Matius 11

1I si Yesus nimakatuzu'mola wia sé mapulu' wo zua pahtuzu'en-Na, an itula'u-Namé um pahento'an-Na itii, i matumuzu' wo mahwoka' u Nuwu' Lé'os wia sé tou wana am wanua tua'na rété witu.

Tumoro si Yohanes Menanarani

(Luk. 7:18-35)

2I si Yohanes Menanarani witi bui, ni sia timalinga am pahpaayangen ni Kristus. 3An iatunama sé pahtuzu'enna i malumigau wia si Yesus in téntii, “Ama', apa ni Komo si méitaaz ni Opo Empung i méyé, kaapa wéwéhan tou walina si totoz in ento'en nai?”

4A séra wingkotela ni Yesus, “Mangémo wo maikuala wia si Yohanes an tinalinga wo a niilek niou: 5#Yes. 35:5-6, 61:1 sé letok én toromo mahilek, sé lailai én toromo mahlampang, sé tinoro ung kusta é lé'oso, sé lunteng é mahtalingamo, sé nimatémo é méitoumomé sumaup wo sé tou zéi'kan siapa apa én timalingamo u Nuwu' Lé'os um wia si Opo Empung a méyé. 6Mahpaa-paazola sé tou simungkul ni Aku.”

7Kaiwurima né pahtuzu'en ni Yohanes, a si Yesus rengan mahnuwu' wia sé tou lakez witu tumoro si Yohanes. Kuan-Na, “Apa u maileken niou im witi kapelasan? Apa kamu mangé wana i mamilek si tou mahzua-zua genang, tanumokan ang kuhun mengogé-ngogé mahkii-kiit uman u reges? 8Kaapa apa un angén niou wana? Mamilek si tou kimarai ung karai wangun? Si tou kimarai ung karai wangun é mahento' witi istana ni kolano. 9Ni- itumo, makumura kamu i mangé wana? Mamilek si nabi? Ulit, wo ikua-Kuma wia ni kamu, si Yohanes é lumouspé'mé si nabi. 10#Mal. 3:1 Pahpaan tumoro ni sia, méipantik witu um Pinantik Lenas, in téntii,

‘Ilekena, ni Aku nimatuma si aatu-Ku i mapuunama wia ni Ko,#11:10 Ni Ko é si Yesus. Im witu u rérékénan kenu, si Opo Empung é matu si aatu-Na si Yohanes, i ni sia si mimek u lalan u lampangan ni Yesus. Ileken kasiila witu Markus 1:1, 2.

ni sia é mamimek u lalan lampangan-Nu witu u sinaru-Mu.’

11Uli-ulit ikua-Kuma wia ni kamu: Im wia sé tou sé nimatoumé im wia sé wéwéné, zéi'kan siapa si lumousé ung kawangko' ni Yohanes, taan si totoz kori' im wia sé tou witi Kakolanoan ni Opo Empungpé' si wangko' taan ni sia. 12#Luk. 16:16 Rengané si Yohanes i mawiamé makaz in tarékan, wéwéhan sé tou léwo' mahsaru wo mahkakawasa sé tou witi Kakolanoan ni Opo Empung. 13Pahpaan péléng sé nabi wo a méipantik witu ung kitap Torat é mahkua tumoro u Nuwu' ni Opo Empung makaz si Yohanes niméyé. 14#Mal. 4:5; Mat. 17:10-13; Mrk. 9:11-13 Sa kamu paaz sumungkul u méikua-Ku, si Yohanes kenumo si Elia si pa'ento'en i méyé itii. 15Séi si wéwéhan lunteng é mahtalingama lé'os!

16Karia un apa iandé-Kuma sé tou in tarékan? Ni séra én tanumokan sé koki' merume-rumez witi pahwangkéran wo mahkéréta sé kakaria néra in téntii,

17‘Ni kai é mahpeloit wia ni kamu,

taan ni kamu é soo dumonci.

Ni kai é mahkantar ang kakantaren wana am pinatéan,

taan ni kamu én zéi'kan mahamé'.’

