Lûqa 10

Hewtay Telebî Rê Wezîfe Deyeno

(Matta 9:37-38; Matta 10:7-16)

1Bahdo Rebbî telebandê xo ra hewtayna merdimî#10:1 Tayn yazidê kihanandê bînî zî vano: Hewtay û didi merdimî. weçînay ew wezîfe da înan. Hirg sûk û cayo ki O do bixo bişîyayê, Ey ê hewtay tenî ra didi didi verdê xo riştî ujaya. 2Îsay înan rê wuna va: “Mexel bol o, hima emeley taynî yê. Qandê coy wihêrdê mexeli Rebbî rê reca bikerê ki, wa mexeldê xo rê emeley birişo. 3Hadê, de şirê! Ezo şima zeydê kavirana rişena vergan mîyan. 4Xo di çîyê meberê, ne pêlekê perran, ne tewreyê nanî, ne zî postalî#10:4 Yazî: xamikî. xo di berê. Ray ra kesî rê silam medê ew mevinderê. 5Çimhal ki şima kewnê jew keyî mîyan, sifte vajê ‘Nê keyî sero wa silametey bo!’ 6Eki uja di merdimo ki silametey ra hes keno esto se, silameteya şima do ey sero bimano. Eki çinî yo se, silametey do fina ageyro şima ser. 7Keyeyo ki şima sifte şinê mîyan, uja di bimanê ew çiçî deyeno şima, ey bûrê û bişimê, çiki merdimo ki xeftîyayo qezencê xo keno heq. Keye bi keye megeyrê.

8“Çimhal ki şima yenê jû sûk ew ê şima qebul kenê, wexta çiçî anê şima ver, ey bûrê. 9Nêweşê ki a sûk d'ê, înan weş kerê ew merdiman rê vajê ‘Hukumdareya Ellay ameya şima ra nezdi!’ 10Hima eki şima yenê jû sûk ew uja di kes şima qebul nêkeno, wexta bivijyê teber ew kuçandê a sûk di wuna vajê 11‘Tozê sûkda şimayo ki lingandê maya mendo, ma yê ey zî çimandê şima vero roşanenê. Hima nay bizanê ki Hukumdareya Ellay ameya nezdi!’ 12Ezo şima rê vana: A roja ki Hukmê Ellay do bîro, halê a sûk do, haldê sûkda Sodomî ra deha bêter bo.

13“Wax bi to ro, Xorazîn! Wax bi to ro, Beytsayda!#10:13 Xorazîn û Beytsayda Celîle mîyan di, Îsay tede wahzî daybî. Hend kerematê ki şima di bî, eki nê kerematî Sûr û Sayda#10:13 Merdimê Sûrî ew Saydayî gawirî bî, çiki Ellayê înan putî bî. (Bewnîrê kitabdê Yeşaya'y di 23:1-16.) di bibîyayê se, merdimanê ujay do rewnayo tewbe bikerdayê, ê do çuwalî xo ra dayê, wel xo sere ro kerdayê. 14Qandê coy, Roja Hesabî di halê Sûrî ew êdê Saydayî do haldê şima ra rind bo! 15Ma ti, sûka Kefernahûm, ti vana qay ti do bigêrîyê azmîn? Ti do birşîyê hetanî cehnimî bin!

16“Kamo ki goştareya şima keno, o yo goştareya mi zî keno. Kamo ki şima qebul nêkeno, o yo mi zî qebul nêkeno. Kamo ki mi qebul nêkeno, Oyo ki ez rişta, o yo Ey zî qebul nêkeno.”

Hewtay Telebey Ageyray

17Hewtay telebey kêfa peyser ageyray ew Îsay rê va: “Rebbî, senî ki ma nameyê to dayê, rihê xirabî zî emirdê ma bin di bî.”

18Îsay înan rê va: “Mi dî ki Şeytan zeydê virsika azmîn ra kewt erd. 19Bewnîrê, mi hukum da şima ki şima marran û demaşkulana lingandê xo bin di pay kerê ew hukmê şima zî hukumdê dişmenî hemî sera bo ew qe çîyê do şima rê zirar nêdo. 20Hima kêf mekerê ki rihî yê goştareya şima kenê, hima kêf bikerê ki nameyê şima Ellay hetek di yazi bîyo!”

Sebebê Kêfdê Girdî

(Matta 11:25-27; Matta 13:16-17)

21A çeq di, Rihê Mibarekî Îsa kerd pirr ew Ey kêfa veynda Ellay: “Pîyê mi, Rebbîyê erdî û azmînî, to rê şukur bo, çiki to no çî merdimandê aqilan û zanayan ra nimit, hima êyê ki zeydê qeçkana teba nêzanê, to înan rê akerd. Xora meramê to zî no bi, Pîyê mi!

