Matius 20

Un aandéan tumoro sé mememendu witi uma tinaneman an anggor

1Ang kuan ni Yesus, “Ung Kakolanoan ni Opo Empung én tanu si tou makauma tinaneman anggor, si woondopé' karengan nimondoloma mamenéro tou i mamendu un umana. 2I mémoikaileké sé woopira tou mahpaayang, a sia mahkuaala karia néra, um wawaér wia ni séra witu u sana endo én esa dinar, tanu ung kinanaram ipahwaér in toro niitu. A séra iatunama i mamendu un umana tinaneman an anggor. 3Woo jam kasiou im woondo, sia mondola sumaup an ilekennala im witi pasar ém wéwéhampé' sé woopira tou zéi'kan siapa paayangen. 4Kuana wia ni séra, ‘Mamomendula kamu witi umaku un tinaneman an anggor, wo ni kamu ém waérangkumokan um wangun ing kailekan niou.’ Kaitalingamé niitu, a séra mangé i mamendu witi uma itii. 5Woo jam i mapulu' wo zua wo jam ing katelu im wengindo, sia mondol kasiima sumaup a mangun tanu un taré winangunnamé. 6Woo jam kalima im wengindo, sia mondol kasiima sumaup, a sia mahilekala wo sé tou walina sé zéi'kan kasii siapa paayangen. Kuana wia ni séra, ‘Kaa kamu zéi'kan nimaayangla i sana endo kenu?’

7A séra mingkotla wia ni sia, ‘Pahpaan zéi'kan siapa tou niméhé paayangen wia ni kai.’

Ang kuana wia ni séra, ‘Sa téntu, ni kamu é mamomendula witi umaku un tinaneman an anggor.’

8 # Im. 19:13; Ul. 24:15 Im wengimo, a si makauma itii kumuala wia si menénéiz sé mememendu, ‘Tawahené péléng sé mememendu itii wo séra waérala, rengané im wia sé nimaayang totoz kamurian makaz wia sé nimaayang kataré-taré.’

9A méyé sé nimendu rengané in jam kalima im wengindo, ni séra si esa wo si esa é nimakailek um wawaér esa dinar. 10Tumondong niitu, a méyé sé nimendu rengané ing kataré-taré, pahgenangen nérala un iwaéré wia ni séra é lumakezpé'mé u méiwaér wia sé nimaayang kamurian. Taan ni séra kangkasii si esa wo si esa é nimakailek umané un esa dinar. 11I ni séra nimakailekomé un zoit itii, ni séra é mahpa'os wo menembu-nembut wia si makauma. 12Kuan néra, ‘Sé kamurian nimuntepé é nimendu uman sana jam wo pinasuatmu umané karia a méiwaér wia ni kai sé simanaendo i nimaayang wutez wo rinaazan.’

13Taan kuan ni makauma itii wia si esaané im wia ni séra, ‘É karia, ni aku én zéi'kan mahwangun u mahsanaweka im wia ni kamu. Zéi'kankuaa rengané ing kataré ni kita é nimahkuaano im waéran esa dinar i sana endo? 14Éndonoma um wawaérmu wo mangémo. Ni aku ém paaz i maér wia sé kamurian nimuntepé kenu tanu u méiwaérku wia ni ko. 15Wayaangku kurangku un zoitku. Kaapa ni ko menéutéu pahpaan ni aku é rumaraaté sé tou itii?’ ”

16 # Mat. 19:30; Mrk. 10:31; Luk. 13:30 Ang kuan kasii ni Yesus, “Téntu kangkasii si tou ipahmuri-muri é maéndo ipahpuu-puuna wo si ipahpuu-puuna é maéndo ipahmuri-muri.”

Ing katelu si Yesus nimapata'u um patéan-Na

(Mrk. 10:32-34; Luk. 18:31-34)

17I si Yesus mahaangé witi Yerusalem, tawahen-Namé sé mapulu' wo zua pahtuzu'en-Na in timampasé ang kuan-Na wia ni séra karegas i mahlampang, 18“In tarékan ni kita é mangé witi Yerusalem wo im wana si Oki' ni Tou én iayo wia sé tonaas né walian wo sé tou tulap un Torat. Ni Sia én totozen néra im wunu'en. 19Ni Sia én iayo néra wia sé tou zéi'kan Yahudi i séro'an néra, saluken wo salipen, taan witu un endo katelu ni Sia én itou sumaup ni Opo Empung.”