18Pahpaan si Yohanes i niméyé, ni sia zéi'kan mahkan wo zéi'kan mahelep wo ni sia ém pahkuan néra i sinelazan ni sétang. 19In tarékan si Oki' ni Tou é niméyé, ni Sia é mahkan wo mahelep wo ni séra é mahkua, ‘Ilekena, ni Sia é sorem wo matetewelen, kakaria né menanagi am pajak wo né tou mahsingkéla'.’ Taan ung katulapan ni Opo Empung én ikatuzu'mé im wana am pahlé'osen né tou mahkiit ni Sia.”

Si Yesus mahséro' wia sé tou soo tumula'u a singkéla'

(Luk. 10:13-15)

20A si Yesus rengan i mahséro' wia sé tou wana am wanua tua'na sé soo tumula'u a singkéla' néra, zozo' im witu ni Sia makalakezo nimanguné a makakompo'en. 21#Yes. 23:1-18; Yeh. 26:1, 28:26; Yl. 3:4-8; Ams. 1:9-10; Za. 9:2-4 Kuano kasii ni Yesus, “Ikaléwo'mo ni kamu in tou Khorazim! Ikaléwo'mo ni kamu in tou Betsaida! Pahpaan sa a makakompo'en winangun-Ku wana am wanua niou ém winangun-Ku witi Tirus wo Sidon, tantumo urémo ni séra ing kimarai ung karai pengangaraien witi pinatéan wo an ulu néra ém wuzwuzan néra an awu, un tumuzu'mé ni séra é mene'selo wo timula'umola a singkéla' néra. 22Taan ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukumanpé' wia sé tou witi Tirus wo Sidon u rorak taan un ukuman wia ni kamu. 23#Kej. 19:24-28; Yes. 14:13-15 Ni kamu in tou witi Kapernaum, ni kamu é mahgenangla im wénéten ni Opo Empung makaz witi kasendukan? Zéi'kan, ni kamu én itumpa witu naraka. Pahpaan sa a makakompo'en winangun-Ku witi wanua niou ém winangun-Ku witi Sodom, tantumo um wanua tua'na itii ém wiapé' makaz in tarékan. 24#Mat. 10:15; Luk. 10:12 Taan ikua-Kuma wia ni kamu: Im witu un endo si Opo Empung in tumotoz ulit kaapa zéi'kan am pahlé'osen né tou, un ukuman né tou witipé' Sodom u rorak taan un ukuman wia ni kamu.”

Si Yesus timawah sé tou méyé wia ni Sia

(Luk. 10:21-22)

25In toro niitu si Yesus mengaléi, “Ni Aku kumuama u makasé wia ni Ko, Ama', Opo Empung u langit wo ung kaayahan, pahpaan niana é méiwuni ni Ama' im wia sé tou tulap wo lakez ang kata'uan. Taan niana é méipapailek ni Ama' wia sé tou kanaramen sé mahkii-kiit uman tanu sé koki'. 26Niitu u nimangun un até ni Ama' i mahpaa-paaz.”

27 # Yoh. 3:35, 1:18, 10:15 A si Yesus kumua kasiima, “Péléng am péléng é mémoiayo ni Ama'-Ku wia ni Aku. Zéi'kan siapa zozo' in esa si mata'u si Oki', akaz uman si Ama' si mata'u si Oki', wo zéi'kan siapa zozo' in esa si mata'u si Ama', akaz uman si Oki' si mata'u si Ama' wo sé tou pinéléng ni Oki' sé makuaan-Na tumoro si Ama'-Na.

28Méyémo wia ni Aku, péléng sé marawoi wo sé lakez am pengalin, ni kamu ém wéhang-Ku ung kaenaan. 29#Yer. 6:16 Kumiitola um perénta-Ku tanumokan i masaan um pasangan méipasaan-Ku, wo mahtata'umé wia ni Aku, pahpaan ni Aku én eluz uman wo roros até, wo si rohmu é makailek ung kaenaan. 30Pahpaan am perénta-Ku é makapaazen wo um pengalin méipasaan-Ku é rorak uman.”

Currently Selected:

Matius 11: LAITOM

Highlight

Copy