Markus 15

Si Yesus witu u sinaru ni Pilatus

(Mat. 27:1-2, 11-14; Luk. 23:1-5; Yoh. 18:28-38)

1In totozpé' woondo, sé tonaas né walian, sé pahtutu'an né tou Yahudi, sé tou tulap un Torat wo sé walina sé méikauntep witu u Mahkama Agama, nimaréwok wo nimaesaan. A si Yesus apusen nérala an ipahwalima i maiayo wia si Pilatus.

2Ikaayola wia si Pilatus, a si Pilatus meligau wia ni Sia, “Ni Ko si Kolano né tou Yahudi?”

A si Yesus mingkotla, “Ni ko in esa si kimuamé niitu.”

3Lakez an totoké ipahkua né tonaas né walian wia ni Sia. 4A si Pilatus lumigau kasiila sumaup wia ni Sia, “Soopé' kasii mingkot Ko? Ilekena! Téntumokan ung kalakez an ipahtoké néra wia ni Ko!”

5Taan si Yesus é memene-menes uman, taka-takazan si Pilatus é mengusi-ngusingsing.

Si Yesus tinotoz im wunu'en

(Mat. 27:15-26; Luk. 23:13-25; Yoh. 18:39–19:16)

6Sekez i lumé'os um Paskah, si Pilatus é milot si esaané im wia sé binui, mengiit um paaz né tou lakez. 7In toro niitu, wéwéhan si tou makangaran Barabas, si binui karia né tou walina pahpaan ni séra é nimahwunu' tou i mahsaru sé pemerénta Romawi. 8A sé tou lakez méyé wia si Pilatus, mahaléi i miloté si esaané im wia sé binui, tanu um pemamangunenna.

9A si Pilatus meligau wia ni séra, “Apa kapaaz niou in ipilotkuma si kolano né tou Yahudi kenu?” 10Kata'uano ni Pilatus i sé tonaas né walian é mahtéutéu si Yesus, niitumo si Yesus é méiayo néra wia ni sia. 11Taan sé tonaas né walian é mahaker sé tou lakez i mahaléi wia si Pilatus i miloté si Barabas.

12A si Pilatus lumigau sumaup wia ni séra, “Sa téntu, apa u léwo'zéi' im wangunengku wia si tou si pahkuan niou ing kolano né tou Yahudi kenu?”

13A séra kumérét kasiima, “Salipenola Sia!”

14A si Pilatus meligau sumaup kasii wia ni séra, “Taan apa a léwo'an winangun-Na?”

Taan ni séra éng karimezna uman taré i mahkérét, “Salipenola Sia!”

15Pahpaan si Pilatus paaz i mangun sé tou lakez itii i mahpaa-paaz, a sia milota si Barabas wia ni séra, taan si Yesus é méipekisaboknama an iayonala i masalipen.

Si Yesus im pahséro'an

(Mat. 27:27-31; Yoh. 19:2-3)

16Tumondong niitu, a si Yesus ipahwalima né suraro witi lésaz u istana ni gubernur Pilatus. An tawahené péléng sé kasuraro néra i maréwoké witu. 17A ni Sia karaian nérala ung karai tonton monong, ni séra mayamla um poporongen um panga rintek menulah am wangunen, an iporong nérala wia ni Sia. 18Tumondong niitu, ni séra tanu a mahsigi' ni Sia, kuan néra, “Sigi' wangko', é Kolano né tou Yahudi!” 19Ni séra é mahwélwél un ulu ni Yesus karia am wéwélwél wo mahrura' wia ni Sia. A séra kumuruzla tanu a mahsigi' ni Sia. 20Kumawusa Sia im penéro-néro'an néra, am wuka nérala ung karai tonton monong kinarai-Na, ang karaian nérala sumaup ung karai-Na. A Sia iondol néramé i masalipen.

Si Yesus i sinalip

(Mat. 27:32-44; Luk. 23:26-43; Yoh. 19:17-27)

21 # Rm. 16:13 In toro niitu a lumangkoi si tou makangaran Simon, tou Kirene, ama' ni Aleksander wo ni Rufus, si witi wanua walina a méyé, taré mahuuntep witu um wanua tua'na. Ni sia én tinutu' nérala i masaan u salip ni Yesus. 22Ipahwali nérama si Yesus witi tampa makangaran Golgota, ung kalakoana: Tampa an Tengkora'. 23Im witu, sé suraro é niméhéla un anggor sinembor mur#15:23 U sezingna un tatanemen mur ém pahwangunen néra lana mahwou tariis. U mur kenu kasii ém pemamangunen néra undam., taan si Yesus é soo melep. 24#Mzm. 22:19 Tumondong niitu a si Yesus salipen nérala, am wéténgen nérala ung karai-Na karia i simawutla lot#15:24 Ung kinanaram in toro niitu ni séra limombo'ma um watu zua i mahtata'u séi si niméndo. in tumotoz um wéténg ni esa wo ni esa.