22“Pêrê mi heme hukum da destandê mi. Kes nêzano Laj kam o, Pî tenya zano. Ew kes nêzano Pî kam o, hima Laj tenya zano ew êyê ki Laj qayil o ki bizanê, ê zî zanê Pî kam o.”

23Bahdo ageyra telebandê xo, înan tenya rê wuna va: “Girweyê ki şima dî, çimê ki nînan vînenê, werrekê înan. 24Çiki ezo şima rê vana: Girweyê ki şima yê nika vînenê, bol pêxemberî ew bol hukumdarî qayilî bî nînan bivînê, hima înan nêdî. Qiseyê ki şima yê nika aşnawenê, ê qayilî bî nînan biaşnawê, hima înan nîyaşnawitî.”

Mesela Embiryandê Rindî

(Matta 22:34-40; Marqos 12:28-31)

25Jew Alîmê Kitaban qayil bi Îsay bicerbino, qandê coy ame Îsay hetek ew Ey ra çîyê pers kerd: “Mehlîmê mi, ez do se kera ki şira cinet ew hetan û hetan Ellaya pîya ba.”#10:25 Yazî: Mehlîmê mi, lazim o ez se kera ki emirê bêsoyinî mêras bigîra?

26Îsay ey rê va: “Mibarek Qanûn di senî yazi bîyo? To uja di çiçî wend?”

27Alîmê Kitaban wuna va: “Ti do Rebbî, Ellayê xo, heme zerrîda xoya û gandê xoya, heme hukum û aqildê xoya bisîn! Ew ti ki senî xo sînenê, embiryananê xo zî winî bisîn!”

28Îsay zî va: “Tî yê raşt vanê, wuna bik, ti do nêmirê.”

29Hima ey fina pers kerd ki bixo neheq nêbo ew naqor zî va: “Embiryanê mi kam o?”

30Wexta Îsay ey rê na mesel va: “Jew mêrdek Yeruşalîm ra şîyê cêr, hetê Erîhaya. Ray ra qaşqûnî ey tepêşenê, heme çîyê ci gênê, danê piro ew ey winî nîm-merg erdo veradanê, şinê. 31A çeq di zî jew kahîn a ray ra ravêreno, o nê mêrdekî erdo-kewte vîneno, hima o a kişta ray ra ravêreno, şino. 32Jewna mêrdek, ezbeta Lewî#10:32 Lewî: Camêrdê ki ezbetda Lewî ra bi, Keyedê Ellay di xizmet kerdê. ra reseno uja, o zî ey erdo vîneno ew zeydê ê bînîya ravêreno, şino. 33Naqor jewna a ray ra yeno, no jew Samerîyeyij o. Senî ki o nê mêrdekî erdo dirbetin vîneno, zerrîya ci ey veşena. 34No şino ey hetek, ruwen û şeraba saweno dirbetandê ci ew pêşeno. Bahdo ey nano herdê xo ser ew ey ano jew xan ew weyneno ey. 35Şefaqêrî Samerîyeyij di teney perreyê sêminî vejeno, dano wihêrdê xanî ew ey rê vano: ‘Rind bewnî ney! Eki nînan ra vêşî mesrefê to şino, wexto ki ez peyser ageyrena, dana to.’ ”

36Îsay pers kerd: “Tî yê se vanê? Nê hîrê raywanan ra kamcînî no mêrdeko ki qaşqûnan dest kewtbi, ey rê embiryaney kerd?”

37Alîmê Kitaban va: “Oyo ki ey rê rehim kerd ew qeyret kerd.”

Wexta Îsay ey rê va: “Eki winî yo, ti zî şo ew eynî winî bik!”

Îsa yo Keyedê Marta û Meyrem Di

38Wexto ki Îsa û telebandê xoya raywanî bî, amey jû dew. Uja di jû cenîyek, nameyê ci Marta bî, ew ay Îsa dahwet kerd keyedê xo. 39Jû waya nay zî, nameyê ci Meyrem bî, Meyrem lingandê Rebbî bin di roniştbî ew goştareya qisandê ey kerdê. 40Naqor Marta kewtbî teşqele ki nan hadre kero. Bahdo amê Îsay hetek ew Ey rê va: “Rebbî, qe tî yê teba nêvanê? Waya mina xizmet di mi tenya verdana, ay rê vaj ki, wa mi rê qeyret bikero.”

41Rebbî ay rê va: “Marta, Marta, tî ya qaxuyê bol çî gêna ew kewna teşqele. 42Halbik jew çî tenya lazim o, Meyrem xo rê rindê ci weçîna, ew o do ay ra nêgêryo.”

Currently Selected:

Lûqa 10: diq

Highlight

Copy