Yəhye 19
19
Pilatee I'sa çarmıxılqa qıkkeeva eyhe
1Manke Pilatee I'sa qıkkı, çümqüqqa heles ilekka. 2Eskeraaşed zazaake tac hı'ı, Mang'une vuk'lelqa giyxhe, paççahılqa xhineeyid, tanalqa ç'əran tanalinbı alya'a. 3Manbı I'saysqana qabı «Yahudeeşina Paççah, geer qa'ana!» uvhu Mang'une aq'vays ı'xiyxə ıxha.
4Pilat meer g'aqa qığeç'u, Yahudeeşik'le eyhen:
– Haane, zak'le Mang'ul taxsir idveykıva sayid şok'le g'acecenva, Mana zı şosqa g'aqa qığayhe.
5Mane gahıl I'sa vuk'lel zazaakene tacıka, tanalyne ç'ərane tanalinçika g'aqa qığeç'e. Pilatee manbışik'le eyhen:
– Mana İnsan haane!
6Kaahinaaşine ç'ak'ınbışik'le, g'aravulyçeeşik'le Mana g'acumee, «Çarmıxıqqa ts'ıts'e'e, çarmıxıqqa ts'ıts'e'eva!» ts'irbı ha'a.
Pilatee manbışik'le eyhen:
– Mana şucar çarmıxıqqa ts'ıts'e'e, zak'le Mang'ul taxsir g'ece deş.
7Yahudeeşine ç'ak'ınbışe mang'us alidghıniy qele:
– Şaqa sa q'aanun vob, mane q'aanunus sik'ı Mana qik'as ıkkan, Mang'vee Cuk'le Allahna Dix eyheva.
8Pilatık'le man g'ayxhımee, mana sık'ırar qəyq'ən giyğal. 9Meer mana cune sarayeeqa ikkeç'u, I'sayke qiyghanan:
– Ğu nençene vor?
I'see mançis alidghıniy qele deş. 10Pilatee Mang'uk'le eyhen:
– Zasne alidghıniy qidele? Vak'le ats'a dişde, Ğu g'aykkasır, çarmıxılqa ts'ıts'a'asır zasse əxə?
11I'see mang'us alidghıniy qele:
– Vas xəənçe huvu dexhaynxhiy, Zak vuççud vasse ha'as əxəs deşdiy. Mançil-allad Zı yiğne xılyaqa quvuyng'ulqa valeb geeb bınah gyooxha.
12Mançile qiyğar Pilatıs Mana g'aykkas ıkkiykan, Yahudeeşeme ts'irıka eyhen:
– Ğu Mana g'aykkee, ğu imperatorna hambaz deşurne. Şavaayiy cuk'le paççahva eyhe, imperatorılqa g'elil qıxhay eyxhe.
13Pilatık'le manva g'ayxhımee, I'sa g'aqa qıkkı, g'ayeyke hav'uyne yəqqə haakimne cigee giy'ar. (Mane yəqqı'k'le cühüt'yaaşine mizel Gabbatava eyhe ıxha.) 14Peesaxayle ögiylin man yiğ ülycümən yiğ ıxha. Yı'q'ı'hiyna gah vuxha. Pilatee Yahudeeşik'le «Vuşda Paççah haaneva!» eyhe. 15Manbışe ts'irbı ha'a, eyhen:
– De'eş, ak'an he'e, ak'an he'e! Mana çarmıxılqa ts'ıts'e'e!
Pilatee manbışike qiyghanan:
– Vuşda Paççahne çarmıxılqa ts'ıts'e'e?
Kaahinaaşine ç'ak'ınbışe alidghıniy qele:
– İmperatorule ğayrı şaqa paççah deşda!
16Manke Pilatee I'sa çarmıxılqa ts'ıts'e'eva manbışisqa qele.
Eskeraaşe I'sa aqqı, qıkkekkana. 17I'see çarmıx Vuceecad alyaat'u, Vuk'lena Bark'va eyhene cigeeqa ılqeç'e. (Cühüt'yaaşine mizel mane cigayk'le Golgotava eyhe.)
I'sa çarmıxılqa ts'ıts'a'a
18Maa'ar I'sayle ğayrı q'öyre insanır çarmıxılqa ts'ıts'a'ana. Manbışda sa I'sayne sağıl, manasar solul ıxha. I'sa Vuc manbışde yı'q'nee ıxha. 19Pilatee q'uval ooad «Yahudeeşina Paççah Nazaretğançena I'sava» ok'an hı'ı, çarmıxıl ooqa givaxana'a. 20I'sa çarmıxılqa ts'ıts'ıiyn ciga şaharıs k'ane ıxhayke, Yahudeeşine geebınbışe man otk'uniynbı qətq'ı'ynbı. Q'uval ooyud cühüt'yaaşine, latınne, yunanne mizyaaşil otk'un ıxha. 21Man g'acu, kaahinaaşine ç'ak'ınbışe Pilatık'le eyhen:
– «Yahudeeşina Paççah» deş, «Cuk'lecad Vucee Yahudeeşina paççahva, eyhenava» ok'ne.
22Pilatee alidghıniy qele:
– Zı ok'anasın otk'uniyn.
23I'sa çarmıxılqa ts'ıts'ıyne gahıl, Mang'un tanalinbı alyaat'u, yoq'ne eskerıs cone yı'q'nee qa'a. Sayid q'omançe k'anyaqqame iyxhuyn ciga deşin, sa bıkırne parçeykecad hı'iyn gurt ıxha. 24Manbışe sana-sang'uk'le eyhen:
– İn qit'dyaxxas, çöp k'eççes, şavus gitxhuy gexha.
