Matius 18
18
Séi si totoz ipahpuu-puuna
(Mrk. 9:33-37; Luk. 9:46-48)
1 #
Luk. 22:24
In toro niitu, méyé wia si Yesus sé pahtuzu'en-Na a meligau, “Séi si totoz ipahpuu-puuna im witi Kakolanoan ni Opo Empung?”
2An tawahené ni Yesus si koki' esa. Si koki' itii é méirendai-Nala witu un unez néra. 3#Mrk. 10:15; Luk. 18:17 Ang kuan-Na, “Uli-ulit ikua-Kuma wia ni kamu, sa kamu zéi'kan tumula'ula a singkéla' niou wo maéndo tanu si koki' kenu, ni kamu én zéi'kan ikauntep witi Kakolanoan ni Opo Empung. 4Wo séi uman si meroros un touna wo maéndola tanu si koki' kenu, ni siamo si totoz ipahpuu-puuna im witi Kakolanoan ni Opo Empung. 5Séi uman si simungkul si koki' tanu si kenu pahpaan ni sia ma'éman ni Aku, ni sia é simungkul ni Aku.”
U mahwangun si tou mahsingkéla'
(Mrk. 9:42-48; Luk. 17:1-2)
6Ang kuan kasii ni Yesus, “Taan séi uman si tou nimangun si esaané im wia sé koki' sé ma'éman wia ni Aku kenu in zéi'mo ma'éman wia ni Aku, tawimo u léhé'na apusala um watu tua'na ipahgiling wo sia maitenemé witi tasik. 7Ikaléwo'la ung kaayahan kenu pahpaan lakez an toro mangun sé tou i mahsingkéla'. Ulit sa niana é léwo'zéi' mamuali wia ung kaayahan, taan ikaléwo'la si tou mahmuali niitu!
8 #
Mat. 5:30
Sa u lengenmu kaapa un a'ému nimangun ni ko mahsingkéla', ketorenola wo itia'la. Pahpaan tawimo ni ko menou-nou karia ni Opo Empung karia u lengen kaapa un a'é pokol taan ni ko karia u lengen zua wo un a'é zua, mailombo' witu un api zéi'kan mahpaté. 9#Mat. 5:29 Sa um werenmu u nimangunla ni ko mahsingkéla', suitela wo itia'la um werenmu itii. Pahpaan tawimo ko i menou-nou karia ni Opo Empung karia um weren esa uman, taan karia um weren zua ni ko mailombo' witu un api naraka.”
Un aandéan tumoro si domba méikalulu
(Luk. 15:3-7)
10“Gena-genangen! Tia' meroros si esaané im wia sé koki' kenu. Pahpaan ikua-Kuma wia ni kamu, wéwéhan sé malaekat mahtéiz ni séra sé witi kasendukan, sé mengile-ngilek uman ung gio ni Ama'-Ku. [11#Luk. 19:10 Pahpaan si Oki' ni Tou niméyé i mémilot sé tou méikalulu im witu un ukuman wana a singkéla néra.]
12Kura ung genang niou? Sa wéwéhan si makaanu sé sana atus domba wo si esaané im wia ni séra é méikalulula, zéi'kankuaa itula'unamé witi kazukutan sé siouna pulu' wo siou a mamenéro si domba esa si méikalulu itii? 13Uli-ulit ikua-Kuma wia ni kamu: Sa kinailekannamomé si domba itii, u mahpaa-paazna im wia si domba esa itiipé' u lumousé taan u mahpaa-paazna im wia sé siouna pulu' wo siou domba sé zéi'kan méikalulu. 14Téntu kangkasii si Ama' niou witi kasendukan, kasoo-Na sa si esaané im wia sé koki' kenu ikalulu.”
Kura sa si katuarimu sumingkéla'la wia ni ko
15 #
Luk. 17:3
Ang kuan kasii ni Yesus, “Sa si katuarimu sumingkéla'la, mengesama ko in tumawahmé ni sia wo séro'ennula. Sa sia paaz tumalinga a sésésamu, ni sia ém winangunmumola nimawurimé sumaup wia ni ko. 16#Ul. 19:15 Taan sa ko zéi'kan talingana, tumawahmé si esa kaapa zua katuarimu tou ma'eman i milek wo tumalinga un ipahkuamu wia ni sia, wo wéwéhan sé tou menté' u méikuamu. 17Sa sia soopé' kasii tumalinga sé tou tinawahmumé itii, maipapata'ula niana péléng wia sé jamaat. Sa sia soopé' kasii tumalinga sé jamaat, irékénola sia in tou zéi'kan mata'u si Opo Empung kaapa si tou menanagi am pajak.