25Si Yesus é sinalip néra witu un jam kasiou im woondo. 26Ung kinawalian si Yesus i niukum é méipantik witu um papang u méipaku witu un atas un ulu-Na: “Kolano né tou Yahudi”.

27Ni séra kasii é simalipla karia-Na sé zua maremu', si esa ém witu ung kakan-Na wo si esa witu ung kawihi-Na. [28#Yes. 53:12 Karia in téntu, nimalekepola u méipantik witu um Pinantik Lenas, “Ni Sia é maikarékén wia sé tou léwo'.”]

29 # Mzm. 22:8, 109:25; Mrk. 14:58; Yoh. 2:19 Si Yesus ém pahséro'an né tou mahlangkoi witu. Ni séra é mahséro' wia ni Sia karia i mengusi-ngusingsing wo mahkua, “É Ko si kumemu um Walé ni Opo Empung, wo rumendai niitu sumaup witu un teluna endo. 30Tumumpamomé im witu u salip itii wo tulungela un tou-Mu!”

31Sé tonaas né walian wo sé tou tulap un Torat kangkasii é mahséro' wia ni Sia wo mahkua, “Sé tou walina én tinulung-Na, taan un tou-Na in esa én zéi'kan katulungan-Na! 32Sa ni Sia é Mesias, si Kolano né tou Israel si méitaaz ni Opo Empung, iwayamola Sia in tumumpamé witu u salip itii, wo kita toro milek wo ma'éman.” Sé zua sinalip karia-Na kangkasii é mahséro' wia ni Sia.

Si Yesus nimaté

(Mat. 27:45-56; Luk. 23:44-49; Yoh. 19:28-30)

33Péléng un tana' itii é nimarimbengbenga rengan witu un jam mapulu' wo zua i lolambot makaz witu un jam katelu im wengindo. 34#Mzm. 22:2 Wo witu un jam katelu im wengindo, si Yesus kuméréta totoz rimez, “Eloi, Eloi, lama sabakhtani?” Ung kalakoana, “Opo Empung-Ku, Opo Empung-Ku, kaa Aku méitula'u-Mu?”

35Kaitalingamé niitu, sé woopira tou rimendai witu é mahkua, “Talingané, ni Sia é mahtawah si Elia.” 36#Mzm. 69:22 Am wéwéhan si tou esa mereweka in timo'to'ma um wunga karang pahkuan spons witu un anggor esem an itundaknala witu un dondohan, a niitu iwéhénama witu um wiwih ni Yesus karia i mahkua, “Ento'enta wo ilekenta, sa si Elia é méyé i métumumpa ni Sia.”

37A si Yesus kuméréta totoz rimez, a Sia kalekepala.

38 # Kel. 26:31-33 In toro niitu, u roko' méiapé' witi tampa Totoz Lenas witi Walé ni Opo Empung é nimapahzuama witi atas makaz witi wawa'.

39I si tonaas né sana atus suraro si rimendai simaru u salip ni Yesus nimileka si Yesus ing kinalekepan én téntu u nimamuali, kuana, “Totoz ulit, si Tou kenu én Oki' ni Opo Empung!”

40 # Luk. 8:2-3 Im witu kangkasii ém wéwéhan sé woopira wéwéné sé mengile-ngileké witi zou'ma. Im wia ni séra é si Salome, si Maria tou Magdala wo si Maria ina' ni Yakobus si Tarétumou wo ni Yoses. 41Ni séra péléng é sé nimahkii-kiité wo nimahselewiré si Yesus im witipé' Galilea. Wo im witu kasii é lakez sé wéwéné walina sé niméyé witi Yerusalem nimahwalimé karia ni Yesus.

Si Yesus i méileweng

(Mat. 27:57-61; Luk. 23:50-56; Yoh. 19:38-42)

42In toro niitu é mahwengimoma wo un endo itii én endo mahsiwo-siwo i lumé'os un endo Sabat. 43Si Yusuf, si tou Arimatea, ni sia én esaané im wia sé sana réwok tou né Mahkamah Agama, si pahsigi-sigi'en wo kasii mengento-ngento' ung Kakolanoan ni Opo Empung. Ni sia nimapasuata i masimaru wia si Pilatus i mahaléi un awak ni Yesus i maileweng. 44Si Pilatus é mengompo' in timalingala i si Yesus é nimatémo. An tawahennamé si tonaas né sana atus suraro a lumigau sa ulit si Yesus nimatémo. 45In timalingamé u méiwingkotnamé, an énéala ni Pilatus si Yusuf i maméndo un awak ni Yesus i maileweng. 46Si Yusuf matumelesé u roko' lenan, an itumpanamé un awak ni Yesus im witu u salip, saputenala karia u roko' lenan itii. A maizeta'namé un awak ni Yesus witu u lelewengan u méikiar witu ung kentur watu. An isoro'namé um watu i malot u lelewengan itii. 47In toro niitu, si Maria tou Magdala wo si Maria ina' ni Yoses én totoz nima'uma u linewengan si Yesus.

Currently Selected:

Markus 15: LAITOM

Highlight

Copy