Lukas 16
16
Un aandéan tumoro si zéi'kan ulit i mahlé'os an zoit
1Kumawusa niitu si Yesus kumua un aandéan wia sé pahtuzu'en-Na, kuan-Na, “Wéwéhan si tou wa'ilan, ni sia ém wéwéhan si melélé'os an zoit witi waléna. Wia ni sia ém wéwéhan si kimelakla, kuana, ‘Si melélé'os an zoitmu é mapaapu uman un zoitmu.’ 2Niitumo tawahennamé si melélé'os an zoitna itii, ang kuana, ‘Apa itu ulit ung kinatalingaangkula tumoro ni ko? In tarékan ipakakuamumé wia ni aku am pinaayangmu, pahpaan ni ko én zéi'mo toro maéndo melélé'os an zoitku.’
3Witu ung genangna, ni sia é mahkua, ‘Ni aku é zéi'eno ni tuangku i melélé'os an zoitna. Apa un totoz wangunengku in tarékan? Mamahi', ni aku én zéi'kan makawawa. Mamengangaléi, ni aku é maizang. 4Téntii um wangunengku, ni aku é menéro lalan wo sa ni aku méikana'mola im witu um paayangengku, wéwéhan tou sumungkul ni aku witi walé néra.’
5Niitumo, pahta'sanamé i mahtawah sé tou wéwéhan utang wia si tuangna. Ang kuana wia si kataré, ‘Pira wé un utangmu wia si tuangku?’
6Si tou itii mingkotla, ‘Un utangku é lana zaitun sana atus tampayang.’#16:6 Witu nunuwu'en Yunani, ‘100 batos’. U sana batos é masuat wo u 40 liter lana zaitun. Niitumo u 100 batos é masuat wo u 4000 liter.
Ang kuanama wia ni sia, ‘Kenu um pinantikan an utangmu. Rumumezla wo sogitenuma i mantika limana pulu' tampayang.’
7Ang kuana wia si tou kazua, ‘Pira un utangmu wia si tuangku?’ Si tou itii mingkoté, ‘Gandum sana riwu kazo.’#16:7 Witu nunuwu'en Yunani ‘100 koros’. Ung kalakez u sana koros é masuat wo 390 liter. Niitumo 100 koros é masuat wo 39000 liter. Ang kuana, ‘Kenu um pinantikan an utangmu. Rumumezla wo ipantikmumola un utangmu ém waluna atus kazo.’
8A si tuangna mahlooz si melélé'os an zoit si tantowo itii, pahpaan ung kasigaanna i menéro lalan. Pahpaan sé tou mahkiit a lelo ung kaayahanpé' sé totoz siga' i mahpenéro lalan i makailek ung kauntungan néra im wia sé kasuat néra, taan sé tou mahkiit ang kapaaz ni Opo Empung.
9Ikua-Kuma wia ni kamu, ung kawa'ilanan niou wia ung kaayahan én ipahsawangla sé tou wo malakezé sé kakaria niou. Sa ung kawa'ilanan niou maapuma, lakez sé sumungkulé ni kamu witi pahwéha-wéhan niou makaz ing kauré-uré.
10Si tou toro pa'émanen i mahpaayang ang kori', ni sia kangkasii én toro pa'émanen i mahpaayang a selah. Taan séi si zéi'kan mata'u pa'émanen i mahpaayang ang kori', ni sia kangkasii én zéi'kan mata'u pa'émanen i mahpaayang a selah. 11Niitumo, sa tumoro a sangkum wia ung kaayahan ni kamu én zéi'kan ulit, séi si paaz méhé um paayangen wia ni kamu i mimek u sangkum witi kasendukan? 12Wo sa ni kamu zéi'kan mata'u tarawésaan an anu né tou walina, séi si paaz i méhé wia ni kamu a maéndo anu niou?
13 #
Mat. 6:24
Si ata esa én zéi'kan mamuali i maayang wia sé zua tuang. Pahpaan sa téntu, si esa é maikazi'zisna wo si walina én iraraaténa. Kaapa ni sia é mahtali-talinga si esa wo zéi'kan mahtali-talinga si walina. Ni kamu én zéi'kan mamuali i mahpaayang wia si Opo Empung wo karegas niitu mahpaayang wia si Mamon.”
Si Yesus mapagenang wia sé tou né sana réwok tou Farisi
(Mat. 11:12-13, 5:31-32; Mrk. 10:11-12)
14I sé tou wia sé sana réwok tou Farisi sé megena-genang uman an zoit, tumalingamé péléng a méikuamé ni Yesus, a Sia ipahké'ké' néra. 15Ang kuan ni Yesus wia ni séra, “Ni kamu é mapailek wia sé tou i ni kamu én ulit, taan kata'uan ni Opo Empung am witu un até niou. Pahpaan am pahgenangela né tou in totoz wangun im wia ung kaayahan, niitu én ikazi'zis ni Opo Empung.
