Mat. 9:34, 10:25 Taan im wia sé tou lakez itii ém wéwéhan sé mahkua, “Ni Sia mahwoho si sétang éng karia ung kawasa ni Beelzebul, si tonaas né sétang.” 16#Mat. 12:38, 16:1; Mrk. 8:11 Sé walina é mema'wa' si Yesus. Ni séra é mahaléi wia si Yesus i manguné u makakompo'en un tumuzu'mé wia ni séra ung kawasa ni Yesus én ulit méiwéhé ni Opo Empung. 17Taan kata'uan ni Yesus am pegena-genangen néra, ang kuan-Na, “Sa sé tou witi kakolanoan esa é makahkoro', ni séra é makayo'. Téntu kangkasii sa sé sana walé é makahkoro', ni séra é makayo'. 18Téntu kangkasii um witi kakolanoan né sétang sa sé sétang makahkoro' wo sé kasétang nérakan, tantumo ni séra é makayo'. Pahpaan ni kamu é mahkua i ni Aku é mahwoho sé sétang karia ung kawasa méiwéhé ni Beelzebul wia ni Aku. 19Niitumo, sa ni Aku mahwoho sé sétang karia ung kawasa ni Beelzebul, karia ung kawasa ni séi sé pahtuzu'en niou i mahwoho sé sétang? Pahpaano niitu, sé pahtuzu'en niou sé tumuzumé sa an ipahtoké niou itii é simala'. 20Taan sa ni Aku mahwoho sé sétang karia ung kawasa ni Opo Empung, ung kalakoana ung Kakolanoan-Na ém wiamo ni kamu. 21Sa si tou ketezen timiono ang kokoro' i mahtéiz um waléna, zéi'kan siapa si toro makumahat a sangkumna. 22Taan sa wéwéhan tou si kumetezenpé'mé sumaru wo kumala ni sia, si tou itii makumahat ang kokoro' u mahkelung si tou ketezen itii, an ipeméténgnala wia sé kakariana a sangkum kinahatnamé itii.

23 # Mrk. 9:40 Séi si zéi'kan mahwali-wali karia-Ku, ni sia é mahsaru ni Aku. Wo séi si zéi'kan mahsawang ni Aku i mahréwok sé tou wo séra mahwali-wali karia-Ku, ni sia é mahsera sé tou.”

Si sétang mawurimé wia si tou sinelazanna im puuna

(Mat. 12:43-45)

24Kuan ni Yesus, “Sa si sétang nimondolomé im wia si tou, si sétang itii é mahliklik wana ang kapelasan i menéro ento'an. Pahpaan ni sia én zéi'kan méikailekla un ento'an, ang kuanamo, ‘Ni aku é mawuri witi pinahento'angkumé i makasa.’ 25A sia mawurima witu. Mailekenna, um pinahento'annamé itii ém weresi wo niimek. 26A si sétang itii matumawahmé sé sétang pitu walina sé lumouspé'mé ung kaléwo'. A sé sétang itii méyé a sumelazla wia si tou itii. Ing kamurian, u nimamuali wia si tou itii é luméwo'pé'mé i makasa.”

Séi si totoz mahpaa-paaz

27Karegas si Yesus i mahnuwu'pé', ang kumérété si wéwéné si esaané im wia ni séra, “Totoz mahpaa-paaz si ina' nimahawa-awaké wo si simusumé ni Ko.” 28Taan kuan ni Yesus, “Si mahpaa-paaz é si tou mahtalinga wo mahwangun u Nuwu' ni Opo Empung.”

