Matius 14

Si Yohanes Menanarani winunu'

(Mrk. 6:14-29; Luk. 9:7-9)

1In toro niitu, si Herodes Antipas si kolano witi Galilea én timalingala a sirita tumoro si Yesus. 2Ang kuana wia sé touna, “Si tou makangaran Yesus itii, ni siamo si Yohanes Menanarani. Ni sia é méitoumomé sumaup ni Opo Empung im wia sé nimaté. Niitumo ni sia ém wéwéhan kawasa i mahwangun a makakompo'en.”

3 # Luk. 3:19-20 Si Herodes é mahgenangla in téntu, pahpaan im puuna si Yohanes é méipekitiona an iuntepna witu um bui. Winangunna téntu pahpaan si Yohanes é siméro'la si Herodes ing kumawéng si Herodias, si mahayo ni Filipus katuarina. 4#Im. 18:16, 20:21 Si Yohanes nimenau-naupola i siméro'la si Herodes, kuana, “Ni ko én zéi'kan toro kumawéng si Herodias, si mahayo ni katuarimu!” 5Zozo' si Herodes paaz i mahwuwunu' si Yohanes, taan ni sia é maindé' sé tou lakez sé mahgenangla si Yohanes i nabi.

6Taan im witu un endo i lumé'os un endo kinatouan ni Herodes, si raraha ni Herodias é mahmanari witu u sinaru ni Herodes wo né sakéina, a mangun si Herodes totoz mahpaa-paaz. 7Ni- itumo, si Herodes timiwa'la i méhé apa uman um pahaléien ni raraha itii.

8Pahpaan niakerla ni ina'na a sia kumuala wia si Herodes, “Iwéhémé wia ni aku un ulu ni Yohanes Menanarani méizeta' witu um wawo um baki!”

9I si Herodes timalingala um pahaléien ni raraha itii, un aténa é rumara. Taan pahpaan ni sia én timiwa'mola wia si raraha itii witu u sinaru né sakéina, ang kiitannala um pahaléien ni raraha itii. 10Iatunama sé touna i mamokolé un ulu ni Yohanes witi bui, 11am pahalin nératuumé un ulu ni Yohanes méizeta' witu um baki an iwéhéla wia si raraha itii. Éndona ni raraha itii un ulu ni Yohanes an alinama wia si ina'na. 12Kumawusa niitu, a méyé sé pahtuzu'en ni Yohanes Menanarani, éndo nérama un awak ni Yohanes a maileweng néramé. A séra makumua u nimamuali itii wia si Yesus.

Si Yesus niméhé ung kakanen wia sé limana riwu tou

(Mrk. 6:30-44; Luk. 9:10-17; Yoh. 6:1-14)

13Ing kinatalingaala ni Yesus u nimamuali itii, a Sia mondolé im witu, sumakéma londéi a mangé witi tampa zou'ma im wana am wanua, in tumampas. Taan un angéan ni Yesus éng kinata'uanla né tou lakez, a séra kumiita ung katanaan wana am wanua néra i mahtondonga si Yesus. 14I si Yesus timumpamomé im witu u londéi, ileken-Nama sé tou totoz lakez, a mawiamé u raraatéan-Na wia ni séra. A lé'osen-Nala sé tou saki im wia sé tou lakez itii.

15Im wengindomo, a méyé sé pahtuzu'en ni Yesus wia ni Sia ang kumua, “Un tampa kenu én zou'mé im wana am wanua wo mawengimo. Iatumoma sé tou kenu i mangé wana am wanua rété wia'i wo séra toro matumelesé ung kanen néra.”

16Taan kuan ni Yesus wia ni séra, “Ni séra én zéi'kan mangé wisa, ni kamu sé léwo'zéi' i méhé ung kanen néra.”

17A séra mingkotla, “Um wia ni kai in tarékan én akaz uman u roti lima wo seza' zua.”

18Ang kuan ni Yesus, “Pahaliné niitu wia ni Aku.” 19A sé tou lakez itii pekirumez-Nala wana an zukut. Éndo-Namé u roti lima wo sé seza' zua itii, Sia lumoho'ma witi langit ang kumuama u makasé wia si Opo Empung. Am pemété-météngen-Nama a roti itii an iwéhéma wia sé pahtuzu'en-Na. Am peméténg nérama wia sé tou lakez. 20Ni séra péléng éng kiman makaz nimawesuh. A réwokené né pahtuzu'en ni Yesus a roti nimateza. Péléng a nimateza é mapulu' wo zuana lo'lo' kumuwu-kuwu. 21Sé kiman ém woo limana riwu tuama, zéi'kampé' méikarékén sé wéwéné wo sé koki'.

Si Yesus limampang witu um wawo un zano

(Mrk. 6:45-52; Yoh. 6:16-21)

22Tumondong niitu, si Yesus rengan nimatuma sé pahtuzu'en-Na i sumakéma witu u londéi mapuunama i lumeweta. Karegas niitu, sé tou lakez ém pahatu-Nama i mawuri. 23I sé tou lakez itii méipekiwuri-Namoma, a si Yesus mengesama i simosoza witu ung kimeleng i mamengaléi. Im wengimo, si Yesus ém witupé' mengesa-ngesa. 24Karegas niitu, u londéi sinakéan né pahtuzu'en-Na én zou'momé im witi katanaan. U londéi itii ém pemolé-moléi u sempa', pahpaan u reges totoz repet. 25Im woo jam katelu i maayah, si Yesus méyé wia ni séra mahlampangé witu um wawo un zano. 26I sé pahtuzu'en-Na nimileka ni Sia mahlampang witu um wawo un zano, ni séra é mengompo' wo mahkérét pahpaan i maindé', “Mengingindé'!”

27Taan si Yesus é rengan ing kimuama wia ni séra, “Menesola! Kenu é ni Aku, tia'mo maindé'!”

28Ang kuan ni Petrus wia ni Sia, “Tuang, sa uli-ulit ni Ko, tawahena ni aku i mangé wia ni Ko lumampang witu um wawo un zano.”

29Ang kuan ni Yesus wia ni sia, “Méyémo!”

A si Petrus tumumpamé im witu u londéi a lumampang witu um wawo un zano mangé wia si Yesus. 30Taan im pahpendanenala u reges repet é mahtoromé ni sia, a sia maindé' am pahkatenema, ang kumérét, “Tuang, tulungené ni aku!”

31A si Yesus rengan i mayola u lengen-Na an tumioné si Petrus, ang kuan-Na, “É tou zéi'kan tahlous ma'éman, kaa ko mahzua-zua genang?”

32A séra sumakéla witu u londéi ang kumana'la u reges itii. 33Sé tou witu u londéi é mahongkot wo mahsigi' si Yesus, kuan néra, “Ni Ko én uli-ulit Oki' ni Opo Empung.”

Sé tou saki witi Genesaret liné'os ni Yesus

(Mrk. 6:53-56)

34I mémoikaayola witi lewet u louz, a séra sumuwa'la witi Genesaret. 35I si Yesus kinana'uanola né tou witu, a Sia ipahwoka' nérama wana péléng an tampa witi tana' itii. Péléng sé tou saki é méipahwalimé wia ni Sia. 36Ni séra é mahaléi wia si Yesus in énéané zozo' uman i sumahiza witu u rawisna ung karai tonton-Na. Péléng sé tou simahiza u rawisna ung karai tonton-Na é nimalé'os.

Currently Selected:

Matius 14: LAITOM

Highlight

Copy