Matius 26

Sé nimaesaan i munu' si Yesus

(Mrk. 14:1-2; Luk. 22:1-2; Yoh. 11:45-53)

1I si Yesus nimakakuamola niitu, ang kuan-Na wia sé pahtuzu'en-Na, 2#Kel. 12:1-27 “Kata'uan niouo, zuana endomokan é lumé'oso un endo mahpésta pahkuan Paskah, wo si Oki' ni Tou é maiayo i salipen.”

3In toro niitu, sé tonaas né walian wo sé pahtutu'an né tou Yahudi é nimaréwok witi istana ni Walian Wangko' makangaran Kayafas. 4Im witu, ni séra é nimeruz a maesaan in tumion si Yesus karia i mahwuni-wuni wo i munu' ni Sia. 5Taan kuan néra, “Ni Sia én tia'mo pahtitionan witu un endo i mahpésta, én taa sé tou rumikoka'.”

Un ulu ni Yesus winuwu'an u lana mahwou tariis

(Mrk. 14:3-9; Yoh. 12:1-8)

6I si Yesus witi Betania, witi walé ni Simon si i makasa én tinoro ung kusta, 7#Luk. 7:37-38 a méyé wia si Yesus si wéwéné mahali-ali um wotel pualam#26:7 Um wotel kenu ém watu kulo' pahkuan pualam am wangunen. I muka um wotel kenu é léwo'zéi im pahtarazen witu u léhé'na. un tinahu'an u lana mahwou tariis totoz mahal. U lana itii méiwuwu'ma ni wéwéné itii witu un ulu ni Yesus si karegas rimumez i mahkan.

8Mileka niitu sé pahtuzu'en-Na é maupi' a mahkua, “Apa un torona i mahtitia' u lana itii? 9Pahpaan u lana itii én toro iwangkér mahal wo un zoitna én toro iwéhéma wia sé tou zéi'kan siapa apa.”

10Taan kata'uan ni Yesus am pegena-genangen néra, ang kuan-Na, “Kaa si wéwéné kenu pahsususan niou? Ni sia é nimangunola um wangun wia ni Aku. 11#Ul. 15:11 Pahpaan sé tou zéi'kan siapa apa sekezé ém witu u liklik niou, taan ni Aku zéi'kan sekezé é memali-mali karia niou. 12Pahpaan karia im winuwu'annamé u lana itii un awak-Ku, ni Aku é niimeknamola i mamoileweng. 13Uli-ulit ikua-Kuma wia ni kamu: Wisa uman wia ung kaayahan kenu u mawokaan né tou u Nuwu' Lé'os ni Opo Empung, um winangun ni wéwéné kenu én isirita néra kangkasii ing gumenang ni sia.”

Si Yudas gimenango i mayo si Yesus

(Mrk. 14:10-11; Luk. 22:3-6)

14A si esaané im wia sé mapulu' wo zua pahtuzu'en ni Yesus si makangaran Yudas Iskariot, mangé wia sé tonaas né walian. 15#Za. 11:12 Kuana, “Apa un iwéhé niou wia ni aku, wo Sia iayoku wia ni kamu?” A sia wéhan nérala un teluna pulu' zoit péra'.#26:15 Un teluna pulu' zoit péra', ung kalakezna én tanu ung kalakez un ipahwaér wia sé tou maayang epatna loloho'en. Masuat wo un teteles ni ata esa im witu un Taaz Uré. 16Rengané in toro niitu si Yudas é menéro-néro un oras i mayo si Yesus.

Si Yesus kiman karia né pahtuzu'en-Na in endo Paskah

(Mrk. 14:12-21; Luk. 22:7-14, 21-23; Yoh. 13:21-30)

17Witu un endo kataré i mahpésta Roti Zéi'kan Rinagian#26:17 Um pésta Roti Zéi'kan Rinagian é masuat wo um pésta Paskah., a méyé sé pahtuzu'en ni Yesus ang kumuama, “Wisa ung kapaaz-Mu i maimekan nai ung kanan i lumé'os um Paskah?”

18A mingkotla si Yesus, “Mangémo witi wanua tua'na wia si tou wo ikuala wia ni sia in téntii, ‘Kuan ni Méster: Un oras-Ku én zéi'mo uré, witu un untep um walémumo ung kanenang-Ku karia né pahtuzu'eng-Ku i lumé'os um Paskah.’ ” 19Am wangunela né pahtuzu'en-Na tanu u méikuama ni Yesus wia ni séra. A séra mimekla i lumé'os um Paskah.

