Lukas 21

U raragés méiwéhé ni wéwéné mahesa-esamokan si zéi'kan siapa apa

(Mrk. 12:41-44)

1Im witi lésaz um Walé ni Opo Empung, si Yesus nimilek sé tou wa'ilan timahu'ma u raragés néra witu um penanahu'an a raragés. 2An ileken-Na kasiima si wéwéné mahesa-esamokan si zéi'kan siapa apa timahu'ma un zua zoit tambaga#21:2 Un zoit kenu én tawi zéi'kan siapa telesna pahpaan in toro niitu un ipahwaér wia si nimaayang i sana endo én 128 zoit tambaga. witu um penanahu'an itii. 3Ang kuan ni Yesus, “Uli-ulit ikua-Kuma wia ni kamu, u méiwéhéma ni wéwéné mahesa-esamokan si zéi'kan siapa apa kenu é lumakezpé'mé u méiwéhéma péléng né tou itii. 4Ni séra é niméhéma an zoit raragés néra wana ang kalakez an anu néra, taan si wéwéné mahesa-esamokan kenu é niméhéma wana an anuna an toyo' uman, lumouspé'mé niitu péléng am pemandungenna i menou-nou é méiwéhénamoma.”

Um Walé ni Opo Empung é makemun

(Mat. 24:1-2; Mrk. 13:1-2)

5Sé woopira tou é mahsirita wo mahlooz ung kawangunan um Walé ni Opo Empung un totoz wangun pahpaan pinerong karia am watu totoz wangun wo am peperong mémoiragés né tou wia si Opo Empung.

Ang kuan ni Yesus wia ni séra, 6“A niilek niou witu ém wéwéhan un orasna in zéi'kan siapa zozo' in esa im wana am watu itii un iwaya i nimausunampé', péléng niitu é makemun.”

An zézéha kataré-taré i makailekan

(Mat. 24:3-14; Mrk. 13:3-13)

7A séra meligau wia si Yesus, “Méster, sawisa niitu mamuali? Apa un tumuzu'mé sa niitu mamuali?”

8Am wingkotela ni Yesus, “Tuméga-tégam én taa kamu ilulu. Pahpaan lakez sé tou é méyé wo maké u ngaran-Ku wo kumua in téntii, ‘Ni akumo si Mesias’ wo ‘Un orasna é lelezo’. Ni kamu én tia' mahkii-kiit ni séra. 9Sa kamu tumalingamé sé mahkoro' wo sé mahsaru sé tonaas, ni kamu én tia'mo maindé'. Pahpaan péléng niana é léwo'zéi' i mamuali puunala, taan zéi'kan niitu un tumuzu'mé i rétémo un orasna ung kaakazan ung kaayahan.”

10Ang kuan ni Yesus kasii, “Sé tahsasana wanua é makumoro' wo sé tahsasana wanua walina wo ung kakolanoan esa é makumoro' wo ung kakolanoan walina. 11Un éhzo' totoz repet wo a saki melaput karia ang kaahreman é mamuali wana lakez tampa. Wo witi langit é mamuali a makaindé'en wo an zéi'kan kakuaan. 12Taan puunala niana péléng i mamuali, ni kamu én tionan wo pahzézéhan. Ni kamu én iayo wana am walé peraragésan né tou Yahudi, iuntep wana am bui wo maisaru wia sé kolano wo sé mahkawasa pahpaan mahkiit ni Aku. 13In toro niitumo un oras niou ing kumua an niilek niou tumoro ni Aku. 14#Luk. 12:11-12 Niitumo, enté'enola un até niou wo tia'mo megena-genang un iwingkot niou ing kumua i ni kamu én ulit. 15Pahpaan ni Aku in esa si mapata'u wia ni kamu a nunuwu'en mawuta-wuta karia ang katulapan in iwingkot niou, wo sé kakoro' niou zéi'kan makawingkot um pahkua niou kaapa sumaru ni kamu. 16Ni kamu én iayo né tu'amu, né totoz tuarimu, né katuarimu, né kalomu wo sé woopira im wia ni kamu ém wunu'en 17wo maikazi'zis péléng né tou pahpaan mahkiit ni Aku. 18Taan ni kamu én tia'mo maindé' pahpaan zozo' in esa uman um wuukmu én zéi'kan siapa u magogo. 19Sa ni kamu ezen, ni kamu é makailek ung katou-touan makaz ing kauré-uré.”