Um pahaléien ni ina' ni Yakobus wo ni Yohanes wia si Yesus

(Mrk. 10:35-45)

20A méyé wia si Yesus si mahayo ni Zebedeus karia né oki'na zua. A sia kumuruzla witu u sinaru ni Yesus im wéwéhan um pahaléien.

21Kuan ni Yesus wia ni sia, “Apa ung kapaazmu im wanguneng-Ku?”

Kuana wia si Yesus, “Kapaazku sé oki'ku zua kenu toro rumumez witi Kakolanoan-Nu im woo sawisa, si esa ém witu ung kawihi-Mu wo si esa kasii ém witu ung kakan-Mu.”

22Taan kuan ni Yesus, “Um pahaléien niou én zéi'kan kata'uan niou. Makawawa wé kamu i mendan an zézéha pendaneng-Ku un tanumokan i melep witu un eelepan u léwo'zéi' in elepeng-Ku?”

A séra mingkotla, “Ni kai é makawawa.”

23Ang kuan ni Yesus wia ni séra, “Totoz ulit, ni kamu é mamendan an zézéha un tanumokan i melep witu un eelepan u léwo'zéi' in elepeng-Ku. Taan tumoro séi sé marumumez witu ung kakan kaapa witu ung kawihi-Ku, ni Aku én zéi'kan siapa kawasa in tumotoz niitu. U rurumezan itii é maiwéhé ni Ama'-Ku wia sé tinotoz-Namo i makailek niitu.”

24In timalingamé niitu, sé mapulu' pahtuzu'en-Na walina, maupi' wia sé zua mahtuari itii. 25#Luk. 22:25-26 Taan si Yesus tumawahmé ni séra, ang kumua, “Kata'uan niou sé tonaas né tahsasana wanua sé zéi'kan mata'u si Opo Empung é mahzézéha sé tou néra. Wo sé pahsigi-sigi'en witu é mahwangun kiit um paaz néra wia sé tou néra. 26#Mat. 23:11; Mrk. 9:35; Luk. 22:26 Taan ni kamu én zéi'kan tanu ni séra! Séi si paaz i maéndo tou pahsigi'en im wia ni kamu, ni sia é léwo'zéi' i maéndo menenelewir im wia ni kamu. 27Wo séi uman si paaz maéndo kataré im wia ni kamu, ni sia é léwo'zéi' i maéndo ata im wia ni kamu. 28Téntu kangkasii si Oki' ni Tou i méyé én zéi'kan i selewiren, taan i mésumelewir wo i mayo ung katou-touan-Na in tumubus a singkéla' né tou lakez.”

Sé tou letok zua liné'os ni Yesus

(Mrk. 10:46-52; Luk. 18:35-43)

29I si Yesus wo sé pahtuzu'en-Na nimondolé im witi Yerikho, sé tou lakez mahtotondongané i mahkiit ni Sia. 30Wéwéhan sé zua tou letok sé makarumez witu ruruh u lalan, timalingamé i si Yesus é lumangkoi, a séra kumérét, “Tuang, Suzu ni Daud, iraraaté ndootuumé kai!”

31Taan sé zua tou letok itii é sinéro'la né tou lakez wo séra menesla. Taan karimezna uman taré ni séra i mahkérét, “Tuang, Suzu ni Daud, iraraaté ndootuumé kai!”

32A si Yesus mento'la an tumawahmé ni séra zua. Kuan-Na wia ni séra, “Apa ung kapaaz niou im wanguneng-Ku wia ni kamu?”

33A séra mingkotla, “Tuang, ni kai ém paaz in toro milek.”

34A mawiamé u raraatéan ni Yesus wia ni séra. An irasak-Nama u lengen-Na wana am weren néra zua, in toro niitukan ni séra én toromo mahilek, a séra kumiit si Yesus.

Currently Selected:

Matius 20: LAITOM

Highlight

Copy