20Im wengimo, si Yesus rimumez ing kuman mahwali-wali karia né mapulu' wo zua pahtuzu'en-Na. 21Karegas séra i mahkan ang kuan ni Yesus, “Uli-ulit ikua-Kuma wia ni kamu, si esaané im wia ni kamu é mayo ni Aku.”

22Kaitalingamé niitu, un até né pahtuzu'en-Na én totoz rumara a séra mahta'sama i mahkuama wia ni Sia, “Tuang, zéi'kan ni aku to?”

23 # Mzm. 41:10 A si Yesus mingkotla, “Si tou itii é si nimahwalima karia-Ku i simousoua u roti witu um piring, ni siamo si mayo ni Aku. 24Si Oki' ni Tou é maté tanu u méipantik tumoro ni Sia witu um Pinantik Lenas. Taan ikaléwo'la si tou nimayo si Oki' ni Tou. Tawimo si tou itii in zéi'kan méitoumé.”

25Si Yudas si gimenango i mayo si Yesus éng kimuama wia si Yesus, “Zéi'kan ni aku to, Méster?”

A mingkotla si Yesus wia ni sia, “Ni ko in esa si kimuamé niitu!”

Si Yesus wo sé pahtuzu'en-Na limé'os um perjamuan

(Mrk. 14:22-26; Luk. 22:14-20; 1Kor. 11:23-25)

26Karegas séra i mahkan, si Yesus méndomé u roti ang kumuama u makasé wia si Opo Empung, pemété-météngen-Nala u roti itii an ipahwéhé-Nama wia sé pahtuzu'en-Na ang kumua, “Éndonoma, kanenola, ung kenumo un awak-Ku.”

27Tumondong niitu, a Sia méndomé um pengengelepan un tinahu'an anggor, kumuama u makasé wia si Opo Empung, an iwéhé-Nala wia ni séra ang kumua, “Ni kamu péléng é melepola witu um pengengelepan kenu. 28#Kel. 24:8; Yer. 31:31-34 Pahpaan ung kenumo un zaha'-Ku, un zaha' nimenté' um pinataazan ni Opo Empung, un isaroi wia sé tou lakez i méhé un ampungan wana a singkéla' néra. 29Taan, ikua-Kuma wia ni kamu, ni Aku én zéi'mo mahele-elepla un anggor kenu, makaz witu un endo ni Aku i melep un anggor weru karia niou witi Kakolanoan ni Ama'-Ku.”

Si Petrus makumélong si Yesus

(Mrk. 14:27-31; Luk. 22:31-34; Yoh. 13:36-38)

30Makakantarla ang kakantaren lolooz, a si Yesus wo sé pahtuzu'en-Na mangé witi Kentur Zaitun. 31#Za. 13:7 Ang kuan ni Yesus wia ni séra, “Im wengi kenu ni kamu péléng én tumula'u ni Aku. Pahpaan witu um Pinantik Lenas é méipantik, ‘Si memimiara sé domba ém wunu'eng-Ku, wo sé dombana én ikasera.’ 32#Mat. 28:16 Taan ni Aku i méitoumomé sumaup ni Opo Empung, ni Aku é mangé witi Galilea puunala ni kamu.”

33A mingkotla si Petrus wia si Yesus, “Zozo' ni séra péléng tumingkasa tumula'uma ni Ko, taan ni aku én zéi'kan mahwangu-wangunla un téntu.”

34Ang kuan ni Yesus wia ni sia, “Uli-ulit ikua-Kuma wia ni ko, im wengi kenu, puunala si laka' ing kumukuké, ni ko é nimakatelumola ing kimélong ni Aku.”

35Taan kuan ni Petrus wia ni Sia, “Zozo' ni aku léwo'zéi' i maté karia-Mu, ni aku én zéi'kan kumélong ni Ko.” Péléng sé pahtuzu'en ni Yesus walina kasii éng kimuala in téntu.

Si Yesus mengaléi witi Getsemani

(Mrk. 14:32-42; Luk. 22:39-46)

36Tumondong niitu, si Yesus wo sé pahtuzu'en-Na ikaayola witi tampa makangaran Getsemani. Ang kuan ni Yesus wia ni séra, “Rumumezola wia'i, karegas ni Aku i mamengaléi witi kenuma.” 37A si Yesus tumawahma si Petrus wo sé zua oki' ni Zebedeus ing kumiita ni Sia. Un até-Na é mahpendano i rumara wo zéi'mo si katu'tulan. 38A Sia kumuala wia ni séra, “Un até-Ku én totoz rumara, tanumokan i matémo. Mento'mola wia'i wo tumégamla karia-Ku.”