Um Yerusalem é makemun

(Mat. 24:15-21; Mrk. 13:14-19)

20“I ni kamu milek u Yerusalem ém pinakalikliko né suraro, kata'uan niouola in zéi'mo uré um wanua tua'na itii é mamomakemu. 21In toro niitu ni séra sé witi Yudea én totoz in tumingkas wana ang kentur. Sé witi wanua tua'na én tumingkasé im witu um wanua tua'na itii, wo sé tou wana am wanua én tia'mo mahuuntep witu um wanua tua'na itii. 22#Hos. 9:7 Niitumo un orasna i si Opo Empung méhé un ukuman wo péléng a mémoipantik witu um Pinantik Lenas é malekep. 23Ikaléwo'la sé wéwéné mahawa-awak kaapa sé pahsusuan né taré itoumé in toro niitu! Pahpaan un zézéha totoz repet un tumuli sé tahsasana wanua wo kangkasii un upi' repet wia sé tahsasana wanua kenu é méyé. 24Wéwéhan sé wunu'en karia um pisou wo sé walina é mationan an itia' wana am péléng tahsasana wanua walina. Wo um wanua tua'na Yerusalem é makawasaan né tahsasana wanua sé zéi'kan mata'u si Opo Empung makaz witu un oras tinotozo ni Opo Empung tumoro ni séra.”

Si Oki' ni Tou i mawurimé sumaup

(Mat. 24:29-35; Mrk. 13:24-31)

25 # Yes. 13:10; Yeh. 32:7; Yl. 2:31; Why. 6:12, 13 “Im wia si endo, si loloho'en wo sé tototi'en ém wéwéhan a mamuali. Im wia ung kaayahan péléng sé tahsasana wanua é maindé' wo malinganga i mahsaru un ender wo u sempa'na un tasik. 26Sé tou én totoz maindé' akaz mahgerger pahpaan a mamuali wia ang kaayahan kenu, pahpaan ang kawasa witi langit é makayo'. 27#Dan. 7:13; Why. 1:7 In toro niitumo péléng sé tou é mamilek si Oki' ni Tou si witu um wawo u ninahak méyé karia péléng ang kawasa wo ang kawangko'an-Na. 28Sa niitu mahmualimo, rumendaiola wo tia'mo mahtuktuk pahpaan zéi'mo uré ni ko én ipiloto im wana an zézéha itii.”

Un aandéan tumoro ung kai ara

(Mat. 24:32-35; Mrk. 13:28-31)

29A si Yesus kumua un aandéan wia ni séra, kuan-Na, “Ileken nioula lumé'o-lé'os ung kai ara kaapa ang kai walina. 30Sa ileken nioula ang kai itii mahsuzumomé, kata'uan nioula in zéi'mo uré é maraazeno. 31Téntu kangkasii, sa péléng a méikua-Ku ém pahileken niouola, kata'uan nioula sa ung Kakolanoan ni Opo Empung é lelezo.

32Uli-ulit ikua-Kuma wia ni kamu: Sé tou in tarékan ém wéwéhan sé zéi'kampé' nimaté puunala niana péléng i mamuali. 33U langit wo ung kaayahan é mazéi', taan u Nuwu'-Ku én zéi'kan mahzéi-zéi'la.”

Tuméga-tégam

34“Tuméga-tégam un toumu wo tia' megena-genang uman u mahpaa-paaz im wana am pésta, wo u mahelep makaz i matewelen karia in tahlous mahgenang am pemandungennu i mendo-endo, wo i si Oki' ni Tou méyé sumaup ni kamu én zéi'kan mengompo'. 35Pahpaan un endo itii i méyé én tanu um wetes wia péléng sé tou wia ung kaayahan. 36Niitumo ni kamu én tuméga-tégamla karia i mengaléi, wo kamu makailek ung kaenté'an wo makawawa i mahsaru a mamuali itii wo ezen i rimendai witu u sinaru ni Oki' ni Tou.”

37 # Luk. 19:47 In endo, si Yesus é mahtuzu' witi lésaz um Walé ni Opo Empung wo im wengi ni Sia mondolé i matumekel witi kentur Zaitun. 38Woondopé' é lakezo sé tou niméyé wia ni Sia witi lésaz um Walé ni Opo Empung in tumalinga an ipahtuzu'-Na.

Currently Selected:

Lukas 21: LAITOM

Highlight

Copy