18 #
Mat. 16:19; Yoh. 20:23 Uli-ulit ikua-Kuma wia ni kamu: Apa a sinéro' niou im wia ung kaayahan, niitu kangkasii é sinéro' im witi kasendukan. Wo apa ang kuan nioula in ulit im wia ung kaayahan, niitu kangkasii én ulit im witi kasendukan. 19Wo kasii ikua-Kuma wia ni kamu: Sa sé tou zua im wia ni kamu wia ung kaayahan kenu nimaesaan i mengaléi, um pahaléien néra itii én énéan ni Ama'-Ku si witi kasendukan. 20Pahpaan sa wéwéhan zua kaapa telu tou sé nimaréwok i mengaléi karia u ngaran-Ku, ni Aku kangkasii é memali-mali karia néra.”
Un aandéan tumoro si ata soo méhé ampungan
21 #
Luk. 17:3, 4 A méyé si Petrus ang kumuama wia si Yesus, “Tuang, makaz makapira ni aku léwo'zéi' i méhé ampungan wia si katuariku, sa sia sumingkéla'la wia ni aku? Makaz i makapitu?”
22A si Yesus mingkotla wia ni sia, “Zéi'kan! Ikua-Kuma wia ni ko: Zéi'kan uman makapitu, taan makaz i makapituna pulu' wo ipakapituma! 23Pahpaan tumoro ung Kakolanoan ni Opo Empung én tanu si kolano si niméyé i mémahrérékénan karia né atana. 24I ni sia karegaso i mahrérékénan, an isarumé wia ni sia si atana si wéwéhan utang mapulu'na riwu talenta. 25Taan pahpaan si ata itii zéi'kan makawawa i maér an utangna, an iatuma ni kolano itii i mangkér ni sia, karia ni mahayona wo sé oki'na wo kasii péléng a sangkumna i maér an utangna. 26Kaitalingamé niitu, si ata itii rengan ing kimuruzla a sumigi' si kolano itii, kuana: ‘Tuang, mezenpé'la oki', péléng an utangku ém pakawaérengku.’ 27Tumalingamé u méikuamé ni atana, a mawiamé u raraatéan ni kolano wia ni sia. Niitumo, si ata itii é méipiloté ni kolano itii wo an utang ni ata itii ém pinakazéi'na.
28Taan i si ata itii mondolé im witu, a sia mahilekala karia ni ata walina si wéwéhan un utang sana atus dinar wia ni sia. An tionannala si kakariana itii ang kezangannala, kuana, ‘Waérenomé an utangmu wia ni aku!’ 29Ang kumuruzla si kakariana itii a mahaléi wia ni sia, ‘Mezenpé'la oki', an utangku itii ém pakawaérengku.’ 30Taan um pahaléien ni kakariana itii zéi'kan kiniitannala. A sia iuntepnama witi bui makaz im pinakawaérnala an utangna. 31I nimilekla niitu, un até né kakariana walina é rumara. A maikua nérala péléng a nimamuali itii wia si tuang néra. 32Tumalingamé u sirita néra, an ipekitawahmé ni kolano si ata itii ang kuana, ‘É ata léwo'! Péléng an utangmu wia ni aku ém pinakazéi'kumola pahpaan ni ko é nimahaléi wia ni aku. 33Zéi'kankuaa ni ko kangkasii é léwo'zéi' i rumaraaté si kakariamu tanu ni aku i rimaraatémo ni ko?’ 34Si tuangna itii én totoz maupi' wia ni sia. A sia iayonala wia sé touna sé witi bui in zuméha ni sia, makaz péléng an utangna pakawaérenna.
35Téntumo kangkasii um wangunen ni Ama'-Ku si witi kasendukan wia ni kamu. Ni kamu si esa wo si esa én ukumen-Na sa kamu zéi'kan uli-ulit méhéla ampungan wia si katuarimu.”