39A Sia lumampanga oki', kumuruzla karia in timuktuk a mengaléi, “O Ama'-Ku, sa tanu an toro, izou-zou' im wia ni Aku an zézéha kenu, taan ikiitola um paaz ni Ama', zéi'kan mengiit um paaz-Ku.”

40Kumawusa niitu, a Sia mawurimé wia sé pahtuzu'en-Na itii, maileken-Na ni séra é nimatekelo. Ang kuan-Na wia si Petrus, “Zéi'kan makawawa kamu wé in tumégamla karia-Ku zozo' i sana jam uman? 41Tuméga-tégam wo mengaléila wo kamu zéi'kan ikakiit witu um pema'wa'en. Ulit i si roh ém paaz i mangun a lé'os, taan in tou uman, ni kamu én zéi'kan makawawa.”

42A Sia mamengaléi ing kazua. Kuan-Na, “O Ama'-Ku, sa an zézéha kenu zéi'kan mamuali in izou'ma wia ni Aku, taan léwo'zéi' im pengaling-Ku, mamualimola mengiit ung kapaaz-Mu.” 43A si Yesus mawurima sumaup wia sé telu pahtuzu'en-Na. Maileken-Na ni séra é nimatekelo sumaup pahpaan ni séra én totozo i mahtatando'.

44An iwayamé ni Yesus séra im witu, a Sia mamengaléi ing katelu wo u méikua-Namé é masuat wo un taré ikua-Namé. 45Kumawusa niitu, a Sia mawurimé sumaup wia sé telu pahtuzu'en-Na ang kumua wia ni séra, “Timekel wo kimana'pé' kasii kamu? Ilekena, un orasna é méikaayomola i si Oki' ni Tou iayo wia sé tou mahsingkéla'. 46Rumendaiomé! Méyémo kita mangémo. Si tou si mayo ni Aku é merétémomé!”

Si Yesus in tinionan

(Mrk. 14:43-50; Luk. 22:47-53; Yoh. 18:3-12)

47I si Yesus karegaspé' mahnuwu', méyé si Yudas si esaané im wia sé mapulu' wo zua pahtuzu'en-Na, nimahwalimé karia né sana réwok tou lakez sé mahali-ali am pisou wo am wéwélwél. Ni séra é méiatumé né tonaas né walian wo né pahtutu'an né tou Yahudi. 48Taan puunala niitu si Yudas éng kimuamola wia ni séra, “Si Tou si masiomengku, ni Siamo itu, tionanola Sia.”

49I ni séra nimawitumola, a si Yudas rengan nimangé wia si Yesus ang kumua, “U sigi'ku Méster!” A Sia siomennama.

50Taan si Yesus kimuama wia ni sia, “É karia, niitu ndéén u niéyému?” A rumétémé sé tou a si Yesus tionan nérala.

51Taan si esaané im wia ni séra sé kimiité si Yesus, simawuté um pisou, am wira'ennama si ata ni Walian Wangko' makaz u luntengna é nimatengkola. 52Ang kuan ni Yesus wia si tou itii, “Iuma'la sumaup um pisoumu itii, pahpaan péléng sé tou mahpaké um pisou i munu' tou, ni sia kangkasii é maté karia um pisou. 53Kaapa pahgenangen nioula i ni Aku én zéi'kan toro mahaléia wia si Ama'-Ku, wo rengan in iatu-Namé sé mapulu' wo zuana réwok suraro#26:53 Sana réwok suraro ém pahkuan ‘legion’. Esa legion én enemna riwu suraro witu u rérékénan in oras ni kaisar Agustus. Niitumo sa mapulu' wo zua legion é masuat wo sé pituna pulu' wo zuana riwu suraro. né malaekat i mésumawang ni Aku? 54Taan sa téntu, kurapé' kahuman i malekep u méipantik witu um Pinantik Lenas, ung kimua sa a mahmuali in tarékan é léwo'zéi' i mamuali?”

55 # Luk. 19:47, 21:37 A si Yesus kumuala wia sé tou lakez itii, “Pahgenangen nioula ni Aku én tou léwo' taka-takazan ni kamu nimahalimé am pisou wo am wéwélwél i métumion ni Aku? Sekez in endo ni Aku é rimumez wo mahtuzu' witi lésaz um Walé ni Opo Empung, taan ni Aku zéi'kan pahtitionan niou. 56Taan péléng niia é léwo'zéi' mamuali wo malekep a méipantik né nabi witu um Pinantik Lenas.” Am péléng sé pahtuzu'en ni Yesus tumula'uma ni Sia an tumingkasa.