Um pahaléien né tou wia si Yesus

(Mat. 12:38-42)

29 # Mat. 16:4; Mrk. 8:12 I si Yesus kinaréwokan né tou lakez, ang kuan-Na, “Sé tou in tarékan én tahlouso léwo'. Ni séra é mahaléi ni Aku i mapailek u makakompo'en, taan ni séra én zéi'kan papailekang-Ku um pahaléien néra, akaz uman u makakompo'en u nimamuali wia si nabi Yunus. 30#Yun. 3:4 Pahpaan tanu si nabi Yunus im puuna witu um poot ni seza' tua'na ung kauréna én teluna endo a sia iondolé ni Opo Empung. Niitu un timuzu'mé wia sé tou Niniwe ung kawasa ni Opo Empung. Téntu kangkasii a makakompo'en a mawangunen ni Oki' ni Tou, niitu un tumuzu'mé wia sé tou in tarékan.

31 # 1Raj. 10:1-10; 2Taw. 9:1-12 Witu un endo si Opo Empung in tumotoz ulit kaapa zéi'kan am pahwangunen né tou, si kolano wéwéné makangaran Syeba si witi wanua zou' witi timuh én itou sumaup karia né tou in tarékan wo ni sia kasii é matumotoz ulit kaapa zéi'kan am pahwangunen néra. Pahpaan ni sia ém witi pondol ung kaayahan a méyé i métumalinga ung katulapan ni Salomo, wo un ulitna si Tou si mahwali-wali karia niou in tarékan é lumouspé'mé si Salomo, taan ni kamu é soo tumalinga am pahkua-Na. 32#Yun. 3:5 Im witu un endo itii kangkasii, sé tou Niniwe én itou sumaup karia né tou in tarékan i matumotoz ulit kaapa zéi'kan am pahwangunen néra. Pahpaan sé tou Niniwe én timula'ula a singkéla' néra in timalingala a méipahwoka' ni nabi Yunus, wo un ulitna, si Tou si mahwali-wali karia niou in tarékan é lumouspé'mé si nabi Yunus.”

U Nuwu' ni Opo Empung én tanu u sena' u solo

(Mat. 5:15, 6:22-23)

33 # Mat. 5:15; Mrk. 4:21; Luk. 8:16 Si Yesus kimua un aandéan in téntii, “Zéi'kan siapa tou tumutungla u solo wo maizeta'na witi tampa méikawuni kaapa keleuanna karia un tampayang, taan u solo itii é maizeta'na witu um penono'tolan u solo wo sé tou mahuntepa witu um walé én toro milek u sena'na. 34Um werenmu én tanu u solo witu un toumu. Sa um werenmu ém wangun, péléng un toumu én ayah. Taan sa um werenmu éng kewur, un toumu é marimbengbeng. 35Niitumo, wéhanla genang, un ayah wiamo ni kamu én tia' marimbengbeng. 36Sa péléng ung katou-touannu én ayah wo zéi'kan siapa u rimbengbeng, péléng ung katou-touannu itii én ayah, tanu u sena'na u solo i sumena'ma wia ni ko.”

Sé sana réwok tou Farisi wo sé tou tulap un Torat sinéro' ni Yesus

(Mat. 23:1-36; Mrk. 12:38-40)

37I si Yesus nimakatuzu'mola, a si tou si wia sé sana réwok tou Farisi tumawahla ni Sia ing kuman witi walé ni tou itii. Niitumo, si Yesus nimangé witi walé ni tou itii, a rumumez ing kuman. 38Si tou itii é mengusi-ngusingsing i nimilekla si Yesus én zéi'kan zimano puunala ing kiman. 39Taan kuan ni Tuang wia ni sia, “Ni kamu i sana réwok tou Farisi é mahweresi u liklikna am pengengelepan wo ang kakanan niou, taan um witu un untep un até niou ém wuta a léwo'an wo an zéi'kan wangun. 40Ni kamu én totoz lemou! Si Opo Empung si nimangun a liklik wo péléng um witu un tou niou. 41Pahpaano niitu, am witu um pengengelepan wo am witu ung kakanan niou én iwéhéla wia sé tou zéi'kan siapa apa. Wéhanla wana an anu niou sé tou zéi'kan siapa apa. Niitumo u mangun un tou wo un até niou uli-ulit weresi.