Currently Selected:
Matius 18: LAITOM
Highlight
Share
Copy
Want to have your highlights saved across all your devices? Sign up or sign in
Matius 18
18
Séi si totoz ipahpuu-puuna
(Mrk. 9:33-37; Luk. 9:46-48)
1 #
Luk. 22:24
In toro niitu, méyé wia si Yesus sé pahtuzu'en-Na a meligau, “Séi si totoz ipahpuu-puuna im witi Kakolanoan ni Opo Empung?”
2An tawahené ni Yesus si koki' esa. Si koki' itii é méirendai-Nala witu un unez néra. 3#Mrk. 10:15; Luk. 18:17 Ang kuan-Na, “Uli-ulit ikua-Kuma wia ni kamu, sa kamu zéi'kan tumula'ula a singkéla' niou wo maéndo tanu si koki' kenu, ni kamu én zéi'kan ikauntep witi Kakolanoan ni Opo Empung. 4Wo séi uman si meroros un touna wo maéndola tanu si koki' kenu, ni siamo si totoz ipahpuu-puuna im witi Kakolanoan ni Opo Empung. 5Séi uman si simungkul si koki' tanu si kenu pahpaan ni sia ma'éman ni Aku, ni sia é simungkul ni Aku.”
U mahwangun si tou mahsingkéla'
(Mrk. 9:42-48; Luk. 17:1-2)
6Ang kuan kasii ni Yesus, “Taan séi uman si tou nimangun si esaané im wia sé koki' sé ma'éman wia ni Aku kenu in zéi'mo ma'éman wia ni Aku, tawimo u léhé'na apusala um watu tua'na ipahgiling wo sia maitenemé witi tasik. 7Ikaléwo'la ung kaayahan kenu pahpaan lakez an toro mangun sé tou i mahsingkéla'. Ulit sa niana é léwo'zéi' mamuali wia ung kaayahan, taan ikaléwo'la si tou mahmuali niitu!
8 #
Mat. 5:30
Sa u lengenmu kaapa un a'ému nimangun ni ko mahsingkéla', ketorenola wo itia'la. Pahpaan tawimo ni ko menou-nou karia ni Opo Empung karia u lengen kaapa un a'é pokol taan ni ko karia u lengen zua wo un a'é zua, mailombo' witu un api zéi'kan mahpaté. 9#Mat. 5:29 Sa um werenmu u nimangunla ni ko mahsingkéla', suitela wo itia'la um werenmu itii. Pahpaan tawimo ko i menou-nou karia ni Opo Empung karia um weren esa uman, taan karia um weren zua ni ko mailombo' witu un api naraka.”
Un aandéan tumoro si domba méikalulu
(Luk. 15:3-7)
10“Gena-genangen! Tia' meroros si esaané im wia sé koki' kenu. Pahpaan ikua-Kuma wia ni kamu, wéwéhan sé malaekat mahtéiz ni séra sé witi kasendukan, sé mengile-ngilek uman ung gio ni Ama'-Ku. [11#Luk. 19:10 Pahpaan si Oki' ni Tou niméyé i mémilot sé tou méikalulu im witu un ukuman wana a singkéla néra.]
12Kura ung genang niou? Sa wéwéhan si makaanu sé sana atus domba wo si esaané im wia ni séra é méikalulula, zéi'kankuaa itula'unamé witi kazukutan sé siouna pulu' wo siou a mamenéro si domba esa si méikalulu itii? 13Uli-ulit ikua-Kuma wia ni kamu: Sa kinailekannamomé si domba itii, u mahpaa-paazna im wia si domba esa itiipé' u lumousé taan u mahpaa-paazna im wia sé siouna pulu' wo siou domba sé zéi'kan méikalulu. 14Téntu kangkasii si Ama' niou witi kasendukan, kasoo-Na sa si esaané im wia sé koki' kenu ikalulu.”
Kura sa si katuarimu sumingkéla'la wia ni ko
15 #
Luk. 17:3
Ang kuan kasii ni Yesus, “Sa si katuarimu sumingkéla'la, mengesama ko in tumawahmé ni sia wo séro'ennula. Sa sia paaz tumalinga a sésésamu, ni sia ém winangunmumola nimawurimé sumaup wia ni ko. 16#Ul. 19:15 Taan sa ko zéi'kan talingana, tumawahmé si esa kaapa zua katuarimu tou ma'eman i milek wo tumalinga un ipahkuamu wia ni sia, wo wéwéhan sé tou menté' u méikuamu. 17Sa sia soopé' kasii tumalinga sé tou tinawahmumé itii, maipapata'ula niana péléng wia sé jamaat. Sa sia soopé' kasii tumalinga sé jamaat, irékénola sia in tou zéi'kan mata'u si Opo Empung kaapa si tou menanagi am pajak.