Məxüd Muq'addasne Otk'unee otk'uniyn eyxhe:
«Yizın tanalinbı cos bit'al ha'as,
yizde tanalinçinemee çöp k'eççes».#19:24 İnəxüd Zaburee otk'un (21:19).
25I'sayne çarmıxne k'ane yed, yedina yiçu, Klopasna xhunaşşe Mayram, sayır Magdaleençena Mayram ulyobzur vuxha. 26I'sayk'le Cune yedine k'ane, Cus geer ıkkanna teleba g'acu, Mang'vee yedik'le eyhen:
– Yed, ina yiğna dix vor!
27Qiyğa telebayk'led eyhen:
– İna yiğna yed vor!
Mançile qiyğa telebee mana cune xaaqa qiykekka.
I'sayn qik'uy
28Qiyğa I'sayk'le, gırgın bıkırxha g'acu, eyhen:
– Xhyan ıkkan!
Məxüd Muq'addasne Otk'unee otk'uniyn eyxhe.
29Maa'ad ç'ürç'ümən çaxırnan g'ab ıxha. Eskeraaşine sang'vee ç'ürç'üməne çaxıreeqa gupk'a k'yooq'a. Qiyğa züfa eyhene alayne q'ı'şilqa gupk'a qı'xı', I'sayne ghalesqa qa'a. 30I'see ç'ürç'ümən çaxır ghalyaqa ıkkekkan. Qiyğa «Bıkırxhaynva» uvhu, vuk'ul g'a'abaççena, rı'hı'd qığeç'en.
31Ülcümən yiğ ıxha. Ögiyle Şabbat qööva Yahudeeşine ç'ak'ınbışe Pilatıke «Çarmıxılqa ts'ıts'av'uynbışin g'elin barkv'bı haq'var hı'ı#19:31 G'elin barkv'bı haq'var hı'ı: Mısayne Q'aanune givapxın gyapt'ıynbı verığ ky'ooçesse yivele g'avşes vukkanva otk'un. Çarmıxılqa ts'ıts'av'uynbımee mankecab habat'a vuxha deş. Manbışde sabaranbışin hapt'ıy xılece yiğbına ts'ıts'exhe ıxha. Manbı çarmıxıl xıleppışike givapxın vuxhayke, manbışisse avts'esınmeen nafas alişşes əxə ıxha deş. Mançil-allab manbı sık'ılbaxheeyib g'elilqa suğootsasniy vukkan. Givapxınne cigee g'elybı haq'var hı'iynbımee, g'elybışe uvqıdyaaqava, nafas haxıles dəxı' zaraba habat'a vuxha., qüvxüynbı çarmıxıle gyaaqqeva» eyhe. Manbışis qüvxüynbı Şabbatne yiğıl çarmıxıl avxu vukkan deşdiy. Mane ögiyle qööne Şabbatne yiğıl xədın bayram ıxha. 32Manke eskerar abı, I'sayka çarmıxılqa ts'ıts'av'uyne insanaaşin ts'etta sang'un, qiyğad mansang'un g'elybı haq'var ha'a. 33I'sayne k'anyaqa qeepxhayng'a, Mana qik'u g'acu. Mang'un g'elybı haq'var ha'a deş. 34Eskeraaşine sang'vee Mang'une ak'vaayk nizeyka q'əç' haa'a, mançe xhyaniy eb gyobatstse.
35Man g'acuyng'vee vucee şahaadat haa'a, şunad mançilqa inyam he'ecenva. Mang'una şahaadat hək'ena vob, mang'uk'le cuk'led vucee hək'en eyheva ats'an. 36Man gırgın Muq'addasne Otk'unee otk'uniyn xhinne, eyxhe: «Mang'una sacab bark'v havaaq'aras deş»#19:36 İnəxüd Mısa peyğambarne q'öd'esde kitabee otk'un (Qığ. 12:46). Maad Peesaxne bayramıs gyuvk'iyne urgne hək'ee otk'un. . 37Sa menne Otk'unee otk'un vod: «Manbışe mang'une tanak ciga ha'as, mang'uqa ilyaakas»#19:37 İnəxüd Zakariye peyğambarne kitabee (12:10)..
I'sayn k'eyxhiy
38Mançile qiyğa Arimateeğançena Yusuf Pilatısqa arı, I'sayn mayit qeqqa. Yusuf I'sayna teleba ıxha. Mana Yahudeeşine ç'ak'ınbışile qəyq'ənva, man şavuk'lecad eyhe ıxha deş. Pilatee I'sayn mayit alyaat'as Yusufusqa haysaran. Mang'veeyid I'sayn mayit arı, alyaat'an. 39Yusufukasana Nikodimır ıxhana, manar mısamecar I'saysqa xəmde arınaniy. Nikodimee xhebts'al (30) kilolqa ələən alikkıyn yugun evanan gətraniy aloye adayle. 40I'sayn mayit çarmıxıle gyaqqı, Yahudeeşine ədatbışis sik'ı, ətirbışika katanıke hı'iyne kafaneeqa hiyk'ar. 41I'sa çarmıxılqa ts'ıts'ıiyne cigee bağ ıxha. Mane bağeeyib mankilqamee vuşucar k'ideyxhına sa mağara vuxha. 42Ögiyle cühüt'yaaşin Şabbatın yiğ qööva, I'sayn mayit mane k'anene mağareeqa giyxhe.
Currently Selected:
Yəhye 19: YIQSUM
Highlight
Share
Copy
Want to have your highlights saved across all your devices? Sign up or sign in