16 #
Mat. 11:12-13
A méipantik witu un ukum Torat wo wana ang kitap né nabi ém pahpakémpé' makaz in oras ni Yohanes Menanarani i menou-nou. Rengané in toro niitu u Nuwu' Lé'os tumoro ung Kakolanoan ni Opo Empung én ipahwoka'mo wia sé tou wo péléng sé tou én totoz menutu' i maéndo tou witi Kakolanoan ni Opo Empung. 17#Mat. 5:18 U langit wo ung kaayahan én toro uman mazéi', taan a méipantik witu un ukum Torat én zéi'kan mamuali i mazéi', zozo' niitu ém pinantik totoz kori' uman.”
18 #
Mat. 5:32; 1Kor. 7:10-11 Ang kuan ni Yesus kasii, “Séi uman si tuma'sala si wéwéné mahayona ang kumawéngla sumaup karia ni wéwéné walina, si tuama itii é mahsamek. Wo séi uman si tuama kumawéngla si wéwéné méita'sala ni mahayona, si tuama itii kangkasii é mahsamek.”
Si tou wa'ilan wo si Lazarus
19A si Yesus sumirita kasii un aandéan, kuan-Na, “Wéwéhan si tou wa'ilan si mahkara-karai ang karai tonton monong, un totoz wangun wo mahal. Sekez in endo ni sia éng kiit uman um paazna i mapailek ang kawa'ilananna. 20Wo wéwéhan kasii si tou zéi'kan siapa apa si makangaran Lazarus. Péléng un touna én tinouan ang kupes, si kimolo' witu u léléngko'an witi walé ni tou wa'ilan itii. 21Pahpaan si Lazarus én totozo maharem, si paazo ing kuman ang kakanen mahgogomé witu u méja ni tou wa'ilan itii. Karegas niitu sé asu é mémahsila' ang kupesna.
22Matéma si tou zéi'kan siapa apa itii, a sia ipahwalima né malaekat maméirumez witu u rété ni Abraham. Si tou wa'ilan kangkasii é matéma, a sia mailewengé. 23Im witu um woso um patéan, si tou wa'ilan itii én totoz zézéha. A sia lumoho'ma ilekennama si Lazarus é rimumez witu u rété ni Abraham. 24A si tou wa'ilan itii kuméréta, ‘Ama' Abraham, iraraaté ndootuumé aku. Ipekiwahu'pé'mé un tutundu' ni Lazarus wo méyépé' wahu'ené u lila'ku. Ni aku én totozo zézéha im wia un api kenu.’
25Taan si Abraham é nimingkot umané in téntii, ‘É oki'ku, amoké genangenula! Im puuna i ni ko menou-noupé', ni ko é nimakailekomé péléng am wangun. Taan si Lazarus ndootuu i menou-noupé', ang kinailekanamé ém péléng an zéi'kan wangun. Taan in tarékan ni sia é sénango im wia'i wo ni ko kahuman én zézéha im wana. 26Ni kai wo ni ko ém pinatampas um pasong un zéi'kan kalewetan, um winangun ni Opo Empung. Niitumo sé wia'i én zéi'kan mata'u mangé wana, téntu kangkasii sé wana én zéi'kan mata'u méyé wia'i!’
27Ang kuan ni tou wa'ilan itii kasii, ‘Sa téntu ni aku é mekisawang wia si ama' i matuma si Lazarus mangé witi walé ni ama'ku. 28Pahpaan im witu ém wéwéhan sé lima totoz katuariku. Iatupé'ma si Lazarus i mapagenang wia ni séra wo sa séra matéma, ni séra én zéi'kan iuntep wia an tampa zézéha kenu.’
29Taan si Abraham é nimingkot umané in téntii, ‘Im wia ni séra ém wéwéhano ung kitap ni Musa wo ang kitap né nabi. Niitumo, ni séra é mahtalingala wo mahwangunla a méipantik wana ang kitap itii.’
30A si tou wa'ilan itii mingkoté, ‘Azo ndootuu ama' Abraham, zéi'kan mamuali sa téntu uman. Taan sa wéwéhan si esaané im wia sé nimaté si méitoumé sumaup wo mangé wia ni séra, ni séra én tumula'u a singkéla' pahlé'osen néra.’
31Ang kuan ni Abraham wia ni sia, ‘Sa zéi'kan pahtalingan néra a méipahkua ni Musa wo né nabi, ni séra kasii é soo ma'éman, zozo'pé' si tou nimatémo an itoumé sumaup im wia sé nimaté si mahkua niana.’ ”
Currently Selected:
Lukas 16: LAITOM
Highlight
Share
Copy
Want to have your highlights saved across all your devices? Sign up or sign in