18 #
Mat. 16:19; Yoh. 20:23 Uli-ulit ikua-Kuma wia ni kamu: Apa a sinéro' niou im wia ung kaayahan, niitu kangkasii é sinéro' im witi kasendukan. Wo apa ang kuan nioula in ulit im wia ung kaayahan, niitu kangkasii én ulit im witi kasendukan. 19Wo kasii ikua-Kuma wia ni kamu: Sa sé tou zua im wia ni kamu wia ung kaayahan kenu nimaesaan i mengaléi, um pahaléien néra itii én énéan ni Ama'-Ku si witi kasendukan. 20Pahpaan sa wéwéhan zua kaapa telu tou sé nimaréwok i mengaléi karia u ngaran-Ku, ni Aku kangkasii é memali-mali karia néra.”
Un aandéan tumoro si ata soo méhé ampungan
21 #
Luk. 17:3, 4 A méyé si Petrus ang kumuama wia si Yesus, “Tuang, makaz makapira ni aku léwo'zéi' i méhé ampungan wia si katuariku, sa sia sumingkéla'la wia ni aku? Makaz i makapitu?”
22A si Yesus mingkotla wia ni sia, “Zéi'kan! Ikua-Kuma wia ni ko: Zéi'kan uman makapitu, taan makaz i makapituna pulu' wo ipakapituma! 23Pahpaan tumoro ung Kakolanoan ni Opo Empung én tanu si kolano si niméyé i mémahrérékénan karia né atana. 24I ni sia karegaso i mahrérékénan, an isarumé wia ni sia si atana si wéwéhan utang mapulu'na riwu talenta. 25Taan pahpaan si ata itii zéi'kan makawawa i maér an utangna, an iatuma ni kolano itii i mangkér ni sia, karia ni mahayona wo sé oki'na wo kasii péléng a sangkumna i maér an utangna. 26Kaitalingamé niitu, si ata itii rengan ing kimuruzla a sumigi' si kolano itii, kuana: ‘Tuang, mezenpé'la oki', péléng an utangku ém pakawaérengku.’ 27Tumalingamé u méikuamé ni atana, a mawiamé u raraatéan ni kolano wia ni sia. Niitumo, si ata itii é méipiloté ni kolano itii wo an utang ni ata itii ém pinakazéi'na.
28Taan i si ata itii mondolé im witu, a sia mahilekala karia ni ata walina si wéwéhan un utang sana atus dinar wia ni sia. An tionannala si kakariana itii ang kezangannala, kuana, ‘Waérenomé an utangmu wia ni aku!’ 29Ang kumuruzla si kakariana itii a mahaléi wia ni sia, ‘Mezenpé'la oki', an utangku itii ém pakawaérengku.’ 30Taan um pahaléien ni kakariana itii zéi'kan kiniitannala. A sia iuntepnama witi bui makaz im pinakawaérnala an utangna. 31I nimilekla niitu, un até né kakariana walina é rumara. A maikua nérala péléng a nimamuali itii wia si tuang néra. 32Tumalingamé u sirita néra, an ipekitawahmé ni kolano si ata itii ang kuana, ‘É ata léwo'! Péléng an utangmu wia ni aku ém pinakazéi'kumola pahpaan ni ko é nimahaléi wia ni aku. 33Zéi'kankuaa ni ko kangkasii é léwo'zéi' i rumaraaté si kakariamu tanu ni aku i rimaraatémo ni ko?’ 34Si tuangna itii én totoz maupi' wia ni sia. A sia iayonala wia sé touna sé witi bui in zuméha ni sia, makaz péléng an utangna pakawaérenna.
35Téntumo kangkasii um wangunen ni Ama'-Ku si witi kasendukan wia ni kamu. Ni kamu si esa wo si esa én ukumen-Na sa kamu zéi'kan uli-ulit méhéla ampungan wia si katuarimu.”
Currently Selected:
:
Highlight
Share
Copy
Want to have your highlights saved across all your devices? Sign up or sign in