Ts'etta 17
17
Sunnat mugaavileyn işaarat vodun
1İbramıqa yüç'əle yüç'üd (99) sennang'a mang'us Rəbb gyagu uvhuyn:
– Gırgın əxəna Allah (El-Şadday) Zı vorna. Yizde yəqqı'n hohre, məttın yik'nana ixhe. 2Mugaavile Yizdeyiy yiğne yı'q'neeqa gyuvxhu, vake g'abıynbı geeb xəp qaa'as.
3İbram aq'vahiyna ç'iyelqa gizyaraççe. Allahee mang'uk'le eyhen:
4– Yizde suralyna mugaavile vakana haane: Ğu geedne milletbışda dek ixhes. 5Zı vake geedne milletbışda dek ha'asva, g'iyniyle yiğın do İbram (xərna dek) deş, İbrıhım (xəppananbışda dek) ixhes. 6Yiğna nasıl geeb xəp qaa'as. Vake milletbı g'ales. Yiğne nasılee paççaharıb vuxhesınbı. 7Zı vakayiy vale qihnane yiğne nasılıka gırgıne gahbışisda mugaavile haa'a. Zı ixhes, yiğnayiy vale qihnane yiğne nasılbışda Allah. 8Vasiy vale qiyğiyne nasılbışis gırgıne gahbışis ğu alycaxvana Kana'anna ölka huvu, manbışda Allah ixhes.
9Qiyğa Allahee İbrıhımık'le uvhuyn:
– Yiğne suraleb, ğunay vale qiyğiyne nasılbışe mugaavilee nəxüdiy eyhe, həməxüd he'e. 10Vakayiy vale qiyğiyne nasılbışika hav'uyne mugaavileyn işaarat in vod: Gırgın adamer sunnat hav'u vuxhes. 11Sunnatın ç'ürüx g'ats'ak'vne. Sunnat Yizdeyiy vuşde mugaavileyn işaarat ixhes. 12Vuşde xaa yedike ıxhanar, menne milletbışiker alişşunar adameeşina insan molyulle yiğ ıxhamee sunnat he'e. 13Yiğne xaa yedike vuxhaynbıb, menne milletbışike alivşuynbıb sunnat hidyav'u g'ılymaa'a. Sunnat vuşde tanalin Yizde gırgıne gahbışisda mugaavileyn işaarat ixhes. 14Sunnat hidi'ına adameeşina insan mugaavile havaakal hav'uva, milletne yı'q'nee mexhecen.
15Allahee İbrıhımık'le meed eyhen:
– Xhunaşşeyk'le Sarayva immeyhe. G'iyniyke şaqa məng'ı'n do Sarra (printsesa) ixhes. 16Zı məng'ı's xayir-düə hevles: məng'ı'ker vas dix heles. Qiyğa məng'ı's sayib xayir-düə hevles: mana milletbışda yed yixhes, milletbışin paççahar məng'ı'ne nasıleençe qığeepç'es.
17İbrıhım aq'vahiyna gizerçu, əqəna ha'u, culed-alqa uvhuyn:
– Vəş sennane insanıs uşax eyxheye? Yüç'əl sennane Sarraysse uxas əxəye?
18Qiyğa İbrıhımee Allahık'le eyhen:
– Hasre saccu I'smı'ı'l xheeyir Yiğne xayir-düəyka üç'ürra axhvecen!
19Allahemee uvhuyn:
– Sarree, yiğne xhunaşşee vas dix uxas, doyud I'saq' (əqəna) gixhxhe. Zı mugaavile mang'ukab, mang'ule qihniyne nasılıkab gırgıne gahbışis havaacesda. 20Ğu I'smı'ı'lil-alla uvhuyn Zak'le g'ayxhiyn. Mang'usub Zı xayir-düə hevles, mang'uke g'abıynbı geeb xəp qaa'as. Mang'uke yits'ıq'vəyre (12) paççah g'avaales. Zı mang'uke xədın millet ha'as. 21Mugaavilemee Zı qööne sen ine gahıl Sarree vas uxasde I'saq'ıka haa'as.
22Allahee man İbrıhımık'le uvhu ooqa ts'ıts'xha.
23Manecab yiğıl İbrıhımee cune xaabın gırgın adamer: dix I'smı'ı'l, cune xaa yedike vuxhayn gırgın nukarar, menne milletbışike alivşuynbıb sacigeeqa sav'u, Allahee cuk'le uvhuyn xhinne, sunnat hav'u. 24İbrıhım sunnat hı'iyng'a mang'uqa yüç'əle yüç'üd (99) senniy vod. 25I'smı'ı'l sunnat ha'ang'a, mang'uqa yits'ıxhebad (13) senniy vod. 26İbrıhımiy I'smı'ı'l sa yiğıl sunnat hav'u. 27Cuka sa yiğıl, cune xaabın gırgın adamer, menne milletbışike alivşuynbı, cune xaa yedike vuxhaynbı gırgınbı sunnat haa'anbı.
Currently Selected:
Ts'etta 17: YIQSUM
Highlight
Share
Copy
Want to have your highlights saved across all your devices? Sign up or sign in