Si Yesus witu u sinaru né Mahkama Agama

(Mrk. 14:53-65; Luk. 22:54-55, 63-71; Yoh. 18:13-14, 19-24)

57I si Yesus tinionan néramomé, a Sia ipahwali nérama isaru wia si Walian Wangko' Kayafas. Im witu é nimaréwoko sé tou tulap un Torat wo sé pahtutu'an né tou Yahudi. 58Karegas niitu, si Petrus é mengii-ngiité si Yesus witi zou'ma makaz witi lésaz um walé ni Walian Wangko'. I ni sia nimuntepola witu u lésaz itii, ni sia é marimumez karia né menénéiz um walé ni Opo Empung i mahiilek kura u mamuali wia si Yesus.

59Sé tonaas né walian wo sé walina sé méikauntep witu u Mahkama Agama é menéro-néro tou sé kumua an towo tumoro an tinalinga wo niilek néra i sumaru si Yesus, wo Sia toro ukumen i maté. 60Taan ni séra én zéi'kan méikailekla maan in esa, si toro tumuzu'mé ung kasumalaan-Na, zozo' lakez sé tou mahkuama an towo tumoro si Yesus. Ing kamurian niméyé sé tou zua, 61#Yoh. 2:19 ang kumuama, “Si Tou kenu i makasa éng kimua i ni Sia én toro gumogar um Walé ni Opo Empung wo rumendai niitu sumaup witu un teluna endo.”

62A rumendaié si Walian Wangko' itii ang kumua wia si Yesus, “Zéi'kan siapa ikua-Ko wé ing kumelung un tou-Mu wana an ipahtoké néra kenu?” 63Taan si Yesus é memene-menes uman. A si Walian Wangko' itii kumua kasiima wia ni Sia, “Karia u ngaran ni Opo Empung si menou-nou, ikuamé wia ni kai, apa ni Ko é Mesias, si Oki' ni Opo Empung, kaapa zéi'kan?”

64 # Dan. 7:13 A si Yesus mingkotla, “Ni ko éng kimuamomé niitu, taan ikua-Kuma wia ni kamu, rengan in tarékan ni kamu é milek si Oki' ni Tou i rimumez witu ung kakan ni Totoz Mahkawasa wo méyé witu um wawo a ninahak witi langit.”

65 # Im. 24:16 A si Walian Wangko' itii sumangsanga ung kinaraina ang kumua, “Ni Sia mahséro'mo si Opo Empung. Apapé' un torona kita menéro tou ing kumua a niilek wo tinalinga tumoro ni Sia? In tarékan én tinalinga niouoma ni Sia i mahséro' si Opo Empung. 66Sa kamu éng kura?”

A séra mingkotla, “Ni Sia é léwo'zéi' in ukumen maté.”

67 # Yes. 50:6 A séra mahrura' witu ung gio-Na, mahsondo' ni Sia wo sé walina é mahsepal ni Sia. 68Ang kuan néra, “É Mesias! Amoké ikuamé wia ni kai, séi sé mahsepala ni Ko?”

Si Petrus kimélong si Yesus

(Mrk. 14:66-72; Luk. 22:56-62; Yoh. 18:15-18, 25-27)

69Karegas niitu, si Petrus é rimumez witi lésaz um walé ni Walian Wangko'. A méyé wia ni sia si ata wéwéné ang kumua, “Ni ko kasii sekezé é memali-mali karia ni Yesus, si tou Galilea itii.”

70Taan ni sia é mahkélong uman im witu u sinaru péléng né tou, kuana, “Zéi'kan kata'uangku um pahkuamumé.” 71I ni sia nimangé witi pepenet tua'na, si ata wéwéné walina nimileka ni sia ang kumua wia sé tou witu, “Si tou kenu é mahkari-karia si Yesus, si tou Nazaret itii.”

72Taan ni sia kimélong uman kasiila karia i mahtiwa', “Si Tou itii én zéi'kan kata'uangku.”

73Zéi'kan uré kasii, sé tou witu rimétéla si Petrus, ang kumuama, “Tantumo ni ko kasii én esaané im wia ni séra, niitu én toro kata'uan witu um pakahnuwu'mu.”

74A si Petrus rengan i mahsalou wo mahtiwa', “Zéi'kan kata'uangku si tou itii.” In toro niitukan ang kumukuké si laka'.

75Ang kagenangala ni Petrus u méikua ni Yesus wia ni sia, “Puunala si laka' ing kumukuké, ni ko é nimakatelumola ing kimélong ni Aku.” A sia mondola a mamamé' karia in totoz rumara un até.

Currently Selected:

Matius 26: LAITOM

Highlight

Copy