42 # Im. 27:30 Ikaléwo'mo ni kamu sé sana réwok tou Farisi! Pahpaan ni kamu é mahwéhé wia si Opo Empung u sana pahpulu' a lasi, an inggu#11:42 Witu u nunuwu'en Yunani ‘peganon’, ung kalakoana un tinanem um wouna én totoz menarengseng taan pahwangunen undam. Um ‘peganon’ kenu én zéi'kan ipahtanem, niitumo un ulitna niitu én zéi'kan pahéndoan u sana pahpulu' in ipahragés wia si Opo Empung. wo a séndé'en, taan ni kamu é mahsanaweka wo zéi'kan rumaraaté si Opo Empung. Un esa é léwo'zéi' im wangunen, wo am walina ém pahwéhanla genang. 43Ikaléwo'mo ni kamu sé sana réwok tou Farisi! Pahpaan totoz kapaaz niou i merurumez wana a rurumezan witi totoz puuna im wana am walé peraragésan né tou Yahudi wo paaz pahsigi'en né tou wana am pasar. 44Ikaléwo'mo ni kamu! Pahpaan ni kamu én tanu a lelewengan zéi'kan tinandaan, sé tou memuri-muri witu én zéi'kan mata'u sa niitu é lelewengan.”

45Wéwéhan si esa im wia sé tou tulap un Torat kimua wia si Yesus, “Méster, ni Ko i mahkuamé an téntu, ni Ko é mahséro'mo wia ni kai kangkasii.” 46Taan si Yesus mingkotla, “Ikaléwo'mo ni kamu in tou tulap un Torat! Pahpaan ni kamu é melusu-lusu sé tou i mangun an zéi'kan kawawaan néra wo an tinotoz niou, taan ni kamu é soo sumawang sé tou i mangun an tinotoz itii. 47Ikaléwo'mo ni kamu! Pahpaan ni kamu nimangun a lelewengan né nabi im puuna, taan sé nimaopo niou sé nimunu' sé nabi itii. 48Karia ni kamu i nimanguna a lelewengan né nabi, pahkuan niou sé nimaopo niou i nimunu' sé nabi itii én ulit. 49Niitumo, totoz tulap si Opo Empung ing kimua, ‘Iatu-Ku sé nabi wo sé aatu-Ku i mangé wia sé tou Israel. Taan im wia sé nabi wo wia sé aatu-Ku, wéwéhan sé mazézéhan néra wo wéwéhan sé winunu' néra.’ 50Niitumo, si Opo Empung é mukum sé tou in tarékan, pahpaan sé nabi winunu' rengané ung kaayahan kenu im winangun ni Opo Empung. 51#Kej. 4:8; 2Taw. 24:20, 21 Niitu é rengané wia si Habel im winunu', makaz si Zakharia im winunu' witu um pinaselat um pahtunuan an ipahragés wia si Opo Empung wo um Walé ni Opo Empung. Ni Aku éng kumuama wia ni kamu, ‘Péléng niana é mapenutu'en wia sé tou in tarékan.’ 52Ikaléwo'la ni kamu in tou tulap un Torat! Pahpaan ni kamu é mata'umo kura ing kumiit si Opo Empung, taan ni kamu é soo kumiit niitu. Lumouspé'mé niitu, pahapé-apé'an niou sé tou paaz mahtata'u kura ing kumiit si Opo Empung. Niana é masuat wo ni kamu én timion ung kusi' u loloangan i muntep witu ung kata'uan tumoro si Opo Empung, taan ung kusi' itii é méilé'os niou uman wo sé tou mahuuntep witu ém pahapé-apé'an niou uman.”

53Kumawusa niitu, si Yesus tumula'umé un tampa itii. Rengané in toro niitu, sé tou tulap un Torat wo sé sana réwok tou Farisi én zéi'kan mazéi' i mahsaru wo lakez am pahligauen néra wia si Yesus. 54Ni séra é menéro-néro a sinala' ni Yesus, wo Sia toro tionan néra pahpaan an ipahkua-Na.

Currently Selected:

Lukas 11: LAITOM

Highlight

Copy